Lamatuak Yesus maso neni kota Yerusalem neu sama leo Manek
21
Basa boe ma Yesus asa la'ok lakandoo losa nggolok esa, nade Betfage, nai lete Setun boboan.a Nggolok ndia deka-deka no kota Yerusalem. Leu ndia, de ala hahae tataak. Boe ma Ana nadenu ana mana tunggan dua fo leu lakahuluk. 2 Ana palenda sala nae, “Ei dua nggei mini nggolok ele miu. Mete ma ei maso, na, dei fo ei mita banda keledei ina esa no anan nana mba'ak lai ndia. Ei miu sefi heni talin nala, fo hela mini sala leni Au mai. 3 Tehuu mete ma hataholi natane ei nae, ‘Hatina de ei hela mini hataholi banda keledein?’ Naa, ei mataa mae, ‘Lamatuak sangga paken. Mete ma pake basan, na, dei fo Ana haitua falik kana mai tutik.’4 Basa ia musi dadi, tungga hata fo Manetualain mana kokolan sulak memak kana so nae,
5 ‘Wei, ei hataholi Yerusalem asa!b
Mai mita ia dei baa!
Ei Manem mai.
Ana mai no dale kadi'i-taidaek.
Ana mai sa'e banda keledei ana.”’c
6 Basa boe ma ana mana tunggan nala leu de ala tao tungga basan, sama leo Yesus hehelun neu sala. 7 Ala hela loo banda keledei ina no anan leni Yesus leu. Boe ma ala bela sila lafa nalusen nala neu banda keledei ana dean, de Yesus sa'e neu lain fo sangga maso neni kota neu. 8 Ledo-eik ala sangga maso leni kota dale leu, boe ma hataholi no'uk kala ha'i lala lafan nala ma lafa anan nala, de bela sala leu dalak. Hambu luma boe, leu tati lala ai palam doon nala,d de lakambembela sala leu dalak laladan. No leo ndiak, ala tao tanda lae, ala soluk Ndia leo hataholi ina-huuk. 9 Boe ma luma la'ok lakahuluk lai Yesus matan, ma mana tunggak kala lai dea. Ala eki no'u lae,
“Hosana! Ai koa-kio Manetualain!e
Huu Dauk numbu-sadun mai so!
Hosana! Ai koa-kio Manetualain!
Huu Lamatuak nadenu Hataholi ia mai.
Hosana! Ai koa-kio Manetualain!
Huu Lamatuak nanggatuuk to'u palenda memak nai lalai mboin ele!”f
10 Ledo-eik Yesus maso Yerusalem no nakasoek leo ndiak, boe ma basa kota isin nala kalua de latane lae, “Awii! See mana maik ia bae?”
11 Hataholi no'uk kala lataa lae, “Ndia ia, Manetualain mana kokolan. Naden Yesus, fo hataholi Nasaret, neme propensi Galelea mai.”
Lamatuak Yesus maso neni Uma Ina Huhule-haladoik neu, de ofe heni pasak manai ndia
12 Boe ma Yesus asa la'ok lakandoo, de ala maso leni Uma Ina Huhule-haladoik dalek leu. Nai Uma Ina Huhule-haladoik pasan, hataholi la taon dadik pasak, fo lase'ok lunda, suek hataholi paken dadik neu tunu-hotuk huhule-haladoik. Yesus nita leo ndiak, boe ma husi kalua heni sala. Ana fae nalengga mei la fo ala taon neu mamana tuka doik, ma Ana fae nalengga banggu la fo ala paken neu lase'ok mbuik kala. 13 Boe ma nafada sala nae, “Manetualain mana kokolan sulak memak kana so nae,
‘Au ambadedei Uma ia,
fo suek hataholi la mai hule-haladoi lai ia.’
Manetualain maksut leo ndiak, tehuu ei tao Uma ia dadik neu mana mamoa la mamana nakabubuan so!”g
14 Basa boe ma hataholi la loo hataholi mbokek ma lu'uk kala leni Yesus leu, lai Manetualain Uma Huhule-haladoin ndia. Boe ma Ana tao nahai basa sala. 15 Nai ndia boe oo, hambu malangga anggama Yahudi malanggan nala ma mese anggama la. Ledo-eik lita Yesus tao tanda heran leo ndiak, boe ma ala luli. Nakalenak bali ledo-eik lamanene kakanak kala sila eki landaa lai Uma Huhule-haladoik ndia lae,
“Hosana! Ai koa-kio Manetualain!
Huu mane Dauk numbu-sadun mai so!”
16 Basa de malanggan nala sila lafada Yesus lae, “Weih! O mamanene kakanak kala sila kokolan? Ndia ta tetebes!”
Tehuu Yesus nataa sala nae, “Hei, Au amanene. Tehuu hatina? Ei bei ta lees mitak nai Manetualain Susula Malalaon, la'e-neu kakanak kala mana koa-kio neu Manetualain, do? Huu nai ndia nana sulak nae,
‘Manetualain nahehele memak kakana mbimbila anak ma kakana kadi'ik bafan nala,
fo ala koa-kio Ndia.”’h
17 Basa boe ma Yesus kalua la'o ela kota ndia, de neu sunggu nai nggolo Betania.
Lamatuak Yesus palenda ai huuk esa, fo boso naboa bali
18 Neu fo'a fafain, Yesus asa la'ok leni Yerusalem leu bali. Tehuu nai dala laladak, Ana nameda ndoe so. 19 Nita ai huuk esa nai dalak bifin fo hataholi la lateme la'a boan.i De Ana neu deka-deka no ai huuk ndia, fo sangga memete sudik kaboak do taa. Tehuu ledo-eik Ana losa ai huuk ndia, Ana ta nita boak esa boe, huu ai huuk ndia bei fo nadoo. Boe ma Ana kokolak neu ai huuk ndia nae, “Huu o ta kalua o boam fee Au, de o ta bole maboa so!” Ana kokolak nate'e, boe ma ai huuk ndia namatuu tutik.
20 Ndia ana mana tunggan nala lita leo ndiak, boe ma ala nggengge. Ala latane lae, “Hatina de kada nggengge neuk ai huuk ia namatuu tutik?”
21 Boe ma nataa nae, “Mamanene neulalau baa! Mete ma ei mamahele tebe-tebe Manetualain, ta no dale kaba'ek faa boe, na, ei bisa tao sama leo Au taok ndia. Ei bisa tao lena heni ndia boe. Conto leo: ei bisa palenda letek esa nana so'uk neni tasi dale neu. Neu ko Manetualain lali heni letek ndia tutik, sadi ei mamahele tebe-tebe neu Ndia.j 22 Huu basa hata fo ei moke Manetualain, na, dei fo ei simbon, sadi ei mamahele tebe-tebe neu Ndia.”
Malanggan nala latane la'e-neu Lamatuak Yesus haak
23 Basa de Yesus asa la'ok lakandoo. Losa Yerusalem, boe ma ala maso fali leni Uma Ina Huhule-haladoik pasan leu bali. Ledo-eik Ana nanoli hataholi la'e-neu Manetualain dala sodan, boe ma malangga anggama Yahudi malanggan nala, ma lasi hadak kala mai latane Ndia lae, “Afik, see ndia nadenu o mai tao nahuuk nai ia? See ndia fee o haak ndia?”
24 Tehuu Ana bubuluk ala mai sangga dalak fo tao latuda Ndia. Boe ma Ana nataa nae, “Au boe oo sangga atane ei. Ei mataa Au dei, bei fo Au ataa ei. 25 Au sangga atane leo iak: ei basa nggei malelak Yohanis Mana Salanik ndia, hetu? See feen haak fo ana salani hataholi? Manetualain do, hataholi?”
Boe ma ala dudu'a leu-mai, ma lakokola lae, “Awii! Ita nana te'e nalak ia so maa! Mete ma ita tataa tae, ‘Manetualain fee haak’ na, dei fo Ana bala nae, mete ma leo ndiak, na, ‘Hatina de ei ta mamahele neu Yohanis?’ 26 Tehuu ita boe oo ta bisa tae, ‘Hataholi fee haak’, te dei fo basa hataholi la manggalau lo ita. Huu sila lamahele lae, Yohanis ndia, na Manetualain mana kokolan.” 27 Huu ndia de ala lataa Yesus lae, “Ai ta bubuluk.”
Boe ma Yesus bala nae, “Naa! Mete ma leo ndiak, na, Au boe oo ta paluu afada see ndia fee Au haak.”
Lamatuak Yesus fee nakandandaak la'e-neu touk esa, no ana tou anan dua
28 Yesus kokolak nakandoo no malanggan nala sila nae, “Ei dudu'am leo bee no nakandandaak ia? Touk esa no ana tou anan dua. Ana palenda kakana ka'ak nae, ‘Ana, ei! Leledon ia, na o muu tao ues nai osi dei.’
29 Tehuu kakanak ndia nataa nae, ‘Eeh! Au ta uu.’ Tehuu ta dook boe ma ana fale dalen, de neu.k
30 Basa boe ma touk ndia nadenu kakana fadik nae, ‘ana, ei! Leledon ia, na o muu tao ues nai osi dei.’
Boe ma kakanak ndia nataa nae, ‘Iya papa. Dei fo au uu.’ Tehuu naa te ta neu.”
31 Tui basa leo ndiak, boe ma Yesus natane sala nae, “Naa, Au sangga atane leo iak: neme kakana kaduak kala sila mai, see ndia tao tungga aman palendan?”
De ala lataa lae, “Ka'ak!”
Boe ma Ana kokolak nae, “Hei. Tehuu mamanene neulalau, huu Au kokolak tetebes. Hataholi fo ei mae sila papake taak kala, sama leo mana susu bea, ma ina kalabik, dei fo ala maso dadik Manetualain hataholin lakahuluk leme ei mai. Huu kada ei makaheik Manetualain, tehuu ta tao tungga Ndia hihiin. 32 Makahulun, Yohanis Mana Salanik nanoli ei so, dalan leo beek fo ei bisa masoda ndoos. Tehuu ei ta nau mamahelen. Naa te ledo-eik hataholi papake taak kala lamanene Yohanis, boe ma ala la'o ela sala-singgon nala, de ala tungga ndia nanonolin. Ei boe oo bubuluk basa sila. Tehuu ei ta nau hahae mima ei sala-singgom mala mai, fo tungga Manetualain hihiin.”l
Lamatuak Yesus fee nakandadaak la'e-neu hataholi manggalauk mana seba osi anggol
33 Basa ndia boe ma Yesus tui nakandandaak esa bali nae, “Hataholi madaek esa tao osi fo sangga sele ai anggol nai ndia dae bibian. Boe ma ana kota e'on. Ma ana tao baak he'e anggol boak oen. De ana nambadedei mamana nanea madema esa. Basa boe ma ana seba osin ndia neu hataholi mana tao osi la, fo laba'e buna-boan lo ndia. Boe ma ana la'o neni nusa dea neu.m
34 Losa fai ketu anggol boak, boe ma maosik ndia nadenu mana tao uen nala leni mana seba osi la sila leu, fo loke ndia baba'en. 35 Tehuu mana seba osi sila ta mbali ndia mana tao uen nala. Hambu nana fembak, ma hambu nana tao nisak, ma hambu nana mbiak nenik batu. 36 Tehuu maosik ndia nadenu mana tao uen nala bubua ina-huuk esa lena heni bubua makasososak ndia. Tehuu mana seba osi sila tao manggalauk leo ndiak leu sala boe.
37 Doo-doo boe ma maosik ndia nadenu ana hehelin neu. Te ana dudu'a nae, ‘Mete ma au adenu au ana heheling neu, na, neu ko ala simbok kana no malole, ma lamanenen.’
38 Tehuu ledo-eik mana seba osi la lita kakanak ndia, boe ma lakokola lae, ‘Wei, ei mita dei! Te tou lasik nadenu ana hehelin mai so. Dei fo ndia simbo basa tou lasik pusakan. De mai fo ita tao tisan leo, fo suek ita hambu osi ia.’ 39 Boe ma ala humu lala kakanak ndia, de hela lenin neni osi deak neu, de ala tao lisan.”
40 Yesus tui nate'e, boe ma Ana natane sala nae, “Naa, Au sangga atane leo iak: mete ma maosik fali main, na, meda ana tao leo bee neu mana seba osi sila?”
41 Basa boe ma hataholi Yahudi la malanggan nala lataa lae, “Neu ko ana tao nisa basa hataholi manggalauk kala sila. Basa ndia, na ana seba osin ndia neu hataholi fe'ek, fo dei fo laba'e buna-boak, nandaa no ndia fai seseun.”
42 Boe ma Yesus kokolak no sala nae, “Fama ei ta lees mitak hata fo nana sulak nai Manetualain Susula Malalaon nae,
‘Hambu batu esa fo tuka batu la mbia henin,
tehuu hatematak ia batu ndia dadik neu uma batu neten!
Manetualain mesak kana hele nalan, fo nanggatutuu batu ndia.
Huu ndia de ita tita ndia lolen seli!”’n
43 Yesus tuti Ndia kokolan bali nae, “De ei dudu'a neulalaun dei baa! Makahulun, Manetualain hele nala ita hataholi Yahudi ia fo dadik Ndia hataholin. Tehuu ei ta nau mbali Au, de dei fo Manetualain hele nala hataholi fe'ek. Huu kada hataholi fo mana tungga Ndia hihiin, bisa maso dadik Ndia hataholin. 44 [Au afada tungga ndoon. Au ia, ndia batu netes ndia. Hataholi fo mana tuda la'e-neu batu ndia, dei fo hataholi ndia lulutu ndoos. Ma mete ma batu ndia tuda la'e hataholi, na, dei fo hataholi ndia sosombu ndoos.]”o
45 Ledo-eik malangga anggama Yahudi malanggan nala ma hataholi Farisi la lamanene Yesus tutuin ndia, boe ma ala bubuluk lae, Ana uku bebeik sila. Sila sama leo mana seba osi sila, ma tuka batu mana mbia heni batu netes ndia. 46 De ala luli lalan seli. Boe ma ala heti dalak fo sangga humu Ndia. Tehuu ala bei bii hataholi no'uk kala, fo mana taok Yesus ndia, Manetualain mana kokolan. De ala ta bisa tao hata-hata neu Ndia.