La'o ela soda manggalauk, fo fali tungga Lamatuak hihiin
13
Faik ndia, hambu hataholi nafada Yesus nae, nggubenol Pilatus tao nisa hataholi Yahudi hida leme Galelea so, neu faik fo ala leni tunu-hotuk neni Uma Ina Huhule-haladoik neu nai Yerusalem. 2 Yesus namanene leo ndiak, boe ma Ana natane nae, “Tungga ei, na, meda hataholi nana tao nisak sila, salan nala ina-huun lena heni basa hataholi Galelea fe'ek kala, do? Huu ndia de ala hambu huhuku mate? 3 Taa! Tehuu mete ma ei ta la'o ela ei soda manggalaum, fo fali miu tungga Manetualain hihiin, na, ei boe oo, dei fo makalulutuk sama leo sila. 4 Boe ma leo bee bali no hataholi kasanahulu faluk mana matek kala, huu fai maneuk uma batu madema tu'u tuni nala sala leme Siloam? Sila salan nala ina-huun lena heni hataholi fe'ek malai Yerusalem, do? 5 Taa! Tehuu mete ma ei ta la'o ela ei soda naputam, fo fali tungga Manetualain dala ndoon, na, ei dei fo makalulutuk sama leo sila boe.”Ai ta kaboak, sama leo Manetualain hataholin fo buna-boan taa
6 Basa boe ma Yesus fee nakandandaak esa nae, “Hambu hataholi esa naena ai kaboaka nai osin dale. Ana nambue mai titilo sudik, fo sangga bubuluk ai ndia naboa so, do beik. Tehuu ai ndia bei ta naboa. 7 Basa boe ma ana nadenu mana tao osi nae, ‘Teuk telu ia so, au mai taa-taa fo sangga ai ia boan, tehuu au ta hambu hata-hata. De kekeko henin, huu ai ia kada na'a mamanak.’
8 Tehuu mana tao osi ndia nataa nae, ‘Ama boso mamanasa. Fee lelak ai ia teuk esa bali. Fo suek au fufu'a dae ndule huun, basa na, au tao pupuk neun, fo na'ao. 9 Mete ma teu mana maik, ai ia naboa, na, malole. Tehuu mete ma taa, na, kekeko henin leo.”’
Lamatuak Yesus tao nahai ina dea mbukuk, nandaa no fai huhule-haladoik
10 La'i esa, nandaa no hataholi Yahudi fai huhule-haladoin, Yesus neu fee nanonolik nai uma huhule-haladoik. 11 Nai ndia hambu inak esa dean mbukuk teuk sanahulu falu so, huu nitu tataon. Ana ta bisa nambadeik natetu aon. 12 Yesus nita inak ndia, boe ma noke nalan, de nafadan nae, “Ina! Hatematak ia ina hai so.” 13 Boe ma Yesus tao liman neu inak ndia. Nggengge neuk, ndia dea mbukun, nakandoo tutik. Boe ma ana noke makasi ma koa-kio Manetualain.
14 Tehuu malangga uma huhule-haladoik ndia manggalau, huu Yesus tao nahai hataholi nandaa no fai huhule-haladoik. Boe ma ana nafada hataholi no'uk kala nae, “Sosoda ina esa, na hambu kada faik nee tao ues. De malolenak hataholi kamahedik kala mai nai kada fai tao ues, fo sangga hataholi tao nahai sala. Boso mai nai fai huhule-haladoik!”b
15 Tehuu Yesus nataan nae, “Heh! Hataholi mana dea-matak. Nai fai huhule-haladoik, ei tao ues boe, hetu? Huu ei miu mbo'i sapi ma keledei, fo fee sala linu, hetu?! 16 Inak ia, ba'i Abraham numbu-sadun, sama leo ita. Nitu la malanggan hengge nalan teuk sanahulu falu so. Mete ma Au mbo'in nandaa no fai huhule-haladoik, na, sala, do?”
17 Yesus musun nala lamanene leo ndiak, boe ma ala mae. Tehuu hataholi no'uk kala lamahoko lo Ndia tatao malolen nala.
Lamatuak Yesus fee nakandandaak la'e-neu ai de'e kadi'i anak
18 Boe ma Yesus tuti kokolan bali nae, “Leo Au akasasamak Manetualain hataholin nala sama leo hata, bae? 19 Sososan sila kada lumak, tehuu tamba faik boe lamano'u. Sila natahuhuun sama leo ai de'e kadi'i anak. Hataholi selen nai osin. Boe ma ana moli mai dadik ai ina-huuk. Basa de mbuik kala mai landunu nai ba'en nala.”
Lamatuak Yesus fee nakandandak la'e-neu lalu teik
20 Basa de Yesus kokolak bali nae, “Leo Au akasasamak Manetualain hataholin nala no hata bali, bae? 21 Ndia sama leo lalu teik fo inak kala ha'i lalan, de seseok kana no hade uu saku dua,c fo tao loti no'uk. Boe ma hade uu ndia natafuu losa ina-huu, huu lalu teik faa anak ndia. Nakandandaak ia sosoan leo iak, Manetualain hataholin nala le'a-nole lala sala, de boe nakambela leo ndiak.”
Nusa sodak lelesun kadi'i anak
22 Basa boe ma Yesus asa mulai la'o leni kota Yerusalem leu. Ana singgo la'o-la'o tungga-tungga dalak nai kota ma nggolok, fo nanoli hataholi. 23 Nai mamanak esa, hambu hataholi esa natanen nae, “Ama Mesen! Meda kada hataholi lumak bisa hambu nasalala'ek, do?”
24 Ana nataa nae, “Nusa sodak lelesu mason dalek neu ndia kadi'i anak. De mbalak eik, fo ei bisa maso tungga ndia. Huu hambu hataholi no'uk nau soba maso, tehuu ta bisa. 25 Mete ma maumak nggoe lelesun so, na, dei fo ei mambadeik nai deak, fo dedele lelesu, ma eki moke tulun mae, ‘Lamatuak! Soi lelesu dei!’
Tehuu dei fo ana nataa nae, ‘Ei ia, see? Au ta alelak ei!’
26 Boe ma ei mae, ‘Talo bee de, lamatuak ta malelak ai? Ai ndia mateme mi'a-minu mia lamatuak. Lamatuak boe oo nateme nanoli ai nai ai okofoon nala.’
27 Boe ma dei fo ana nataa nae, ‘Isinaak au afada so ae, au ta alelak ei! Ei ia, kada hataholi mana tao manggalauk. Boke malai heok ia!’d
28 Boe ma mete ma Manetualain naketu basa hataholi dede'an, na, dei fo kada ei mamatani makaleleu ma mamanasa. Huu ei mita ba'i Abraham, ba'i Isak, ba'i Yakob, ma basa Manetualain mana kokolan nala, maso langgatuuk lai nusa sodak so. Tehuu kada ei nana husi henik mini deak miu.e 29 Dei fo hataholi mai leme dae-bafok bu'un nala mai, leme ledo sasadun mai losa ledo tetesan; neme kii mai losa kona, fo langgatuuk la'a no'u nai Manetualain uma manen.f 30 Tanda matalolole dede'ak ia; mete ma Manetualain naketu hataholi dede'an, na, dei fo hambu hataholi makahuluk, nae hetuk ndia kada hataholi kadi'ik, tehuu ana hambu hada-holomata ina-huuk. Ma hambu hataholi makahuluk nae, ndia hataholi ina-huuk, naa te Manetualain taok ndia, kada hataholi kadi'ik.”g
Lamatuak Yesus tuda kasian neu kota Yerusalem isin nala
31 Faik ndia, hambu hataholi Farisi hida mai lasale Yesus, boe ma lafada lae, “Malolenak Ama Mesen heok dook muni mamana fe'ek muu, huu mane Herodes sangga tao nisa Ama.”
32-33 Boe ma Yesus nataa nae, “Heeh! Tou lasik ndia manggalaun ana seli! Ei miu mafadan mae, ‘Au husi heni nitu, ma tao ahai hataholi kamahedik kala nai faik ia ma fo'a mai. Neu binesan, bei fo Au ueng basan so.’ Mae talo bee boe oo, Au bei nau tao ues faa bali, nai Au lala'ong uni Yerusalem uu. Huu hataholi Yerusalem asa lahiik tao lisa Manetualain mana kokolan nala.
34 Awii, hataholi Yerusalem mala, ei! Ei ia fo mana mambue tao misa Manetualain mana kokolan nala, ma mbia makamate nadedenuk, fo mai latudu Manetualain dalan neu ei. La'i no'uk Au nau akabubua fo anea ei so, suek babaa ala ei mima manggalauk mai, sama leo manu ina nasulu nala anan nala neu lidan dale. Tehuu ei ta nau. 35 Hatematak ia, Manetualain ta mbali ei uma huhule-haladoim so bali. De mbila-binesak te louk so. Dei fo ei ta mita Au bali, losa ei manaku mae,
‘Manetualain fee baba'e-babatik neu hataholi fo mana mai neni Manetualain naden,
huu Manetualain nadenu Ndia so!”’h