Lamatuak Yesus fee nakandandaak la'e-neu hataholi, fo ta mana nau neni feta kabin neu
22
Basa boe ma Yesus kokolak no sala bali, nenik nakandandaak nae, 2 “Manetualain toto'u palendan ndia, sama leo manek esa tao ndia ana manen feta kabin. 3 Ledo-eik lahehele lala feta so, boe ma nadenu atan nala leu lafada hataholi nana hokak kala lae, ‘Mai leo, huu feta sangga mulai so.’ Tehuu hataholi la sila ta nau mai.4 Basa de ata la sila fali fo lafada manek. Manek namanene leo ndiak, boe ma ana nadenu ata fe'en nala nae, ‘Ei miu mafada hataholi la sila fo ala mai leo, huu feta nahehele so. Au hala sapi, ma tunu-nasu ala nana'a malada la so. Madenu sala mai la'a feta, huu basan nana sadiak so.’ 5 Ata la sila leu lafada leo ndiak. Tehuu hataholi nana hokak kala sila ta nau mbali sala. Hambu mana neni osi neu, hambu mana neni mamana tao ues neu, 6 hambu luma humu lala manek atan nala, de tao doidoso sala losa mate sala.
7 Manek namanene leo ndiak, boe ma ana luli nalan seli. Basa de nadenu soldadun nala leu tao lisa hataholi la, fo mana tao lisa ndia atan nala. Boe ma soldadu la hotu heni kota ndia bebelak no dae.
8 Basa boe ma manek noke nala ata fe'en nala, de nafada sala nae, ‘Feta kabin nahehele so, tehuu hataholi fo au hokak kala sila, ta landaa tungga au fetang. 9 Hatematak ia ei kalua mini dala hataholi no'uk kala miu, fo hoka sudi see fo ei matonggo mia sala lai ndia.’ 10 Boe ma ata la sila leni dala hataholi no'uk kala leu. Ala latonggo hataholi no'uk kala lai ndia, de loo sala leni feta kabin ndia leu. Hataholi no'uk kala tao lahenu feta ndia, hambu hataholi neulauk ma hataholi manggalauk.
11 De manek maso neni feta ndia dalek neu, de mete ndule hataholi mana main nala sila. Boe ma nita hataholi esa ta pake balo'a feta.a 12 Boe ma manek ndia natanen nae, ‘Hei tolanook! Hatina de o maso ia mai ta pake balo'a feta?’ Tehuu hataholi ndia kada namanggonggoak. 13 Boe ma manek palenda ana mana ono-laun nala nae, ‘Hengge hataholi ia ei-liman nala fo mbian deak neu. Ela ana namatani ma doidoso nai mamana makiuk ele.’b
14 Leo ndiak boe oo, Manetualain hoka hataholi no'uk, tehuu Ana hele nala kada lumak fo dadik neu Ndia hataholin.”
Lamatuak Yesus kokolak la'e-neu bae bea fee mana palenda
15 Hataholi Farisi la lamanene basa Yesus kokolan ndia, boe ma lala halak fo sangga te'en ma soli salak neu Ndia. 16 Boe ma ladenu sila ana mana tunggan nala sama-sama lo hataholi leme Herodes paltei politik mai, fo latane-lataak lo Yesus. Ala soso'uk Ndia lae, “Ama Mesen! Ai bubuluk Ama dalen ndoos. Ama ta masapepeko malelak, ma ta hehele matak. Ama fee nanonolik taa-taa la'e-neu Manetualain Dede'a-kokolan no ndoos. 17 Hatematak ia, ai sangga matane dede'ak esa. Tungga ita anggama Yahudi heti-heun, na meda ita musi bae bea fee mana palenda Roma mane ina-huun, do taa?”
18 Tehuu Yesus bubuluk ala sangga doluk Ndia so, fo kokolak laban mana palenda Roma. De Ana nataa nae, “Memak ei hataholi mana dea-matak! Hatina de ei sangga te'ek Au minik dede'ak ndia? 19 Hena matudu Au doi lilo fulak esa fo hataholi paken bae neu bea!” Boe ma latudun doi lilo fulak esa neu Ndia.
20 Basa de natane sala nae, “See mata-aon ia? Ma see naden ia?”
21 Ala lataa lae, “Ndia keser, mana palenda Roma mane ina-huun ndindia.”
Boe ma Yesus nafada sala nae, “Mete ma leo ndiak, na, ei fee mana palenda hata fo ndia haak. Ma fee Manetualain hata fo Ndia haak.”
22 Basa sala lamanene leo ndiak, boe ma ala heran lalan seli, huu Ndia kokolan tetebes. Huu ndia de ala ta bisa te'ek lala Ndia. Boe ma ala la'o ela Ndia.
Lamatuak Yesus fee nanonolik la'e-neu hataholi mana matek nasoda fali; ma hataholi lasaok lai nusa sodak, do taa?
23 Nai ndia boe oo, hambu hataholi paltei Saduki. Hataholi Saduki la fee nanonolik lae, hataholi mana matek ta nasoda fali. Faik ndia, sila boe oo sangga dalak fo te'ek Yesus. Huu ndia de ala mai latanek lo Ndia lae,c 24 “Ama Mesen! Ba'i Musa sulak ela ita hadak ia so nae: mete ma touk esa mate la'o ela saon, tehuu anan taa, na, touk ndia fadin musi sao nala ina falu ndia, suek fee numbu-saduk neu ka'an mana matek ndia so.d 25 Memak makahulun ba'i Musa fee nanonolik leo ndiak, tehuu ai sangga matane leo iak: hambu touk hitu tolanook kala. Uluk sao, tehuu maten, ma anan taa. Boe ma fadin mana tungga ndia, sao nala ina falu ndia. 26 Ta dook bali, boe ma maten boe, ma anan taa. Leo ndiak boe oo fadi katelun: ana sao nala ina falu ndia, tehuu maten, ma anan taa. Leo ndiak nakandondoo henin losa fadi mate'a teisusuk maten. 27 Boe ma ina falu ndia maten boe.
28 Hatematak ia ai sangga matane leo iak: inak ndia sao nitak touk hitu so. Dei fo neu dae-bafok fai babasan, boe ma Manetualain tao nasoda falik hataholi mana matek kala, na, inak ndia dadik neu see saon?”
29 Boe ma Yesus nataa nae, “Mete ma ei matane leo ndiak, na, ei sala malan seli ia maa! Huu ei ta bubuluk Manetualain Susulan isin. Ma ei boe oo, ta bubuluk Ndia koasan fo ana seli ndia! 30 Teteben leo iak. Mete ma Manetualain tao nasoda falik hataholi mana matek kala, na, dei fo ta lasaok bali, sama leo Ndia ata nusa sodan nala.
31 Ma Au boe sangga kokolak la'e-neu hataholi bisa nasoda fali, do taa. Nai ba'i Musa susulan tui nae, ai huu anak esa ha'i na'an tehuu ta kade sana. Neme tutuik ia mai, ita bisa bubuluk tae, hataholi mana matek bisa nasoda fali. Huu nai ndia Manetualain nafada ba'i Musa nae,
32 ‘Au ia, Manetualain neme o ba'im mala mai.
Fo ndia ba'i Abraham, ba'i Isak, ma ba'i Yakob.
Sila basa sala lakaluku-lakatele lakandondoo henin neu Ndia losa hatematak ia.’
Ita bubuluk tae, ledo-eik Manetualain kokolak leo ndiak, na, ba'i la sila mate sala dook ia so. Tehuu Manetualain nae, Ndia bei dadik neu sila Lamatuan. Huu ndia de ita bubuluk tae, sila samanen bei lasoda lakandoo, mae sila mate dook ia so. De mae hataholi mana matek, tehuu ana nasoda fali. Huu kada hataholi kasodak nakaluku-nakatele neu Manetualain, tehuu ta hataholi mana matek, hetu?!”e
33 Hataholi Saduki la lamanene Yesus fee nanonolik leo ndiak, boe ma ala ta bisa bala hata-hata bali. Tehuu hataholi no'uk kala sila heran lalan seli, de lakokola lae, “Awii! Hataholi ia nanonolin ana seli maa!”
Lamatuak Yesus fee nanonolik la'e-neu palenda fo penting nalan seli
34 Ledo-eik hataholi Farisi la lamanene lae, Yesus senggi hataholi Saduki la sila, boe ma lakabubua no'u fo sangga latatanek lo Ndia. 35 Sila malela anggaman esa sangga soba natuda Ndia nae, 36 “Ama Mesen! Au sangga atane leo iak: ita hadan heti-heun, ma anggama palendan nala, no'un seli. Neme basa ba'i Musa palendan ndia mai, na bee ndia penting nalan seli?”
37 Boe ma Ana nataa nae, “Palenda fo penting nalan seli nai Manetualain Susula Malalaon ndia nae leo iak:
‘Manetualain ndia, ei Manetualaim.
De ei musi sue Ndia lena heni basan.
Huu ndia de ei musi dokodoe miu Ndia taa-taa,
malelak Ndia,
ma tao ues tingga-tingga fo tungga Ndia hihiin.’f
‘O musi sue hataholi fe'ek kala, sama leo o sue o ao-ina hehelim.’g
40 Palenda kaduak kala ia, ndia huun neme basa ba'i Musa heti-heun, ma Manetualain mana kokolan nala nanonolin mai. Hataholi ta bisa tungga palenda fe'ek kala, mete ma ndia ta tungga nakahuluk palenda ina-huu kaduak kala ia.”h
Karistus ndia, memak mane Dauk numbu-sadun, tehuu Ndia dadik neu mane Dauk Lamatuan
41 Ledo-eik hataholi Farisi la sila bei lakabubua lai ndia, boe ma Yesus natane nasafali sala nae, 42 “Neme makahulun ele mai Manetualain helu memak fo nadenu Karistus mai so, fo nasala'e nala Ndia hataholin nala. Naa, tungga ei dudu'am mala, Karistus ndia, na see numbu-sadun?”
Boe ma lataa lae, “Ndia ndia, mane Dauk numbu-sadun.”
43 Yesus kokolak nakadaik bali nae, “Mete ma leo ndiak, na, hatina de Manetualain Dula-dale Malalaon nafada mane Dauk fo noke Karistus ndia, na ‘Lamatuak’? Huu Dauk sulak so nae,
44 ‘Manetualain nafada au lamatuang so nae,
“Mai fo manggatuuk muu Au boboa konang, nai mamana nana hadak nalan seli ia.
Huu dei fo Au tao o musum mala, losa ala do'ok leu o.”’i
45 Neme susulak ndia mai, ita bisa bubuluk tae, mane Dauk mesak kana noke Karistus ndia, na ‘Lamatuak.’ De mete ma hataholi lae, Karistus ndia, kada mane Dauk numbu-sadun, na ndia bei ta dai! Huu Ndia boe oo, mane Dauk Lamatuan fo naena haak palenda ndia!”
46 Hataholi Farisi la lamanene Yesus kokolan leo ndiak, boe ma ala kada lamanggonggoak, huu ta hambu hataholi esa boe bisa nataa Yesus. Huu ndia de mulai neme faik ndia mai boe, ala bii lalatanek ma ta lambalani soba latuda Ndia so bali.