2 De hataholi la leme sudi bee mai. Ala lakahohombu, de lakasese'e lai uma dale losa lelesu bafan. Basa boe ma Yesus nafada sala Manetualain hihiin.

3 Yesus bei kola-kola, te hataholi haa ndolo leni hataholi lu'uk esa neni Ndia neu. 4 Huu hataholi no'un seli so, de ala ta bisa loo hataholi ndia losa Yesus matan. Boe ma ala hene leni uma lain leu, de ala tao bolok nandaa no Yesus langgan. Ledo-eik ala tao lala bolok ndia, boe ma lakonda hataholi ndia no nene'in.^a 5 Ledo-eik Yesus nita sala, boe ma Ana bubuluk hataholi la sila lamahele tebe-tebe leu Ndia. De Ana nafada hataholi lu'uk ndia nae, “Ana, ei! Au fee ambon neu o sala-singgom mala so!”

6 Tehuu nai ndia hambu mese anggama Yahudi hida langgatuuk. Ledo-eik lamanene Yesus kokolan ndia, boe ma ala lameda ta malole nai dalen nala. 7 Boe ma ala lakokola lae, “Hataholi ia nambalani nalan seli kokolak leo ndiak! Kada Manetualain mesak kana fo bisa fee ambon neu hataholi sala-singgon nala. Tehuu hataholi ia kokolan nonook leo bali Manetualain ndindia. Ana kokolak nakadadaek nalan seli ndia so!”

8 Tehuu Yesus bubuluk basa sila dalen nala so. Boe ma Ana kokolak nae, “Ei boso dudu'a leo ndiak! 9-10 Bee ndia lofo anak? Mete ma Au afada hataholi lu'uk ia ae, ‘O sala-singgom hambu ambon so,’ na, ei ta bubuluk ana dadi leo ndiak, do taa. Tehuu mete ma Au ae, ‘Fo'a leo! Lu'a mala o nene'im fo fali leo.’ Mete ma ana fo'a tutik so, na, dei fo ei mita mia mata de'e hehelim mala mae, Au ia, Hataholi Isi-isik. Au aena koasa ma haak fo fee ambon neu hataholi sala-singgon.”

Basa boe ma Yesus nafada hataholi lu'uk ndia nae, 11 “Mamanene baa! Hatematak ia o hai so! De fo'a fo lu'a mala o nene'im fo fali leo!”

12 Hataholi ndia namanene leo ndia, boe ma ana fo'a tutik. Boe ma ana lu'a nala nene'in, de ana la'o neni deak neu. Basa hataholi malai sila lita lo mata de'en nala. Boe ma basa sala lamanggonggoak, de lae, “Awii! Bei fo ai mita mata leo iak bae maa! Manetualain koasan memak ana seli maa!”

13 Basa boe ma Yesus neni dano Galelea bifin neu seluk. Hataholi no'uk kala mai latonggo lo Ndia, boe ma Ana nafada sala Manetualain hihiin.

14 Nai ndia hambu hataholi esa nade Lewi, fo Alfius anan. Ana tao ues nai mamana bae bea fo fee mana palenda Roma. Nandaa no Yesus la'ok tungga ndia, boe ma nita Lewi. De Ana nafadan nae, “Wei! Mai fo tungga Au!”

Lewi namanene Yesus nae leo ndiak, boe ma ana fo'a de ana tungga tutik Ndia.

15 Basa boe ma Yesus no ana mana tunggan nala langgatuuk la'a lai Lewi uman, sama-sama lo Lewi nonoo mana susu bean nala. Hambu hataholi fe'ek kala boe, la'a sama-sama lai ndia. Tungga hataholi Yahudi la dudu'an, na hataholi sila hataholi ta malole la. Neme hataholi fo mana manggatuuk mana'ak kala sila, hambu hataholi no'uk hii lamanene neu Yesus.

16 Faik ndia, mese anggama hida leme paltei Farisi mai, lita Yesus nanggatuuk na'a no mana susu bea la, ma hataholi ta malole la. Boe ma latane Yesus ana mana tunggan nala lae, “Talo bee de ei mesem nanggatuuk na'a no hataholi mana susu bea la, ma hataholi ta malole la?”

17 Tehuu Yesus namanene ala latane leo ndiak, boe ma nataa nae, “Hataholi kamahedik memak paluu dotel, tehuu hataholi ta kamahedik ta paluu dotel. Au mai ono-lau hataholi ta malole la. Tehuu Au ta mai ono-lau hataholi fo nameda aon ndoos so.”

18 La'i esa, paltei anggama Farisi hataholin nala puasa. Ala lita Yohanis Mana Salanik ana mana tunggan nala puasa boe. Tehuu ala ta lita Yesus ana mana tunggan nala puasa leo sila. Boe ma sila hataholin nala mai latonggo lo Yesus de latane lae, “Ama. Ai puasa. Ma Yohanis ana mana tunggan nala puasa boe. Tehuu hatina de Ama ana mana tunggan nala ta puasa?”

19 Boe ma Yesus nataa nae, “Memak ei bubuluk so, mete ma hataholi tao feta kabin, na, hataholi nana hokak kala ta puasa, tehuu la'a-linu losa lakabete. Mete ma tou mana kabin bei nai ndia, na, basa sala la'a-linu leu esa. 20 Tehuu mete ma faik esa hataholi fe'ek kala humu leni tou mana kabin ndia dei, na, nonoon nala dale hedi, bei fo ala puasa.”

21 Basa boe ma Yesus nafada nakadaik dede'a nakandandaak esa nae, “Ta hambu hataholi tanda tema beuk neu badu laak. Huu mete ma safen, na, dei fo tema beuk kukulu, fo badu laak ndia sidan boe namaloa. 22 Sama leo hataholi ta di'a tua beuk neu samba laak nalan seli, huu dei fo sambak ndia sidan, de loo heni tua ndia. De tua beuk, na musi di'an neni samba beuk dale neu.”^b [No leo ndiak, na Yesus nanoli sala nae, Ndia nanonoli beun, boso seseok kana no hataholi Farisi la nanonoli laan.]

23 La'i esa, nandaa no hataholi Yahudi fai huhule-haladoin, Yesus asa la'ok lesik osi la. Boe ma Ndia ana mana tunggan nala ketu lala hade-nggandum, de la'a.^c 24 Tehuu hataholi Farisi la suli lita sala, de lafada Yesus lae, “Hatina de O ana mana tunggam mala la'o lena ita anggaman heti-heun? Ala ketu hade-nggandum nandaa no fai hahae tao ues! Ei ta bole tao leo ndiak!”

25-26 Boe ma Yesus nataa nae, “Leo bee bae? Ei ta masaneda ba'i Dauk tutuin ndia. Faik ndia, tou lasi Abiatar dadik anggama Yahudi la malangga ina-huun. Ba'i Dauk no ana mana tunggan nala ndoe lalan seli so. Boe ma ala maso leni Manetualain Tenda Huhule-haladoin dalek leu, de ala ha'i lala loti fo malangga anggama la feen neu Manetualain so, de ala la'a. Naa te kada malangga anggama la bole la'a, tehuu hataholi fe'ek ta bole la'a. Boe ma ba'i Dauk asa la'a, tehuu ta hambu hataholi soli salak neu sala.”^d

27 Boe ma Yesus nafada nakadaik nae, “Ei boso mafalende henin, te Manetualain tao fai hahae tao ues fo dadik neu baba'e-babatik, fo suek tulu-fali ita hataholi. Tehuu Ana ta tao ita hataholi fo tungga kada fai hahae tao ues heti-heun. 28 De Au ia, Hataholi Isi-isik. Au aena haak fo afada ae, hataholi bole do, ta bole tao sudi hata nandaa no fai hahae tao ues.”