Ramatua Yesus asa leo Yerusalem reu, ma lahenda dodou' io-oa Ni, sama leo' lahenda bau-ina'
11
Fai fo ara ranenea' kota Yerusalem, ara losa koro' dua, si' Betfage no Betania, nai lete Saitun suu na.a Nai naa, Yesus asa bei rahani selu' bai'. Boe ma Ana nadenu ana mana tuka dean dua reu raulu'.
Markus 11:1-14
2 Ana helu si nae, “Emi dua maulu koro' ele meu. Emi meu, te neu' ko mita keledei ana' esa mana heke' nai naa. Bei ta parnaa lahenda sa'e ni. Emi sefi maan, fo hela menin leo ia' mai. 3 Tehuu kalu lahenda ratane emi rae, ‘Ubea' taon, de emi sefi meni keledei ria?’ Sona mataa mae, ‘Ami Ramatua ma nau paken. Kalu pake basa, sona neu' ko fee fali' ana.’”
4 Lahenda kadua' sira reu, te rita keledei ana' ria mana heke' nai uma esa mata na nai eno' a suun. De ara sefi renin. 5 Tehuu lahenda fo rapadei rai naa a ratane rae, “Ubea' taon de emi sefi meni lahenda keledei na?”
6 Boe ma rataa rae, “Ami Ramatua ma nau paken. Kalu pake basa sona, neu' ko ami meni fali' ana.” Lahenda sira rataa' asa fo hela reni keledei ria. 7 Ara hela renin leo Yesus neu. Boe ma ara bela lafa nara reu' keledei ria kotiain, de Yesus sa'e.
8 Fai ria ara saka' maso' leo kota dale' reu, boe ma lahenda dodou' hai ra lafa, lafa nasaa nara, de bela si reu' eno' a. Ruma reu beta reni palam doo'b nai eno suu' sira fo bela neu' eno' lain. No ria naa, ara tao tanda nae, ara sipo' Ramatua Yesus no hada-horomata. Sama leo' ara biasa sipo' lahenda bau-ina'. 9 Lahenda ruma raulu' Yesus resi' mata, ma ruma resi' dea'. Ara mulai he'i rae,
“Hosana! Ita io-oa Manetualain!c
Manetualain fee ua-nale' neu' lahenda fo mai pake nade Na,
huu fo Manetualain nadenu Ni!d
10 Hosana! Ita io-oa Manetualain!
Huu fo Manetualain nafoa fali' mane' Daud pareta na!
Hosana! Ita io-oa Manetualain!
Huu fo Manetualain natuu' pareta nai lalai madema naan seli!”
11 Losa kota dale', boe ma Yesus asa maso' leo Manetualain Uma Mamaso Yahudi Ina Na kintal na reu. Yesus rerelu nalelei' bai naa' ke. Tehuu no ledo-fai ta'a so, de ara fali selu' Betania reu.
Ramatua Yesus pareta ai huu' esa fo ana ta bisa naboa so'
12 Balahaa' balahaa anan, ara kalua reme Betania mai fali selu' leo kota Yerusalem reu. Tehuu nai eno talada', Yesus namalaa'. 13 Ana nita ai huu' esa nai eno' a suu na. Lahenda biasa raa boa na.e De Yesus nanenea' leo ai huu' ria neu, fo mete nanenin hapu boa' do ta'a. Tehuu Ana losa ai huu' ria, ta nita hata-hata esa boe'. Huu fo bei ta losa ai huu' ria fai naboa na. Besa' ko mulai nadoo beu. 14 Boe ma Yesus dedea fee ai huu' ria nae, “Huu no o boa' ta'a, de mulai neme' besa' ia mai, o ta bisa maboa soa-neu' lahenda feke' so'!”
Ana mana tuka dea nara ramanene Ni dedea hara bera' leo' naa.
Ramatua Yesus maso' leo Uma Mamaso Yahudi Ina a neu. Boe ma Ana fate heni pasar nai naa
15 Yesus asa la'o raroo, losa Yerusalem, boe ma Ana maso' leo Manetualain Uma Mamaso Yahudi Ina Na neu. Nai Uma Mamaso Yahudi a kintal na, lahenda ra taon dadi' pasar de ara rase'o manupui kalasi fo ri' lahenda paken tao tutunu-hohotu' soa-neu' huhule-haradoi'. Yesus nita leo' naa, boe ma usi heni si. Ana rua nabuu mei fo ri' ara pake si ela lahenda nusa dea mai tukar doi nara a, ma fae naleka-natono baku fo ara pake si ela se'o reni' manupui'.
Markus 11:15-33
16 Ana horo basa lahenda ra ta bole reni sira hata nara fo la'o tepa resi' uma ria kintal na. 17 Boe ma Ana nanori-nafada si nae, “Emi bubulu' mema' hata fo Manetualain mana nesi mata nara dui' rae, ‘Au afoa Uma Ki ia, ela lahenda reme' basa nusa' a mai hule-haradoi nai ia.’ Tehuu emi tao ma Uma ia dadi' parampok ara mamana nabua-naesan!”f
18 Malaka agama Yahudi a malaka nara ro mesen agama ra ramanene Yesus tao leo naa', boe ma ete' ao nara ro Ni. De ara mulai saka eno' fo raisa Ni. Tehuu ara lele, nana huu lahenda dodou' rahii' Ria nanori-nafadan.
19 Ledo a saka' tena, boe ma Yesus asa kalua reme kota Yerusalem mai, de ara fali reu suku nai koro Betania.
Kalu ita tamahere tebe-tebe Manetualain, neu' ko Ana fee hata fo ita hule a
20-21 Balahaa' balahaa anan, boe ma ara fali selu' Yerusalem reu. Nai eno talada', ara la'o resi' ai huu' fo ri' usele' a Yesus dedea fee ni a. Ana mana tuka dea nara heran, nana huu ai huu' ria maten, namatuu losa oka nara. Petrus nafarene Yesus dedea usele na. De ana nafada nae, “Papa! Mita'! Ai huu' fo ri' usele' a Papa feen kutuk a, maten so!”
22 Yesus nataa nae, “Mema' tebe! Sadi emi mamahere Manetualain. 23 Kalu emi mamahere tebe-tebe, emi bisa pareta lete' esa narali leo tasi a neu. Tantu Manetualain narali lete' ria, sadi boso emi mamahere no dale poo seseri'! Emi muste mamahere tebe-tebe Manetualain.g 24 Boso' mafarene henin! Sadi emi mamahere tebe-tebe mae, Manetualain bisa fee hata fo emi hule, tantu Ana fee. 25 Tehuu kalu emi hule-haradoi, sekonaa te bei mamanasa mo lahenda feke', sona emi muste malolole mo lahenda ria dei. Besa' ko emi Amam nai nusatetu-ikutema' a sae-safe heni sala-siko mara. 26 [Kalu emi mapeda dale', ma ta fee ampon neu' lahenda, tantu emi Amam nai nusatetu-ikutema' a boe fee ampon neu' emi sala-sikom.”]h i
Ara ratatane ao' Yesus haak Na
27 Boe ma ara la'o raroo. Losa Yerusalem, ara maso' selu' leo Manetualain Uma Mamaso Yahudi Ina Na reu. Fai ria ara maso' losa kintal a, boe ma malaka agama Yahudi malaka nara, mesen agama ra, lasi' Yahudi ra mai, 28 ratane Yesus rae, “Usele' a bea ri' nadenu o mai tao kaco nai ia? Bea ri' fee o haak?”
29 Tehuu Yesus bubulu' ara saka eno' fo rahihii' Ana. De Ana balas nae, “Au boe nau atane emi. Emi mataa Au dei, besa' ko Au ataa emi. 30 Au atane leo ia': emi basa malela' Yohanis Mana Sarani' a, hete? Bea ri' nadenu ni sarani lahenda? Manetualain do, lahenda dae-bafo' a?”
31 Ara afi reu-mai, ma dedea-rao' rae, “La'e selu' ita so! Kalu ita tataa tae, ‘Manetualain ri' nadenu’, neu' ko Ana balas nae, ‘Kalu leo' naa, sona ubea' taon de emi ta mamahere Yohanis!’ 32 Tehuu ita boe ta bisa tataa tae, ‘Lahenda dae-bafo' a ri' nadenu.’ Huu fo neu' ko basa lahenda ra ramanasa. Huu fo ara ramahere, Yohanis nana, Manetualain mana nesi matan.”
33 De ara rataa rae, “Ami ta bubulu'!”
Yesus balas asa nae, “Kalu leo' naa, sona Au boe ta nau afada ae, bea ri' nadenu Au.”