Foa ela masoda tadalu' a, fo matafali mai tuka Manetualain hihii-nanaun
13
Fai' ria, lahenda rafada Yesus rae, gubernor Pilatus naisa lahenda Yahudi hida reme Galilea mai, tepo' fo ara reni tutunu-hohotu' nai Uma Mamaso Yahudi Ina nai Yerusalem. 2 Yesus namanene leo' naa, boe ma nafada si nae, “Emi dale mara mae Manetualain namate lahenda Galilea sira, nana huu sala nara bau lena lahenda Galilea feke'? 3 Tuka Au sona sala ria! Tehuu kalu emi ta saledale-tu'etei mara meme sala-siko mara mai, sona emi malulutu' leo' sira boe. 4 Boe ma lahenda kasanahulu falu' fo ri' manara nai Siloam refa neu de nanete naisa si a, nana sira sala nara bau lena basa lahenda fo rai Yerusalem, do? 5 Tuka Au sona sala ria! Tehuu kalu emi ta saledale-tu'etei mara meme sala-siko mara mai, sona emi malulutu' leo' sira boe.”Ai huu' maboa taa', sama leo' Manetualain lahendan fo buna-boa' ta'a
6 Boe ma Yesus nafada dedea nasasama' esa nae, “Lahenda esa nanuu ai huu'a esa nai oka na dale'. Ana mai kokosen fo saka ai huu' ria boa na. Tehuu boa' bei ta'a. 7 Boe ma ana nafada mana noi oka' a nae, ‘Teu' telu ian, au mai kokosen fo saka ai huu' ia boa na, tehuu au ta hapu boa' esa boe'. De lo'o henin, huu fo ana naseseka nahenu mamana' a.’
8 Tehuu mana noi oka' a sipo' nae, ‘Papa boso' mamanasa'. Neme' naa fo teu' ia au fufu'a-aali ai huu' ia, ela nalole selu' dei. 9 Bate manafali' boe ma ana naboa, sona malole a. Tehuu kalu ta'a, sona dei lo'o henin.’”
Ramatua Yesus puli na ina koti'ai pukudou' a, la'e fai huhule-haradoi'
10 Lai' esa de Yesus nanori-nafada nai uma mamaso' dale', la'e lahenda Yahudi ra fai huhule-haradoin. 11 Nai naa ina' esa pukudou ni teu' sanahulu falu, huu fo nitu a tataon. Ana ta bisa napadei natetu. 12 Yesus nita ina' ria, boe ma Ana naloo naan, de nafada ni nae, “Mama! Besa' ia mama ka te'e ma aom so.” 13 Boe ma Yesus fua lima Na neu' ina' ria, no hatemata' ria boe koti'ai pukudou' na namaroo na aon tuti' a. Boe ma ana hule makasi, ma io-oa Manetualain.
14 Tehuu uma mamaso' ria malaka na namanasa, huu fo Yesus puli na lahenda la'e fai huhule-haradoi'. Ana nafada lahenda kadodou-ina' ara nae, “Nai mamaso' esa dale', fai nonoi-tatao' fai' nee. De malole lena' lahenda kamahedis ara saka lahenda fo puli si, sona ara mai la'e fai sira. Boso' mai la'e fai huhule-haradoi'!”b
15 Tehuu Yesus nataa ni nae, “Lahenda masarole-masarali' emin. Nai fai huhule-haradoi' boe emi moi nonoi', hete?! Huu fo emi po'i sapi mara ma keledei ra fo hani si, hete?! 16 Ina' ia, nana ba'i Abraham tititi-nonosin, sama leo' ita. Malaka nitu a heke naan teu' sanahulu falu ian so. Kalu Au po'i aan la'e fai huhule-haradoi' sona, sala do?”
17 Yesus musu-noo nara ramanene ra ria, boe ma ara mae'. Tehuu lahenda kadodou-ina' sira ramaho'o huu fo Ria nonoi-tatao malole nara.
Ramatua Yesus fee dedea nasasama' la'e-neu' ai deke lutu ana'
18 Boe ma Yesus dedea bali nae, “Au asasama' Manetualain lahenda nara sama leo' ubea'? 19 Masososa na sira noi baiana' asa, tehuu mate'e na boe ma dodou' asa. Sira mulai sama leo' ai deke lutu ana'. Lahenda sele ni nai oka-tine. De ana mori ma nambau-ina te dadi ai huu bau-ina'. Boe ma manupui' ara rarunu rai doo-ranan.”
Ramatua Yesus fee dedea nasasama' la'e-neu' ralu tetei'
20 Yesus dedea bali nae, “Au asasama' Manetualain lahenda nara no ubea' bali? 21 Ria sama leo' ralu tetei' fo ri' ina' ara ame rabua ni no uu' saku dua,c ela tao roti dodou'. Boe ma uu' mana ame' ria ae losa' bau' basa, huu no ralu tetei kabaiana' ria. Manetualain lahenda nara lelea-nonoren namaloa-namanaru leo' naa boe.”
Nusatetu-ikutema' a lelesu na loaana'
22 Basa boe ma Yesus mulai la'o leo kota Yerusalem neu. Ana tuli lala'o kota ma koro' ara, fo nanori-nafada lahenda ra. 23 Nai mamana' esa, lahenda esa natane Ni nae, “Papa Mesen! Noi lahenda baiana' a ri' hapu popo'i-tatata', do?”
24 Ana nataa nae, “Lelesu fo leo nusatetu-ikutema' a neu loaana' a. De mahehere ao mara fo bisa kodi mesi' naa. Huu fo lahenda dodou' soba nau maso' reu, tehuu ta bisa fa. 25 Kalu manuu uma' a, koe na lelesu a, neu' ko emi mapadei mahani' dea' fo dedelu lelesu a, ma maloo hule tutulu-fafali' mae, ‘Papa! Soi lelesu a dei!’
Tehuu neu' ko ana nataa nae, ‘Bea emi? Au ta alela' emi!’
26 Boe ma emi mae, ‘Hapun nai bea papa ta malela' ami? Ami biasa mia-minu mo papa. Papa boe manori-mafada ami nai eno-dala' ara.’
27 Neu' ko Ana nataa nae, ‘Bisinaa' a au afada, au ta alela' emi! Emi nana, lahenda mana tao tadalu'. Maheo' meme ia' mai!’d
28 Fai bea ma Manetualain naetu' basa lahenda ra dedea nara, emi boreu ma heku nisi mara. Huu fo emi mita ba'i Abraham, ba'i Isak, ba'i Yakob ma Manetualain mana nesi mata nara, basa si maso' rai nusatetu-ikutema' a. Tehuu emi sona nana usi heni' leo dea' meu.e 29 Neu' ko lahenda reme dae-bafo' a bukun haas mai, reme dulu ma muri mai; reme ii ma ona mai, ratuu' raa-rinu reu' esa nai Manetualain uma mane' Na.f 30 Tanda matalolole hihii-nanau' ia: kalu Manetualain naetu' basa lahenda a dedea na, neu' ko lahenda fo maulu na naendobuko ria lahenda aana', tehuu ana hapu hada-horomata bau-ina'. Ma lahenda fo maulu na naendobuko ria lahenda bau-ina', sekonaa te Manetualain tao ni neu' lahenda aana'.”g
Ramatua Yesus kasian neu' kota Yerusalem a lahenda nara
31 Fai ria, lahenda Farisi hida mai rasare ra Yesus, boe ma rafadan rae, “Malole lena', Papa Mesen maheo' doo' a leo mamana feke' muu, huu fo mane' Herodes a nau naisa Papa.”
32-33 Yesus nataa si nae, “Tou' ria hada-pariin sama leo' ue a! Emi meu mafadan mae, ‘Fai ia no balahaa', Au usi nitu, ma puli a lahenda kamahedis ara. Binesa', dei basa Au nonoi Ka.’ Tehuu Au muste oi-tao a selu' bai', fo dei leo Yerusalem uu. Huu fo nai Yerusalem nana mamana' fo ri' raisa Manetualain mana nesi matan.
34 Adoo, Yerusalem lahendan emin! Emi maisa Manetualain mana nesi mata nara, ma pia maisa lahenda nadedenu' fo ri' mai ratudu emi Manetualain eno-dalan. La'i-la'i Au anea-asala'e emi neme tadalu' a mai, sama leo' manu ina' a nasuru-nahapa' ana nara rai dila na dale'. Tehuu emi ta nau. 35 Besa' ia, Manetualain ta tao dale' neu' emi uma mamaso mara so'. De balahaa-binesa' te dadi lino-nees. Neu' ko emi ta mita Au, losa' emi manaku mae,
‘Manetualain fee ua-nale' neu' lahenda fo ri' mai neni Manetualain nade Na,
huu fo Manetualain ri' nadenu Ni!’”h