Yohanis Mana Salanik nanoli hataholi la
3
Neu faik fo Yesus ina-huu so, boe ma Yohanis Mana Salanik mulai nanoli hataholi la lai mamana nees, nai propensi Yudea. 2 Ana nafada nae, “Tolanoo susue nggala ei! Ei musi manaku ma la'o ela ei sala-singgom mala, fo fali mini Manetualain miu leo. Huu hatematak ia, basa hataholi la bisa maso dadik Manetualain hataholin nala so.”a3 Makahulun Manetualain mana kokolan esa, nade Yesaya sulak la'e-neu Yohanis so nae,
“Dei fo hambu hataholi mana manggouk nai mamana nees nae,
‘Basa hataholi mahehele fo tao neulalau dalak,
fo soluk Manetualain mamain!
Tao mandoo dalak soa-neu Ndia!”’b
4 Yohanis ia dala sodan sama leo Manetualain mana kokola makahulun nala. Ndia balo'an, nana taok neme banda onta bulun mai. Kalikeen, nana taok neme banda loun mai. Ndia nana'a-nininun, lamak ma fani oe nula.c
5 Faik ndia, hataholi no'uk kala mai fo sangga latonggo lo Yohanis. Ala leme kota Yerusalem ma basa propensi Yudea isin mai. Sila boe oo leme nggolok kala mana dekak no lee Yarden mai. 6 Ala lalengga dalen nala, ma manaku basa sila sala-singgon nala, basa de Yohanis salani sala leme lee Yarden.
7 Faik ndia, hataholi la leme paltei anggama Farisi ma paltei anggama Saduki mai boe, ala mai fo loke Yohanis salani sala. Tehuu ledo-eik ana nita sala, boe ma nasapalak kasa nae, “Heeh! Ei ia sama leo mengge fo masapepekok! Dei fo Manetualain huku ei, huu ei tatao-nono'i manggalaum mala. Weih! Boso mae hetuk ei bisa malai kalua mima Ndia huhukun mai.d 8 De malolenak ei fali mini Manetualain miu, ma la'o ela basa ei sala-singgom mala. Basa ndia, na tao dede'a malole, sama leo ai huu mana maboa boa malole. 9 Boso mae hetuk ei sodak so, huu ei ia ba'i Abraham numbu-sadun. Mamahele au! Huu Manetualain bisa tao nala batu la ia, dadik neu ba'i Abraham numbu-sadun.e 10 Mata neuk baa! Huu Hataholi fo mana to'u taka nahehele fo sangga kekeko ai huu boa taak. Kekeko basa, boe ma Ana mbian neni ha'i dale neu.f
11 Hatematak ia au salani ei unik oe, fo dadik tanda nae, ei heok masadea ela ei sala-singgom mala so. Tehuu dei fo Hataholi esa ana seli lena heni au, sangga mai. Mae kada dadik neu Ndia atan boe oo, au ta andaa. Dei fo Ana tao nahenu ei dalem mala no Manetualain Dula-dale Malalaon. Ndia boe oo tao nalalao ei, sama leo hataholi pake ha'i fo hotu kadafuk.g 12 Huu Ana to'u oko henuk no isik, fo sangga da'i heni uun. Basa boe ma Ana tao isik kala leni karon dale leu. Tehuu Ana mbia heni uuk kala leni ha'i dale leu fo mbilan ta mana matek.”
Yohanis salani Lamatuak Yesus
13 Faik ndia, Yesus loe neme Galelea mai neni lee Yarden neu. Ana mai noke Yohanis salani Ndia, 14 tehuu Yohanis ta nau. Ana sapa nae, “Talo bee de au musi salani Lamatuak? Ta kasafalik ia, do? Lamatuak musi salani au dei. Huu au paluuk ndindia, maa!”
15 Tehuu Yesus nataa nae, “Ta hata-hata. Huu soa-neu hatematak ia, na elan fo ka'a ndia salani Au. No leo ndiak, na ita tungga Manetualain hihiin.”
Yohanis namanene leo ndiak, boe ma ana nataa nae, “Kada neme Lamatuak mai.” De ana salani Yesus.
16 Salani nate'e, boe ma Yesus kalua neme lee dale mai. Tehuu kada nggengge neuk, lalai natahu'ak. Boe ma Ana nita Manetualain Dulan konda neu Ndia, sama leo lunda mai sa'e neu Ndia. 17 Boe ma ala lamanene Manetualain halan neme lalai mai nae,
“Ndia ia, Au Ana susueng.
Ana tao namahoko Au daleng taa-taa.”h