Yohanis Mana Salanik tao uen
3
1-2 Faik ndia, Tiberius dadik keser fo to'u palenda nai Roma, teuk sanahulu lima so. Pontius Pilatus dadik nggubenol nai propensi Yudea. Herodes dadik nggubenol nai propensi Galelea. Herodes ka'an Filipus dadik nggubenol nai propensi Iturea ma propensi Trakonitis. Ma Lisanias dadik nggubenol nai propensi Abilene.aFaik ndia boe oo, Hanas ma Kayafas dadik malangga anggama Yahudi malangga ina-huun nai kota Yerusalem.
Faik ndia, Yohanis, fo Sakarias anan ndia, leo nai mamana nees fo doon seli neme nggolok mai. Manetualain feen heheluk neme ndia. 3 Yohanis namanene basa, boe ma ana neni basa nggolok kala fo mana dekak no lee Yarden, fo nafada hataholi la nae, “Ei musi manaku ma la'o ela basa ei sala-singgom mala, fo suek Manetualain koka heni sala-singgok kala sila. Ma ei musi salani dei, fo dadik tanda nae, ei malole mia Manetualain so.”
4 Makahulun ele, Manetualain mana kokolan ba'i Yesaya sulak la'e-neu Yohanis ia nae,
“Hambu hataholi nai mamana nees nanggou nae,
‘Basa hataholi la mahehele tao neulalau dalak, fo simbok Lamatuak mamain!
Tao mandoo dalak fo soluk Ndia.
5 Fua matetu leak kala.
Kali tao matetu letek kala.
Tao mandoo dala pekok kala,
tao neulalau dalak kala fo bei nakatunuk kala.
6 Suek hataholi la leme basa hataholi nusak kala mai
bisa bubuluk lae, Manetualain nau nasala'e nala hataholi
leme sila sala-singgon nala mai.”’b
7 Hataholi no'uk kala sudi leme bee mai fo loke Yohanis salani sala. Tehuu nasapalak kasa nae, “Wei! Ei masapepekok kala! Ei sama leo mengge kalasok! Boso mae hetuk ei bisa makambo'ik mima Manetualain huhukun mai, no kada taok ei hondak! Taa! Ta dook bali, Manetualain huku basa hataholi la fo ta mana hondak no tetebes.c 8 Ei boso dudu'a mae, ‘Au ia ta hambu huhukuk, huu au ia ba'i Abraham numbu-sadun.’ Hambu nai bee leo ndiak? Ndia ta bisa tulu-fali nala ei, huu ta tao ei dadik malalaok. Manetualain nabe'i tao batu la ia dadik Abraham numbu-sadun. Au afada ei baa! Matudu tungga ei sodam mae, ei heok masadea la'o ela ei sala-singgom mala so, ma ei masafali tungga Manetualain so.d 9 Ei musi tao dede'a malole. Mete ma taa, na, Manetualain huhuku mabelan tuda neu ei, sama leo hataholi pake taka fo kekeko heni ai no okan. Leo ndiak leo! Mete ma ai buna-boan ta malole, na, ai ndia sosoan taa! De malolenak kekeko henin, fo mbian neni ha'i dale neu.”e
10 Basa de hataholi no'uk kala latane Yohanis lae, “De ai musi tao hata?”
11 Boe ma ana nataa nae, “Mete ma o badum dua, na, fee esa neu hataholi badu taak. Mete ma o kanana'ak, na, ba'e fee hataholi nana'a taak.”
12 Boe ma mana susu bea la mai, fo loke Yohanis salani sala boe. Ala latane lae, “Ama mesen! Ai musi tao leo beek?”f
13 Ana nataa nae, “Ei mahiik kada masapepeko. Tehuu hatematak ia, ei musi maue no ndoos. Boso susu bea lena-lenak neme mana palenda heti-heun mai. Elan fo lau-inggu la bae bea nandaa no heti-heuk.”
14 Hambu soldadu hida lai ndia boe. Ala latane Yohanis lae, “Mete ma ai, na, talo bee? Ai musi tao hata?”
Boe ma ana nataa nae, “Boso mambue moke hataholi la doin nala, tungga ei hihiim. Ma boso mambue fee salak neu hataholi ta no bolo dalan. Ei musi moke makasi, ma simbo ei nggadim mala no teteben ma dale loak.”
15 Basa hataholi lamanene kokolan ndia, boe ma ala mulai lakisuk de lakukutuk lae, “Awii! Naa fo Yohanis ia, Karistus, fo Manetualain helu sangga nadenun mai neme makahulun mai so!”
16 Tehuu Yohanis nafada sala nae, “Mamanene neulalau! Dei fo hambu Hataholi esa ana seli lena heni au, sangga mai. Mae kada dadik neu Ndia atan boe oo, au ta andaa.g Au kada bisa salani ei unik oe, tehuu dei fo Ana tao lena heni au, huu Ana tao nahenu ei dalem mala nenik Manetualain Dula-dale Malalaon. Dei fo Ana tao nalalao ei, sama leo hataholi pake ha'i fo hotu heni kadafuk. 17 Ana huku hataholi fo mana tao salak kala, sama leo hataholi mana tao ue daek pake ani, fo tao kofe'ek hade langgak neme hade neuk mai. Boe ma ana mbeda hade neuk neni mbolek dale neu, tehuu ana hotu heni hade langgak. Leo ndiak boe, dei fo Karistus huku hataholi mana tao salak kala, ma mbia heni sala leni ha'i ta mana matek dalek neu.”
18 No leo ndiak, Yohanis fee nasanenedak neu hataholi dede'a mata-matak, ma nafada sala Manetualain Hala Malolen.
19-20 Faik ndia, Yohanis mulai kokolak ledo-ledo la'e-neu Herodes tataon boe. Dede'an leo iak: Herodes ndia, nggubenol nai propensi Galelea. Ndia salan nala makadotok nalan seli so. Conto leo ana namoa nala fadin saon so, nade Herodias. Naa te fadin bei kasodak, ma bei ta naelak no Herodias. Herodes dala sodan ta malole ndia, tao nala Yohanis sapan ledo-ledok, losa Herodes lesuha'in nakase'e nalan seli neu ndia. Boe ma Herodes humu nalan, de nandeen neni bui dale neu.h
Yohanis salani Lamatuak Yesus
21 Makahulun, neu faik fo ala bei ta humu lala Yohanis, ana salani hataholi no'uk. Ma ndia boe oo salani Yesus. Basa boe ma Yesus hule-haladoi, de lalai natahu'ak. 22 Boe ma Manetualain Dula-dale Malalaon konda neu Ndia. Dulak ndia mata-aon leo mbui lunda. Boe ma hambu halak neme lalai mai nae,
“O ia, Au Ana susueng.
O tao mala Au amahoko taa-taa.”i
Lamatuak Yesus bei-ba'in nala, tungga ama Yusuf
23 Neu faik fo Yesus mulai nafada hataholi la la'e-neu Manetualain dala sodan, meda Ndia teuk 30. Hataholi la lalelak lae, Yesus ndia, na Yusuf Anan. Yusuf bei-ba'in nala, sila:
Yusuf aman, Eli.
24 Eli aman, Matat.
Matat aman, Lewi.
Lewi aman, Melki.
Melki aman, Yanai.
Yanai aman, Yusuf.
25 Yusuf aman, Matatias.
Matatias aman, Amos.
Amos aman, Nahum.
Nahum aman, Hesli.
Hesli aman, Nagai.
26 Nagai aman, Maat.
Maat aman, Matatias.
Matatias aman, Semein.
Semein aman, Yosek.
Yosek aman, Yoda.
27 Yoda aman, Yohanan.
Yohanan aman, Resa.
Resa aman, Serubabel.
Serubabel aman, Sealtiel.
Sealtiel aman, Neri.
28 Neri aman, Melki.
Melki aman, Adi.
Adi aman, Kosam.
Kosam aman, Elmadam.
Elmadam aman, Er.
29 Er aman, Yosua.
Yosua aman, Elieser.
Elieser aman, Yorim.
Yorim aman, Matat.
Matat aman, Lewi.
30 Lewi aman, Simeon.
Simeon aman, Yahuda.
Yahuda aman, Yusuf.
Yusuf aman, Yonam.
Yonam aman, Elyakim.
31 Elyakim aman, Melea.
Melea aman, Mena.
Mena aman, Matata.
Matata aman, Natan.
Natan aman, Dauk.
32 Dauk aman, Isai.
Isai aman, Obet.
Obet aman, Boas.
Boas aman, Salmon.
Salmon aman, Nahason.
33 Nahason aman, Aminadab.
Aminadab aman, Admin.
Admin aman, Arni.
Arni aman, Hesron.
Hesron aman, Peres.
Peres aman, Yahuda.
34 Yahuda aman, Yakob.
Yakob aman, Isak.
Isak aman, Abraham.
Abraham aman, Tera.
Tera aman, Nahor.
35 Nahor aman, Seruk.
Seruk aman, Rehu.
Rehu aman, Pelek.
Pelek aman, Eber.
Eber aman, Sela.
36 Sela aman, Kenan.
Kenan aman, Arpaksad.
Arpaksad aman, Sem.
Sem aman, Noh.
Noh aman, Lamek.
37 Lamek aman, Metusalak.
Metusalak aman, Henok.
Henok aman, Yared.
Yared aman, Mahalalel.
Mahalalel aman, Kenan.
38 Kenan aman, Enos.
Enos aman, Set.
Set aman, Adam.
Adam ndia, fo Manetualain ana nakadadadin.