3 Yesus nataa nae, “Au boe nau atane hihii-nanau' esa, basa dei Au ataa emi. 4 Leo ia': emi malela' Yohanis Mana Sarani' a, hete? Bea feen kuasa sarani lahenda? Manetualain do, lahenda dae-bafo'?”

5 Ara dedea-rao' reu-mai rae, “La'e ita ia so. Kalu ita tae, ‘Manetualain ri' nadenu’, neu' ko Ana balas nae, ‘Kalu leo' naa, sona ubea' taon de emi ta mamahere Yohanis?’ 6 Tehuu ita boe ta bisa tae, ‘lahenda dae-bafo' a ri' nadenu’, te neu' ko lahenda ia ra here batu fo pia raisa ita. Huu fo ara ramahere, Yohanis nana, Manetualain mana nesi matan.”

7 Boe ma ara rataa Yesus rae, “Ami ta bubulu'.”

8 Yesus balas asa nae, “Kalu leo' naa, sona Au boe ta afada ae bea nadenu Au.”

9 Boe ma Yesus tui lahenda kadodou-ina' sira, nasasama' esa bali nae, “Lahenda esa nanuu oka anggor. Ana seba oka' ria neu' mana noi ra, fo ara bati buna-boa' ro ni. Boe ma ana leo nusa dea neu de leo namanoso nai naa.^a 10 Losa fai eetu anggor, boe ma manuu oka' a nadenu atan esa neu nala ria nuu babati na neme mana noi ra. Tehuu mana noi ra popo'o ata ria, ma ara usi henin neu ni no lima rou'. 11 Basa de manuu oka' a nadenu atan esa neu bali. Tehuu mana noi oka' ara popo'o ni, ma ramamae' ana. Boe ma ara usi fali' ana no lima rou'. 12 Manuu oka' a nadenu selu' ata katelu a neu, tehuu ara popo'o raan hina-hina' mesan ma tu'u ni leo dea' neu.

13 Manuu oka' a aafi nae, ‘Au muste tao leo bea' bali? Malole lena' au adenu ana susue ka neu. Tantu ara hada' ana, ma sipo' ana no malole.’ De ana nadenu ana boki na leo naa' neu.

14 Tehuu mana noi ra rita ni, boe ma dedea-rao nara rae, ‘Emi mete dei! Tou lasi' a nadenu ana boki na mai. Neu' ko ria ri' sipo katema' tou lasi' a posaka nara. De mai fo ita taisa ni leo! Ela ita tanuu oka' ia.’ 15 Ana' ria bei losa, boe ma ara roso tatata' renin neme oka' dale' mai leo dea' neu, de raisa ni.

Au atane leo ia': tuka emi aafi ma, manuu oka' a tao mana noi sira leo' bea? 16 Tuka Au, tantu ana mai naisa laesa' asa, boe ma ana seba oka' ria leo lahenda feke' neu.”

Lahenda sira ramanene Yesus dedea nae leo' naa, boe ma ara bubulu' rae, Yesus dedea la'e-neu' sira mauli-malaka nara. De ara rataa rae, “Kalu bisa, sona Manetualain boso' fee ami huhuku' leo naa' a!”

17 Yesus mete nahere si, boe ma natane nae, “Kalu ta dadi fee huhuku leo naa', sona ubea' taon de Manetualain mana nesi mata nara dui' rae leo' ia:

18 Lahenda fo natundu batu ria, tantu sopu', huu fo ana hapu huhuku'. Ma kalu batu ria tuda la'e lahenda, ria boe nasosopu', huu fo hapu huhuku'.”

19 Mesen agama ra, ro malaka agama malaka nara ramanene tutui' ria, ara bubulu', Yesus dedea soa-neu' asa pake dedea nasasama' ria. Sira sama leo' mana noi oka' a, de ramanasa raan seli. Boe ma ara saka eno' fo nau hopu Ni. Tehuu ara lele lahenda kadodou-ina' fo ri' rahii' Yesus nanori-nafadan. De ara la'o elan mesa' Ana.

20 Boe ma Yesus musu-noo nara mama'u Ni. Ara saka mana lalafa fo bisa tao ao nara leo' lahenda neulau', ela rahihii' Yesus. Ara ramahehena' Yesus bisa dedea nalena-laka mana pareta Roma, fo reu kolaa' Ana nai gubernor, ela nadenu lahenda reu hopu Yesus. 21 De ara radenu mana lalafa ra reu ratatane ao' ro Yesus rae, “Papa Mesen! Ami bubulu' Papa dale roo-tetu'. Papa ta mapuputa', ma ta mete mata'. Papa manori-mafada Manetualain Hara-dasin no matetu'. 22 Besa' ia ami saka' matane hihii-nanau' esa: tuka ita atoran agama Yahudi, ita bole bae doi-bea fee mana pareta Roma mane' bau-ina na, do ta'a?”

23 Tehuu Yesus bubulu' sira maksud tadalu nara fo nau rahihii' Ana. Boe ma Ana nataa nae, 24 “Soba matudu Au doi lilo fula' esa dei.” Ara ratudu Ni doi' ria. Ana natane nae, “Ia nana, bea mata-idun? Ma bea naden ia?”

Ara rataa rae, “Ria nana mane' bau-ina keser.”

25 Yesus nae, “Kalu leo' naa, sona fee mana pareta hata fo mana pareta haak na. Ma fee Manetualain hata fo Manetualain haak Na.”

26 Ramanene leo' naa, boe ma ara heran, huu fo ara ta bisa rahihii' Ana nai lahenda dodou' matan. De roi nenee' a leo.

27 Boe ma lahenda hida reme partei agama Saduki a mai rahihii' Yesus. Lahenda Saduki ra ranori-rafada rae, dae-bafo' a nonoe na te lahenda mana mate' a ta nasoda selu' so'. Ara mai ratatane ao' ro Yesus rae,^c 28 “Papa Mesen! Ba'i Musa dui' ela ita atoran nae: kalu mate tou' a tehuu ana' ta'a, sona tou' ria fadi na muste sao na ina-falu ria, ela boki fee a'a mana mate na tititi-nonosi'.^d

29 Tebe fai a ulu na ba'i Musa nanori-nafada leo' naa. Tehuu besa' ia ami matane leo ia': tou' hitu toranoo' ara. Ulu' a sao, tehuu mate ni ma ana' ta'a. 30 Boe ma fadi mana tuka' ria a, sao na ina-falu ria. Ta doo bea boe' te mate ni, tehuu ana' ta'a. 31 Leo' naa boe ana katelu a. Ana sao na ina-falu ria, tehuu mate ni ma ana' ta'a boe. Leo-leo na losa' fadi mate'a tei-susu' a boe mate ni. 32 Mate'e na ina-falu ria maten boe. 33 Besa' ia ami saka' matane leo ia': ina' ria parnaa sao tou' hitu. Kalu dae-bafo' a nonoe na, boe ma Manetualain fee lahenda mana mate' ara rasoda selu', sona ina' ria dadi neu' bea sao na?”

34 Yesus nataa nae, “Lahenda sao noi nai dae-bafo' ia. 35-36 Tehuu neu' ko nai nusatetu-ikutema' a lahenda ta sao so'. Ma nai naa ara ta mate so'. Sira sama leo' Manetualain eila'o-limalopen nai nusatetu-ikutema'. Tepo' fo Manetualain fee lahenda mana mate' ara rasoda selu', Ana teka-here na si fo dadi Ria ana nara. 37 Nai ba'i Musa dudui na hapu tutui ai huu ana' fo ai-pila' a naa ni tehuu ta putun. Neme tutui' ria ita bubulu', lahenda mana mate' a bisa nasoda selu'. Nai naa Manetualain nafada ba'i Musa nae, ‘Au nana o ba'i mara Manetualain. Si' ba'i Abraham, ba'i Isak, ma ba'i Yakob. Basa si do'o-tabe raroo Au losa' besa' ia.’^e 38 Sekonaa te ba'i sira mate si rai fai a ulu na so. Tehuu no Manetualain nafada nae Ana bei dadi neu' sira Ramatua na, huu ria naa ita bubulu', ara rasoda. Huu fo noi lahenda masoda' a ri' do'o-tabe Manetualain, ta lahenda mana mate' a, hete?!”

39 Ramanene Yesus nataa nae leo' naa, boe ma mesen agama a dedea nae, “Papa Mesen nataan ria, la'e matetu'.” 40 Mulai neme fai ria, ta hapu lahenda esa naparani natane Yesus so', huu fo ara ta bisa rahihii' Ana.

41 Yesus bei nanori-nafada lahenda kadodou-ina' sira nai Uma Mamaso Yahudi Ina a. Ana natane natafali' asa nae, “Tuka emi dudu'a-aafim, sona leo bea'? Mesen agama ra ranori-rafada rae, Kristus nana Lahenda fo ri' Manetualain tudu mema' Ana neme fai a ulu na mai. Tuka sira, Ria nana noi mane' Daud tititi-nonosin. Tehuu ria bei ta dai fa. 42 Huu fo fai a ulu na mane' Daud ri' dui' aon nai susura Sosoda I'io-o'oa ara dale' nae,

44 Neme dudui' ria, ita bubulu' mane' Daud naloo Kristus nae, ‘Ramatua'’. Sosoa na nae, kalu lahenda nae Kristus nana noi mane' Daud tititi-nonosin, sona bei ta dai fa! Huu fo Ria boe mane' Daud a Ramatua na nanuu haak pareta ni!”

45 Fai fo basa lahenda ra pasa' ridoo nara ramanene Yesus, boe ma Ana dedea no ana mana tuka dea nara nae, 46 “Emi muste besa-besa mo mesen agama ra. Huu fo ara rahii' lala'o pake badu manaru fo roroso raroo' a, reu raneta ro lahenda dodou', ela lahenda rita si sona rae, ‘Sira lahenda bau-ina'!’ Ara rahii' saka mamana hada-horomata a nai uma mamaso' ara, nai feta-dote, ma nai mamana' fo ri' lahenda dodou' rabua. 47 Tehuu besa-besa, huu fo sira rapuputa' ina-falu ra, fo ralea ra uma nara. Tehuu nai lahenda dodou' matan, sona rafuni sira sala nara ma rapadei' hule-haradoi doo na seli. Ara nau lahenda rae, sira lahenda lalao-lalafu'. Tehuu Manetualain bubulu' sira sala nara, de neu' ko Ana fee si huhuku mabera ina.”