Lamatuak Yesus nadedenun nala Tutuin
Manetualain helu sangga nadenu Ndia Dula-dale Malalaon mai
1
1-3 Ama Teofilusa fo malole. Soda-molek neme au mai, Lukas.Nai au susula makahulung, au sulak memak basa-basan so, la'e-neu Lamatuak Yesus sodan. Fo ndia basa hata fo Ana taon so, ma basa hata fo Ndia fee nanonolik neme sososan mai so. Nae, Ana hele nala nadedenun nala so. Mae hataholi tao lakatoto'ak ma tao lisan so, tehuu Manetualain tao nasoda falik kana. Neu faik fo Ana nasoda fali, boe ma natudu aon neu nadedenun nala. Ala lita seluk kana taa-taa losa faik haa hulu, de ala bubuluk memak lae, Ana nasoda fali tebe-tebe so. Ndia boe oo nafada sala nae, Manetualain ndia, sama leo Manek mana to'u palenda. Ndia boe oo nadenu sala pake Manetualain Dula-dale Malalaon koasan. Losak Lamatuak Yesus hene fali neni nusa sodak neu.
Basa sila, ndia au sulak itak.
4-5 La'i esa, Yesus nakabubua no nadedenun nala leme lete Setun. Ana palenda sala nae,
“Masanenedak! Makahulun Yohanis salani hataholi kada pake oe, tehuu hatematak ia ei musi mahani faik hida bali, te Manetualain sangga tao tataok esa ana seli fee ei, huu Ana sangga fee Ndia Dula-dale Malalaon neu ei. De ei boso la'o ela kota Yerusalem ia dei. Tehuu ei mahani nai ia, losa Au Amang fee Ndia Dulan neu ei, sama leo Ndia helu nitak so. Ma Au boe oo afada ei leo ndiak so.”b
Lamatuak Yesus nana so'uk neni nusa sodak neu
6 Ledo-eik Yesus nakabubua no nadedenun nala, boe ma latanen lae, “Ama! Ai sangga matane leo iak: Ama masaneda lele uluk, neu faik fo nusa Israel palenda aon. Hatematak ia Ama sangga nakambo'ik ita, do ita musi tahani fai fe'ek bali?”
7 Boe ma Yesus nataa nae, “Ei ta paluu bubuluk ndia fain. Kada Au Amang ndia naena haak fo heti faik ndia. 8 Tehuu mete ma Manetualain Dula-dale Malalaon maso nai ei so, bei fo ei hambu koasa. Boe ma ei musi miu mafada basa hataholi la'e-neu Au. Mafada hataholi malai kota Yerusalem, ma nai basa nggolok malai propensi Yudea, ma propensi Samaria, losa dae-bafok bu'un nala.”c 9 Yesus kokolak basa leo ndiak, boe ma Ana nana so'uk neni lalai neu, nai sila matan. Ndia nana so'uk, losa ko'as mboti nalan, boe ma ala ta lita sana bali.d
10 Ledo-eik fo ala bei suli leni lain leu, kada nggengge neuk, hataholi dua lambadeik lai sila boboan so, ma pake balo'a fula malalaok. 11 Hataholi kaduak kala sila kokolak lae, “Wee! Hataholi Galelea la ei! Hatina de ei bei mamanggonggoak suli lalai miu? Isinaak ei mita no ei mata de'e hehelim, Yesus nana so'uk neni lalai neu, losa ko'as mboti nalan so. Ei mita Ndia nana so'uk leo beek, na dei fo Ana konda fali leo ndiak boe.”
Ala sangga hataholi fe'ek fo nggati Yudas
12 Basa boe ma Yesus nadedenun nala konda leme lete Setun mai, fo fali leni kota Yerusalem leu. Letek ndia doon neme kota mai, meda kilo esa.e
13 Losa kota, boe ma ala maso leni uma esa leu, fo ala leo tataak. De ala hene leni kama manai lain leu. Nadedenuk kala naden sila:
Petrus,
Yohanis,
Yakobis,
Anderias,
Filipus,
Tomas,
Bertolomeos,
Mateos,
Yakobis (Alpius anan),
Simon (hataholi paltei Selot),f
ma Yudas (Yakobis anan).g
14 Basa sala lateme lakabubua, fo hule-haladoi no dalek esa. Ala hule-haladoi sama-sama lo Yesus inan Maria, ina fe'ek hida, ma Yesus fadin nala boe.
15 Boe ma la'i esa lakabubua bali, meda hataholi natun esa dua hulu. Boe ma Petrus fo'a nambadeik, de kokolak nae, 16 “Basa ina-ama ma tolanoo nggala ei! Neu ko ei bei masaneda Yudas, fo makahulun no ndia hataholin nala leu humu Yesus. Basa hata fo Yudas taok ndia, memak musi leo ndiak so. Huu lele uluk Manetualain Dulan pake mane Dauk so, fo sulak la'e-neu Yudas leo ndiak. 17 Ndia ndia, makahulun ita hataholin. Ndia tao ues tungga no ita boe.”
18 (Tehuu neu faik fo Yudas se'o heni Yesus so, boe ma ana ha'i nala doi manggenggeok ndia, de neu hasa nala dae bibiak esa. Boe ma dae ndia dadik ndia mamana mamaten, huu ana tu'u natotonok neme ndia, losa tati ba'e tein, ma tei lutun nala lola deak mai. 19 Boe ma hataholi la mulai tui neme bafak mai neni bafak neu, losa basa hataholi mana leo lai kota Yerusalem lamanene Yudas mamaten ndia so. Huu ndia de ala foi dae ndia tungga sila dede'a Aram lae, ‘Hakeldama’ ndandaan nae ‘Dae Daak’.)h
20 Petrus kokolak nakandoo bali nae, “Lele uluk, mane Dauk sulak memak leo ndiak nai susula Koa-kiok kala so. Ana sulak nae,
‘Elan fo ndia mamana leleon, dadik nees;
ta bole hambu hataholi leo nai ndia bali.’
Boe ma ana sulak bali nae,
‘Elan fo ndia uen, ala feen neu hataholi fe'ek leo.’i
21-22 De ita musi sangga hataholi fo nggati Yudas. Ita paluu hataholi esa, fo ana tungga sama-sama no ita dook so. Hataholi ndia musi tungga deka-deka no Lamatuak Yesus sudi bee leu, mulai neme Yohanis salani Yesus. Ndia boe oo, musi nita no mata de'e hehelin nae, Lamatuak Yesus nasoda fali neme mamaten mai so, losa Ana hene fali neni nusa sodak neu.”j
23 Ledo-eik Petrus kokolak nate'e leo ndiak, boe ma hataholi mana makabubua tungga lai ndia, fee nadek dua. Esa nade Matias, ma esa bali nade Yusuf (fo ala lateme loke lae Barsabas, naden esa bali, ndia Yustus). 24-25 Boe ma ala hule-haladoi lae, “Amak manai nusa sodak! Ama bubuluk basa hataholi dalen. Yudas mate la'o ela uen so. De Ama matudu ai neme hataholi kaduak kala ia mai, see ndia Ama helen nggati Yudas, fo suek ai so'un dadik Lamatuak Yesus nadedenun.” 26 Boe ma ala le'a lot pake hataholi kaduak kala sila naden. De ala le'a la'e Matias. Huu ndia de ala so'uk kana dadik nadedenuk sama-sama no hataholi kasanahulu esak kala sila.