Ramatua Yesus maso' kota Yerusalem sama leo' Mane'
21
Yesus asa la'o raroo de losa rai koro' esa nade Betfage, nai lete Saitun suu na.a Koro' ria nanenea' kota Yerusalem. Ara hahae ao nara reu' naa. Boe ma Ana nadenu ana mana tuka dean dua reu raulu'. 2 Ana pareta si nae, “Emi dua leo koro' a ri' ele' meu. Emi meu, te neu' ko mita keledei ina' esa no ana na, mana heke' rai naa. Emi sefi maa si, fo hela meni si mai fee Au. 3 Tehuu kalu lahenda natane emi nae, ‘Ubea' taon, de emi hela meni lahenda keledei na?’ Sona mataa mae, ‘Ramatua' a nau paken. Kalu Ana pake basa, sona neu' ko fee fali' ana.’4 Basa ia ra muste dadi, tuka hata fo Manetualain mana nesi mata nara dui' mema' rae,
5 ‘Lahenda Yerusalem emin!b
Mai mete-relu nai ia dei!
Huu fo emi Mane ma mai.
Ana mai no dale naloe-nadae ao'.
Ana mai sa'e keledei ana'.’”c
6 Boe ma ana mana tuka dea sira reu, ma tao tuka basa-basan sama leo' Yesus helu si a. 7 Ara hela reni keledei ina' ria no ana na leo Yesus reu. Ara bela lafa nara reu' keledei ria kotiain, ela Yesus sa'e neu' lain fo leo kota dale' reu. 8 Ara saka' maso' kota dale', boe ma lahenda dodou' hai ra lafa, ma lafa nasaa nara bela si reu' eno' lain. Ruma reu beta reni palam doo'd fo bela neu' eno' lain. No ria naa, ara tao tanda nae, ara sipo' Ana sama leo' lahenda bau-ina'. 9 Lahenda ruma raulu' Yesus resi' mata, ma ruma resi' dea' boe. Ara he'i rame-rame rae,
“Hosana! Ami io-oa Manetualain!e
Nana huu Daud tititi-nonosin mai so!
Hosana! Ami io-oa Manetualain!
Nana huu Manetualain nadenu Lahenda ia mai.
Hosana! Ami io-oa Manetualain!
Nana huu Manetualain natuu' pareta mema' nai lalai poi na!”f
10 Fai ria Yesus maso' Yerusalem no rame-rame leo naa', boe ma basa kota isi' a kalua mai de ratane rae, “Bea ri' mai ia?”
11 Lahenda makadoto' sira rataa rae, “Ia nana, Manetualain mana nesi matan. Nade Yesus, lahenda Nasaret, neme propensi Galilea mai.”
Ramatua Yesus maso' leo Uma Mamaso Yahudi Ina a neu fo fate heni pasar nai naa
12 Yesus asa la'o raroo, de maso' leo Manetualain Uma Mamaso Yahudi Inan reu. Nai Uma Mamaso Yahudi a kintal na, lahenda ra taon dadi' pasar, de ara rase'o manupui kalasi fo ri' lahenda paken dadi tutunu-hohotu' soa-neu' huhule-haradoi'. Yesus nita leo' naa, boe ma neu usi heni si. Ana rua nabuu mei fo ri' ara pake si ela lahenda nusa dea mai tukar doi nara a, ma fae naleka-natono baku fo ara pake si ela se'o reni' manupui'. 13 Ana nafada si nae, “Manetualain mana nesi mata na dui' nae,
‘Au afoa Uma ia,
ela lahenda bisa mai hule-haradoi nai ia.’
Manetualain maksud Na leo naa', tehuu emi tao Uma ia dadi neu' parampok ara mamana nabua-naesan!”g
14 Boe ma lahenda poke' ma lahenda luku' ara leo Yesus mai nai Manetualain Uma Mamaso Yahudi Na. De Ana puli na katema' asa. 15 Malaka agama Yahudi malaka nara, ma mesen agama ra rai naa boe. Ara rita Yesus tao tanda heran leo naa', boe ma ete' ao nara. Lena-lena' bali, fai fo ramanene ana' sira bobou' rame-rame rai Uma Mamaso Yahudi a rae,
“Hosana! Ami io-oa Manetualain!
Nana huu mane' Daud tititi-nonosin mai so!”
16 Boe ma malaka sira rafada Yesus rae, “O mamanene ana' sira dedean? Ria ta la'e fa!”
Tehuu Yesus nataa si nae, “Au amanene. Te ubea' taon? Emi bei ta parnaa lees nai Manetualain Susura Makamoi Na la'e-neu' ana' ara io-oa Manetualain, do? Mana dui' nai naa nae,
‘Manetualain sadia mema' ana boki beu' ma ana aana' ara,
fo ara io-oa Ni.’”h
17 Boe ma Yesus asa kalua ela kota ria, de reu suku nai koro Betania.
Ramatua Yesus pareta ai huu' esa fo boso' naboa bali
18 Balahaa' balahaa anan, Yesus asa fali selu' leo kota Yerusalem reu. Tehuu nai eno talada', Ana namalaa. 19 Ana nita ai huu' esa nai eno' a suu na, lahenda biasa raa boa na.i De Ana nanenea' leo ai huu' ria neu, fo nau mete nanenin, hapu boa', do ta'a. Tehuu Ana losa ai huu' ria, Ana ta nita boa' esa boe', huu fo ai huu' ria besa' ko nadoo beu. Boe ma Ana dedea neu' ai huu' ria nae, “Huu no ta kalua boa ma fee Au, de neu' ko o ta maboa so'!” Ana dedea basa, boe ma ai huu' ria namatuu tuti' a.
20 Ria ana mana tuka dea nara rita leo naa', boe ma kekes ara. Ara ratane rae, “Ubea' taon, de kekeneu te, ai huu' ia namatuu tuti' a?”
21 Ana nataa si nae, “Nenene matalolole! Kalu emi mamahere tebe-tebe Manetualain, ma dale mara ta kadudua fa, emi bisa tao sama leo' Au tao a. Emi boe bisa tao lena ria bali. Conto leo-leo': emi bisa pareta lete' esa narali leo tasi' a neu. Tantu Manetualain fee lete' ria narali tuti' a, sadi emi mamahere tebe-tebe neu' Ana.j 22 Basa hihii-nanau' fo emi hule neu' Manetualain, neu' ko emi sipo si, sadi emi mamahere tebe-tebe neu' Ana.”
Malaka ra ratatane ao' la'e-neu' Ramatua Yesus haak Na
23 Yesus asa la'o raroo. Losa Yerusalem, ara maso' selu' leo Uma Mamaso Yahudi Ina a kintal na reu. Ana nanori-nafada la'e-neu' Manetualain eno masoda Na, boe ma malaka agama Yahudi malaka nara, ma lasi' ara mai ratatane ao' ro Ni rae, “Usele' a bea ri' nadenu o mai tao kaco nai ia? Bea ri' fee o haak ria?”
24 Tehuu Ana bubulu' ara saka eno' fo nau rahihii' Ana. De Ana balas nae, “Au boe nau atane emi. Emi mataa Au dei, besa' ko Au ataa emi. 25 Au atane leo ia': Emi basa malela' Yohanis mana sarani' a, hete? Bea ri' fee ni haak fo sarani lahenda? Manetualain do, lahenda dae-bafo' a?”
Ara afi reu-mai, ma ara dedea-rao' rae, “Ana nala selu' ita ia so! Kalu ita tataa tae, ‘Manetualain ri' fee haak’, neu' ko Ana balas nae, ‘Kalu leo' naa, sona ubea' taon de emi ta mamahere Yohanis?’ 26 Tehuu ita boe ta bisa tae, ‘Lahenda dae-bafo' a ri' fee haak’, neu' ko basa lahenda fo rai ia ramanasa' ita. Nana huu ara ramahere rae, Yohanis nana, Manetualain mana nesi matan.” 27 Huu ria naa, ara rataa Yesus rae, “Ami ta bubulu'.”
Boe ma Yesus balas nae, “Kalu leo' naa, sona Au boe ta parluu afada ae bea ri' fee Au haak.”
Ramatua Yesus fee dedea nasasama' la'e-neu' tou' esa no ana manen dua
28 Yesus dedea naroo no malaka sira nae, “Emi aafi ma leo bea' neu' dedea nasasama' ia? Tou' esa no ana manen dua. Ana pareta ana ulu' a nae, ‘Ana ki on! Fai' ia o muu moi nonoi' nai oka' dei.’
29 Ana' ria nataa nae, ‘Au ta uu fa.’ Tehuu basa boe ma ana nasaledale de neu.k
30 Boe ma tou' ria nadenu ana kadua a nae, ‘Ana ki on! Fai' ia o muu moi nonoi' nai oka' dei.’
Ana' ria nataa nae, ‘Malole a papa. Neu' ko au uu’. Sekonaa te ta neu fa.”
31 Yesus tui basa nae leo' naa, boe ma natane si nae, “Au saka' atane leo ia': Neme ana' sira dua mai, bea ri' tao tuka papa na paretan?”
Ara rataa rae, “Masososa' a!”
Ana dedea nae, “Hoo. Tehuu nenene matalolole, huu fo Au dedea tetea'. Lahenda fo emi mae sira lahenda masala-masiko', leo-leo' mana susu doi-bea, ma ina mana sosoa, neu' ko ara dadi reu' Manetualain lahendan raulu' reme emi mai. Huu fo emi mataa neu' Manetualain mae ya, tehuu ta tao tuka Ria hihii-nanaun fa. 32 Fai a ulu na Yohanis mana sarani' a nanori-nafada emi eno na leo bea', fo emi bisa masoda roo-tetu'. Tehuu emi ta nau mamahere ni. Sekonaa te, tepo' fo lahenda masala-masiko' ara ramanene Yohanis, sira saledale-tu'etei nara, de tuka ria nanori-nafadan. Emi bubulu' basa sira so boe. Tehuu emi ta nau saledale-tu'etei mara, fo tuka Manetualain hihii-nanaun.”l
Ramatua Yesus fee dedea nasasama' la'e-neu' lahenda tadalu' mana noi oka anggor
33 Boe ma Yesus tui selu' dedea nasasama' esa bali nae, “Manuu dae' esa nau sele ai anggor neu' ria daen bibia' esa. Ana heu kofeo' naan, ma tao bak fo ela hee oe anggor neu' dale'. Ma nafoa uma nanea dema' esa. Ana seba oka' ria fee mana noi ra, fo ara roin ela bati buna-boa' ro ni. Boe ma ana leo nusa dea a neu.m
34 Losa fai eetu boa anggor, boe ma manuu oka' a nadenu ata nara leo mana noi ra reu, fo hule ria nuu babati na. 35 Tehuu mana noi sira ta tao dale' neu' ata sira. Esa hapu fefepa-lili'u, feke' a raisa ni, ma feke' a bali roi pia' ana reni' batu. 36 Tehuu manuu oka' ria, nadenu selu' ata dodou' lena heni masososa' a. Tehuu mana noi sira tao tadalu leo naa' neu' basa si boe.
37 Mate'e na boe ma manuu oka' a nadenu ana boki na. Ana afi nae, ‘Kalu au fee ana boki ka neu, tantu ara sipo' no malole ma ramanene ni.’
38 Tehuu mana noi ra rita ana' ria, boe ma dedea-rao nara rae, ‘Emi mete dei! Tou lasi' a fee ana boki na mai. Neu' ko ria ri' sipo katema' tou lasi' a posaka nara. De mai fo taisa ni, fo ela ita tanuu oka' ia.’ 39 Boe ma ara hopu ra ana' ria tu'un leo oka' dea' neu de raisa ni.”
40 Yesus tui basa, boe ma Ana natane si nae, “Au nau atane leo ia': kalu manuu oka' ria fali main, sona ana tao mana noi sira leo' bea?”
41 Lahenda Yahudi malaka nara rataa rae, “Tantu ana naisa basa lahenda tadalu' sira. Basa te ana seba oka' ria neu' lahenda feke', ela naraa la'e ledo-fain, sona bati buna-boa'.”
42 Yesus dedea no si nae, “Bate emi bei ta parnaa lees hata fo mana dui' nai Manetualain Susura Makamoi Na nae,
‘Batu esa, tukan ara tu'u henin so,
tehuu besa' ia batu ria dadi neu' uma a batu bukun!
Manetualain ri' here batu ria, boe ma natende ni.
Huu ria naa, ita tita ni malole na seli'!’”n
43 Yesus dedea naroo nae, “De emi afi matalolole. Fai a ulu na, Manetualain teka-here ita lahenda Yahudi a, fo dadi teu' Ria lahendan. Tehuu no emi ta nau tao dale' neu' Au, de neu' ko Manetualain teka-here lahenda feke'. Lahenda bea nasoda tuka Ria hihii-nanaun, ria ri' bisa dadi neu' Manetualain lahendan. 44 [Au tui neu' tea na. Au ia, nana ri' batu buku' ria. Lahenda bea tuda la'e batu ia, neu' ko nalulutu'. Ma kalu batu ria tuda la'e lahenda, neu' ko lahenda ria nasosopu'.]”o
45 Malaka agama Yahudi malaka nara, ma lahenda Farisi ra ramanene Yesus tutui Na, boe ma ara bubulu' rae, Ana dedea la'e-neu' asa. Sira sama leo' mana noi ra, ma tukan batu fo tu'u heni batu buku' ria. 46 De ara ramanasa raan seli. Boe ma ara saka eno' fo nau hopu Ni. Tehuu ara bei lele lahenda kadodou', fo ri' rae Yesus nana Manetualain mana nesi matan. Huu ria naa, ara ta bisa tao Ni leo' bea boe'.