Ala loo Lamatuak Yesus neni nggubenol Pilatus neu
23
Tehuu mana palisa dede'a anggama Yahudi la sila, ta laena haak, fo huku mate hataholi. Huu ndia de, ala loo Yesus neu nasale nggubenol neme mana palenda Roma nai ndia, fo ndia Pilatus. Ala nau fo nggubenol huku Ndia. 2 De losa nggubenol matan, boe ma lafada Yesus salan nala lae, “Hataholi ia, mana laban mana palenda Roma. Ana fee nanonolik nae, hataholi boso bae bea fee mana palenda. Ndia boe oo so'uk aon nae, ndia ia Karistus, hataholi Yahudi manen.”3 Nggubenol namanene leo ndiak, boe ma natane Ndia nae, “Tetebes, do? O ia, hataholi Yahudi manen, do?”
Boe ma Yesus nataa nae, “Tetebes. Sama leo ama kokolan ndia.”
4 Nggubenol palisak basa, boe ma nasale malangga anggama malanggan nala, ma hataholi no'uk sila. Boe ma nae, “Leo iak. Au ta hambu Hataholi ia salan faa boe.”
5 Tehuu ala lahele lae, “Taa, ama nggubenol. Hataholi ia fee nanonolik sudi nai bee, mbau-edo lau-inggu fo tao nahuuk. Ana tao naodek mulai neme propensi Galelea mai, losa kota Yerusalem ia.”
Nggubenol nadenu Lamatuak Yesus neni mane Herodes neu
6 Nggubenol namanene leo ndiak, boe ma natane sala nae, “Mete ma leo ndiak, na ndia ia, hataholi Galelea, do?”
Boe ma ala lataa lae, “Tetebes, Ama. Ndia neme Galelea mai!” 7 Nggubenol bubuluk leo ndiak, boe ma ana nadenu loo Yesus neu nasale mane Herodes, mana palenda nai propensi Galelea. Faik ndia, ana nai kota Yerusalem. 8 Mane Herodes namanene tutuik no'uk la'e-neu Yesus so, ma nahiik nita Yesus neme makahulun mai so. Ana namahehenak fo bisa nita Yesus natudu tanda heran esa do dua. Huu ndia de ledo-eik ala loo Yesus neni ndia neu, dalen namahoko. 9 Boe ma Herodes natane dede'ak mata-matak neu Yesus, tehuu Ana ta nataa hata-hata. 10 Herodes bei nakokola no Yesus, tehuu malangga anggama malanggan nala, ma mese anggama la mulai kokolak seluk Yesus salan mata-matak bali neu manek. 11 Boe ma mane Herodes no soldadun nala mulai haumemee tungga ma lakamamaek tao lakadadaek Yesus. Basa de ala papaken badu neulauk esa, sama leo manek kala lateme pake, boe ma ala haumemee lakandoo. De ala loo falik kana neni nggubenol Pilatus neu. 12 Makahulun, nggubenol ndia no mane Herodes lamusuk. Tehuu mulai faik ndia, dua sala latia-laik.
Nggubenol naketu huku mate Lamatuak Yesus
13 Basa boe ma nggubenol Pilatus noke malangga anggama Yahudi malanggan nala, ma lasi hada fe'ek kala, sama-sama lo hataholi no'uk sila, fo mai lakabubua lamanene ndia nakeketun. 14 Ana kokolak nae, “Ei mia Yesus neni au mai, ma kalaak Ndia mae, Ana nahiik mbau-edo lau-inggu fo laban mana palenda Roma. Au palisak Ndia lutu-lutuk nai ei matam so, tehuu au ta hambu Ndia salan hata-hata. 15 Mane Herodes palisak Ndia bali, tehuu ta hambu Ndia salan hata-hata boe. Huu ndia de ana fee falik Hataholi ia neni au mai. Hataholi ia salan ta faa boe, de au ta bisa huku mate Ndia. 16 De au sangga aketun leo iak: au fee ala filo Ndia, basa na au mbo'i henin.”
17-18 Ala lamanene leo ndiak, boe ma ala mulai eki landaa lae, “Ta bisa! Tao misa Ndia. Mbo'i kada Barabas.”
[Ala eki leo ndiak, huu tungga teuk mete ma hataholi Yahudi la tao feta Paska, na, nggubenol nateme mbo'i hataholi bui esa tungga sila hihiin.]a 19 (Barabas ia, maso bui huu dadik mana nggenggefuk, tao nahuuk laban mana palenda Roma nai kota Yerusalem, ma tao nisa hataholi boe.)
20 Tehuu nggubenol nau mbo'i Yesus. De ana natane seluk hataholi no'uk kala nae, “Mete ma au mbo'i Yesus ia, na, leo bee?”
21 Tehuu basa sala eki landaa lae, “Taa! Kada mbaku nisa Ndia, nai ai ngganggek! Mbaku nisa Ndia, nai ai ngganggek!”
22 Tehuu nggubenol nameda ndia ta malole, de natane seluk kala'i telun nae, “Hatina de au musi mbaku isan leo ndiak? Ndia manggalaun hata? Au palisak Ndia so, tehuu au ta hambu to'ok esa boe, fo huku mate Ndia. De elan fo au adenu filo Ndia, basa na mbo'i henin.”
23 Tehuu basa hataholi sila, boe eki latingga bali, fo lakaseti nau mbaku nisa Ndia, nai ai ngganggek. Babasan, nggubenol ta bisa nahele, 24 boe ma naketun tungga kada sila hihiin. 25 Basa de ana mbo'i Barabas fo mana tao nahuuk, ma mana nakanisa hataholi ndia. Tehuu ana fee Yesus neu sila liman, fo suek ala tao Ndia tungga sila hihiin.
Ala mbaku londa Lamatuak Yesus nai ai ngganggek
26 Basa boe ma soldadu Roma loo Yesus kalua neme kota Yerusalem mai. Leu dala laladak, ala latonggo lo hataholi esa neme kota Kirene mai, nade Simon. Ana bei fo neme kota deak mai. Ala lakasetin, fo lu'a ai ngganggek nggati Yesus, de la'o tungga Yesus dean.
27 Faik ndia, hataholi no'uk mai lanilu Yesus. Hambu inak kala, fo lamatani neu Ndia boe. 28 Yesus namanene lamatani leo ndiak, boe ma Ana nasale sala, de kokolak nae, “Wei! Inak kala maneme Yerusalem mai, boso mamatani neu Au. Malolenak mamatani neu ei ao-ina hehelim, ma ei anam mala. 29 Huu dei fo mbila-binesak toto'a ina-huuk sangga mai, losa hataholi kokolak lae, ‘Inak fo ua-nale malolen ana seli, na ndia inak fo ta bonggi nitak ma ta nasusu nitak kakana mbimbila anak.’ 30 Faik ndia toto'a ina-huuk ndia mai, hataholi la doidoso lalan seli, losa ala loke lae, ‘Malolenak letek kala ndefa mai, fo tuni lala ai leo!’ Sila boe oo kokolak lae, ‘No doidosok leo iak, na, malolenak lete mbumbukuk kala tatana lala ai leo!’b 31 Mete ma hataholi bisa tao toto'ak leo iak, neu hataholi sala taak, na, nakalenak no hataholi manggalauk bali?”c
32 Neu faik fo soldadu la loo Yesus ma hela loo hataholi manggalauk dua, fo sangga huku nisa sala sama-sama lo Ndia. 33 Ala losa mamanak esa, nade ‘Langga Duik.’ Boe ma ala mbaku Yesus no hataholi manggalauk kaduak kala sila, esa-esak no ai ngganggen. Basa de ala lambadei ai ngganggek kala sila. Ala mbaku londa hataholi manggalauk esa neu Yesus boboa konan, ma esak bali neu Ndia boboa kiin.
34 [Faik ndia, Yesus hule-haladoi nae, “Ama! Mafalende heni hataholi ia salan nala, huu ala ta bubuluk hata fo ala taok.”]d Basa boe ma soldadu la hela lot, fo sangga bubuluk see hambu Ndia balo'an.e
35 Hataholi no'uk mai lanilu lai mamanak ndia. Hataholi Yahudi malanggan nala haumemee Yesus lae, “Ana nasala'e hataholi fe'ek so, tehuu ta bisa nasala'e Ndia ao-ina hehelin. Mete ma Ndia ia, tebe-tebe Karistus, fo Manetualain hele memak kana so, na, elan fo Ana konda aon neme ai ngganggek ndia mai leo.”f
36 Soldadu la sila haumemeen boe. Ala feen ninu anggol oek makeis,g 37 ma eki haumemeen lae, “Mete ma o ia tebe-tebe hataholi Yahudi manen, na, masala'e o ao-inam leo!” 38 Ala sulak neu papak esa nae,
“Ia, hataholi Yahudi manen.”
Basa de ala mbaku papak ndia neu Yesus langgan ndandaan lain, fo lafada to'on hatina de ala huku Ndia.
39 Hataholi manggalauk esa fo ala mbaku londan nai Yesus boboan seli boe oo, haumemee nae, “O ia tebe-tebe Karistus, do? Mete ma leo ndiak, na, masala'e mala ita basa nggata leo!”
40 Tehuu hataholi manggalauk esa ka'in nae, “Wei! O ta bii Manetualain, do? Huu o boe oo hambu huku mate sama leo Ndia. 41 Ita dua nggata hambu huhukuk nandaa no ita manggalaun. Tehuu Hataholi ia, ta tao manggalauk hata-hata.” 42 Boe ma ana kokolak tamba nae, “Yesus! Mete ma Ama maso muni Ama nusan muu, na, masaneda au, baa!”
43 Yesus nataa nae, “Au helu! Faik ia boe oo, o maso muni nusa sodak dalek muu, sama-sama mua Au.”
Lamatuak Yesus maten
44-45 Faik ndia, ledo kamatetuk so. Tehuu ledo ta nasa'a, boe ma makiu-mumuuk mboti nala mamanak ndia, losa li'u telu ledo bobon. Nai Uma Ina Huhule-haladoik, hambu tema maloa esa nana londak fo babaa Manetualain Kama Malalaon Ana Seli. Kada nggengge neuk, tema maloa ndia sii ba'en neu dua.h
46 Nai mamana ‘Langga Duik’ ndia boe oo Yesus nanggou nae, “Ama! Hatematak ia Au fee Au samaneng neu Ama liman.” Ana kokolak nate'e leo ndiak, boe ma ketu tutik Ndia ani hahaen.i
47 Hambu malangga soldadu Roma nambadeik dekak no Yesus ai ngganggen. Ledo-eik nita Yesus mamaten ndia, boe ma ana koa Manetualain nae, “Awii! Hataholi ia tebe-tebe Hataholi dale ndoos, maa!”j
48 Ledo-eik hataholi no'uk mana lakabubua lai ndia lita Yesus mamaten, boe ma ala fale dalen nala, de fali lo dale hedik. 49 Tehuu Yesus hataholin nala lambadeik lai dook, fo lita Ndia mamaten. Inak kala fo mana tungga Ndia leme Galelea mai losa Yerusalem, lai ndia boe.k
Ala latoi Lamatuak Yesus
50-51 Ledo-eik Yesus maten so, boe ma hataholi esa sangga dalak, fo nau neu nakonda Ndia mbombolan neme ai ngganggek mai, fo natoi neulalau Ndia. Hataholi ndia nade Yusuf, neme kota Arimatea mai. Ndia dalen ndoos, tao dede'a malole no'uk. Ana nahani-nahani fo Manetualain natudu Ndia toto'u palendan. Ndia boe oo hataholi esa fo mana palisak dede'a anggama Yahudi, tehuu ta nakaheik sila nakeketun, fo huku mate Yesus. 52 Huu ana nau nakonda Yesus mbombolan neme ai ngganggek mai, de neu nasale nggubenol Pilatus, fo noke nau nakaneni mbombolak ndia. 53 Ana hambu nakambo'ik, boe ma neu nakondan. Basa de ana mboti mbombolak ndia nenik tema banggana'uk. Boe ma ana tao mbombolak ndia, neu bolo batu esa fo hataholi bei fo to'i basan. Lates ndia, bei ta nana pakek. 54 Yesus mamaten ndia la'e fai Lima. Ledo-eik Yusuf asa latoi basa, ledo bobok so. Mete ma ledo tesa so, na, hataholi Yahudi fai huhule-haladoin mulai so.
55 Inak kala sila, fo mana mai sama-sama lo Yesus leme Galelea mai, sila boe oo leu tungga Yusuf, fo sangga bubuluk ana tao mbombolak ndia nai lates bee. 56 Lita neulalau lates ndia mamanan, boe ma inak kala sila fali fo leu sadia bungga ma mina kaboo menik. Ledo-eik ledo tesa, boe ma ala hahae tao ues, tungga hataholi Yahudi heti-heu fai huhule-haladoin. Ala lahani fai huhule-haladoik seli, bei fo ala leu loloo bungga neu Yesus mbombolan.l