2 Petrus
Petrus susura kadua na
Soda-mole'
1
Susura' ia neme au, Simon Petrus.a Au dadi Yesus Kristus atan. Au boe dadi Ria lahenda nadedenun, Ana nadenu au leo basa mamana' ain, ela tui-beka fee lahenda ra la'e-neu' Ana.Au dui' susura' ia fee emi fo ri' mamahere Yesus Kristus. Huu no Manetualain dale roo-tetu Na, de Ana soi eno' ela emi bisa mamahere Kristus, sama leo' ami. Namahere' ria beli' mesan soa-neu' ita basa. Kristus boe ita Manetualain na, ma Ria boe Lahenda fo po'i-tata na ita teme sala-siko' a mai.
2 Au hule fo emi bisa malela' matalolole Manetualain, ma malela' matalolole ita Ramatuan Yesus. Ela Ara ratudu Sira dale malolen neu' emi, ela emi bisa masoda no tetu-tema', mole-dame ma tesatei-tamadale'.
Ramatua' a teka-here lahenda nara, boe ma naloo si leo Ria mai
3 Yesus nanuu kuasa sama no Manetualain kuasa Na. Huu ria naa, Yesus fee ita basa hihii-nanau' fo ita parluu, ela tasoda roo-tetu' tuka Ramatua' a hihii-nanaun. Ana tao leo naa', nana huu ita talela' matetu' Ana. Ma Ana naloo ita dadi Ria lahendan, nana huu Ria malole a ma marela-masa'a naan seli. 4 Yesus fee ita katema' hihii-nanau' penting ara. Huu fo maulu na Ana helu nau fee basa sira reu' ita. Ria hehelu-barataa nara malole na seli. Ana fee katema' sira reu' ita, ela ita dale na bisa dadi sama leo' Ramatua' a dale Na. Ma ita boe bisa lui teme nonoi-tatao tadalu' fo lahenda nai dae-bafo' ia rahii' taon, nana huu sira tuka noi sira hihii-nanau mesa nara, ta pake hahae'.
5 Huu ria naa, au nau emi tebe-tebe sadia tao hihii-nanau' malole.
Emi mamahere Yesus, tehuu ria bei ta dai.
Moi-tao maroo hihii-nanau' malole.
Malela' Ramatua' a sona malole lena bali.
6 Tehuu boso' te'e ada' ria.
Emi manori masoda manenete mala ao mara.
Tehuu ria bei ta dai boe'.
Fai bea ma emi hapu susa sona emi muste manenete mahere, boso' heo'.
Tehuu tao lena neme ria mai bali.
Tao basa-basan tuka Ramatua' a hihii-nanaun.
7 Tehuu boso' te'e ada' ria.
Matudu susue-lalai' neu' ita toranoon lahenda kamahere'.
Tehuu ria bei ta dai.
Emi muste masue-malai ao maroo.
8 Kalu emi masoda leo naa' ma hihii-nanau' malole ra tamba raroo, sona ria tao na emi malela' matalolole ita Ramatuan Yesus Kristus. Hihii-nanau' malole ra, ta tu'u heni hihii' asa ma ta tutu'u ledo-fai. Huu fo hihii-nanau' malole ia ra, tao fee emi bubulu' matalolole Ni. 9 Kalu lahenda bea ta nau tao leo naa', sona ria dudu'a-aafin e'etu'. Ana sama leo' poke ni, de ta nita loo-dae. Ramatua' a sae-safe heni lahenda ria sala-sikon, de dale na bisa lalao-lalafu'. Tehuu lahenda ria nafarene henin!
10 Toranoo susue kara! Besa' ia emi muste tebe-tebe mahehere ao mara. Ramatua' a teka-here emi dadi Ria lahendan, boe ma emi leo Ria meu. Besa' ia, emi muste matudu mae, emi dadi Ria kileo-bobokin so. Kalu hihii-nanau' fo ri' bisinaa' a au afada, tamba raroo nai emi masoda ma, sona neu' ko emi ta tuda. 11 No ria naa, Manetualain fee emi hihii-nanau' kahere' esa fo ri' Ana soi eno' ma fee emi haak sipo' Yesus Kristus dadi emi Mane ma, ela emi masoda maroo mo Ni. Huu fo Ria nana ita Ramatua na. Ma Ria boe, Lahenda fo po'i-tata na ita teme sala-siko' a.
Ubea' taon de Petrus dui' leo naa'?
12 Emi bubulu' hihii-nanau' fo ri' bisinaa' a au afada ma emi manenete mahere, nana huu emi mamahere hata roo-tetu'. Leo mae leo' naa, tehuu au nau afarerene' asarerei fee emi hihii-nanau' ia, ela emi boso' mafarene henin. 13 Au ta ataa' emi mafarene henin. Au nau afarerene' fee emi ela afi maroo hihii-nanau' ia ra. Huu fo au bei asoda nai dae-bafo' ia, de naraa au afarerene' fee emi hihii-nanau' ia ra. 14 Ta doo' a so' te au mate. Ita Ramatuan Yesus Kristus nafada au nae leo' naa. Huu ria naa au bubulu' mema'. 15 Tehuu besa' ia au afarerene' aroo fee emi, ela leo mae au mate boe, emi mafarene maroo hihii-nanau' ia ra.
Ita tita Yesus marela-masa'a Na so
16 Maulu na au oo tia-lai kara tui-beka fee emi la'e-neu' ita Ramatuan Yesus Kristus. Ami boe tui mae, kalu Ana natafali mai, neu' ko mai no kuasa marela-masa'an. Tebe hete? Tehuu tutura' ta ria. Ami tui emi la'e-neu' noi hata fo ri' parnaa ami mita mata'! Huu ria naa, ami bubulu' Yesus nanuu kuasa, sama leo' mane' bau-ina' esa. 17-18 Lai' esa de, ami sama-sama mo Yesus nai Manetualain lete lalao-lalafu Na lain. Boe ma Ama' Manetualain nafada la'e-neu' Yesus marela-masa'a Na. Tepo' ria, ami mamanene haraoe malole ina' esa neme lalai mai nae,
“Ia nana, Au Ana susue Ka.
Ana tao na Au dale Ka namaho'o.”b
19 Dedea' ria tao na ita boe-boe tamahere, la'e-neu' basa hihii-nanau' fo ita sipo neme Ramatua' a mana nesi mata fai ulu nara. De malole lena' emi tao tuka sira hehelu na! Huu fo sira hehelu na, sama leo' dedede' esa pila na nahaa nai mamana maiu'. De emi muste mamania-mamanene sira hehelu na, losa' Yesus natafali mai. No ria naa, emi boe-boe bubulu' maroo. Ria sama leo' emi mita ruu dulupila' a dei, besa' ko ledo a tii mai nahaa-nakaledo soa-neu' basa-basan.
20 Mafarerene', te Manetualain mana nesi mata nara rafada mema' la'e-neu' hihii-nanau' dodou'. Tehuu sira hehelu na, ta tuka hihii-nanau mesa nara.c 21 Nana huu hata fo ri' ara dui', ta naoka-nasamu neme hata fo sira rahii' dedean. Tehuu ria naoka-nasamu nai Manetualain, tuka hata fo Ria Dula-dale Malalao-malalafu Na natudu si a.