Lahenda dae-bafo' a atoran na boso' katin neu' Manetualain pareta Na
7
Lahenda Farisi bubua' esa, ma mesen agama hida reme Yerusalem mai raneta ro Yesus.
Markus 7:1-23
2-5 Lahenda Farisi ra hopu rahere sira hadas Yahudi na. Conto leo-leo' lahenda saka' raa-rinu, sona ara muste safe lima nara tuka sira hadas na. Leo' naa boe, kalu fali reme' pasar a mai, ara muste radiu oe dei. Losa' sira rou-raa' dapu nara, si' ure', bika', galaas, cerek, muste safe katema' asa tuka hadas a, besa' ko bole raa-rinu reni'.
Kalu lahenda Yahudi feke' fo ta tuka hadas ria, sona lahenda Farisi ra ramanasa.
Huu ria naa, fai fo rita Yesus ana mana tuka dea nara raa-rinu, ta safe lima nara tuka hadas a. Boe ma ara mai sale Yesus rae, “Ubea' taon de o ana mana tuka dea mara raa-rinu, tehuu ta safe raulu' lima nara fa? Ria nana ara ralena laka ita hadas na neme bei-ba'i a mai!”
6-7 Tehuu Yesus nataa nae, “Emi nana tebe lahenda fo dedea feke', tao feke'! Neme ulu' mai, ba'i Yesaya dui' na Manetualain hehelu Na nae,
‘Lahenda ia ra io-oa Au,
noi nai bafa-doo peda nara, tehuu dale' ta'a.
Ara tao leo naa' boe, mana dadi taa'.
Ara pake lahenda dae-bafo' a atoran na, dadi' leo atoran ria onda neme Au mai.
Sekonaa te Au ta tao atoran ria.’a
Emi leo' naa boe. 8-9 Emi foa ela Manetualain pareta Na, fo tuka lahenda dae-bafo' a hadas na. Mema' emi tao leo naa' sona malela mara seli!
10 Fai ulu na ba'i Musa nafada emi Manetualain pareta Na nae, ‘Fee hada-horomata neu' ina-ama mara.’ Ma nafada selu' bali nae, ‘Kalu lahenda esa do'i ina-ama nara, sona muste huku maisa ni.’b 11-12 Manetualain nanori-nafada leo' naa, tehuu emi manori-mafada feke'. Emi mae, ‘Kalu lahenda helu nau fee hata esa neu' Manetualain, sona leo mae ina-ama mara doidoso raan seli, tehuu ta bole pake hata sira fo tulu-fali si, huu fo emi helu basa nau fee Manetualain.’ 13 Huu ria naa bisinaa' a Au afada ae, emi tu'u heni Manetualain hihii-nanaun, de katin neni' atoran bebeu'. Hapu atoran dodou' emi kati si leo naa'.”
Dedea tadalu' kalua neme' lahenda dale na mai
14 Basa boe ma Yesus naloo na lahenda feke' manai naa ra de nae, “Pasa' ridoo mara, ela emi bubulu'. 15 Hata fo maso' leo lahenda tein dale' neu, ria ta tao nakekeo-nakakanu fa. Tehuu hata fo kalua dea' mai, ria ri' tao nakekeo-nakakanu. 16 [Bea nanuu ridoo', sona nenene natalolole!]”c
17 Boe ma Yesus no ana mana tuka dea nara la'o ela lahenda sira, de kodi leo uma esa dale' reu. Ana mana tuka dea nara ratane dedea nasasama' ria sosoa na. 18-19 Yesus nataa nae, “Emi ta bubulu', do? Ria maksud na leo ia': hata fo lahenda raa-rinun, nana malole a. Tehuu hata fo kalua mai, sona ta malole a. Hata fo ita taa-tinun, maso' leo ita tei na dale' neu, tehuu basa te kalua mai bali. (Ramatua Yesus maksud Na nae, lahenda bole naa-ninu sudi la'e ubea' a, ta horo fa.)
20 Tehuu hata fo kalua neme lahenda dale na mai, ria tao makekeo-makakanu' losa' Manetualain nahia' ana, ma ta nabua no ni. 21 Huu fo dedea tadalu' dodou' kalua neme lahenda dale na mai. Conto leo-leo': dudu'a-aafi tadalu', hohoke, na'o, kanisa', 22 tendetuu, sosoa-piao, tadalu', mapuputa', tuka hihii-nanau ao-paa', ete ao', namumulu-namamae', koao', manori taa', ma laka batu'.
23 Basa tadalu leo naa' a, kalua reme' lahenda dale na mai. Ria ri' tao nalutu ni. Manetualain boe nahia' ana.”
Ramatua Yesus tulu-fali ina' esa, ta lahenda Yahudi
24 Basa de Yesus foa ela mamana' ria, de leo kota esa neu nade Tirus. Losa naa, boe ma ara kodi leo uma esa dale' reu, huu fo Yesus ta nau lahenda bubulu' Ana nai naa. Tehuu ta nafuni nala ao Na.
Markus 7:24-37
25-26 Nai naa ina' esa, ta lahenda Yahudi. Boki ni nai nusa Fenisia, nai propensi Siria. Fai ria ana namanene Yesus mai, boe ma neu hule Yesus fo usi heni nitu neme' ana feto na mai.
27 Tehuu Yesus tu'u dedea' nae, “Ana' ara muste raa raulu' dei, besa' ko tu'u nanaa lena' sira fee busa a.” [Ma maksud na bei nafuni', Yesus muste tulu-fali naulu' Ria lahenda Yahudi nara dei, besa' ko lahenda feke'.]
28 Tehuu ina' ria balas nae, “Tebe, Papa! Tehuu busa ria nai mei a fiki dale na. Ria boe naa hata fo ri' tuda neme' ana' a bika na mai.” [Ma maksud na nae, fai fo ana' ara raa, busa a boe naa. Leo mae Yesus tulu-fali Ria lahenda nara, tehuu Ria boe muste tulu-fali lahenda feke'.]
29 Yesus namanene leo' naa, boe ma nafada nae, “Mama dedea la'e ria! De mama fali leo, huu fo nitu ria kalua neme ana feto ma mai so.”
30 Ina' ria fali neun. Losa uma te ana na suku namanee. Nitu ria mema' kalua so.
Ramatua Yesus puli na lahenda pake'-pakanaa' esa
31 Boe ma Yesus asa foa ela kota Tirus, ara la'o tuka tasi a suu na raroo kota Sidon. Reme naa' mai, ara la'o raroo losa dano Galilea. De ara leo nusa' esa no kota sanahulu, fo ri' rae, ‘Dekapolis’. 32 Nai naa, lahenda esa pake'-pakanaa'. Nonoo nara roon leo Yesus neu. Ara hule Yesus fua lima Na neu' ria laka na, fo puli naan. 33 Boe ma Yesus foa ela lahenda kadodou-ina' sira, de no noi lahenda ria mesa' asa. Yesus duku lima Na leo lahenda ria ridoon dua si dale' neu. Basa de Ana tao ape neu lima u'u Na, ma nafaroe lahenda ria maa na. 34 Yesus nakanaro leo lalai neu, Ana hela hahae Na, ma pareta nae, “Efata!” (Sosoa na nae, “Matahu'a leo!”)
35 Yesus nae leo' naa, boe ma lahenda ria ridoo na namanene tuti' a. Lahenda ria maa bara'aain na balanau tuti' a, de ana mulai dedea malole.
36 Boe ma dua si fali leo lahenda kadodou-ina' sira reu. Yesus horo si nae, “Nenene! Emi boso' tui lahenda mae, Au puli a lahenda ia.” Leo mae Yesus horo si, tehuu ara ratui ao nai basa mamana' ain. 37 Lahenda fo ramanene tutui' ria, ara heran raan seli. De ara beidea rae, “Talalu leo! Lahenda ia tao na basa-basan dadi malole. Lahenda pake' a namanene, ma lahenda pakanaa' a bisa dedea.”