Manetualain nadenu Abraham tao Isak dadi tutunu-hohotu'
22
Ta doo bea boe', te Manetualain uji Abraham, ela mete nasudi ni namanene Manetualain, do ta'a. Manetualain naloo ni nae, “Abraham!”Abraham nataa nae, “Ia, Manetualain!”
2 Manetualain nadenu ni nae, “Nenene matalolole! Hai ma ana mane ise susue ma, moo ni leo dae Moria neu, fo taon dadi tutunu-hohotu' soa-neu' Au. Losa naa, besa' ko Au atudu o mamana na nai lete' esa.”
3 Balahaa' balahaa anan, boe ma Abraham tati ai natutu'. Ana puputu naa si, boe ma fua si reu' keledei lain. Ana no Isak ma ata ni dua, ara la'o leo mamana' fo ri' Manetualain nafada ni. 4 Ara roi la'o-la'o a, binesa' boe ma Abraham lalanda nita mamana' ria nai doo' a. 5 Ana nafada ata sira dua nae, “Emi dua ada' ia mo keledei ia! Au oo ana ka saka' leo lain ele' meu do'o-tabe Manetualain. Basa ria, besa' ko ami fali selu' leo ia' mai.”
6 Boe ma Abraham hai naa ai natutu' ela tunu-hotu neni' a, de fua si reu' Isak arun lain. Ria homu neni dope ma dede neni ai neu' ai suu' esa. Dua si la'o-la'o, 7 boe ma Isak naloo papa na nae, “Papa!”
Abraham nataa nae, “Ubea', Isak?”
Isak natane nae, “Papa. Ita saka' tao tutunu-hohotu'. Nai ia, ai natutu' ma papa dede muni ai neu' ai suu' esa ria. Tehuu bibi-lopo ana' fo ri' ita pake ni dadi tutunu-hohotu', nai bea?”
8 Abraham nataa nae, “Ana ki on! Neu' ko Manetualain ri' fee Ria bibi-lopo ana na fo pake ni dadi tutunu-hohotu'.”
Dua si ae raroo lete' lain reu. 9 Ara losa mamana' fo ri' Manetualain nafada, Abraham lutu batu tao mei tutunu-hohotu'. Ana hai naa ai natutu' ara, naduduru si reu' mei batu lain. Boe ma puputu naa ana na, de napeu' naleka ni neu' ai natutu' lain. 10 Basa de ana hai naa dope fo saka' pau ana na. 11 Tehuu kekeneu te, MANETUALAIN eila'o-limalopen nahara neme lalai mai nae, “Abraham! Mahani dei!”
Abraham nataa nae, “Ubea', Manetualain?”
12 Haraoe' ria nae, “O boso' maisa ana' ria! Boso' taon hata-hata esa boe! Besa' ia Au bubulu', tebe-tebe o tuka Manetualain hihii-nanaun, nana huu o sadia fee Manetualain ana mane ise ma dadi tutunu-hohotu'.”
13 Boe ma Abraham nita bibi-lopo mane' esa, susura na soro'ai nai ai huu ana' a rana nara. Abraham hela naa bibi-lopo ria, ana tao ni dadi tutunu-hohotu' soa-neu' Manetualain, kati ana na. 14 De Abraham hule mamana' ria nade, ‘Manetualain neu' ko sadia fee hata fo parluu.’a Huu ria naa, losa' besa' ia lahenda ra rae, “Nai MANETUALAIN leten lain, Ana sadia fee hata fo parluu.”
15 Boe ma Manetualain eila'o-limalopen nahara selu' neme lalai mai nae, 16 “MANETUALAIN nae, ‘Au soo-supa pake Au nade Ka leo ia': O sadia fee Au ana mane ise ma dadi tutunu-hohotu'. Huu ria naa, 17 Au fee ua-nale' dodou' neu' o mo tititi-nonosim. Neu' ko ara ramefu losa' ta hapu lahenda reke rala si, sama leo' ruu' ara rai lalai ma soroae' nai tasi' a suu na. Neu' ko upu-ana mara raseki musu nara. 18 Neme o tititi-nonosi mara, basa lahenda nusa' nai dae-bafo' a, hapu ua-nale' nana huu o tuka Au pareta Ka.’”
19 Boe ma Abraham no Isak onda fali mai si leo ata kadua sira, de ara sama-sama fali leo Beer Syeba reu. Abraham asa leo reu' naa.
Nahor tititi-nonosin
20 Lai' esa de, Abraham namanene rae, fadin Nahor saon Milka boki na ana nara. 21 Ana ulu' a nade Us. Fadi nara nade Bus, Kemuel (fo ri' Aram papa na), 22 Kesed, Haso, Pildas, Yidlaf ma Betuel. 23 Betuel nana, Ribka papa na. 24 Nahor hapu tamba ana' reme saon fo ri' ta nanuu haak, nade Reuma. Ria boki naa Teba, Gaham, Tahas ma Maaka.