2 Ala losa, boe ma nggubenol natane Yesus nae, “Leo bee? Tetebes O ia hataholi Yahudi Manen, do?”

Yesus nataa nae, “Tetebes! Ama nggubenol kokolak tetebes ndia so.”

3 Basa boe ma malangga anggama Yahudi la malanggan nala kokolak lo nggubenol lae, “Hataholi ia tao salak no'uk so!” Boe ma ala lafada Ndia salan nala esa-esak.

4 Nggubenol natane seluk Yesus nae, “O ta mamanene sila kokolan nala, do? Ala fee salak no'un seli neu O. De hena O balan dei!”

5 Tehuu Yesus ta nataa faa boe, losa nggubenol heran nalan seli.

6 Tungga-tungga teuk, mete ma hataholi Yahudi la tao feta Paska, na, hataholi no'uk kala sila lateme hele lala hataholi bui esa fo nggubenol mbo'in. 7 Faik ndia, hambu hataholi bui esa nade Barabas. Makahulun, ala humu lala ndia no nonoon nala, huu ana laban mana palenda Roma, ma ana tao nisa hataholi boe. 8 Huu feta Paska ndia deka-deka so, de hataholi no'uk leni nggubenol Pilatus leu, de ala eki lae, “Ama nggubenol! Fai Paska losa so! Mete ma bisa, na, ama nggubenol mbo'i fee ai hataholi bui esa fo tungga ita natetemen!”

9 Boe ma nggubenol nataa nae, “Au mbo'i fee ei, see? Leo bee mete ma au mbo'i fee ei hataholi Yahudi manem ia? Ei makaheik, do taa?” 10 Nggubenol kokolak leo ndiak, naa te ana bubuluk basa malangga anggama Yahudi la malanggan nala loo Yesus neni ndia neu so, huu ala binci lalan seli Yesus.

11 Tehuu malangga anggama la sila mbau-edo hataholi no'uk kala sila, fo basa sala loke nggubenol lae, “Ai ta hii Ndia! De kada mbo'i heni Barabas leo!”

12 Basa boe ma nggubenol natane seluk nae, “Mete ma leo ndiak, na, au tao Yesus ia leo bee, fo loken lae, ‘Mane Yahudi’ ia?”

13 Boe ma basa sala eki landaa-landaa lae, “Tao misan! Mbaku misan neu ai ngganggek!”

14 Boe ma nggubenol natane nae, “Tehuu Ana sala hata? Au palisak Ndia so, tehuu au ta hambu salan faa boe!”

Tehuu ala boe eki latingga bali lae, “Tao misan! Mbaku misan neu ai ngganggek leo!”

15 Huu nggubenol sangga tao namahoko hataholi no'uk kala sila dalen nala, de ana mbo'i heni Barabas tungga sila hihiin. Boe ma ana palenda hataholi mana maneak kala, fo leu filo Yesus.^a Ala filo late'e, boe ma soldadu la loon, fo sangga leu mbaku lisan nai ai ngganggek.

16 Basa boe ma soldadu la hela loo Yesus leni sila kota musun pasa maloan neu.^b Leu ndia boe ma ala loke lala sila nonoon nala batalion esa. 17 Boe ma ala fee Yesus pake badu manalu mbila balanggeok esa, sama leo manek kala lateme paken. Basa boe ma ala ha'i lala ai kanggouk ndanan, de ala nanen dadik solangga. Boe ma ala nene'e solangga kanggouk ndia neu Yesus langgan de ala tao lakamiminak kana leo ala so'u mane beuk, pake solangga manek.

18 Boe ma basa sala fee hada-holomata lakamiminak Ndia lae, “Soda-molek, mane Yahudi!” 19 Ma ala taok sendek lakamiminak fee hada-holomata neu Yesus matan. Boe ma ala mbula lakaduduak ambe neu Yesus matan. De ala denggu lakau'utak Ndia lenik ai. 20 Ala lakamiminak kana basa, boe ma ala odu heni badu nalun. De ala odu falik badun neu seluk. Basa boe ma loon kalua neni kota Yerusalem deak neu, fo ala leu mbaku londa lisan nai ai ngganggek.

21 Ledo-eik ala kalua leme kota Yerusalem mai, de ala losa dala laladak boe ma latonggo lo hataholi esa neme kota Kirene mai. Hataholi ndia nade Simon, fo Alexander no Rufus aman. Bei fo ana sangga losa Yerusalem, tehuu soldadu la to'u lalan, de lakasetin ana lu'a Yesus ai ngganggen.^c 22 Ala hela loo Yesus losa mamanak esa, nade Golgotaa. (Ndia ndandaan nae, ‘mamana langga duik.’) 23 Leu ndia, boe ma ala nau fee Yesus ninu anggol oek makeis fo nana seseok no akidook, suek Ana nakatataka hedis. Tehuu Yesus ta nau ninu. 24-25 Boe ma ala mbaku lakalelenggak Yesus neu ai ngganggek. Ma ala lambadedei ai ngganggek ndia, meda neu li'u sio fafain. De soldadu la le'a loot, fo ala sangga bubuluk see ndia hambu Yesus balo'an.^d 26 Basa boe ma ala sulak neu papak esa, fo mbaku nai Yesus langgan ndandaan lain nae,

Ala pake to'ok ndia, fo huku Yesus. 27 Ala mbaku lisa tou nakodaa dua lai ndia boe. Esa nai Yesus boboa konan; esa nai Yesus boboa kiin. 28 [No leo ndiak, ala tungga hata fo nana sulak memak nai Manetualain Susula Malalaon so nae, “Ala tao Ndia sama leo hataholi manggalauk.”]^{e f}

29 Basa hataholi mana la'ok lesik ndia lita Yesus nana londak nai ai nggangek ndia. Boe ma ala kakalek langgan fo haumemee lakamamaek Yesus lae, “Wei! O mae O tao matu'u Manetualain Uma Ina Huhule-haladoin, fo basa na o mambadedei falik kana nai faik telu dalen, hetu?^g 30 Hena O konda muma ai ngganggek ndia lain mai, fo makambo'ik heni O aom leo! Mete ma leo ndiak na, bei fo ai mamahele memak mae, O ia Manetualain Anan.”

31 Malangga anggama Yahudi la malanggan nala ma mese anggama la boe oo haumemee Yesus, ma lakokola lae, “Ana nasala'e nala hataholi fe'ek, tehuu ta bisa nasala'e nala Ndia ao hehelin! 32 Ana nafada nae, Ndia ndia ‘Karistus’, Hataholi fo Manetualain helu memak kana neme makahulun mai so. Hataholi fe'ek lae, Ndia ndia, hataholi Israel Manen. Mete ma tetebes leo ndiak, na, elan fo Ana konda aon neme ai ngganggek lain mai, fo ita tita sudik kana dei. Leo ndiak, bei fo ita basa nggata bisa tamahele Ndia.”

Hataholi kaduak kala fo nana londak sama-sama lo Yesus, ala tungga haumemee Ndia boe.

33 Basa boe ma makiuk mboti nala mamanak ndia neme ledo kamatetun losa li'u telu ledo bobon.

34 Nandaa no li'u telu ledo bobon, boe ma Yesus nanggou nenik dede'a Aram nae, “Eloi! Eloi! Lema sabaktani?” (Ndia ndandaan nae, “Au Lamatuang! Au Manetualain! Hatina de Ama la'o ela Au leo iak?”)^h

35 Hataholi hida mana dekak lai ndia lamanene Yesus halan ndia. Boe ma ala lae, “Wei! Ei mamanene dei. Ana noke Elia, fo Manetualain mana kokola makahulun ele ndia!” 36 Boe ma hataholi esa nalaik neu ha'i lombu, de domben neni anggol oek makeis dale neu. Boe ma ana kofu lombu neu tete'e-aik mbedan, de ana look kana neu Yesus bifi doon fo nasamusi. Basa boe ma hataholi la kokolak lae, “Mahani fo ita mete sudik kana dei! See bubuluk nae fama ba'i Elia mai nakondan neme ai ngganggek lain mai.”ⁱ

37 Basa boe ma Yesus nanggou seluk bali, boe ma maten.

38 Nai Uma Ina Huhule-haladoik dale, ala londa tema maloa esa fo babaa neu Manetualain Kama Malalaon. Nandaa no ketu Yesus ani hahaen, boe ma tema maloa ndia sii ba'en neu dua, neme lain mai losa dae.^j

39 Nai Golgotaa, malangga soldadu esa nambadeik nanea dekak no Yesus ai ngganggen. Ledo-eik ana nita Yesus mamaten, boe ma ana nggengge. De nae, “Awi! Hataholi ia memak tetebes Manetualain Anan bae maa!”

40-41 Ma hambu inak hida lita Yesus mamaten leme dook mai. Sila ndia, fo makahulun ala ono-lau Yesus neme Galelea. Inak kala sila, Salome, Maria neme nggolok Magdala mai, ma Maria fe'ek esa boe (fo Yakobis ta'e anak ma Yoses^k inan), ma inak fe'ek no'uk kala fo ala la'ok sama-sama tungga Yesus neni Yerusalem mai.^l

42-43 Basa boe ma hataholi esa sangga dalak fo nakonda Yesus mbombolan neme ai ngganggek lain mai. Hataholi ndia nade Yusuf, neme kota Arimatea mai. Ndia ndia, hataholi esa neme mana maketu dede'a anggama Yahudi mai boe. Ndia dalen malole hiak. Ndia boe oo nahani Manetualain palendan mamain.

Yesus maten la'e-neu fai lima. Fo'a mai, nandaa no hataholi Yahudi la fai huhule-haladoin. Huu ndia de Yusuf sangga nakonda nakahuluk Yesus mbombolan dei. Boe ma nambalalani dalen, de ana neni nggubenol Pilatus neu, fo noke nakonda Yesus mbombolan. 44 Ledo-eik nggubenol namanene Yusuf nonoken ndia, boe ma ana heran, de nae, “Awii! Hataholi ndia mate lai-lai so! Au ae hetuk ta bisa dadi leo ndiak maa!”

Boe ma ana nadenu hataholi leu loke malangga soldadu fo natanen nae, “Leo bee? Yesus ndia, maten so do, beik?”

45 Malangga soldadu ndia nataa nae, “Ama, memak maten ndia isinaak so.” Nggubenol namanene leo ndiak, boe ma nadenu Yusuf neu nakonda heni Yesus mbombolan.

46 Boe ma Yusuf neu hasa tema manalu mabeli. De neni Golgotaa neu. Boe ma ana nakonda Yesus mbombolan neme ai ngganggek lain mai. Ana mbomboti nalolole Yesus mbombolan nenik tema beuk fo belin seli ndia. Faik ndia, bei fo ala mba'a lala lua anak esa nai lete batu. Boe ma ala ko'o Yesus mbombolan neni lates ndia dalek neu. Ala keko lala batu bebela ina-huuk esa, de ala tatana latalololen neu lates bafan. Boe ma Yusuf asa fali.

47 Faik ndia, Maria neme Magdala mai no Maria fe'ek (fo Yoses inan) tungga losa ndia boe. Dua sala lita fo suek lasanenedak neulalau mamanak fo ala mbeda Yesus mbombolan ndia so.