“Ama bonggik! Au faing losa so, fo Ama so'u dema-demak Au. Au ia, Ama Anan. Ama fee Au haak so, fo heti basa hataholi malai dae-bafok ia. Ama fee Au haak fo suek Au fee sodak tetebes fo ta mana ketuk neu basa hataholi fo Ama fee Au, fo dadik neu Au hataholing. De hatematak ia, Au oke fo Ama so'u dema-demak Au, fo suek Au bisa atudu Ama koasa ina-huun. 3 Dalan fo hambu sodak tetebes fo ta mana ketuk ndia, leo iak: hataholi musi lalelak Amak, fo ndia Manetualain tetebes. Ta hambu dala fe'ek so bali. Sila boe oo musi lalelak Au, fo ndia Yesus Karistus fo Amak madenun neni dae-bafok ia mai so. 4 Au atudu Ama koasa ina-huun nai dae-bafok ia. Au tao basa ues ndia fo Ama feen neu Au so. 5 Makahulun ele, neu faik fo Ita bei ta takadadadik dae-bafok ia, Au sama-sama ua Ama. Ledo-eik ndia Au koasa ina-huung sama leo Ama koasa ina-huun boe. Hatematak ia Au sangga fali uni Ama uu. De Au oke Ama so'u dema-demak Au, fo suek Au koasa ina-huung fali main sama leo makahulun.”

6 Yesus hule-haladoi nakadaik nae, “Ama fee hataholi malai dae-bafok ia fo dadik leu Au hataholing. Au anoli sala so, fo ala lalelak Ama. Ala dadik Ama enan, boe ma Ama fee sala leu Au fo dadik leu Au enang boe. De ala tao tungga Ama Dede'a-kokolam. 7 Hatematak ia ala lalelak so lae, basa dede'ak kala fo Ama fee sala leu Au ndia so, okan nai Ama. 8 Huu Au anoli sala so, basa Dede'a-kokolak fo Ama mafada mitak Au. Sila boe oo simbok Dede'a-kokolak kala sila. Sila boe oo bubuluk lae, Au uma Ama mai. Boe ma ala lamahele lae, Ama ndia madenu Au uni dae-bafok ia mai.

9 Au hule-haladoi fee sila. Au ta hule-haladoi fee basa hataholi malai dae-bafok ia. Tehuu Au kada hule-haladoi fee hataholi la fo Ama fee sala mai Au so, huu sila ndia, Ama enan. 10 Huu basa mana dadik leu Au enang, dadik leu Ama enan boe. Ma basa mana dadik leu Ama enan, dadik leu Au enang boe. Boe ma Au hataholi nggala sila, fo ala so'u dema-demak Au. 11 Au ta leo akandoo nai dae-bafok ia so bali, huu ta dook bali, te Au sangga fali uni Au Amang uu. Tehuu hataholi la ia musi leo lakandoo lai dae-bafok ia. Amak ndia malalaon ana seli. De Au oke fo Ama manea sala, munik Ama koasan fo Ama feen neu Au so. Au boe oo oke fo sila nana mba'ak leu esa, sama leo Au nana mba'ak neu esa ua Ama. 12 Neu faik fo Au bei ua sala no'u lai dae-bafok ia, Au akaboi sala dadik leu Ama enan so. Au anea neulalau sala, fo suek ala nana mba'ak lakandoo lo Ama. Ta mopo esa boe. Kada Yudas mesak kana neu fuik, tungga hata fo Manetualain Susula Malalaon nana sulak memak neme makahulun ele mai so.^a

13 Hatematak ia Au sangga fali uni Ama uu. Au afada dede'ak kala ia neu faik fo Au bei nai dae-bafok ia. No leo ndiak, Au hataholi nggala dalen nala bisa lamahoko lakandoo, sama leo Au daleng namahoko. 14 Au afada Ama Dede'a-kokolam neu sala so. Hataholi fe'ek malai dae-bafok ia binci Au hataholi nggala, huu Au hataholi nggala ta lasoda sama leo sila. Au boe oo leo ndiak, huu Au ta sama leo hataholi fe'ek nai dae-bafok ia. 15 Mete ma Au hule-haladoi, na, Au ta oke fo Ama noo sala kalua leme doidosok manai dae-bafok ia mai. Taa! Tehuu Au oke fo Ama manea sala, fo ala dook leme dede'a manggalauk mai. 16 Sila ta sama leo hataholi fe'ek lai dae-bafok ia, sama leo Au boe oo ta sama leo hataholi fe'ek nai dae-bafok ia.

17 Pake hata fo ndoos suek tao dalen nala malalaok. Huu Ama Dede'a-kokolam mala ndoos. 18 Ama ndia madenu Au uni dae-bafok ia mai. Basa de Au boe oo adenu sala leo ndiak, fo suek ala lasoda lakambela lai hataholi dae-bafok kala laladan nala. 19 Au anea Au aong fo malalaok nakandoo neu Ama. No leo ndiak, Au hataholi nggala boe oo lanea aon nala, fo malalaok lakandoo soa-neu Ama. Ama Dede'a-kokolam fo ndoos, fo tao sala fee ao-ina katematuan nala neu Ama.”

20 Yesus hule-haladoi nakadaik nae, “Au hule-haladoi ta kada neu sala fo malai hatematak ia. Huu Au boe oo hule-haladoi neu hataholi la fo dei fo lamahele neu Au, huu Au ana mana tungga nggala kokolan nala.

21 Ama. Au oke fo sila basa sala bisa nana mba'ak neu esa, sama leo Ita boe nana mba'ak teu esa. Au boe oo nau fo ala nana mba'ak dadik esa lo Ita, fo suek hataholi fe'ek kala malai dae-bafok ia bisa lamahele lae, Ama mesak kana madenu Au so. 22 Ama matudu Au koasa ina-huung neu hataholi la so. Boe ma Au so'u dema-demak kasa so, sama leo Ama so'u dema-demak Au. No leo ndiak, ala nana mba'ak dadik leu esa, sama leo Ita nana mba'ak teu esa boe. 23 Au nana mba'ak ua sala. Ama boe oo nana mba'ak no Au. Ala musi nana mba'ak dadik esa leo ndiak, losa ala lasoda dalek esa tebe-tebe. Huu mete ma ala lasoda dalek esa leo ndiak, na, dei fo hataholi fe'ek kala lai dae-bafok ia bisa bubuluk lae, Ama sue sala, sama leo Ama sue Au. No leo ndiak sila boe oo bubuluk lae, Ama ndia nadenu Au.

24 Ama. Au ahiik fo basa hataholi la fo Ama fee sala neu Au ndia, sama-sama lo Au. Huu Au nau fo ala bisa lita Ama so'u dema-demak Au. Huu memak Ama sue Au so, neu faik fo Ita bei ta takadadadik dae-bafok ia.

25 Ama Bonggik dalen ndoos. Tehuu hataholi malai dae-bafok ia ta lalelak Ama. Au ndia alelak Ama. Ma Au hataholi nggala boe oo bubuluk lae, Ama ndia madenu Au uni dae-bafok ia mai. 26 Au afada sala so ae, Ama ndia, na See. Ma dei fo Au afada akandoo sala leo ndiak, huu Au nau fo ala bisa lameda tetebes Ama susuen. Huu susuek fo ala lamedan ndia, sama leo Ama feen neu Au. Fo suek Au nana mba'ak akandoo ua sala.”