Ramatua Yesus naneta no mana susu doi-bea esa, nade Sakeos
19
Boe ma Yesus asa la'o raroo, ara maso' tuka kota Yeriko. 2 Nai naa lahenda esa nade Sakeos. Ria malaka mana susu doi-bea fee mana pareta Roma. Ma ria lahenda kamasu'i. 3 Ana namanene Yesus saka' nesi' naa, boe ma ana nahii' nita Yesus. Tehuu ana ta bisa nita no matetu', huu fo lahenda dodou' eo ra Yesus, ma ria ao-ina na eetu ana' esan. 4 Huu ria naa ana nalai naulu', de ae neu' ai huu' esa lain nai eno' a suu na, fo ri' Yesus saka' nesi' naa.a5 Yesus losa ai ria huu na, boe ma Ana relu leo lain neu. Ana naloo Sakeos nae, “Sakeos! Onda leo! Malai' a, huu fo fai' ia Au nau tuli o uma ma.”
6 Sakeos heran. Boe ma ana onda lai-lai, de ana noo Yesus leo uma na neu. Dale na namaho'o naan seli. 7 Tehuu lahenda kadodou-ina' ara ramumuu rae, “Sakeos nana lahenda tadalu'! Ubea' taon Yesus tuli uma na?! Basa lahenda ra bubulu'!”
8 Losa uma, boe ma Sakeos foa napadei' nai Yesus mata Na, ma ana dedea nae, “Papa Mesen! Mulai neme fai' ia, au bati dua hata-heto kara katema', fee lahenda manato'a-manataa' ara babati' esa. Kalu au parnaa susu doi-bea ala lena', au fee fali' asa lai' haa.”
9 Yesus nataa nae, “Malole a. Fai' ia Manetualain po'i-tata na o mo kileo-boboki mara katema', huu fo o mamahere Manetualain sama leo' ba'i Abraham. 10 Huu fo Manetualain nadenu Au dadi Lahenda Dae-bafo' Tetea' nai dae-bafo' ia. Au mai saka lahenda fo sala-mopo neme Manetualain eno na mai, ela po'i-tata a si.”b
Tutui' la'e-neu' ata fo ator natalolole malaka na doi-talin
11 Fai ria lahenda dodou' ramanene Yesus. Ara ranenea' kota Yerusalem. Ma sira dale nara rae Ana leo Yerusalem neu, nana ela pareta sama leo' Mane' fo ri' Manetualain helu basa. Yesus tui fee si dedea nasasama' esa bali 12 nae, “Lahenda bau-ina' esa saka' leo nusa dea neu, fo ara feo lesu ni dadi mane'. Basa dei ana fali leo nusa na neu. 13 Fai fo ana nahehere aon saka' la'o, ana naloo na ata ni sanahulu, de fee si lahenda esa na doi lilo pilas esa.c Ana pareta nae, ‘Emi pake doi' ia ra dadi poko. Kalu au fali, emi mafada au emi hapu doi buna' hida.’ Boe ma ana la'o.
14 Tehuu lahenda nusa isi nara ete' ao nara roon. De ara radenu lahenda tuka reu rafada rae, ‘Ami ta mahii' lahenda ia dadi mane' fee ami.’
15 Leo mae leo' naa, tehuu ara feo lesu ni nai naa. Basa de ana fali. Losa uma, boe ma naloo na ata kasanahulu' sira, de natane si nae, ‘Emi hapu buna' hida neme doi lilo pilas fo ri' au fee emi a?’
16 Ata masososa' a nafada nae, ‘Papa mane'! Au hapu doi buna' lai' sanahulu, neme doi poko fo au sipo a!’
17 Mane' a nafada ni nae, ‘Malole a! O ia, ata malole. Huu no au bisa amahere o nai hihii-nanau' aana' ara, huu ria naa besa' ia au so'u o pareta kota sanahulu.’
18 Ata kadua a nafada nae, ‘Papa mane'! Au hapu buna' doi lilo pilas lima neme doi poko fo au sipo a.’
19 Mane' a io ni nae, ‘Malole a! Kalu leo' naa, sona au so'u o pareta kota lima.’
20 Tehuu ata katelu a neni fali' ria doi lilo pilas na. Ana nafada nae, ‘Papa, ia doi ma! Au poti aan, de afuni atalololen ela boso' mopon. 21 Au tao leo naa', huu fo au bii'. Au bubulu' papa nana lahenda ta namimina' fa. Nana huu papa mahii' hai hata fo ta papa nuu-enam, ma etu-oru hata fo ta papa sele-tande.’
22 Mane' a namanene leo' naa, boe ma nasapaa ni nae, ‘O manori taa'! O dedea-nafadam huku selu' ao-ina ma. O bubulu' au lahenda ta namimina', de hai hata fo au ta anuu ni, ma etu-oru hata fo au ta sele-tanden. 23 Kalu leo' naa, sona ubea' taon de o ta muu peda doi' ia neu' bank? Ela fai fo au fali, au bisa hapu buna na. Leo mae baiana' boe malole a.’
24 Mane' ria nadenu lahenda feke' fo rai naa nae, ‘Hai ma doin ria, feen leo ata fo ri' bisinaa' a hapu doi buna' lai' sanahulu.’
25 Tehuu ana nadedea laka nae, ‘Papa! Lahenda ria hapu naan dai so. Boso' boe fee tamba selu' ana bali.’
26 Tehuu mane' a nataa nae, ‘Dodoo matalolole! Kalu lahenda bea urus nalela' hata fo ria homu a, neu' ko ana hapu tamba selu'. Tehuu lahenda bea ao na mata' a urus, neu' ko hai fali' basa hata fo ana nanuu a.d 27 Besa' ia au musu-nook fo ta rahii' au dadi mane' fee si a, moo si leo ia' mai fo tati heni si mai' au mata ka.’”e
Ramatua Yesus maso' leo kota Yerusalem neu
28 Yesus tui basa, boe ma ara la'o raroo leo kota Yerusalem reu. Yesus la'o nesi' ulu'. 29 Fai ria ara ranenea' koro' dua, si' Betfage no Betania, nai lete Saitun suu na, boe ma Ana nadenu ana mana tuka dean dua reu raulu'. 30 Ana nadenu si nae, “Emi dua leo koro' fo nai mata ria meu. Neu' ko emi mita keledei ana' esa mana heke' nai naa. Lahenda bei ta parnaa sa'e ni. Emi dua sefi maan fo hela menin leo ia' mai. 31 Tehuu kalu lahenda ratane rae, ‘Ubea' taon de emi sefi heni keledei ria tali na?’ sona mafada si mae, ‘Ami Ramatua ma nau paken.’”
32 Boe ma dua si reu, te rita keledei ana' ria, sama leo' Yesus nafada si a. 33 Dua si bei sefi heni keledei ana' ria tali na, boe ma manuu' a natane si nae, “Ubea' taon emi sefi po'i keledei ia?”
34 Ara rataa rae, “Ami Ramatua ma noi paken.” 35 Manuu' a sipo' no malole, de dua si hela reni keledei ana' ria leo Yesus neu. Ara bela lafa nara reu' keledei ana' ria kotiai na. Ara rasasa'e Yesus neu' lain.f 36 Lahenda dodou' hai ra lafa nara, ma lafa nasaa nara, bela si reu' eno' lain, fo sipo' Yesus sama leo' sipo' lahenda bau-ina'. 37 Fai ria Ana mulai onda neme lete Saitun mai, boe ma lahenda kadodou-ina' sira ro Yesus ana mana tuka dea nara mulai he'i ma io-oa Manetualain, nana huu basa tanda kuasa fo rita ni a. 38 Ara he'i rae,
“Lahenda ia nana, Mane' fo ri' Manetualain nadenu Ni mai!
Manetualain fee Ni ua-nale'!
Besa' ia, lahenda dae-bafo' a bisa mole-dame ro Ramatua' a nai nusatetu-ikutema'.
Io-oa Ramatua' fo ri' natuu' pareta nai lalai madema naan seli.”g
39 Tehuu lahenda Farisi hida rai lahenda kadodou-ina' sira talada. Ara rafada Yesus rae, “Papa Mesen! Masa'ai si fo boso' he'i leo' naa, huu fo ia seli uuku' a!”
40 Tehuu Yesus nataa nae, “Au afada mema'! Kalu lahenda ia ra ta rahahara, sona batu ra io-oa Manetualain!”
Ramatua Yesus dola soa-neu' Yerusalem
41 Fai fo ara saka' maso' Yerusalem, Yesus nita kota ria, boe ma Ana dola 42 nae, “Adoo, lahenda Yerusalem, emin! Au nau fai' ia emi sipo mole-dame fo ri' Au uni a. Tehuu no emi ta tao dale' neu' Manetualain, besa' ia emi mababako', de mole-dame ria doo' a neme emi mai. 43 Neu' ko emi musu-noo mara po'a dae feo kota a tembok na, boe ma ara maso' reu suu emi. 44 Ara rarerefa' heni emi kota ma nabebela' no dae a, ma raisa katema' emi mo ana mara. Ara ta ela batu esa napadei boe', nana huu Manetualain mai nau po'i-tata na emi, tehuu emi ta malela' Ana!”
Ramatua Yesus maso' leo Uma Mamaso Yahudi Ina a neu
45 Yesus maso' leo Uma Mamaso Yahudi Ina a dale' neu. Nai uma ria kintal na, lahenda ra taon dadi' pasar fo rase'o banda tutunu-hohotu'. Yesus nita leo' naa, boe ma Ana usi heni si reme naa' mai. 46 Ana nasapaa nae, “Manetualain mana nesi mata nara dui' mema' rae,
‘Au afoa Uma ia,
ela basa lahenda ra bisa mai hule-haradoi nai ia.’h
Tehuu emi tao ni dadi neu' parampok ara mamana nabua-naesan.”