4 Basa boe ma nggubenol kalua la'i esa bali, de nafada hataholi no'uk kala nae, “Leo iak! Au ua Ndia deak mai, fo feen neu ei. Huu ei musi bubuluk, au palisak Ndia so, tehuu au ta hambu Ndia salan faa boe.” 5 Ledo-eik Yesus kalua, Ana pake solangga kanggouk ndia, ma badu manalu mbila balanggeok ndia. Boe ma nggubenol nafada hataholi no'uk kala sila nae, “Mita dei! Hataholi ia, ndindia so.”

6 Ledo-eik malangga anggama la malanggan nala, ma hataholi mana maneak kala lita Yesus, boe ma ala eki landaa-landaa lae, “Tao misa Ndia leo! Mbaku Ndia neu ai ngganggek!”

Tehuu nggubenol nafada sala nae, “Ela kada ei mesa nggei mia Ndia fo tao misan nai ai ngganggek. Tehuu au ta hambu Ndia salan faa boe, fo nandaa huku mate Ndia.”

7 Hataholi Yahudi la lataa lae, “Ai kaheti-heuk fo konda neme Manetualain mai. Tungga Heti-heuk ndia, hataholi ia musi mate, huu ana so'u aon dadik Manetualain Anan.”

8 Ledo-eik nggubenol namanene sila kokolan ndia, boe ma ana boe bii. 9 Basa de ana maso fali neni soldadu la kota musun neu, boe ma natane Yesus nae, “O ia, hataholi beek?” Tehuu Yesus ta nataan.

10 Boe ma nggubenol nasapalak Ndia nae, “Akeeh? Hatina de O ta makokola mua au? Neu ko O bubuluk so, hetu? Au ia, aena koasa fo tao isa O do, mbo'i heni O.”

11 Boe ma Yesus nataa nae, “Leo iak, ama. Mete ma ama maena koasa leo ndiak, na, ndia huu ama hambu koasa neme Manetualain nai nusa sodak. Huu kada Ndia mesak kana fee haak neu ama, fo tao sudi hata neu Au. Tehuu hataholi fo mana fee Au uu ama, sila ndia lemba salak belak lena heni ama.”

12 Mulai neme ala kokolak leo ndiak, nggubenol nasanggak dalak fo mbo'i Yesus. Tehuu hataholi Yahudi la eki landaa lae, “Huu Hataholi ndia so'uk aon dadik manek, fo laban Keser. De mete ma ama mbo'i Hataholi ia, na, manggaledok so, ama ta Keser nonoon.”

13 De ledo-eik nggubenol namanene sila kokolan nala leo ndiak, boe ma ana kalua heni Yesus. Boe ma ana nanggatuuk neu mana maketu dede'ak kadelan, nai mamanak esa fo ala foin nade, “Mook nana taok neme Batu Bebelak mai”. (Nai dede'a Aram naden nae, Gabata.)

14 Faik ndia, Fai Sadia Feta Paska. Meda ledo namatetu, boe ma nggubenol nafada hataholi Yahudi la nae, “Mita leo! Ndia ia, ei manem!”

15 Tehuu ala eki latingga lae, “Mian deak mai! Tao misan leo! Mbaku Ndia neu ai ngganggek!”

Boe ma nggubenol dudunggu sala nae, “De leo bee? Ei hihiim, na au musi tao isa ei manem ia, do?”

Boe ma malangga anggama la malanggan nala lataa lae, “Ai manen kada esak, fo ndia mane ina-huuk Keser! Ta hambu fe'ek so bali!” 16a Basa boe ma nggubenol fee Yesus neu soldadu la, fo ala leu mbaku lisa Ndia nai ai ngganggek.

16b Basa de soldadu la sila simbo lala Yesus. 17 Boe ma Ana lu'a nala Ndia ai ngganggen neni kota deak neu. Ala leni mamanak esa leu lae, “Mamana Langga Duik”. (Nai sila dede'a Aram, mamanak ndia nade, Golgotaa.)

18 Losa ndia, boe ma ala mbaku Yesus neu ai ngganggek esa. Ala tao leo ndiak neu hataholi fe'ek dua boe. Ala mbaku londa esa neu Yesus boboa konan, ma esa bali neu Ndia boboa kiin, ma Yesus nai sila laladan. 19 De nggubenol nadenu ndia soldadun nala sulak neu papak esa, boe ma mbakun neu Yesus langgan mboin. Nai papak ndia ala sulak lae,

20 Ala sulak nai papak ndia pake dede'ak telu. Fo ndia: dede'a Aram, dede'a Yunani, ma dede'a Latin. Hataholi Yahudi no'uk kala lees papak ndia, huu Yesus mamana mamaten ndia, dekak no kota Yerusalem. 21 Tehuu malangga anggama Yahudi la malanggan nala ta simbok. De leu lafada nggubenol lae, “Ama! Boso sulak, ‘hataholi Yahudi la Manen’! Malolenak sulak mae, ‘Hataholi ia nae, ndia ndia, hataholi Yahudi la manen.”’

22 Tehuu nggubenol nataa nae, “Au adenu sala sulak leo ndiak. De elan leo ndiak leo!”

23 Ledo-eik soldadu la mbaku londa Yesus neu ai ngganggek, boe ma ala baba'e Ndia balo'an fo taon neu mamanak haa. Baba'ek esa, na feen neu soldadu esa. Boe ma ala ha'i lala Ndia badu dean, fo nana tenu katemak neme lain mai losa dae neu, fo ta nana seuk. 24 Basa de ala lakokola lae, “Wei! Boso ita sii heni Ndia badun ia. Malolenak, kada ita hela lot leo, fo sangga bubuluk see ndia hambun.” Ndia taon ana dadik tungga hata fo nana sulak nai Manetualain Susula Malalaon nae,

Basa de soldadu la tao leo ndiak.^b

25 Nai ndia boe oo hambu inak luma lambadeik lai ndia. Sila ndia, na ndia: Yesus inan, Yesus te'on, Klopas saon Maria, ma Maria maneme nggolo Magdala mai. 26 Yesus nita inan nambadeik nai ndia, sama-sama no Ndia ana mana tunggan fo Ana suek ndia, fo ndia au Yohanis. Boe ma Ana nafada inan nae, “Ina. Ndia ia, ina anan.”

27 Boe ma Ana nafada au nae, “Leo iak. Hatematak ia, taok ndia leo o inam leo!” De mulai neme faik ndia mai, Yesus inan leo no au.

28 Basa boe ma Yesus nafada nae, Ana tao basa Ndia uen so. Ndia tao natetu, basa hata fo Manetualain Susula Malalaon sulak memak neme makahulun mai so. Boe ma Ana nae, “Au maa mada so.”^c

29 Nai ndia hambu anggol oek makeis nai nggusi kadi'ik esa dalek. Boe ma soldadu la ha'i lala lombu tasi de ala domben neu anggol oek ndia, boe ma ala taon neu ai keke'uk esa^d mbedan, de ala solok kana neu Ndia bifi doon. 30 Ledo-eik Yesus musi anggol oek ndia, boe ma Ana kokolak nae, “Basan basa so.” Boe ma Ana nakatele langgan, de ketu memak ani hahaen.

31 Faik ndia la'e-neu fai lima. Tungga heti-heu anggama, na faik ndia hataholi Yahudi la musi lahehele, fo fo'a na ala simbok fai huhule-haladoik. Huu ndia de ala ta nau hataholi kamates nana londak nakandoo nai ai ngganggek nandaa neu fai huhule-haladoik. Fai huhule-haladoik ndia, fai malole. De hataholi Yahudi malanggan nala, loke nggubenol fo ana nadenu hataholi neu femba natepa hataholi manai ai ngganggek kala ein. No leo ndiak, ala bisa mate lai-lai, fo lakonda sala dai fai. 32 Boe ma soldadu la leni ele leu, de femba latepa hataholi esa ein. Basa de ala femba latepa hataholi esa ein bali. Sila dua sala, fo ndia hataholi nana mbaku londak sama-sama lo Yesus. 33 Tehuu ledo-eik ala losa Yesus, te ala litan Ana mate tetebes so. Huu ndia de ala ta femba latepa Ndia ein nala. 34 Tehuu soldadu esa ha'i nala donggi, de ana mbaun neu Yesus tenden. Boe ma daak faa, ma oe kalua boe.

35 (Hataholi esa dadik neu sakasii nita ndia, na ndia au. Au ita basan, ma au sulak no teteben nai ia. Au bubuluk hata fo au tuik ia, tetebes, fo suek ei bisa mamahele au kokolang ia.) 36 Basa dede'ak kala ia dadi, huu Manetualain Susula Malalaon nana sulak nae, “Ndia duin nala ta hambu esa tepan boe.”^e 37 Nai Susula Malalaok ndia, hambu nai mamana fe'ek nana sulak boe nae, “Dei fo lita hataholi ndia fo ala mbau lalan so.”^f

38 Hambu hataholi esa, nade Yusuf, neme nggolo Arimatea mai. Ndia boe oo dadik Yesus ana mana tunggan. Tehuu ana tungga nafufunik Yesus, huu ana bii hataholi Yahudi malanggan nala. Ana neni nggubenol Pilatus neu, fo noke nakambo'ik ndia, fo neu ha'i nala Yesus mbombolan. Nggubenol simbok no malole. De Yusuf neu nakonda Yesus mbombolan, boe ma ana ko'o nenin. 39 Nikodemus boe oo neu no'u no Yusuf. Ndia ndia, fo makahulun neu natonggo no Yesus la'e-neu le'odaek. Ana hasa rampe makadotok, meda kilo telu hulu telu, fo tao neu Yesus mbombolan.^g 40 Boe ma ala mbomboti Yesus mbombolan lenik tema banggana'uk. Tungga-tungga fefeok, na ala tao rampe neu dei. Ala tao leo ndiak, tungga hataholi Yahudi la hadan fo latoi mamate.

41 Naa, ta dook neme mamanak fo Yesus maten ndia, hambu mamana malole esa. Nai mamanak ndia, hataholi bei fo mba'a lala lua lates esa. Ala bei ta lambeda litak mamate nai ndia. 42 Faik ndia, hataholi Yahudi la lahehele fo simbok sila fai huhule-haladoin sangga basa so. Huu ndia de ala mbeda Yesus mbombolan neu lates ndia dalek, huu mamanak ndia, ta dook.