Feta kakabi' nai koro' Kana
2
Binesa' boe ma feta kakabi' nai koro' Kana, nai propensi Galilea. Yesus mama Na nai naa boe. 2 Yesus no ana mana tuka dea nara hapu naloo', de ara reu boe.3 Tehuu namanonoso boe ma anggor nai mamana feta a mulai basan. De Yesus mama Na nafada Ni nae, “Tulu-fali maa si dei! Huu fo sira anggor na basan so.”
4 Yesus nataa ni nae, “Mama. Ubea' taon, de mama ka nau Au ator? Bei ta losa ledo-fai na.”
5 Tehuu Yesus mama Na nafada lahenda malalau' ra nae, “Nenene! Ana nafada emi tao ubea', sona tao tukan.”
6 Lahenda ra sadia ra kusi nee rai naa. Kusi esa, sona sipo oe bate liter hitu hulu lima losa natun esa sanahulu lima. Lahenda Yahudi ra biasa pake oe neme kusi rupa leo naa' a, fo safe makamomoi ao-ina nara tuka sira atoran agama na. 7 Yesus nafada malalau' sira nae, “Meu lepa oe po'a neu' kusi ia ra.” Boe ma ara po'a rahenu kusi sira. 8 Basa de Ana nafada si nae, “Rui ma bai', meni fee malaka feta a.” Boe ma ara tao tukan. 9 Losa naa, de malaka feta a ninu soba oe ria. Ta bubulu' fa te, oe ria dadi anggor so! Ana noi namakokoa' a, huu fo ana ta bubulu' nae ara hapu anggor ria neme bea' mai. (Tehuu lahenda malalau sira bubulu'.)
Boe ma ana naloo na mana kabi tou' a. 10 Ana natane nae, “Leo ia'. Ita biasa na, mauma' a kalua naulu' anggor malada ina' a dei. Kalu lahenda rinu ra dodou', besa' ko ana kalua anggor malada a. Tehuu o tao tabale' ana. O kalua maulu' anggor malada a, basa besa' ko o kalua anggor malada ina' a!”
11 Hihii-nanau' ria dadi nai koro Kana, nai propensi Galilea. Ria nana lahenda ra rita Yesus tao tanda heran masososa' a. Ana natudu marela-masa'a Na leo' naa, de ana mana tuka dea nara ramahere Ni.
12 Boe ma Yesus, mama Na, fadi nara, ma ana mana tuka dea nara onda leo kota Kapernaum reu. Tehuu ara rai naa noi fai' hida' a.a
Ramatua Yesus usi heni lahenda reme Manetualain Uma Mamaso Yahudi Ina Na
13 Tepo' fo lahenda Yahudi ra fai malole Paska na nanenea', boe ma Yesus leo kota Yerusalem neu.b 14 Nai Uma Mamaso Yahudi Ina a kintal na, Yesus nita lahenda ra se'o sapi, bibi-lopo, ma manupui kalasi fo lahenda asa ela tao tutunu-hohotu'. Nai naa boe lahenda ratuu' ranea mei fo ri' ara pake si ela lahenda nusa dea mai tukar doi nara fo reni soa-neu' Manetualain nai Uma Mamaso Yahudi Ina a. 15 Ana puputu nabua tali ura' hida tao cambuk. Boe ma Ana usi heni basa si reme kintal ria mai. Ana usi heni sapi ra ro bibi-lopo ra. Ana fae naleka-natono mei ra, ma po'a kakari doi' ara. 16 Ana nadenu lahenda mana se'o manupui kalasi ra nae, “Kalua heni hata ia ra reme ia' mai! Mamana' pasar ta ia fa! Boso' tao Au Papa Ka Uma Na neu' mamana dagan!”
17 Boe ma Ria ana mana tuka dea nara rafarene mana dui' nai Manetualain Susura Makamoi Na nae,
“Au sue a Manetualain Uma Mamaso Yahudi Ina Na seli.
Huu ria naa, au akate anea uma ria nade malole na.”c
18 Lahenda Yahudi ra malaka nara radenu Yesus rae, “Kalu tebe o manuu haak usi lahenda leo' naa, sona matudu ami tanda heran esa fo dadi buti!”
19 Yesus nataa si nae, “Kalu emi tao malulutu' mamana lalao-lalafu' ia, neu' ko fai binesa na, te Au afoa aan selu'.”d
20 Tehuu ara radedea laka ro Ni rae, “Hapun nai bea? Lahenda tao Uma Mamaso Yahudi Ina ia losa teu' haa hulu nee. Ubea' taon de mae, O parluu noi fai' telu' a fo tao maan selu'?!”
21 Tehuu ara ta bubulu' Yesus dedea la'e-neu' ao-ina Na, sama leo' mamana lalao-lalafu' esa. 22 De nai fai mabui', fai fo Yesus nasoda selu' neme mamate Na mai, besa' ko Ria ana mana tuka dea nara rafarene hata fo Ana nafada si a. Boe ma ara ramahere hata fo mana dui' neme fai a ulu na mai, nai Manetualain Susura Makamoi Na, ma hata fo Yesus nafada si a.
Ramatua Yesus bubulu' basa lahenda ra dale nara
23 Yesus bei nahani nai Yerusalem fo tuka fai malole Paska nai naa. Lahenda dodou' ramahere Ni, nana huu ara rita tanda heran fo Ana tao a. 24-25 Tehuu Yesus ta namahere si, nana huu Ana bubulu' basa lahenda ra dale nara. Ana ta parluu lahenda rafada Ni, nana huu Ana bubulu' mema' lahenda dae-bafo' a leleo-lala'on.