Lamatuak Yesus natonggo mana susu bea esa, nade Sakeos
19
Boe ma Yesus asa maso tungga kota Yeriko, fo sangga la'o lakandoo. 2 Nai ndia hambu malangga mana susu bea esa, nade Sakeos. Ndia hataholi kamasu'ik. 3 Ledo-eik namanene Yesus sangga nesik ndia, boe ma nahiik nita Yesus. Tehuu ana ta bisa nita neulalaun, huu hataholi no'un seli lakalilimbu lala Yesus, ma ndia aon keke'uk. 4 Huu ndia de ana nalaik nakahuluk, boe ma hene neni ai esa lain neu nai dalak bifin, fo Yesus sangga nesik ndia.a5 Losa ai ndia huun, boe ma Yesus suli lain neu. Basa de noke Sakeos nae, “Sakeos! Konda mai leo! Lai-lai, huu faik ia Au sangga leo tataak nai o umam.”
6 Sakeos heran nalan seli. Boe ma ana konda lai-lai, de noo Yesus neni uman neu. Ana namahoko nalan seli. 7 Tehuu hataholi no'uk manggalau lae, “Awe'ek! Sakeos ia, hataholi ta malole! Hatina de Yesus maso neu leo tataak nai uman?! Basa hataholi bubuluk so!”
8 Losa uma, boe ma Sakeos nambadeik neu Yesus matan, de kokolak nae, “Ama Mesen! Mulai neme leledon ia mai, au ba'e duak basa au hata-hetong, fo fee baba'ek esa neu hataholi hata taak kala. Mete ma au susu bea itak lena-lenak, na, au bae falik neu sala, beke la'i haak.”
9 Yesus nataa nae, “Malole. Faik ia, Manetualain nasala'e nala o mua basa o bobonggim mala, huu o mamahele Manetualain, sama leo ba'i Abraham. 10 Manetualain nadenu Au dadik Hataholi Isi-isik nai dae-bafok ia. Au mai sangga hataholi mana heok neme Manetualain dalan mai so, fo asala'e sala.”b
Tutuik la'e-neu ata fo mana heti neulalau ndia malanggan doin
11 Faik ndia, hambu hataholi no'uk tungga lamanene Yesus. Ala sangga deka-deka lo kota Yerusalem so. Ala lae hetuk Ana nau nakalala'ok Manetualain palendan nai ndia so, sama leo manek esa. Boe ma Yesus tui fee sala nakandandaak esa bali 12 nae, “Hambu hataholi ina-huuk esa sangga la'o neni nusa dea neu, fo ala poi lesun dadik manek. Basa ndia bei fo ana nau fali dadik manek nai nusa hehelin. 13 Ledo-eik nahehele fo sangga la'o so, ana noke hataholi mana tao uen sanahulu, de fee sala esa na doi lilo mbilas esa.c Ana palenda nae, ‘Ei pake doik ia dadik poko. Huu mete ma au fali, na, dei fo ei mafada ei hambu bunak hida so.’ Boe ma ana la'o.
14 Tehuu ndia lau-inggun nala binci ndia. De ala ladenu nadedenuk neni ele neu fo nafada nae, ‘Ai ta nau hataholi ia to'u palenda soa-neu ai.’
15 Mae leo ndiak boe oo, tehuu ala poi lesu neu ndia nai ele. Basa boe ma ana fali. Losa uman, boe ma noke nala hataholi mana tao ues kasanahuluk kala, de natane sala nae, ‘Ei hambu bunak hida neme doi lilo mbilas fo au fee ei ndia so?’
16 Hataholi mana tao ues sososak nafada nae, ‘Ama manek! Au hambu bunak la'i sanahulu so, neme poko fo au simbok mai!’
17 Boe ma manek nafadan nae, ‘Malole! O ia, hataholi mana tao ues malole. Huu au bisa amahele o nenik dede'a kadi'ik kala, de hatematak ia au so'uk o fo palenda kota sanahulu.’
18 Boe ma hataholi mana tao ues kaduan nafada nae, ‘Ama manek! Au hambu bunak doi lilo mbilas lima neme poko fo au simbok mai.’
19 Boe ma manek koan nae, ‘Malole! Mete ma leo ndiak, na, au so'u o fo palenda kota lima.’
20 Tehuu hataholi mana tao ues katelun, neni falik doi lilo mbilan. Boe ma nafada nae, ‘Ia ama doin! Au mbombotin, de au afuni neulalaun fo boso mopon. 21 Au tao leo ndiak, huu au bii. Au bubuluk ama ia, hataholi fo ta naena dale kasian. Ama mahiik ha'i mala hata fo ta ama enan, ma ketu mala hata fo ta ama selen.’
22 Manek namanene leo ndiak, boe ma nasapalak kana nae, ‘O ia ta kalela hadak! O kokolam huku o ao-ina hehelim so. O mae hetuk au ia hataholi fo ta naena dale kasian, fo ha'i ala hata fo ta au enang, ma ketu ala hata fo au ta selen. 23 Mete ma leo ndiak, na, hatina de o ta muu mbeda doik ia nai bank? Fo suek au bisa hambu bunan. Mae kada faak boe oo malole.’
24 Boe ma manek nadenu hataholi fe'ek kala lai ndia nae, ‘Ha'i mala doin ndia, fo feen neu hataholi mana tao ues fo mana hambu bunak kasanahuluk isinaak.’
25 Tehuu ala sapa lae, ‘Ama! Hataholi ndia hambu dai so. Hatina de nau ha'i mala hataholi fo enan faak, fo fee makadaik kana neu ndia bali?’
26 Tehuu manek ndia nataa nae, ‘Dudu'a neulalau! Huu hataholi fo mana nalelak nakaneni hata fo hataholi lamahelen so, dei fo ana hambu nakadaik bali. Tehuu hataholi mbela nakaneni, na, dei fo ala ha'i labasa hata fo ndia enan.d 27 Hatematak ia, ei miu humu mala au musu nggala fo ta hii au dadik manek nai ia. Mia sala ia mai, boe ma tao misa basa sala nai au matang. Miu leo!”’e
Lamatuak Yesus maso neni kota Yerusalem neu
28 Yesus tui nate'e, boe ma ala la'o lakandoo leni Yerusalem leu. Yesus la'ok nakahuluk. 29 Ledo-eik sangga deka-deka lo nggolok dua so, fo ndia Betfage ma Betania, fo nai lete Setun bifin, boe ma Ana nadenu ana mana tunggan dua, fo la'ok lakahuluk. 30 Ana nadenu sala nae, “Ei dua nggei mini nggolok manai mata ele miu. Dei fo ei mita banda keledei mane anak esa nana mba'ak nai ndia. Hataholi bei ta sa'e litak kana. Ei sefi heni talin, fo hela minin ia mai. 31 Tehuu mete ma hambu hataholi natane nae, ‘Hatina de ei sefi heni banda keledei ndia talin?’ na, mafada sala mae, ‘Ai Lamatuan sangga paken.”’
32 Boe ma dua sala leu, de latonggo lo banda keledei mane anak ndia, sama leo Yesus kokolan. 33 Ledo-eik ala sefi heni banda keledei mane anak talin, boe ma maenak natane sala nae, “Hatina de ei mbo'i heni banda ia?”
34 Boe ma lataa lae, “Ai Lamatuan sangga paken.” 35 Maenak ndia simbok no malole, de dua sala hela leni banda keledei mane anak ndia neni Yesus neu. Ala bela sila lafa nalusen nala, neu banda keledei mane anak ndia dean. Boe ma ala lakasasa'ek Yesus neu lain.f 36 Hataholi no'uk boe oo, ha'i lala lafa nalusen nala, ma lafa anan nala, de belan neu dalak, fo soluk Yesus sama leo simbok hataholi ina-huuk. 37 Ledo-eik Ana mulai loe neme lete Setun mai, boe ma hataholi no'uk lo Ndia ana mana tunggan nala, mulai eki koa-kio Manetualain, huu lita basa tanda koasa sila so. 38 Ala eki lae,
“Ndia ia, Manek fo Manetualain nadenun mai!
Manetualain fee baba'e-babatik neu Ndia!
Hatematak ia, hataholi bisa dame lo Manetualain nai nusa sodak so.
Koa-kiok neu Manetualain fo mana nanggatuuk to'u palenda nai lalai fo deman ana seli.”g
39 Tehuu hambu hataholi Farisi nai hataholi no'uk kala sila laladan nala. Ala lafada Yesus lae, “Ama Mesen! Ka'i sala fo boso eki leo ndiak, huu ia ana seli ia, maa!”
40 Tehuu Yesus nataa nae, “Heh! Au afada memak! Mete ma hataholi la ia, seu bafan nala, na, dei fo batu la koa-kio Manetualain!”
Lamatuak Yesus namatani neu Yerusalem
41 Neu faik fo ala deka-deka maso Yerusalem so, Yesus nita kota ndia, boe ma namatani 42 nae, “Awii, hataholi Yerusalem! Au nau fo faik ia, ei simbok mala mole fo Au unik. Tehuu ei ta mbali Manetualain, de hatematak ia seli fain so. Mole ndia, dook neme ei mai so. 43 Dei fo ei musum mala fua dae ndule kota tembon, boe ma ala maso mai sambu ei. 44 Ala tao latu'u heni ei kotam bebelak no dae, boe ma tao lisa ei ma basa ei anam mala. Ala ta ela batu esa nambadeik boe, huu Manetualain mai so, fo sangga nasala'e ei, tehuu ei ta malelak Ndia!”
Lamatuak Yesus maso neni Uma Ina Huhule-haladoik neu
45 Basa boe ma Yesus maso neni Uma Ina Huhule-haladoik neu. Nai uma ndia pasan, hataholi taon dadik pasak so, fo lase'o banda tunu-hotuk. Yesus nita leo ndiak, boe ma Ana mulai husi heni sala leme ndia mai. 46 Ana nasapalak nae, “Manetualain mana kokolan sulak memak so nae,
‘Au ambadedei Uma ia,
fo basa hataholi bisa mai hule-haladoi nai ia.’h
Tehuu ei taon dadik mana mamoa la mamana nakabubuan so.”
47 Basa boe ma tungga faik Yesus neni Uma Ina Huhule-haladoik neu fo fee nanonolik nai ndia. Tehuu malangga anggama Yahudi malanggan nala, mese anggama, ma lasi hada Yahudi la sangga dalak fo nau tao lisa Ndia.i 48 Tehuu ala ta hambu dalak, huu hataholi no'uk kala sila, lamahoko lalan seli lamanene Yesus kokolan.