Sara boki Isak fee Abraham
21
1-7 MANETUALAIN fee ua-nale' neu' Sara, tuka hehelu Na. Abraham namalasi, besa' ko Sara nairu. Fai fo ana boki a, Abraham teun natun esa. Natetu na Manetualain ledo-fain, boe ma Sara boki ana tou' esa. Abraham foi ana' ria nade, Isak (sosoa na nae, ‘ana hi'a’).Sara dedea nae, “Manetualain tao naa au hi'a, nana huu besa' ia au amaho'o. Lahenda ra afi rae, au ta bisa hapu ana' nai au fai lasi ka. Sekonaa te, leo mae au sao ka namalasi, tehuu au bei boki fee ni. De besa' ia, sudi bea ramanene hihii-nanau' ia, sira hi'a sama-sama ro au.”
Boki basa Isak fai' falu, boe ma Abraham sunat ana, tuka Manetualain pareta Na.
Hagar no Ismael hapu uusi'
8 Isak boe-boe nambau-ina. Fai fo saka' fila ni, Abraham tao feta bau-ina'.
9-10 Lai' esa de, Sara nita atan Hagar anan Ismael nasesebo' Isak. Sara nita leo' naa, boe ma ana dedea no Abraham nae, “Usi heni ata fo ri' neme Masir mai no ana na! Huu fo au ta nau ata a anan ria sipo posaka' esa boe'. Noi au ana ki Isak muste hapu katema' asa.”
11 Abraham namanene Sara dedea nae leo' naa, boe ma nameda naan ta malole so', nana huu Ismael boe, ria anan. 12 Tehuu Manetualain dedea no Abraham nae, “Abraham! O boso' afi leo ata ria no ana na. Tuka Sara hihii-nanaun, nana huu tititi-nonosi' fo ri' au helu, neu' ko o hapu neme Isak mai. 13 Tehuu Au fee ua-nale' neu' ata ria ana na, nana huu ria boe o ana bokim. Neu' ko ria tititi-nonosin dadi lahenda nusa' esa.”
14 Balahaa' balahaa anan, boe ma Abraham tao tua-lepa fee Hagar, ma feen nasalili neni oe neu' boto paa rou' esa dale', de nafuli heni ina' ria no anan Ismael. Dua si la'o rafeo nai dae rou' nanenea' Beer Syeba.a
15 Sira oe nininu na basan, boe ma Hagar foa ela ana na neu' ai huu ana' esa lao na. 16 Ana afi nai dale na nae, “Au ta anenete relu la'e ana' ia mamate na.” Boe ma ana oru' ela ana' a bate meter lima hulu, de natuu' ma dola nasae'edu.
17 Manetualain namanene Ismael haraoe dodola na, boe ma Ria eila'o-limalopen nai nusatetu-ikutema' naloo Hagar nae, “Hagar! Ubea' taon de o susa leo' ia? Boso' bii, huu fo Manetualain namanene ana' ria haraoe dodola na. 18 Foa fo muu dama ana' ria leo. Matetea dale na, neu' ko au tao a ria tititi-nonosin dadi lahenda nusa bau-ina' esa.”
19 Boe ma Manetualain tao nadila' Hagar mata na, de ana nita oe dodolu' esa nai naa. Ana neu dou oe neu' boto paa rou' ria dale', de naninu' ana na.
20-21 Ismael no mama na leo rahani' moo' soroae Paran. Ana nambau-ina, boe ma dadi mana ou kahere'. Mama na feen sao ina Masir esa. Basa ia ra dadi, nana huu Manetualain sama-sama no Ismael.
Abraham no Abimelek radame ao nai Beer Syeba
22 Tepo' ria, mane' Abimelek no ria malaka musu na, nade Fikol mai dama Abraham. Mane' a dedea nae, “Abraham! Ami bubulu', Manetualain sama-sama no o. Huu ria naa, o tao sudi ubea' a basan dadi. 23 Besa' ia au hule o soo-supa nai Manetualain mata Na mae, o ta edi-fule au oo upu-ana kara. Sama leo' au tao malole neu' o, sona o boe muste tao malole neu' au ma nusa' ia.”
24 Abraham nataa nae, “Ia! Au soo-supa.”
25 Tehuu Abraham tui mane' a nae, “Papa mane' lahenda mara ralea ra au oe dodolu ki esa.”
26 Mane' a namanene leo' naa, boe ma nataa nae, “Au besa' ko amanene hihii-nanau' ia. Ubea' taon de papa ta tui ri' maulu na? Au ta bubulu' bea ri' nonoi-tataon.”
27-28 Boe ma Abraham no Abimelek tao hehelu-barataa'. Abraham fee mane' a sapi ma bibi-lopo. Ma ana fee tamba selu' bibi-lopo tena' hitu. 29 Mane' a natane ni nae, “Ubea' taon de o tao leo ia'?”
30 Abraham nafada nae, “Papa mane' sipo ma bibi-lopo tena kahitu' ia ra dadi tanda nae, papa mane' manaku, au ri' ali oe dodolu' ia.”
31 Huu no dua si soo-supa reu' naa, de ara fee mamana' ria, nade Beer Syeba. Sosoa na nae, ‘Oe dodolu' Soo-supa'’.b
32 Ara soo-supa basa, boe ma mane' Abimelek no malaka musu na fali leo sira nusa Filistin na reu. 33 Boe ma Abraham sele ai tamareska huu' esac nai Beer Syeba. Mulai neme fai ria, ai huu' ria nafarerene' fee Abraham nae, nai naa ana do'o-tabe MANETUALAIN Masoda' Losa Doo Na Neu. 34 Abraham leo namanoso nai lahenda Filistin ara nusa na.