Lamatuak Yesus nasoda fali!
28
Boe ma Sosoda ina fafain, Maria maneme Magdala mai, ma Maria fe'ek, leu tilo lates ndia. 2 Kada nggengge neuk, dae nangge'o nalan seli. Manetualain ata nusa sodan esa konda mai, boe ma neu loli heni batu ina-huuk fo nana kenak neu bolok ndia. Basa de ana nanggatuuk neu batu ndia lain. 3 Ata nusa sodak ndia matan nasa'a leo manggahadok, ma balo'an fula malalaok. 4 Hataholi mana maneak kala sila bii lalan seli, losa ala dele nggebe-nggebe, ma ala ta bisa lakababalek leo bali hataholi kamates sala.5 Boe ma ata nusa sodak ndia, nafada inak kala sila nae, “Ei boso bii! Au bubuluk ei mai sangga Yesus, Hataholi fo ala mbaku lisan nai ai ngganggek ndia. 6 Tehuu Ndia ta nai ia so. Ana nasoda fali so, sama leo Ana kokolak memak ndia so. Mai, fo mita aom mamanak fo ala lakambembe'u Ndia mbombolan neu. Mamanak ndia louk so! 7 Naa, hatematak ia ei fali lai-lai leo! Miu mafada Ndia ana mana tunggan nala mae, Yesus nasoda fali so. Ana la'o nakahuluk neni Galelea neu. Ala musi leu latonggo lo Ndia nai ele, sama leo makahulun Ana helu memak sila so. Kada mamahele leo. Fali leo fo mafada hata fo au kokolak ia!”
8 Boe ma inak kala sila lalai kalua la'o ela mamanak ndia. Ala lameda bii, tehuu ala lameda lamahoko boe. Ala fali lai-lai fo lafada dede'ak ndia neu basa Ndia ana mana tunggan nala.
9 Tehuu losa dala laladak, kada nggengge neuk Yesus mai natonggo no sala. Ana kokolak nae, “Soda-molek!” Lita leo ndiak, boe ma ala leu deka-deka fo sangga holu Ndia ein, ma lakaluku-lakatele neu Ndia. 10 Boe ma Ana kokolak nae, “Boso bii baa! Miu mafada Au ana mana tungga nggala, fo ala leu lahani Au nai Galelea.”
Hataholi mana maneak kala leu lafada la'e-neu hata fo mana dadik nai mamanak mbembeda Lamatuak Yesus mbombolan so
11 Ledo-eik inak kala sila bei lai dala laladak, boe ma hataholi mana maneak kala fali leni kota leu. Leu lafada malangga anggama Yahudi malanggan nala la'e-neu basa hata fo mana dadik ndia so. 12 Boe ma malanggan nala sila heti dalak lo lasi hadak kala, fo ala seba hataholi mana maneak kala doik makadotok, fo suek seu bafan nala. 13 Malanggan nala sila lafada lae, “Leo iak. Mete ma hataholi latane, na, ei musi mataa mae, le'odaen ndia ei sunggu mamanee. Naa te Ndia ana mana tunggan nala mai lamana'o leni Ndia mbombolan. 14 Ma mete ma ama nggubenol namanene dede'ak ia, na, ei boso bii, huu dei fo ai ndia heti tou lasik.”
15 Boe ma hataholi mana maneak kala ha'i lala doik kala sila. Ala tao tungga malanggan nala sila hihiin. Huu ndia de losa hatematak ia hataholi Yahudi la bei lamahele tutui pepekok ndia.
Lamatuak Yesus natudu mata-aon neu ana mana tunggan nala
16 Yesus ana mana tungga kasanahulu esan nala sila lamanene basa inak kala sila nafafadan, boe ma ala leni propensi Galelea leu fo latonggo lo Ndia nai letek esa, tungga Ndia hehelun ndia.a 17 Ledo-eik ala lita Ndia nai ele, boe ma ala lakaluku-lakatele neu Ndia. Mae leo ndiak boe oo, tehuu bei hambu luma dalen nala bei lakandaa.
18 Boe ma Ana mai deka-deka no sala, de Ana kokolak nae, “Manetualain fee Au koasa so, fo Au palenda basa malai nusa sodak, ma basa malai dae-bafok. 19 De ei sudi mini bee miu, na ei musi mafada basa hataholi nusak kala la'e-neu Au Tutui Maloleng ia. Ei musi manoli neulalau sala, fo suek ala dadik Au ana nggala. Ma ei musi salani sala fo dadik tanda nae, ala nana mba'ak lo Amak, ma Ndia Anan, ma Ndia Dula-dale Malalaon so.b 20 Ma manoli sala fo ala tao tungga basa palenda fo Au afada ei so. Masanenedak baa! Au ua ei taa-taa nai ei laladam mala, losa dae-bafok babasan.”