Sara maten ma Abraham natoi ni
23
1-2 Sara maten neu' teun natun esa dua hulu hitu. Tepo' fo mate ni a, Abraham asa leo rai koro Kiryat-Arba (ri' Hebron), nai dae Kana'an. Abraham dola-namatani ma ana mete.3 Boe ma Abraham neu dama lahenda Het ara. Ana dedea nae, 4 “Au manamai' nai emi basa talada. Au ta anuu dae fo atoi sao ka. Kalu emi nau, sona au asa a emi daem bibia ana' esa, ela atoi ni neu' naa.”
5 Ara rataa ni rae, 6 “Leo ia', papa! Doo-naru basa ia, ami tao papa sama leo' lahenda lasi' esa, de ami hada' ma papa seli. Papa here leo, dae bea ri' malole a naan seli, la'e papa hihii-nanaum. Ami sipo-sipo' mesan.”
7 Abraham namanene leo' naa, boe ma napadei' naloe aon fee hada-horomata neu' lahenda Het manuu dae' ara. 8 Ana nae, “Kalu emi sipo' au dedea bisinaa ka, sona au hule emi dedea mo papa Sohar ana manen Efron. 9 Hulen fo kalu bisa, sona ana se'o fee au ria lea na, nade Makpela, nai oka na suu na. Ana hule beli na bau bea boe, au bae. Au nau bae etu beli na nai emi basa matam, ela dae ria dadi au nuu-ena ki. Au nau taon dadi ami mamana roo-ratem.”
10 Fai ria, Efron natuu no lahenda Het ara nai naa. Ana namanene Abraham dedean ria, boe ma ana napadei, de nataa Abraham nai basa lasi' ara matan nae, 11 “Boso' tao leo naa', Papa! Leo ia' dei. Au fee hihii' oka' ria no lea' Makpela neu' papa. Papa matoi sao ma neu' naa. Au fee dae ria leo papa neu nai au lahenda kara matan. Ela sira basa sakasii!”
12 Boe ma Abraham naloe aon selu' neu' lahenda Het ara matan. 13 Ana dedea no Efron nae, “Leo' naa boe malole, tehuu emi basa nenene au dei. Au nau asa etu dae ria, fo atoi lahenda kara reu' naa.”
14-15 Efron nataa nae, “Dae ria beli na noi doi lilo fula' natun haa! Huu hata de ita dua taloloe teu-mai no doi kabaiana' sira? Papa muu matoi sao ma neu' naa leo.”
16 Abraham sipo' naa dae ria beli na tuka Efron nafadan. Ana reke naa doi lilo fula' natun haa fo bae Efron nai lahenda Het ara matan ela ara sakasii.
17-19 No ria naa Abraham hapu Efron dae na, dadi ria nuu-enan. Dae fo ri' nai Makpela, nanenea' no Mamre (ri' Hebron). Ana asa etu dae ria no oka-tinen, lea na ma ai huu' nara katema'. Basa lasi Het ara sakasii rae, dae ria no basa oe-isin, nana Abraham nuu-enan.