Ramatua Yesus fee dedea nasasama' la'e-neu' lahenda fo ta nau leo feta kakabi' a neu
22
Boe ma Yesus dedea no si pake dedea nasasama' bali nae, 2 “Manetualain hohomu pareta Na, sama leo' mane' esa kabi ana mane na. 3 Fai' fo sadia na feta a, boe ma nadenu ata nara reu rafada lahenda fo ara hapu naloo' a rae, ‘Mai leo, te feta saka' mulai.’ Tehuu lahenda sira ta nau mai.4 Ata sira fali mai si, boe ma rafada mane' a. Mane' a namanene leo' naa, boe ma nadenu ata feke nara nae, ‘Emi meu mafada lahenda ra, fo mai leo, te feta mana sadia' so. Au tati sapi, ma dode-nasu mina-malada so. Mafada si mai raa feta leo, huu fo basan mana sadia' so.’ 5 Ata sira reu rafada rae leo naa'. Tehuu lahenda fo hapu naloo' a, ara ta nau tao dale' neu. Ruma leo oka-tinen dale' reu, ruma leo mamana nonoi-tatao nara reu, 6 ma ruma hopu ra mane' a ata nara fo ese-rumu raisa si.
7 Mane' a namanene leo' naa, boe ma namanasa naan seli. De nadenu soldadu nara reu raisa lahenda fo ri' raisa ata nara. Boe ma soldadu ra hotu heni kota ria.
8 Basa de mane' a naloo na ata feke nara, nafada si nae, ‘Feta kakabi' a mana sadia' so, tehuu lahenda fo au aloo si a, ta naraa mai raa au feta ka. 9 Besa' ia, emi kalua leo eno rame a meu, mafada sudi bea fo maneta mo si rai naa a.’ 10 Ata sira leo eno rame a reu. Ara raneta ro lahenda dodou' rai naa, de roo si leo feta kakabi' a mai. Lahenda neulau' ma lahenda tadalu' ara mai ratuu rahenu mamana feta a.
11 Boe ma mane' a maso' leo mamana feta a neu, de memete nalelei' lahenda mana mai' sira. Ana nita esa ta pake kakao-papake feta.a 12 Mane' a natane ni nae, ‘Tia! Ubea' taon, de o maso' leo ia' mai ta pake kakao-papake feta fa?’ Tehuu lahenda ria noi namakokoa' a. 13 Mane' a pareta ata nara nae, ‘Puputu ma lahenda ia ei-liman, fo tu'un leo dea' neu. Neme' naa ela ana dola ma doidoso nai mamana maiu' ele dale'.’b
14 Leo' naa boe, Manetualain naloo lahenda dodou', tehuu Ana teka-here noi baiana' fo dadi reu' Ria lahendan.”
Ramatua Yesus dedea la'e-neu' bae doi-bea fee mana pareta
15 Lahenda Farisi ra ramanene Yesus dedea nae leo' naa, boe ma ara rala hara' fo nau rahihii' Ana. 16 De radenu sira ata nara sama-sama ro lahenda reme Herodes partei politik na mai, fo reu ratatane ao' ro Yesus. Ara io Ni rae, “Papa Mesen! Ami bubulu' Papa dale roo-tetu'. Papa ta mapuputa' ma ta mete mata' fa. Papa manori-mafada kokosen Manetualain Hara-dasin no matetu'. 17 Besa' ia ami nau matane hihii-nanau' esa. Tuka ita agama Yahudi, ami bole bae doi-bea fee mane bau-ina Roma, do ta'a?”
18 Tehuu Yesus bubulu' sira nau edi-fule Ni, ela Ana dedea nalena-laka neu' mana pareta Roma. Boe ma nataa nae, “Iku a lahenda dea-mata'! Ubea' taon, de emi nau mahihii' Au meni' natatane' ria? 19 Soba matudu Au doi lilo fula' fo ri' lahenda bae reni' doi-bea nara!” Ara ratudu Ni doi lilo fula' esa.
20 Ana natane si nae, “Ia nana bea gambar na? Ma bea naden ia?”
21 Ara rataa rae, “Ria nana mane bau-ina Roma.”
Boe ma Yesus nafada si nae, “Kalu leo' naa, sona emi fee mana pareta hata fo mana pareta haak na. Ma fee Manetualain hata fo Manetualain haak Na.”
22 Basa si ramanene Ni nataa nae leo' naa, boe ma ara heran, huu fo Ana nafada neu' matetu na. Huu ria naa, ara ta bisa rahihii' Ana. Boe ma ara la'o ela Ni.
Ramatua Yesus nanori-nafada la'e-neu' lahenda mana mate' a nasoda selu'; ma lahenda sao nai nusatetu-ikutema' a, do ta'a?
23 Lahenda reme partei Saduki rai naa boe. Lahenda ia ra ranori-rafada rae, lahenda mana mate' ara ta rasoda selu'. Fai ria, ara saka eno' boe, fo nau rahihii' Yesus. Huu ria naa, ara mai ratatane ao' ro Ni rae,c 24 “Papa Mesen! Ba'i Musa dui' ela ami hadas ia nae: kalu tou' esa mate ela sao na, tehuu ana' ta'a, sona tou' ria fadi na muste sao na ina-falu ria, ela boki fee a'a mana maten ria tititi-nonosi'.d 25 Tebe, fai a ulu na ba'i Musa nanori-nafada nae leo' naa, tehuu besa' ia ami saka' matane leo ia': tou' hitu toranoo' ara. Ulu' a sao, tehuu maten ma ana' ta'a. Boe ma fadi' mana tuka' ria a, sao na ina-falu ria. 26 Ta doo bea boe' te mate ni ma ana' ta'a. Leo' naa boe neu' fadi katelu a; sao na ina-falu ria, tehuu mate ni ma ana' ta'a boe. Leo-leo na losa' fadi mate'a tei-susu' a, boe mate ni. 27 Mate'e na ina-falu ria maten boe.
28 Besa' ia ami saka' matane leo ia': ina' ria parnaa sao tou' hitu. Kalu dae-bafo' a nonoe na, boe ma Manetualain fee lahenda mana mate' ara rasoda selu', sona ina' ria dadi neu' bea sao na?”
29 Yesus nataa si nae, “Kalu emi matane leo naa', sona emi sala ria so! Huu fo emi ta bubulu' Manetualain Susura Makamoi Na isi-liin. Ma emi ta bubulu' Ria kuasa marela-masa'a Na! 30 Matetu na, leo ia'. Kalu Manetualain fee lahenda mana mate' ara rasoda selu', sira boe ta sao so', sama leo' Ria eila'o-limalopen rai nusatetu-ikutema' a.
31 Ma Au boe saka' dedea la'e-neu' lahenda mana mate' ara rasoda selu', do ta'a. Nai ba'i Musa susura na, hapu tutui' ai huu ana' fo ai-pila' a naan, tehuu ta putun fa. Neme tutui' ria mai ita bubulu' tae, lahenda mana mate' a bisa nasoda selu'. Huu fo Manetualain nafada ba'i Musa nae,
32 ‘Au nana o ba'i mara Manetualain na.
Si' ba'i Abraham, ba'i Isak, ma ba'i Yakob.
Basa si do'o-tabe raroo Au losa' besa' ia.’
Ita bubulu' tae, tepo' fo Manetualain dedea leo naa', ba'i sira mate si doo' a so. Tehuu Manetualain nae Ria bei dadi neu' sira Ramatuan la'o naroo. Huu ria naa, ita bubulu', sira sumane nara rasoda raroo, leo mae mate si doo' a so. De leo mae lahenda mate, tehuu ana nasoda selu'. Huu fo noi lahenda masoda' a ri' do'o-tabe Manetualain, ta lahenda mana mate' a, hete?”e
33 Lahenda Saduki ra ramanene Yesus nanori-nafada leo naa', boe ma ara ta bisa balas hata-hata esa boe'. Tehuu lahenda kadodou' sira heran, ma beidea rae, “Lahenda ia nanori-nafadan talalu kahere'!”
Ramatua Yesus nanori-nafada la'e-neu' pareta fo penting naan seli
34 Lahenda Farisi ra ramanene rae, Yesus naseki lahenda Saduki ra, boe ma ara rame-rame rabua fo nau ratatane ao' ro Ni. 35 Sira lahenda malela agaman esa nahihii' soba Ni nae, 36 “Papa Mesen! Au saka' atane leo ia': ami atoran hadas, ma agama a pareta nara, dodou' naan seli. Neme basa ba'i Musa pareta nara, bea ri' penting naan seli?”
37 Ana nataa ni nae, “Nai Manetualain Susura Makamoi Na dale', pareta fo penting naan seli a, nae leo' ia:
‘Manetualain nana, emi Manetualain ma.
De emi muste sue-lai Ni lena heni basa-basan.
Huu ria naa, emi muste mahii' maroo Ni,
malela' Ana,
ma moi-tao mela-maku tuka Ria hihii-nanaun.’f
‘O muste sue-lai lahenda feke' ara, sama leo' o sue-lai ao-ina heheli ma.’g
40 Ba'i Musa atoran na, ma Manetualain mana nesi mata nara nanori-nafadan katema', huu naa ri' pareta kadua' ia ra. Lahenda ta bisa tuka pareta feke' ara, kalu ana ta tuka naulu' pareta bau-ina' ia ra dua.”h
Kristus nana, tebe mane' Daud tititi-nonosin, tehuu Ria boe mane' Daud Ramatua na
41 Fai' ria lahenda Farisi ra bei rabua nai naa, de Yesus natane natafali' asa nae, 42 “Neme fai a ulu na mai Manetualain helu mema', fee Kristus mai fo po'i-tata Ria lahenda nara. Tuka emi dudu'a-aafim, Kristus nana bea tititi-nonosin?”
Ara rataa rae, “Ria, nana mane' Daud tititi-nonosin.”
43 Yesus dedea selu' nae, “Kalu leo' naa sona ubea' taon, de Manetualain Dula-dale Malalao-malalafu Na nafada mane' Daud fo naloo Kristus nae, ‘Ramatua'’? Huu fo mane' Daud dui' nae,
44 ‘Manetualain nafada au Ramatua ka nae,
“Mai matuu' nai Au boboa ona Ka, nai mamana hada-horomata.
Neu' ko Au tao a musu-noo mara roi rae' o.’”i
45 Neme dudui' ria mai, ita bubulu' mane' Daud ri' naloo Kristus nae ‘Ramatua'’. De kalu lahenda rae Kristus nana, noi mane' Daud tititi-nonosin, sona bei ta dai! Huu fo Ria boe mane' Daud Ramatua na ri' nanuu haak pareta ni!”
46 Lahenda Farisi ra ramanene Yesus dedea nae leo' naa, boe ma roi ramakokoa' a, huu fo ta hapu lahenda esa bisa nataa Yesus boe'. De mulai neme fai' ria mai, ara bii' ratanen ma ta raparani rahihii' Ana so'.