Nakandandaak la'e-neu mana tao ues osi anggol
20
Basa boe ma Yesus fee nanonolik nae, “Manetualain toto'u palendan ndia, sama leo nakandandaak ia: maosik esa kalua fafai anan li'u nee, neu sangga hataholi fo tao ues nai ndia osi anggol. 2 Ana hambu hataholi mana tao ues, boe ma lala halak tao ues faik esa, na, seseban doi lilo fulak esa, tungga seseba basa faik.a Lala halak basa, boe ma ana nadenu hataholi leu tao ues nai ndia osin. 3 Li'u sio fafain, boe ma ana neni pasak neu. Neu ndia boe ma nita hataholi hida kada langgatuuk lanadok kala lai ndia. 4 Boe ma nafada sala nae, ‘Wei, tolanoo nggala ei! Ei nau tao ues nai au osing, do? Dei fo au bae ei no mandaan.’ Ala lamanene leo ndiak, boe ma lakaheik, de leu tao ues. 5 Li'u sanahulu dua ledo kamatetun, ma li'u telu ledo bobon, maosik ndia kalua neme uman mai fo neu sangga hataholi mana tao ues bali. 6 Ledo bobok so fo meda li'u lima, boe ma maosik kalua bali. Ana susuli neu-mai, boe ma hambu hataholi bei lambadeik lou-latak. De ana natane sala nae, ‘Hatina de ei mambadeik lou-latak mima fafain mai losa ledo bobok, ma ta tao hata esa boe?’7 Hataholi la sila lataa lae, ‘Ama! Ta hambu hataholi esa boe fo fee ai tao ues.’
Boe ma maosik ndia nae, ‘Mete ma leo ndiak, na, ei miu tao ues nai au osing leo!’
8 Losa ledo-eik hahae tao ues nate'e, boe ma maosik ndia noke nala ndia mandor, de nae, ‘Moke hataholi mana tao ues sala, fo bae sila esa-esak doi seseban. Mulai neme hataholi fo mana maso makabuik losa hataholi fo mana maso sososak ndia.’b
9 Boe ma mandor ndia noke hataholi fo mana mulai tao ues leme li'u lima ledo bobon mai sila. Ana fee sala, esa-esak simbo doi lilo fulak esa-esak. 10 Basa de mandor noke hataholi mana tao ues fe'ek kala, losa hataholi mana tao ues mulai neme li'u nee fafain mai. Mana tao ues neme fafai anan dudu'a lae, neu ko ala simbo no'uk lena heni hataholi la, fo mana tao ues mulai neme li'u lima ledo bobon. Naa te sila boe oo simbo doi lilo fulak esa. 11 Ala simbo lala leo ndia, boe ma ala manggalau lo maosik lae, 12 ‘Awee'! Ta bisa leo iak ama! Sila mana mai makabuik lalan seli, kada tao ues li'u esa. Tehuu ai mana maso fafaik ia, tao ues sota malan seli, losa mbuse la tetee! Tehuu talo bee de ama bae ai sama leo sila?’
13 Boe ma maosik fee sala natataak esa nae, ‘Ka'a! Au ta aputak ka'a. Huu ka'a mesak kana nakaheik tao ues faik esa, na seseban doi lilo fulak esa. Tetebes, hetu? De au bae tungga ita nakeketun so, hetu? 14 Malolenak ka'a simbo mala ka'a doi seseban, fo fali leo. Mete ma au nau fee hataholi fo mana maso tao ues makabuik nalan seli neme ka'a mai, no'un sama leo au fee ka'a, na, au dede'ang ndia. 15 Au bole pake au doing tungga au hihiing. Talo bee de ka'a mamanasa huu au dale maloleng?’
16 Leo ndiak boe, neu faik fo Manetualain dadik Manek neu hataholi la, Ana bala neu Ndia hataholin nala tungga Ndia hihiin. De hataholi mana mai makabuik, dei fo ana simbo baba'en sama leo hataholi mana mai makasososak. Hataholi mana mai makasososak, dei fo ana simbo ndia baba'en sama leo hataholi mana mai makabuik.”c
Lamatuak Yesus nafada kala'i telun la'e-neu Ndia mamaten
17 Basa boe ma Yesus asa mulai la'ok leni Yerusalem leu. Nai dala laladak, Ana noke nala ana mana tunggan nala fo mesak kasa lakabubua lo Ndia. Basa boe ma nafada bali nae, 18 “Ei mamanene baa! Hatematak ia, ita sangga teni Yerusalem teu. Tehuu nai ele ala se'o heni Au, Hataholi Isi-isik ia, neu malangga anggama Yahudi malanggan nala, ma mese anggama la. Basa ndia, na ala laketun fo huku mate Au. 19 Boe ma ala fee Au uu hataholi fe'ek fo ta mana malelak Manetualain. Boe ma ala lakamamaek Au. Ma ala filo lakalulutu Au aong. Basa bei fo ala tao lisa Au nai ai ngganggek. Memak Au mate tebe. Tehuu neu binesan, Au asoda fali.”
Yakobis no Yohanis inan noke fo so'u anan nala dadik hataholi ina-huuk
20 Basa boe ma Sabadeus saon no anan Yakobis ma Yohanis leni Yesus leu. Boe ma ana sendek fee hada-holomata, de kokoe Yesus.
21 Boe ma Yesus natanen nae, “Ina paluu hata?”
Boe ma inak ndia nafada nae, “Leo iak, Ama! Au oke fo neu faik fo Ama manggatuuk to'u palenda so, na, Ama so'u mala au anang dua sala ia, fo sila to'u palenda sama-sama lo Ama boe. Au oke fo Ama manggatutuu esa neu Ama boboa konan, ma esa neu boboa kiin.”
22 Yesus namanene leo ndiak, boe ma Ana nafada Yakobis ma Yohanis nae, “Ei ta bubuluk hata fo ei mokek ndia. Huu dei fo Au hambu doidosok no'uk. De leo bee? Ei mae hetuk ei boe mabe'i lemba doidosok ndia sama-sama mia Au, do?”
Dua sala kada lataa neulalau lae, “Bisa nalan seli, Ama bou!”
23 Basa de Ana nataa bali nae, “Memak, ei boe oo dei fo lemba doidosok ndia sama leo Au. Tehuu dei fo see nanggatuuk nai Au kii-konang, na Au ta ndia aketun. Ndia, Manetualain haak nakeketun ndia. Ana naketu memak kana so, see ndia nanggatuuk nai mamanak ndia.”
24 Ledo-eik Ndia ana mana tungga kasanahulu fe'en nala lamanene dua sala nonoken leo ndiak, boe ma ala luli. 25 Tehuu Yesus noke nala basa sala, de nae, “Leo iak! Ei bubuluk so, hetu? Hataholi ina-huuk kala mana to'u palenda lateme tuni-ndeni lau-inggun nala, losa ta bisa botik langgan nala. Ma malanggan nala leme nusak fo hataholi ta lalelak Manetualain, ala palenda lala lena-lenak, losa lau-inggun nala ta bisa botik langgan nala. 26 Tehuu ei ta bole tao leo ndiak! Naa, see neme ei mai nau dadik hataholi ina-huuk, na ana musi dadik ata fo ono-lau hataholi fe'ek.d 27 Ma see nau dadik malanggan, na, ana musi tao aon leo ata.e 28 Mamanene baa! Au leo ndiak boe. Au, Hataholi Isi-isik ia, mai ono-lau hataholi. Au ta mai fo hataholi ono-lau Au. Huu Au fee Au soda katematuang, fo soi hataholi no'uk kala sala-singgon nala.”
Lamatuak Yesus tao nahai hataholi mbokek
29 Basa boe ma Yesus asa la'ok lakandoo. Ledo-eik ala kalua leme kota Yeriko mai, hataholi no'uk tungga sala. 30 Nai ndia, hambu hataholi mbokek dua langgatuuk lai dalak bifin. Ledo-eik ala lamanene lae, mana nesik ndia, na ndia, Yesus maneme Nasaret mai, boe ma ala langgou tingga-tingga lae, “Lamatuak! Dauk numbu-sadun! Ai mahani-mahani mala doon seli neu Lamatuak! Kasian neu ai dei!”
31 Hataholi no'uk lamanene ala langgou leo ndiak, boe ma ala ka'i sala lae, “Heeh! Ei dua nggei boso manggilo!”
Tehuu dua sala boe langgou latingga bali lae, “Lamatuak! Dauk numbu-sadun! Kasian neu ai dei!”
32 Ledo-eik Yesus namanene leo ndiak, boe ma Ana hahae de natane sala nae, “Ei nau Au tao hata neu ei?”
33 Ala lataa lae, “Lamatuak! Tulun fo ai bisa mita dei!”
34 Ana namanene sila kokolan leo ndiak, boe ma Ana nameda kasian neu sala. Basa de Ana daba matan nala, de lita tutik. Basa boe ma ala la'o tungga Ndia.