3 Tehuu doo-doo, boe ma basa anggol oek nai feta ndia. Boe ma Yesus inan nafada Ndia nae, “Tulun dei! Huu sila anggol oen basan so.”

4 Tehuu Yesus nataa nae, “Ina. Hatina de ina nau Au akanenin? Huu Au faing bei ta losa.”

5 Tehuu Inan nafada hataholi mana ono-lauk kala malai ndia nae, “Mamanene baa! Ana nadenu ei tao hata, na kada tao tungga.”

6 Nai ndia hambu nggusi nee, fo hataholi la taon neme batu mai. Nggusi esa, na oen meda liter 75 losa 115. Hataholi Yahudi la lateme pake oe neme nggusi mata leo ndiak mai, fo tao lalalao limak tungga sila anggaman heti-heun. 7 Boe ma Yesus nafada hataholi mana ono-lauk kala sila nae, “Miu ha'i oe fo tao mahenu nggusi la sila.” Boe ma ala tao oe henu nggusi la henuk mbao-mbao. 8 Basa de Ana nafada hataholi la sila nae, “Ndui mala faa, fo minin neu mana tenu fetak.” Boe ma ala tao tunggan. 9 Losa ele, boe ma matenu fetak ana soba oe ndia. Naa te oe ndia dadik anggol oek so! Ana nakandaa, huu tana bubuluk ala hambu anggol oek ndia neme bee mai. (Tehuu hataholi mana ono-lauk kala sila bululuk.)

Boe ma ana noke nala mana kabin touk. 10 De ana koan nae, “Leo iak. Ita natetemen, na maumak fee linu lakahuluk anggol oek malada nalan seli. Mete ma hataholi la linu no'uk so, bei fo ana kalua anggol oek nomer dua. Tehuu o tao masafalin. O fee makahuluk anggol oek nomer dua, de dei fo anggol oek malada nalan seli nakabuik!”

11 Dede'ak ndia ana dadi neme nggolo Kana nai propensi Galelea. Ndia makasososan fo Yesus tao tanda heran fo hataholi litan. Ana natudu Ndia koasa ina-huun leo ndiak, boe ma ana mana tunggan nala lamahele leu Ndia.

12 Basa boe ma Yesus, Ndia inan, Ndia fadin nala ma Ndia ana mana tunggan nala loe leni kota Kapernaum leu. Ala leo lai ndia kada faik hida.^a

13 Neu faik fo hataholi Yahudi la fai malole Paska deka-deka mai so, boe ma Yesus hene neni kota Yerusalem neu.^b 14 Nai Uma Ina Huhule-haladoik pasan, Yesus nita hataholi la lase'o sapi, bi'i-lombo ma mbui lunda, fo hataholi la hasa fo taon neu tunu-hotuk. Nai ndia boe oo hataholi langgatuuk lanea mei fo ala paken, suek hataholi nusa dea mai tuka sila doin, fo ala lenin neu Manetualain nai Uma Ina Huhule-haladoik ndia. 15 Ma Ana husi kalua heni basa hataholi la leme uma pasan ndia mai. Boe ma Ana ha'i nala tali fefeok hida, de Ana taon dadik fifilok. Ana husi heni sapi ma bi'i-lombo la. Ana fae natono mei la, ma mbo'a heni doik kala sila. 16 Boe ma nadenu hataholi mana se'o mbui lunda la nae, “Ba'u heni bua sala sila leme ia mai! Mamanak ia pasak ta ia! Boso tao Au Amang Uman dadik neu mamana danggan!”

17 Boe ma Ndia ana mana tunggan nala lasaneda Manetualain Susula Malalaon sulak nae,

18 Boe ma hataholi Yahudi malanggan nala ladenu Yesus lae, “Mete ma memak o maena haak husi hataholi la leo ndiak, na, matudu tanda heran esa neu ai fo dadik buti!”

19 Yesus nataa nae, “Mete ma ei tao makalulutu mamana malalaok ia, na, dei fo neu binesan, Au ambadedei falik kana.”^d

20 Tehuu ala sapa lae, “Hambun neme bee mai? Huu hataholi la lambadedei Uma Ina Huhule-haladoik ia, losa teuk 46. Hatina de O dudu'a mae, O paluu kada faik telu fo mambadedei falik kana?!”

21 Tehuu ala ta lalelak hata fo Yesus kokolak ndia la'e-neu Ndia ao-inan fo sama leo mamana malalaok esa. 22 De nai fai makabuin, neu faik fo Yesus maten so, basa de nasoda fali, na, Ndia ana mana tunggan nala bei fo lasaneda hata fo Ana nafada memak neu sala so. Boe ma ala lamahele hata fo Manetualain Susula Malalaon nana sulak neme makahulun ele mai, ma hata fo Yesus nafada memak neu sala so.

23 Yesus leo tataak nai kota Yerusalem, fo suek Ana tungga fai Paska nai ndia. Boe ma hataholi no'uk kala lita tanda heran nala fo Ana taon, de lamahele leu Ndia. 24-25 Tehuu Yesus ta namahele sala, huu Ana bubuluk basa hataholi la dalen. Ana ta paluu hataholi nafadan, huu Ndia mesak kana bubuluk memak hataholi nanggatutuu-nambadedein so.