Dedea nasasama' la'e-neu' mana noi oka anggor
20
Boe ma Yesus nanori-nafada nae, “Manetualain hohomu pareta na, sama leo' dedea nasasama' ia: lahenda manuu oka' esa li'u nee balahaan, ana kalua neu saka lahenda fo roi oka anggor na. 2 Ana hapu lahenda mana noi, boe ma ara dedea-rao' fo roi fai' esa, sona seseba na, doi lilo fula' esa, tuka seseba bale fai'.a Rala hara', boe ma ana nadenu si reu roi nonoi' nai ria oka na. 3 Li'u sio balahaan, boe ma ana kalua leo pasar neu, de nita lahenda hida ratuu kukua' rai naa. 4 Ana nafada si nae, ‘A'a kara emin! Emi nau moi nonoi' nai au oka ka, do? Neu' ko au bae emi no malole.’ Ara ramanene leo' naa boe ma rataa, de reu roi nonoi'. 5 Li'u sanahulu dua ledo hanan, ma li'u telu leodaen, manuu oka' a kalua neu saka lahenda mana noi bali. 6 Ledo leodaen, bate li'u lima, boe ma manuu oka' ria kalua bali. Ana mete neu-mai, te bei hapu lahenda rapadei hihii'. Ana natane si nae, ‘Ubea' taon, de emi mapadei hihii' meme' balahaa' a mai losa' leodaen ia, ma ta tao hata-hata esa boe'?’7 Lahenda sira rataa ni rae, ‘Papa! Ta hapu lahenda fee ami moi nonoi'.’
Boe ma manuu oka' a nae, ‘Kalu leo' naa, sona emi meu moi nonoi' nai au oka ka leo!’
8 Basa jam nonoi' a, boe ma manuu oka' a naloo mandor na de nae, ‘Maloo lahenda mana noi ra, fo au bae sira esa-esa seseba nara. Mulai neme lahenda fo mai nesi' bui', losa leo lahenda fo mai naulu' a.’b
9 Boe ma mandor naloo lahenda fo mulai roi reme li'u lima leodaen. Ana fee si esa na sipo doi lilo fula' esa. 10 Basa de mandor naloo lahenda mana noi feke' sira, losa leo lahenda fo roi nonoi' reme li'u nee balahaan. Lahenda fo roi reme balahaa anan ria mai a, afi rae tantu ara sipo desi lena neme lahenda fo roi mulai reme li'u lima leodaen. Sekonaa te, sira boe sipo doi lilo fula' bei esa'. 11 Ara sipo ra, boe ma ramumuu manuu oka' a rae, 12 ‘Bos, ta bisa leo ia' fa! Sira mai resi' bui', roi nonoi' noi jam esa' a. Ami moi nonoi' sota maan seli meme balahaa anan ria mai, losa' ami puse makeo' ara! Tehuu tao leo' bea, de bos bae ami sama leo' sira?’
13 Manuu oka' a nataa sira esa nae, ‘A'a! Au ta parnanake a'a fa. Huu fo a'a ri' sipo' mae moi nonoi' fai' esa, sona seba doi lilo fula' esa. Tebe, hete? De au bae tuka ita naeetu na, hete? 14 Malole lena' a'a sipo ma doi seseba ma fo fali leo. Kalu au fee lahenda fo mai nesi' bui' a desi au fee a'a, sona ria nana au urusan ka. 15 Au ae pake tao doi kara leo' bea boe tuka au hihii ka. Ubea' taon de a'a ete' ao ma, nana huu au dale malole ka?’
16 Leo' naa boe, tepo' fo Manetualain dadi Mane' soa-neu' lahenda ra, Ana balas lahenda nara tuka Ria hihii-nanaun. De lahenda fo mai nesi' bui', neu' ko ana sipo babati', sama leo' lahenda fo mai naulu'. Ma lahenda fo mai naulu', neu' ko ana sipo babati' sama leo' lahenda fo mai nesi' bui'.”c
Ramatua Yesus nafada kalai' telu na la'e-neu' Ria mamate Na
17 Boe ma Yesus asa leo Yerusalem reu. Nai eno talada', Ana naloo na ana mana tuka dea nara, de rabua ro noi mesa' Ana. Ana nafada bali nae, 18 “Emi nenene! Besa' ia ita saka' leo Yerusalem teu. Tehuu nai naa, lahenda se'o heni Au, Lahenda Dae-bafo' Tetea' ia, leo malaka agama Yahudi malaka nara ma mesen agama ra. Ara raetu' fo huku ramate Au. 19 Boe ma ara fee heni Au leo lahenda feke' fo ri' ta ralela' Manetualain. Ara ramumulu-ramamae' Au. Ma ara fepa-li'u ralulutu' Au ao-ina Ka, besa' ko ara raisa Au nai ai kake' a. Tetebes ara Au mate. Tehuu fai binesa na, te Au asoda selu'.”
Yakobis no Yohanis mama na hule fo so'u ana nara dadi lahenda bau-ina'
20 Boe ma Sabadeus sao na no ana nara Yakobis ma Yohanis, ara sama-sama leo Yesus reu. Boe ma ana sunda' undulaka na, fee hada-horomata ma do'odoe neu' Yesus.
21 Yesus natane ni nae, “Mama parluu ubea'?”
Ana nafada nae, “Leo ia' Papa! Au hule fo, kalu Papa matuu' homu pareta, sona Papa so'u ma au anak ia ra duas, fo ara homu pareta sama-sama ro Papa. Au hule fo Papa fee esa natuu' nai Papa boboa ona Ma, ma esa nai boboa ii Ma.”
22 Yesus namanene ria huhule na, boe ma nafada Yakobis ma Yohanis nae, “Emi ta bubulu' hata fo emi hule a. Huu fo neu' ko Au hapu doidoso dodou'. De leo' bea? Dodoo maan nana emi mabe'i lepa doidoso ria sama-sama mo Au, do?”
Dua si rataa ratalolole rae, “Papa, talalu bisa!”
23 Yesus nataa si bali nae, “Tebe, emi boe neu' ko lepa doidoso ria sama leo' Au. Tehuu neu' ko bea ri' natuu' nai Au boboa ona, ma boboa ii Ka, ta Au ri' aetu' fa. Manetualain ri' nanuu haak naetu' ria. Ana naetu' mema', bea ri' natuu' nai mamana' ria.”
24 Ana mana tuka dea kasanahulu feke' ara ramanene dua si hule rae leo' naa, boe ma ete' ao nara. 25 Tehuu Yesus naloo na basa si, de nae, “Leo ia'! Emi bubulu', hete? Lahenda bau-ina' fo ri' homu pareta biasa ese-ruma anaraun ara, losa' ta bisa boboti' ao nara. Ma malaka reme lahenda nusa' fo ri' ta ralela' Manetualain, ara fee pareta seli uuku' a, losa' sira anaraun nara ta bisa boti' laka nara. 26 Tehuu emi ta bole tao leo naa'! Neme emi mai bea nau dadi lahenda bau-ina', ana muste dadi sama leo' ata fo nalalau' lahenda feke'.d 27 Ma bea nau dadi malaka, ana muste tao aon sama leo' ata.e 28 Nenene! Au boe leo naa'. Au, Lahenda Dae-bafo' Tetea' ia, mai alalau' lahenda. Au ta mai fo lahenda ralalau' Au. Au mai fo fee katema' masoda Ka, ela soi-tefa lahenda dodou' reme sira sala-siko nara mai.”
Ramatua Yesus puli na lahenda poke' dua
29 Boe ma Yesus asa la'o raroo. Fai fo ara kalua reme kota Yeriko mai, lahenda dodou' tuka si. 30 Nai naa, lahenda poke' dua ratuu rai eno' a suu na. Ara ramanene rae, Yesus lahenda Nasaret ri' la'o nesi' ia, boe ma ara bobou' rambera rae, “Ramatua'! Daud tititi-nonosin! Ami mahani Ramatua' a doo' a so! Kasian neu' ami dei!”
31 Lahenda ra ramanenes bobou' leo' naa, boe ma rasa'ai si rae, “Emi boso' mahahara!”
Tehuu ara bobou' rambera-ina bali rae, “Ramatua'! Daud tititi-nonosin! Kasian neu' ami dei!”
32 Yesus namanene leo' naa, boe ma nate'e de natane si nae, “Emi nau Au tao ubea' soa-neu' emi?”
33 Ara rataa rae, “Ramatua'! Tulu-fali ami, ela bisa mita-dae dei!”
34 Ana namanene si dedea rae leo' naa, boe ma Ana kasian neu' asa. Ana nafaroe mata nara, boe ma rita-dae tuti' a. Basa de ara tuka Ni.