Ala latatanek la'e-neu Yesus haak ma koasan
20
Faik esa, Yesus neni Uma Ina Huhule-haladoik neu, de fee nanonolik la'e-neu Manetualain Hala Malolen nai uma pasan. Boe ma malangga anggama Yahudi malanggan nala, mese anggama la, ma lasi hadak kala mai latatanek lo Ndia. 2 Ala latane lae, “Afik, see ndia fee O haak fo tao nahuuk nai ia? Hena mafada ai dei!”3 Boe ma Yesus nataa nae, “Au boe oo sangga atane dede'ak esa, basa bei fo Au ataa ei. 4 Leo iak: ei malelak Yohanis Mana Salanik, hetu? See ndia feen koasa fo salani hataholi? Manetualain do, hataholi?”
5 Boe ma lakokola leu-mai ma lae, “Awii! Ita la'en ia so maa. Mete ma ita tae, ‘Manetualain ndia nadenu’, na, dei fo Ana bala nae, ‘Mete ma leo ndiak, na, hatina de ei ta mamahele Yohanis?’ 6 Tehuu ita boe oo ta bisa tae, ‘hataholi ndia nadenu’, huu dei fo hataholi la ia ha'i batu, fo mbia lisa ita. Huu ala lamahele lae, Yohanis ndia, Manetualain mana kokolan.”
7 Basa de lataa Yesus lae, “Ai ta bubuluk.”
8 Boe ma Yesus bala nae, “Mete ma leo ndiak, na, Au boe oo ta nau afada ae, see ndia nadenu Au.”
Tutuik la'e-neu mana tao osi anggol
9 Basa boe ma Yesus tui hataholi no'uk kala sila, nakandandaak esa bali nae, “Hambu hataholi esa, sele anggol nai osi. Ana seba osin neu mana tao osi fo laba'e buna-boan. Boe ma ana hu'a neni nusa dea neu, fo leo nala dook nai ele.a 10 Losa fai ketu anggol boak, boe ma maosik ndia nadenu hataholi mana tao uen esa, neu simbo ndia baba'en neme mana seba osi sila mai. Tehuu mana seba osi sila mbomboko hataholi mana tao ues ndia, boe ma ala husi henin fali no lima louk. 11 Basa de maosik ndia nadenu hataholi mana tao uen esa neu. Tehuu mana seba osi sila mbombokon, ma lakamamaek kana. De ala husi falik kana no lima louk. 12 Boe ma maosik ndia nadenu hataholi mana tao ues katelun neu bali, tehuu ala mbomboko lahinan, boe ma ala mbia henin neni mba'a deak neu.
13 Maosik ndia dudu'a nae, ‘Au musi tao leo bee bali? Malolenak au adenu au ana susueng neu. Neu ko ala feen hada-holomata ma simbok kana no malole.’ De nadenu ana bonggin neni ele neu.
14 Tehuu ledo-eik mana seba osi sila litan, boe ma lakokola lae, ‘Wei, ei mita dei! Tou lasik nadenu ana hehelin mai. Ndia ndia, dei fo simbo basa tou lasik pusakan. De mai fo ita tao tisan leo! Suek ita hambu osi ia.’ 15 Ledo-eik kakanak ndia losa, boe ma ala hela loloson neni osi deak neu, de ala tao lisan.
Au sangga atane leo iak: ei dudu'am, na maosik ndia sangga tao leo bee neu mana seba osi sila? 16 Tungga Au, neu ko ana mai fo tao nisa basa sala, boe ma ana seba osin ndia neu hataholi fe'ek.”
Ledo-eik hataholi la lamanene Yesus kokolak leo ndiak, boe ma ala lataa lae, “Mete ma bisa, na, Manetualain boso huku ai leo ndiak!”
17 De Yesus suli nakabubulak neu sala, boe ma natane nae, “Mete ma ta huku leo ndiak, na, hatina de Manetualain mana kokolan sulak so nae,
‘Hambu batu esa tukan nala nggali henin so,
tehuu hatematak ia, dadik dii inak batu neten so.’b
18 Hataholi fo nakatunu neu batu ndia, na neu ko nakalulutuk, huu hambu huhukuk. Ma mete ma batu ndia tuda la'e hataholi, na, ndia boe oo nakalulutuk nalan seli, huu la'e huhukuk.”
19 Neu faik fo mese anggama ma malangga anggama malanggan nala lamanene tutuik ndia, ala bubuluk lae, Yesus uku bebeik sila, nenik nakandandaak ndia. Sila sama leo mana seba osi ndia. De ala luli lalan seli. Boe ma ala heti dalak fo sangga humu Ndia. Tehuu ala bii hataholi no'uk fo lahiik Yesus nanonolin. De ala la'o elan leo.
“Fee Manetualain hata fo Manetualain haak”
20 Basa boe ma Yesus musun nala malok Ndia. Ala sangga hataholi mana memete-mamakuk kala fo bisa tao aon leo hataholi malalaok, fo leu soba latuda Yesus. Ala lamahena Yesus bisa kokolak laban mana palenda Roma, boe ma ala sangga leu lafada nggubenol, fo suek ladenu hataholi leu humu Yesus. 21 Boe ma ala ladenu mana memete-mamakuk fo leu latatanek lo Yesus lae, “Ama Mesen! Ai bubuluk Ama dalen ndoos. Ama ta nalelak pepekok, ma ta mete matak. Ama fee nanonolik taa-taa la'e-neu Manetualain Dede'a-kokolan no tetebes. 22 Hatematak ia, ai sangga matane dede'ak esa: tungga ita anggama Yahudi heti-heun, na meda ita bole bae bea neu mana palenda Roma mane ina-huun, do taa?”
23 Tehuu Yesus bubuluk sila maksut manggalaun fo sangga latuda Ndia so. Boe ma Ana nataa nae, 24 “Soba matudu Au doi lilo fulak esa dei.” Boe ma ala latudu doik ndia neu Ndia. Basa de Ana natane nae, “See mata-aon ia? Ma see naden ia?”
Ala lataa lae, “Ndia mane ina-huuk, keser.”
25 Boe ma Yesus nae, “Mete ma leo ndiak, na, fee mana palenda hata fo mana palenda haak. Ma fee Manetualain hata fo Manetualain haak.”
26 Ala lamanene leo ndiak, boe ma ala heran lalan seli, huu ala ta bisa latuda Ndia nai hataholi no'uk matan. Boe ma ala lakatema bafan nala leo.
Lamatuak Yesus fee nanonolik la'e-neu nasoda fali neme mamates mai
27 Basa boe ma hataholi hida leme paltei anggama Saduki mai fo sangga latuda Yesus. Hataholi Saduki la fee nanonolik lae, hataholi kamates ta lasoda fali so, nai dae-bafok fai babasan. Ala mai latatanek lo Yesus lae,c 28 “Ama Mesen! Ba'i Musa sulak ela ita heti-heuk so nae: mete ma hambu touk mate, tehuu ana taak, na, hataholi ndia fadin musi sao nala ina falu ndia, fo suek fee numbu-saduk neu ka'an mana matek ndia so.d 29 Memak makahulun ba'i Musa fee nanonolik leo ndiak. Tehuu hatematak ia, ai sangga matane leo iak: hambu touk hitu tolanoo bonggik kala. Ka'ak sao, tehuu maten, ma ana taak. 30 Boe ma fadin mana tungga ndia, sao nala ina falu ndia. Ta dook boe ma maten, tehuu ana taak. 31 Leo ndiak boe no fadi katelun. Ana sao nala ina falu ndia, tehuu ndia boe oo mate, ma ana taak. Leo ndiak nakandondoo henin, losa fadi mate'a teisusuk maten boe. 32 Boe ma ina falu ndia maten boe. 33 Hatematak ia, ai sangga matane leo iak: inak ndia sao nitak touk hitu so. Mete ma dae-bafok fai babasan, boe ma Manetualain tao nasoda falik hataholi mana matek kala, na, inak ndia sao teteben ndia see?”
34 Boe ma Yesus nataa nae, “Hataholi kada lasaok lai dae-bafok ia. 35-36 Tehuu dei fo nai nusa sodak, hataholi ta lasaok so bali. Ma nai ele, ala ta mate so bali. Ala sama leo Manetualain ata nusa sodan so. Huu neu faik fo Manetualain tao nasoda falik hataholi mana matek, Ana hele nala sala fo dadik Ndia anan nala. 37 Nai ba'i Musa susulan, hambu tutuik la'e-neu ai kadi'ik ha'i na'an tehuu ta kaden. Neme tutuik ndia mai, ita bubuluk tae, hataholi kamates bisa nasoda fali. Nai ndia Manetualain nafada ba'i Musa nae, “Au ia, o ba'im mala Manetualain. Fo ndia ba'i Abraham, ba'i Isak, ma ba'i Yakob. Basa sala lakaluku-lakatele neu Au losa hatematak ia.”e 38 Naa te ba'i la sila mate sala so neme makahulun mai. Tehuu Manetualain nafada so nae, Ndia bei dadik sila Lamatuan, huu ndia de ita bubuluk tae, sila bei kasodak. De mae hataholi mate so, lasoda fali boe. Huu kada hataholi kasodak nakaluku-nakatele neu Manetualain, ta hataholi kamates, hetu?!”
39 Lamanene Yesus nataa leo ndiak, boe ma hambu mese anggama esa kokolak nae, “Ama Mesen natataan ndia, teteben ana seli.” 40 Mulai neme faik ndia mai boe oo, ta hambu hataholi esa nambalani natane Yesus bali, huu ta hambu hataholi bisa tao natuda Ndia.
Karistus ndia, memak mane Dauk numbu-sadun, ma ndia Lamatuan boe
41 Basa boe ma Yesus bei nanoli hataholi la sila nai Uma Ina Huhule-haladoik. Boe ma Ana natane nasafali sala nae, “Tungga ei dudu'am, na leo bee? Mese anggama la fee nanonolik lae, Karistus ndia, na ndia Hataholi fo Manetualain tudu memak neme lele uluk mai so. Tungga sila, Ndia kada dadik mane Dauk numbu-sadun. Tehuu ndia bei ta dai. 42 Huu makahulun mane Dauk mesak kana sulak nai susula Sosoda Koa-kiok kala nae,
‘Manetualain nafada au lamatuang so nae,
“Mai fo manggatuuk muu mamana nana hadak ia, nai Au boboa konang.
43 Huu dei fo Au tao o musum mala,
losa ala do'ok leu o.”’f
44 Neme susulak ndia mai, ita bubuluk tae, mane Dauk mesak kana noke Karistus ndia nae, ‘Lamatuak’. Ndia ndandaan, mete ma hataholi lae, Karistus ndia, kada mane Dauk numbu-sadun, na ndia bei ta dai! Huu Ndia boe oo dadik mane Dauk Lamatuan fo naena haak palenda ndia!”
Mata neuk neu mese anggama la fo lafuni sila salan
45 Ledo-eik basa hataholi pasak ndi'i dook fo lamanene Yesus, boe ma Ana kokolak no ana mana tunggan nala nae, 46 “Ei musi mata neuk neu mese anggama la. Huu ala lahiik lala'ok pake badu naluk mana mbembembek, leu latonggo lo hataholi no'uk kala, fo suek hataholi lita sala lae, ‘Wei! Sila ndia, hataholi ina-huuk, bou!’ Ala lahiik sangga mamanak nana hadak nalan seli nai uma huhule-haladoik kala, nai feta, ma nai mamanak fo hataholi no'uk lateme lakabubua. 47 Tehuu mata neuk, huu ala lambue pepeko ina falu la, fo lamoa lala uman nala. Tehuu nai hataholi no'uk matan, ala lafuni sila manggalaun ma lambadeik hule-haladoi lala dook. Ala nau fo hataholi lae sila, hataholi malalaok. Tehuu Manetualain bubuluk sila salan, de dei fo Ana fee huku belak neu sala.”