Lamatuak Yesus Tutui Malolen,
tungga
Lukas
Huu hata de Lukas sulak tutuik ia
1
1-3 Ama Teofilusa fo nana hadak.Soda-molek.
Hataholi no'uk kala soba sulak tutuik la'e-neu dede'ak kala mana dadik nai ai laladan nala so. Ala sulak tutuik kala sila lenik tutuik fo ana eo neme ai mai, ma neni ai mai seluk neme makahulun mai. Tutuik kala sila fo ai bubuluk kana neme Lamatuak Yesus hataholin nala mana dekak lo Ndia, ma neme hataholi fe'ek mai boe, fo nita no mata de'e hehelin. Basa tutuik kala sila, nandaa leo Manetualain helu memak kana neme makahulun mai so.
De au palisak losa lutu-lutuk basa dede'ak kala sila so, mulai neme tutuik ndia huu-okan mai. Boe ma au aketun fo sulak basa sila no malole, tungga ndia tutunggan. No leo ndiak, na ama bisa bubuluk no teteben hata fo dadi so. 4 Ma ama boe oo bisa mamahele mae, hata fo hataholi la tuik ndia tetebes. Basa sila memak mana dadik so!
Manetualain ata nusa sodan nafada memak Yohanis Mana Salanik dadadin
5 Tutuik ia huun leo iak: neu faik fo mane Herodes to'u palenda nai propensi Yudea, hambu hataholi esa nade Sakarias. Ndia ndia, malangga anggama Yahudi esa. Ma ndia boe oo esa neme ba'i Abia buao malangga anggaman mai. Sakarias saon, nade Elisabet. Ndia boe oo numbu-saduk neme malangga anggama la mai, huu ndia ndia, ba'i Musa ka'an Harun numbu-sadun.b 6 Dua sala lasoda lo ndoos, tungga Manetualain palendan, ma basa heti-heun nala. Hataholi la boe oo fee hada-holomata neu sala. 7 Dua sala lamalasi so, tehuu anan taa, huu Elisabet ana manan, nana kenak.
8 La'i esa, Sakarias ma ndia buaon Abia sala hambu susula baba'e ues nai Uma Ina Huhule-haladoik nai kota Yerusalem. 9 Tungga sila natetemen, na malangga anggama la sila le'a lot, fo sangga bubuluk see hambu ues maso neni Uma Ina Huhule-haladoik Kama Malalaon Nalan Seli ndia dalek neu. Nai ndia, hataholi ndia musi dede ai kaboo menik nai Manetualain matan. Faik ndia, ala le'a lot, de lot tuda neu Sakarias. 10 Boe ma ana maso dalek neu. Ledo-eik ana dede ai kaboo menik nai Kama ndia dalek, hataholi no'uk kala hule-haladoi lai Uma Ina Huhule-haladoik ndia pasan. 11 Kada nggengge neuk, Manetualain ata nusa sodan esa mai nambadeik neu mamana dedede ai kaboo menik ndia boboa konan.
12 Sakarias nita leo ndiak, boe ma ana bii nalan seli, losa ta bubuluk tao hata. 13 Tehuu ata nusa sodak ndia kokolak nae, “Sakarias! Boso bii bou! Huu Manetualain namanene o huhule-haladoim so. De dei fo o saom bonggi fee o, ana tou anak esa. O musi foin nade Yohanis. 14 Dei fo hataholi no'uk kala boe oo lamahoko tungga sama-sama lo ei, huu ei hambu anak so. Kakanak ia, dei fo tao nala o dalem namahoko. 15 Manetualain Dula-dale Malalaon koasan no ndia, mulai neme inan bei nailun. Ana musi naluli ninu basa ala-lalu. Neu faik fo ana ina-huu mai, Manetualain paken dadik hataholi penting.c 16 Dei fo ana kokoe nala hataholi Israel no'uk, fo lasafali tungga sila Manetualain, fo mana naena haak palenda sila. 17 Ndia hadan ma koasan, sama tetebes leo ba'i Elia, fo Manetualain mana kokolan neme makahulun mai. Ana mai nakahuluk neme ita Lamatuan. Ana tao nala ina-ama la sue lasafali sila anan nala. Ma hataholi mana heok lasadea Manetualain, ana tao nasafali sala boe, fo lasafali tungga Manetualain hihiin. No leo ndiak, na ana tao nala hataholi la sadia dalen nala, fo simbok Lamatuak mamain.”d
18 Tehuu Sakarias natane nasafali ata nusa sodak ndia nae, “Neme bee mai, bisa dadi!? Au ua au saong mamalasi leo iak so! De tandan hata fo au bisa ita basa dede'ak kala ia dadi so?”
19 Boe ma ata nusa sodak ndia nataa nae, “Leo iak! Au ia Jibrael, fo Manetualain atan. Ndia mesak kana nadenu au mai, fo afada o dede'a malole ia.e 20 Tehuu o ta nau mamahele au kokolang ia. De ndia tandan, fo o mokek ndia leo iak! O maam nakadita, de o ta bisa kokolak hata-hata, mulai neme hatematak ia mai, losa ei hambu kakanak ndia. Dei fo o mita aom. Huu hata fo au afadak ia, dei fo ana dadi, nandaa no ndia fain.”
21 Hataholi no'uk kala mana hule-haladoi lai deak, lamanggonggoak so, huu Sakarias ta kalua ndoos. 22 Ledo-eik ana kalua mai, ana ta bisa kokolak hata-hata so bali. Boe ma ana nakababalek nenik liman neu sala, de ala bubuluk lae, Manetualain natudu fee ndia dede'a heran esa neme Kama Malalaok Nalan seli ndia dalek so.
23 Sila uen basan, boe ma Sakarias fali neni uman neu. 24-25 Ta dook boe ma Elisabet nailu. De ana kekek nai uman losa bulak lima. Ana kokolak nae, “Koa-kio Manetualain! Mate'en Manetualain natudu Ndia dale malolen neu au. Mete ma au hambu numbu-saduk so, na, hataholi la ta lakamamaek au so bali.”
Manetualain ata nusa sodan mai natonggo no Maria
26 Ledo-eik Elisabet tein la'ok bulak nee, boe ma Manetualain nadenu ata nusa sodan esa, neni nggolok esa neu, nai propensi Galelea, nade Nasaret. Ata nusa sodak ndia, nade Jibrael. 27 Nai Nasaret hambu ina anak esa, nade Maria. Maria nafufudik no touk esa nade Yusuf. Yusuf ndia, na, mane Dauk numbu-sadun. Jibrael neu natonggo no ina ana Maria ndia.f 28 Ana natudu aon neu ina anak ndia, boe ma nae, “Soda-molek, ina! Manetualain hele nala o so, fo sangga tao dede'a malole esa neu o. Manetualain sama-sama no o, Maria.”
29 Maria namanene leo ndiak, boe ma ana namanggonggoak neu ata nusa sodak ndia kokolan. Ana ta bubuluk ndia maksut hata. 30 Boe ma ata nusa sodak ndia tuti bali nae,
“Maria! O boso bii.
Huu Manetualain naena maksut natudu Ndia dale malolen neu o.
31 Ta dook te o mailu so,
boe ma dei fo o bonggi mala ana tou anak esa.
O musi foin, nade Yesus.g
32 Dei fo Ana dadik Hataholi ina-huuk.
Dei fo Manetualain noken nae, ‘Ndia ndia, Au Ana heheling.’
Fo ndia, Manetualain fo Naden Manai Lain Seli Anan.
Dei fo Manetualain so'u nalan, fo to'u palenda,
sama leo Ndia ba'in mane Dauk.
33 Dei fo Ana to'u palenda nakandondoo henin soa-neu hataholi Israel asa.h
Huu Ndia palendan ta mana basak.”i
34 Tehuu Maria natane Jibrael nae, “Au ia, ta sunggu itak ua touk esa boe! Talo bee de au bisa ailu?”
35 Boe ma Jibrael nataa nae, “Leo iak! Dei fo Manetualain Dula-dale Malalaon mai neu o. Ma dei fo Manetualain fo Naden Manai Lain Seli koasan mboti nala o. No leo ndiak, na dei fo Kakanak fo o bonggi malak ndia, tebe-tebe malalaok. Huu Ndia ndia, Manetualain Anan.
36 Boso heran! Huu o bobonggim esa, nade Elisabet, nailu so boe. Hataholi lae, ndia ta bisa bonggi so, huu ndia lasik so. Tehuu hatematak ia, ndia tein, la'ok bulak nee so. 37 Huu soa-neu Manetualain, na basan bisa dadi!”j
38 Boe ma Maria nataa nae, “Malole. Au ia Manetualain atan. Elan fo basan dadi tungga ama kokolam ndia. Au sadia tungga kada Manetualain hihiin.”
Basa boe ma ata nusa sodak ndia la'o elan.
Maria neu tilo Elisabet
39-40 Seli faik hida, boe ma Maria la'o lai-lai neme Nasaret mai, neni Sakarias nggolon neu, nai letek kala nai propensi Yudea. Losa ndia, ana maso tutik neni Sakarias uman neu. Boe ma ana fee soda-molek neu Elisabet.
41 Ledo-eik Elisabet namanene Maria fee soda-molek, boe ma kakanak manai Elisabet tein dale nafoki. Ma Manetualain Dula-dale Malalalon maso neni Elisabet dalen neu. 42 Boe ma ana kokolak natingga nae, “Maria! Dei fo hataholi la so'u dema-demak o nadem, lena heni basa inak kala malai dae-bafok ia! Dei fo hataholi la, so'u dema-demak kakanak manai o teim dale ndia! 43 Au boe oo nana so'uk tungga, huu au Lamatuang inan mai natonggo no au. 44 Ledo-eik o maso fee soda-molek neu au, boe ma tutik au anang manai au teing dale nafoki, huu namahoko. 45 Manetualain natudu dale malolen neu o so, huu o mamahele mae, Ana sangga tao tungga Ndia hehelun.”
Maria koa-kio Manetualain
46 Maria so'uk halan nae,
“Neme au dale kadi'i anang mai,
au so'u dema-demak Lamatuak!
47 Au daleng namahoko,
huu Manetualain nasala'e nala au!
48 Ana tao matak neulalau neu au so,
Ndia atan fo sosoan taa ia.
Mulai neme hatematak ia mai, dei fo basa hataholi la taok au ia,
inak fo maua-manalek nalan seli,k
49 huu Manetualain tao dede'a heran neu au.
Ndia ndia, Mana Koasa ma Malalaok Nalan Seli.
50 Manetualain natudu taa-taa namemeda kasian neu basa hataholi la, fo mana fee hada-holomata ma lakaluku-lakatele neu Ndia,
neme numbu-saduk esa mai, neni numbu-saduk fe'ek neu.
51 Ana pake koasan,
fo tao naodek neu hataholi mana koaok kala.
52 Ana tao natuda hataholi mana koasa la,
huu koaon nala.
Tehuu Ana so'u laik hataholi madale taidaek kala.l
53 Ana fee hataholi mana ndoek kala la'a losa lakabete,
tehuu Ana husi heni hataholi kamasu'ik kala
fo la'o lo lima louk.
54 Ana tulun Ndia hataholi Israel asa,
ma Ana natudu taa-taa Ndia dale kasian neu sala.
55 Makahulun Ana mba'a heheluk no ita bei-ba'in nala,
fo ndia ba'i Abraham ma basa numbu-sadun nala.
Hatematak ia heheluk ndia nana mba'ak nakandondoo henin.”m
56 Boe ma Maria leo no Elisabet losa bulak telu. Basa de ana fali neni uman neu nai Nasaret.
Elisabet bonggi Yohanis
57 Ndia fain losa so, boe ma Elisabet bonggi ana tou anak esa. 58 Halak ndia natanggela neni ndia bobonggin nala neu, ma nggolo isik kala lae, Manetualain natudu dale malolen so, no fee Elisabet anak esa. Boe ma basa sala lamahoko tungga.
59 Ledo-eik kakanak ndia faik falu, boe ma ala sunat ana, tungga hataholi Yahudi heti-heun. Ala nau foi kakanak ndia nade Sakarias, tungga ndia aman naden.n 60 Tehuu inan sapa nae, “Ta bisa leo ndiak! Ndia naden, musi Yohanis!”
61 Tehuu ala bala lae, “Hatina de o hele mala nade Yohanis ndia? Ta hambu hataholi esa boe nai ei bobonggim mala, pake nadek ndia!” 62 Boe ma ala lakababalek liman nala neu Sakarias, fo sangga bubuluk ana sangga foi kakanak ndia nade see.
63 Sakarias nakababalek liman fo noke batu lei. Ala feen batu lei, de ana sulak nae, “Ndia naden Yohanis!” Boe ma basa hataholi la heran lalan seli.
64 Kada nggengge neuk, Sakarias maan mana makaditak ndia, banggana'u memak. Boe ma ana koa-kio Manetualain. 65 Basa hataholi la fo leo dekak lai ndia, ala bii lalan seli. Boe ma tutuik ndia natanggela neme bafak mai neni bafak neu, losa hataholi malai letek kala malai propensi Yudea, ala bubuluk boe. 66 Hataholi la fo mana lamanene tutuik ndia, dudu'a lae, “Manggaledok so, Manetualain koasan sama-sama no kakanak ndia. Dei fo ana ina-huu mai, na ana dadik hataholi mata-ao leo hata bae?”
Sakarias koa-kio Manetualain
67 Basa boe ma Manetualain Dula-dale Malalaon maso neni Sakarias dalen neu. Huu ndia de ana kokolak nae,
68 “Koa-kiok Lamatuak, hataholi Israel Manetualain!
Huu Ana mai soi nala Ndia hataholin nala so,
fo suek ala boso sama leo ata.
69 Manetualain so'u nala Hataholi esa fo koasan ina-huuk so,
fo dei fo Ana nasala'e nala ita.
Ndia ndia, neme mane Dauk numbu-sadun mai.
70 Manetualain helu memak basa ia la neme lele uluk mai so,
pake Ndia mana kokolan fo dalen nala katemak lo Ndia.
71 Hatematak ia Ana sangga mbo'i heni ita
neme ita musun nala mai,
ma neme hataholi la fo mana dale hedi neu ita.
72-73 Ana natudu Ndia dale malolen neu ita bei-ba'in nala,
huu Ana nasaneda taa-taa Ndia hehelun neu sala,
fo Ana mba'an no ba'i Abraham.
74 Ana mbo'i heni ita neme ita musun nala mai so,
fo ita bisa takaluku-takatele neu Ndia,
ma ta paluu bii bali.
75 Ana mbo'i heni ita so,
suek ita bisa tasoda malalaok ma ndoos taa-taa nai Ndia matan.
76 Yohanis! O ia, Au anang.
Dei fo hataholi la lalelak o lae, o ia, mana kokola neme Manetualain fo Naden Manai Lain Seli mai.
Dei fo o muu mafada hataholi la,
fo lalengga dalen nala, suek simbok Lamatuak mamain.o
77 Dei fo o muu matudu dalak neu Manetualain hataholin nala,
suek ala bubuluk sila hambu nasalala'ek,
huu Manetualain koka heni sila sala-singgon nala.
78-79 Huu Manetualain dalen banggana'uk ma kasian neu ita,
de Ana fee ita fai lela beuk,
sama leo fai beuk fo neni manggaledo beuk.
Ita mana la'ok nai makiuk,
ma ita mana bii mate,
huu bei ta malole to Manetualain,
dei fo hambu manggaledok fo noo ita teni dala mole-damek teu.”p
80 Basa boe ma Yohanis tamba faik, boe ina-huu. Ma Manetualain Dulan tao nalan balakai. Ana ina-huu mai, boe ma neu leo nai mamana nees, losa ana mulai tao ndia uen fee hataholi Israel asa.