Lamatuak Yesus asa maso Yerusalem leu, de hataholi no'uk kala koa-kion, sama leo hataholi ina-huuk
11
Ledo-eik basa sala sangga deka lo kota Yerusalem, ala losa nai nggolok dua, fo Betfage ma Betania nai Lete Setun bifin.a Leu ndia, boe ma Yesus asa hahae tataak. Basa boe ma Ana nadenu ana mana tunggan dua leu lakahuluk.
Markus 11:1-14
2 Ana nafada sala nae, “Ei dua nggei makahuluk mini nggolok ele miu. Mete ma ei maso, na, dei fo ei mita banda keledei ana esa, nana mba'ak nai ndia. Hataholi la bei ta sa'e nitak kana. Ei miu sefi heni talin, fo hela minin neni ia mai. 3 Tehuu mete ma hambu hataholi natane ei nae, ‘Hatina de ei hela mini banda keledei ndia?’ Naa, ei mataa mae, ‘Ai Lamatuan sangga paken. Mete ma Ana pake nate'en, na, dei fo Ana haitua fali tutik kana.”’
4 Boe ma dua sala leu, de lita banda keledei ana ndia nana mba'ak nai uma esa boboan, nai dalak bifin. Boe ma ala sefi lalan, de hela lenin. 5 Tehuu hataholi mana mambadeik malai sila kala latane sala lae, “Wei! Hatina de ei sefi mala hataholi banda keledein ndia?”
6 Boe ma ala lataa lae, “Ai Lamatuan sangga paken. Mete ma Ana pake nate'en, na, dei fo ai mini fali tutik kana.” Boe ma hataholi la sila mbo'i sala hela leni banda keledei ndia. 7 Ala hela lenin neni Yesus neu. De ala bela lafa nala neu banda keledei ndia lain, de Yesus sa'e.
8 Ledo-eik ala sangga maso leni kota dale leu, boe ma hataholi no'uk kala ha'i lala lafa nalusen nala, ma lafa lalan nala, de ala bela sala leu dalak lain. Hambu ala tati palam dookb kala de ala nggenggela sala leu dalak laladan. Ala tao leo ndiak fo dadik neu tanda nae, ala simbok Yesus no hada-holomata. Sama leo lateme ala simbok hataholi ina-huuk kala. 9 Boe ma hambu hataholi la'ok lakahuluk lai Yesus matan, ma hambu luma tungga Yesus dean. Ala mulai eki lae,
“Hosana! Ita koa-kio Manetualain!c
Manetualain fee baba'e-babatik neu hataholi fo mana mai no Lamatuak naden,
huu Manetualain nadenu hataholi ndia so!d
10 Hosana! Ita koa-kio Manetualain!
Huu Lamatuak sangga nafofo'a falik Mane Dauk palendan!
Hosana! Ita koa-kio Manetualain!
Huu Lamatuak nanggatuuk palenda nai lalai mboin ele so!”
11 Losa kota dale, boe ma Yesus asa leni Manetualain Uma Ina Huhule-haladoin pasan leu. Boe ma Yesus mete neulalau ndule basa mamanak ndia. Tehuu fai ta so, de ala fali seluk leni nggolo Betania leu.
Lamatuak Yesus palenda ai huuk esa fo ta bisa naboa bali
12 Neu fo'a fafain, ala kalua leme Betania mai, fo leni kota Yerusalem leu. Tehuu ala losa dala laladak, boe ma Yesus nameda ndoe so. 13 Ana nita ai huuk esa nai dalak bifin. Hataholi la lateme la'a boan.e De Yesus neu deka-deka no ai huuk ndia, fo Ana mete sudik kana naboa do, taa. Tehuu ledo-eik Ana losa ai huuk ndia, Ana ta nita boak esa boe. Ana nita kada ai huuk ndia doon. Huu memak bei ta losa fai naboan. 14 Boe ma Yesus kokolak neu ai huuk ndia nae, “Huu o ta fee o boam neu Au, de mulai neme hatematak ia mai, o ta bisa fee o boam neu hataholi fe'ek so bali!”
Ndia ana mana tunggan nala boe oo lamanene Ndia hala belan leo ndiak.
Lamatuak Yesus maso neni Uma Ina Huhule-haladoik neu. Boe ma Ana ofe heni pasak manai ndia
15 Boe ma Yesus asa la'ok lakandoo losa Yerusalem, de Ana maso seluk neni Manetualain Uma Ina Huhule-haladoin neu. Nai Uma Huhule-haladoik ndia pasan, hataholi la taon dadik pasak so, fo lase'o mbui lunda suek hataholi la paken neu tunu-hotu huhule-haladoik. Yesus nita leo ndiak, boe ma Ana husi kalua heni sala. Ana bala nggali heni mei la, fo ala paken tuka doik, ma Ana mbesi nalengga-natono banggu la fo ala paken neu lase'o mbuik kala sila.
Markus 11:15-33
16 Boe ma Ana ka'i basa hataholi la boe fo ta bole leni balo'an nala lesik uma ndia pasan bali. 17 Boe ma Ana nanoli sala nae, “Ei bubuluk memak so, hata fo Manetualain mana kokolan sulak so nae, ‘Au ambadedei Au Umang ia, fo hataholi la leme basa hataholi nusak kala mai hule-haladoi lai ia!’ Tehuu ei tao Uma ia dadik neu mana mamoa la mamana nakabubuan so!”f
18 Ledo-eik malangga anggama Yahudi la malanggan nala ma mese anggama la lamanene Yesus tao leo ndiak so, boe ma ala luli Ndia lalan seli. De ala sangga dalak fo tao lisan. Tehuu ala bei bii, huu hataholi no'uk kala lahiik Ndia nanonolin.
19 Ledo-eik ledo mulai tesa so, boe ma Yesus no ana mana tunggan nala kalua leme kota Yerusalem mai, de ala fali leu sunggu lai nggolo Betania.
Mete ma ita tamahele tebe-tebe neu Manetualain, na, neu ko Ana fee hata fo ita token
20-21 Neu fo'a fafai anan, Yesus no ana mana tunggan nala fali seluk leni Yerusalem leu. Nai dala laladak, ala la'o seluk lesik ai huuk fo afik Yesus kokolak neu ndia. Ana mana tunggan nala heran lalan seli, huu ai huuk ndia namatuu losa okan nala so. Boe ma Petrus nasaneda afik Yesus kokolan ndia. De ana nafada nae, “Ama! Mita sudik dei! Ai huuk fo afik Ama sumba-sook ndia, maten so!”
22 Boe ma Yesus nataa nae, “Memak tetebes! Sadi ei mamahele tebe-tebe neu Manetualain leo ndiak boe. 23 Mete ma ei mamahele tebe-tebe, na, ei bisa madenu letek esa fo nana so'uk neni tasi dale neu. Boe ma Manetualain lali heni letek ndia, sadi ei boso mamahele no dale bibiak! Ei musi mamahele tebe-tebe neu Manetualain.g 24 Boso mafalende henin baa! Sadi ei mamahele tebe-tebe mae, Manetualain nabe'i fee hata fo ei moken, na neu ko Ana fee ei! 25 Tehuu mete ma hambu hataholi esa hule-haladoi, naa te ndia dalen ta malole no hataholi fe'ek, na, ana musi malole no hataholi ndia dei. Leo ndiak, bei fo ei Amam manai nusa sodak nau koka heni ei sala-singgom mala. 26 [Mete ma hambu hataholi esa bei nambeda dalek, ma ta nau fee ambon neu hataholi ndia, na, ei Amam manai nusa sodak ta nau nafalende heni ei sala-singgom mala boe.”]h i
Ala latane-lataak la'e-neu Yesus haak
27 Basa boe ma Yesus no ana mana tunggan nala la'ok lakandoo. Losa Yerusalem, boe ma ala maso seluk bali leni Manetualain Uma Ina Huhule-haladoin leu. Ledo-eik ala maso lala uma pasan, boe ma malangga anggama Yahudi malanggan nala, mese anggama la, ma lasi hada Yahudi la mai, 28 de latane Yesus lae, “Afik, see nadenu o mai tao nahuuk nai ia? See ndia fee o haak!”
29 Tehuu Yesus bubuluk ala sangga dalak, fo nau latuda Ndia. Boe ma Ana bala nae, “Au boe oo sangga atane ei. Ei mataa Au dei, bei fo Au ataa ei. 30 Au sangga atane leo iak: ei basa nggei malelak Yohanis, Mana Salanik ndia, hetu? See ndia nadenun fo neu salani hataholi? Manetualain do, hataholi?”
31 Boe ma ala dudu'a neu-mai, ma lakokola lae, “Awii! Ita la'en ia so! Mete ma ita tataa tae, ‘Manetualain ndia nadenu’, na, dei fo Ana natane nasafali ita nae, ‘Mete ma leo ndiak, na, hatina de ei ta mamahele neu Yohanis?’ 32 Tehuu ita boe oo ta bisa tae, ‘Hataholi ndia nadenu.’ Huu dei fo basa hataholi la manggalau. Huu ala lamahele lae, Yohanis ndia, Manetualain mana kokolan.”
33 Basa boe ma lataa lae, “Ai ta bubuluk!”
Boe ma Yesus nataa nasafali sala nae, “Mete ma leo ndiak, na, Au boe oo ta nau afada, see ndia nadenu Au.”