Hataholi Farisi ma hataholi Saduki la sangga dalak fo latuda Lamatuak Yesus
16
La'i esa, hambu hataholi Farisi ma hataholi Saduki hida leni Yesus leu. Ala sangga latane-lataak lo Ndia fo sangga dalak latuda Ndia. Huu ndia de ala loke Ndia lae, “Ama! Tulun matudu tanda heran dei, fo dadik buti nae, Ama hambu koasa neme Manetualain mai so.”a2 Tehuu Yesus nataa nae, “Mete ma ledo tesa ma lalai mbila, na, ei tanda mae, ‘Fo'a ta uda.’ 3 Ma mete ma ledo sadu ma lalai ko'a nggeok, na, ei tanda mae, ‘Leledon ia sangga uda.’ Mete ma ei bisa tanda fai leo ndiak, na, hatina de ei ta bisa malelak tanda-tanda dae-bafok babasan? 4 Wei! Ei hataholi hatematak ia, kada malelak tao manggalauk! Ei ta mbali Manetualain! Mae ei moke tanda heran, tehuu Au ta tao. Huu makahulun Manetualain tao tanda heran pake Ndia mana kokolan Yunus. De, dai ndia so!” Yesus kokolak basa leo ndiak, boe ma Ana la'o ela sala.b
Lamatuak Yesus fee nanonolik nae, mata neuk neu hataholi Farisi ma hataholi Saduki la lele'a-nonolen
5 Ledo-eik Yesus asa losa dano selik, bei fo Ndia ana mana tunggan nala lasaneda lae, ta leni lepa-nggee. 6 Ana namanene ala kokolak leo ndiak, boe ma nafada sala nae, “Ei musi mata neuk neu hataholi Farisi ma hataholi Saduki la lalu tein.”c
7 Ndia ana mana tunggan nala lamanene leo ndiak, boe ma ala lasapangga. Ala lakokola aok lae, “Tou lasik kokolak hata ndia? Fama Ana kokolak leo ndiak, huu ita ta teni loti, do?”
8 Tehuu Yesus bubuluk sila dudu'an. De Ana kokolak nae, “Wei! Ei ia ana seli maa! Hatina de ei kokolak la'e-neu loti! Ei ta mamahele Au, do? 9 Ei bei ta malelak Au koasang, do? Huu faik ndia Au bibi'i loti kalimak sila fo fee hataholi 5.000 la'a ndia, ei makaduduluk mala loti nana na'a elak kala lembeneu hida?d 10 Basa de leo beek bali no loti kahituk sila fo Au ba'e fee hataholi 4.000 sila? Ei makaduduluk mala loti nana na'a elak kala lembeneu hida?e 11 Hatina de ei ta malelak Au kokolang isinaak ndia? Au ta kokolak la'e-neu loti. Tehuu Au nau asanenedak ei, fo suek ei mata neuk mia hataholi Farisi ma hataholi Saduki la nanonolin nala. Huu sila nanonolin bisa le'a-nole nala hataholi no'uk, sama leo lalu teik tao natafuu loti.”
12 Yesus kokolak leo ndiak, bei fo lalelak lae, Ana ta kokolak la'e-neu loti. Tehuu Ana kokolak la'e-neu hataholi Farisi ma hataholi Saduki la nanonoli kasalan.
Petrus manaku nae, Lamatuak Yesus ndia, na Karistus
13 Basa ndia boe ma Yesus asa leni dae baba'ek fo mana dekak no kota Kaisarea Filipi. Nai dala laladak, Ana natane sala nae, “Tungga hataholi la kokolan, na lae, Au, Hataholi Isi-isik ia, see?”
14 Ala lataa lae, “Hambu lae, Ama ia, na Yohanis Mana Salanik nasoda fali so. Fe'ek lae, fama Ama ia, ba'i Elia. Fe'ek bali, na lae, ba'i Yermia. Mete ma taa, na, Manetualain mana kokola fe'en makahulun ele.”f
15 Boe ma Yesus natane sala bali nae, “Mete ma tungga ei mesa nggei dudu'am, na, Au ia, see?”
16 Boe ma Simon Petrus nataa nae, “Ama ia, Karistus, fo ndia Hataholi fo makahulun ele Manetualain helu so fo sangga nadenun mai! Ma Ama ia, Anak neme Manetualain fo nasoda nakandondoo henin!”g
17 Boe ma Yesus nae, “Simon, Yunus anan aa! O ia, maua-manalek bou! Huu hataholi ta nafada o dede'ak ia. Tehuu Au Amang nai nusa sodak nafada o. 18 Mamanene baa! Hatematak ia Au foi o nade ‘Petrus’. Huu nadek ndia ndandaan, fo ndia ‘batu’.h Huu o namahehelem matea leo batu so, de dei fo o dadik fanderen neu Au hataholi kamahele nggala. Mae ala hambu doidosok losa mate boe oo, lahele lakandondoo henin. 19 Dei fo Au fee o haak fo makaneni Au hataholi nggala, sama leo o to'u nusa sodak nggoen. Huu hata fo o ka'im nai dae-bafok ia, na ndia Manetualain ka'in nai nusa sodak boe. Ma hata fo o mbo'im nai dae-bafok ia, na Manetualain mbo'in nai nusa sodak boe.”i
20 Yesus kokolak basa leo ndiak, boe ma Ana ka'i sala fo ta bole lafada sudi see lae, Ndia ndia, Karistus.
Lamatuak Yesus nafada memak la'e-neu Ndia mamaten ma Ndia nasoda falin
21 Mulai neme faik ndia mai, Yesus nafada ana mana tunggan nala nae, “Au musi uni kota Yerusalem uu. Tehuu dei fo nai ndia, Au hambu doidosok no'uk neme basa lasi hadak kala, malangga anggama Yahudi malanggan nala, ma mese anggama la. Dei fo ala tao lisa Au, tehuu neu binesan, Au asoda fali.”j
22 Yesus nafada leo ndia, boe ma Petrus hela nalan neu dalak bifin, de ka'in nae, “Ama boso kokolak leo ndiak! Ta bisa Manetualain elan leo ndiak!”
23 Tehuu Petrus kokolan ndia, ta tungga Manetualain hihiin. Huu ndia de Yesus ka'i nasafalin nae, “Heeh! Boke heok ia! Ndia, nitu malanggan kokolan ndia! O boso matabaa mala Au! Kada o dudu'a tungga hataholi hihiin, huu ta tungga Manetualain hihiin!”
24 Boe ma Yesus nanoli ana mana tunggan nala nae, “Hataholi mana nau tungga Au, ana musi nahele tungga nakandoo tungga-tungga faik! Ana musi nafalende heni ndia hihii hehelin, fo tungga kada Manetualain hihiin. Mae hataholi sangga tao lisan boe oo, kada ana musi tungga nakandoo, sama leo hataholi lemba ndia ai ngganggen fo neu mate.k 25 Hataholi sadia mate huu ana tungga Au, dei fo ana bisa nasoda nakandoo no Manetualain. Tehuu hataholi fo kada nau nasoda soa-neu ndia ao-ina hehelin, dei fo ana ta bisa nasoda nakandoo no Manetualain!l 26 Mamanene baa! Mete ma o hambu basa dae-bafok isin, tehuu Manetualain timba heni o, na, nanalan hata? Mae o lemba muni basa dae-bafok isin boe oo, o ta bisa tukan neu o samanem!
27 Au afada ei la'e-neu basa dede'ak kala ia, huu Au ia, Hataholi Isi-isik. Dei fo Au konda fali maing, pake Au Amang koasa ina-huun ndia, sama-sama ua Ndia ata nusa sodan nala. Faik ndia, dei fo Au bala hataholi lala'en tungga hata fo ana taon so.m 28 Masaneda neulalau baa! Neme ei basa nggei ia, dei fo hambu hataholi hida fo bei ta mate losa faik bee ala lita Au, Hataholi Isi-isik ia, dadik Manek fo mana to'u palenda.”