3 Basa de Yesus nda'e neu nanggatuuk nai lete Setun. Boe ma ana mana tunggan nala mai lakokola lo Ndia mesak kana lae, “Ama! Hena mafada seluk Ama kokolam isinaak ndia. Meda Ama fafali main ndia, la'e-neu fai hida bae? Ma ndia tandan nala, leo hata? Dae-bafok fai babasan, dei fo dadi leo beek?”

4 Basa boe ma Yesus nataa nae, “Manea aok neulalau baa! Fo ei boso nana kedi nalak. 5 Huu dei fo hataholi mata-matak kala mai fo babamba kalak lae, ‘Au ia Karistus, Hataholi fo Manetualain heluk ndia neme makahulun mai so.’ No leo ndiak, ala kedi lala hataholi no'uk. 6 Mete ma ei mita hataholi latati do, ei mamanene lae, hambu natatik sudi nai bee, na, ei boso bii. Huu dede'a leo ndiak ndia, musi dadi dei. Tehuu dae-bafok fai babasan bei ta losa. 7 Dei fo leo esa natati laban leo fe'ek. Nusak esa natati laban nusa fe'ek. Hambu dae nangge'o sudi nai bee. Ma fai ndoes boe napadaka nalan seli! 8 Tehuu basa sila, bei fo tanda makasososak fo nafada nae, dae-bafok fai babasan deka-deka mai so. Ndia sama leo inak bei fo nameda tein hedis, huu ndia fain sangga bonggi dekak so.

9 De ei musi manea aok neulalau baa! Huu dei fo ala tao doidoso ma tao lisa ei. Ma hataholi leme basa nusak kala mai, dei fo binci lalan seli neu ei, huu ei tungga Au.^a 10 Faik ndia, hataholi no'uk kala heok lasadea ma ta nau lamahele Au bali. Esa binci esa, ma lase'ok esa no esa. 11 Dei fo masapepekok kala lae sila ndia, Manetualain mana kokolan. Ma hataholi no'uk kala lamahele sala. 12 Dei fo hataholi manggalaun nala tamba faik, na, tamba lamano'u, losa hataholi ta lasue ao esa no esa bali. 13 Tehuu hataholi fo mana nakatataka nakandoo losa maten, na, neu ko Manetualain nasala'e nala ndia.^b 14 Huu hataholi musi tui-bengga Manetualain Hala Malolen losa dae-bafok bu'un nala, fo suek basa hataholi bisa bubuluk Manetualain dala soda ndoon. Basa ndia, bei fo dae-bafok fai babasan mai.”

15 Yesus kokolak nakandoo nae, “Manetualain mana kokolan Daniel sulak, la'e-neu hataholi esa manggalaun ana seli so. Ana maso mai, fo nambadeik neu mamana lulik, nai Manetualain Uma Ina Huhule-haladoin. No leo ndiak, ana tao nanggenggeo mamanak ndia. Huu ndia de Manetualain heok nasadea, la'o ela mamanak ndia. Mete ma ei mita leo ndiak so, na, mata neuk leo baa! (See lees susulak ia, na musi bubuluk neulalau!)^c 16 Huu ndia dadik tanda nae, fai toto'ak nai lelesu matan so. Mete ma mita leo ndiak so, na, hataholi manai propensi Yudea fo'a malai mini letek miu leo. 17 Mete ma hambu hataholi kalua neme uman mai, na, boso fali miu ha'i buas bali. Malai lai-lai leo, fo suek boso hambu soe. 18 Hataholi manai osi, na boso fali fo ha'i sidi nalusek bali. Malai makandoo leo!^d 19 Hataholi fo kasian nalan seli, ndia ina kailus ma ina mana masusu ana mbimbila anak kala. Huu ala ta bisa lalaik latingga. 20 De malolenak ei hule-haladoi fo soe ndia ta mai la'e-neu oe faak do, mai la'e-neu fai hahae tao ues. 21 Huu faik ndia toto'an ana seli! Mulai neme Manetualain nakadadadik dae-bafok ia losa hatematak ia, hataholi bei ta latonggo lo toto'a ina-huuk mata leo ndiak.^e 22 Tehuu ei maua-manale malan seli, huu Manetualain tao keke'u faik ndia. Mete ma taa, na, ta hambu hataholi esa boe bisa nakatataka nasoda. Huu Manetualain sue Ndia hataholin fo hele nalak kala, de Ana tao keke'u fai toto'ak kala sila.

23 Mete ma faik ndia losa so, na, dei fo ei mamanene hataholi nae, ‘Mita dei! Karistus nai ia!’ Ma hataholi fe'ek lae, ‘Karistus nai ele!’ Tehuu ei boso mamahele baa! 24 Huu dei fo hambu hataholi kalua fo babamba kalan nae, ‘Au ia, Karistus!’ Ma fe'ek kala bali lae, ‘Au ia, Manetualain mana kokolan.’ Dei fo ala tao tanda heran mata-matak pake nitu koasan fo pepeko hataholi. Ala soba-soba fo suek Manetualain hataholin nala nana kedi nalak! 25 De ei musi manea aok neulalau baa! Fai toto'ak kala sila bei ta losa, tehuu Au asanenedak memak ei baa!

26 Mete ma hataholi nafada ei nae, ‘Karistus nai mook ele!’ na ei boso mini ele miu. Ma mete ma hambu nae, ‘Karistus nai uma ia dalek!’ na ei boso mamahele sila pepekon nala ndia. 27 Huu Au ia, Hataholi Isi-isik. Dei fo Au fali uni dae-bafok ia mai, na basa hataholi la lita Au, sama leo hataholi lita mahadok nasa'a neme dulu mai neni muli neu.^f

28 Mete ma Au fali maing, dei fo ei bubuluk Au nai bee. Sama leo hataholi bubuluk nae, mete ma mbui mana'a mbombolak lakabubua lai mamanak esa, na, neu ko hambu mbombolak nai ndia.”^g

29 Basa de Yesus tuti bali, fo nafada ana mana tunggan nala nae, “Mete ma fai toto'ak kala sila late'e,

30 Boe ma basa hataholi lita tanda nai lalai lae, Hataholi Isi-isik sangga fali main. Basa hataholi nusak kala malai dae-bafok ia lita leo ndiak, boe ma ala bii, losa lamatani. Dei fo Au konda mai ua ko'as, bei fo ala lita Au koasang, ma basa Au mandela-masa'ang.ⁱ 31 Boe ma Au pake to'ik fo liin ina-huuk, de palenda Manetualain ata nusa sodan nala fo leu lakabubua lala basa hataholi fo Au hele alak kala leme basa dae-bafok bu'un nala mai, neme dulu mai losa muli; neme kii mai losa kona.”

32 “Au ha'i conto leo ai huuk. Mete ma doon mulai kuni, na, ndia tanda nae, fai hanas deka-deka mai so. 33 Leo ndiak boe, mete ma ei mita fai toto'ak kala mai so, sama leo Au afada ei isinaak ndia so, na ndia tanda nae, Au deka-deka mai so. 34 Hatematak ia mamanene neulalau! Neme basa hataholi bei kasodak hatematak ia, dei fo hambu bei ta mate, naa te fai toto'ak kala mai so. 35 Mae lalai ma dae-bafok mopo heni sala so, tehuu Au dede'a-kokolang ia lakatataka ta no mana basak.”

36 “Ta hambu hataholi bubuluk faik bee, Au fali maing. Manetualain ata nusa sodan nala boe oo ta bubuluk, ma Au boe oo ta bubuluk. Kada Au Amang mesak kana bubuluk. 37 Huu Au ia, Hataholi Isi-isik. Mete ma Au fali maing, na, dei fo ndia sama leo makahulun ele, neu faik fo Noh bei nasoda.^j 38 Faa tuak ndia bei ta mai, tehuu hataholi la la'a-linu neulalau, ma lasaok no'u, sama leo basa faik. Ala tao leo ndiak lakandondoo henin, losa Noh maso neni ofa ina-huuk ndia dalek neu. 39 Tehuu ledo-eik faa tuak mai sapu heni basa sala, bei fo matan nala lalaak, fo bubuluk hata mana dadik ndia so. Leo ndiak boe, dei fo no Au mamaing.^k 40 Faik ndia, mete ma hataholi dua tao ues lai osi dale, na, kada nggengge neuk Manetualain so'u nala esa, ma fe'ek Ana elan. 41 Mete ma inak dua mbau hade, na, nggengge neuk Manetualain so'u nala esa, ma fe'ek Ana elan.

42 Huu ndia de ei musi manea leledo-le'odaen, huu ei ta bubuluk fai hida ei Lamatuam fali main. 43 Dudu'a neulalau baa! Mete ma maumak bubuluk le'odae na'o sangga mai, na, ana nanea nakandoo fo suek na'o boso maso neni uman neu. 44 Huu ndia de ei musi mahehele. Huu Au fafali maing ndia, kada kaiboik!”^l

45 Basa de Yesus kokolak nakadaik bali nae, “Ei musi dadik sama leo ata fo tungga nakandondoo henin ndia malanggan hihiin. Mete ma malanggan neni dae dook neu, na, ana so'u nala ata mata leo ndiak, suek nakaneni basa ndia uma isin nana'a-nininun nala. 46 Mete ma malanggan fali fo nita atan tao ues neulauk, na, neu ko ana suen. 47 Mamahele Au, huu dei fo malanggan ndia fee ata koasa fo nakaneni basa hata-heton nala.

48 Tehuu mete ma ata ndia manggalauk, na, neu ko ana kokolak nai dalen nae, 49 ‘Malole! Malanggang la'o so, de see bubuluk nae fai hida ana fali bae!’ Ana dudu'a leo ndiak, boe ma ana mulai mbomboko nonoo mana tao ue fe'en nala. Ma ana nanggatuuk na'a-ninu neulalau no'u no mana mafuk kala. 50 Tehuu ta bubuluk, naa te kaiboik ndia malanggan fali. 51 Boe ma malanggan ndia huku belak neu ndia, de ana mbia henin deak neu, fo ana leo no hataholi mana dea-matak kala sila. Nai mamanak ndia, basa sala lamatani lakaleleu, huu ala doidoso lalan seli.”