4 Yesus ana mana tunggan nala lataa lae, “Ama! Mamanak ia dook no nggolok. De ita ta bisa fee hataholi no'uk kala ia la'a-linu!”

5 Tehuu Yesus natane sala nae, “Ei lotim hida?”

Ala lataa lae, “Ama! Ai mbeda loti kada hituk.”

6 Basa boe ma Yesus nadenu basa hataholi sila langgatuuk leu dae. Boe ma Ana ha'i nala loti kahituk kala sila, de noke makasi neu Manetualain. Basa boe ma Ana bibi'i loti la sila nenik Ndia liman, de Ana fee sala leu ana mana tunggan nala. Boe ma leu baba'e fee basa hataholi la sila. 7 Ala hambu i'ak hida boe. Boe ma Yesus noke makasi seluk neu Manetualain neu i'ak kala sila. Basa de Ana fee ana mana tunggan nala leu baba'e fee hataholi la sila. 8-9 Sila basa sala meda hataholi lifun haa. Ala la'a losa lakabete. La'a basa, boe ma ana mana tunggan nala leu lakaduduluk nana'a elak kala sila, henu lembeneu hitu. Basa boe ma Yesus nadenu basa sala fali. 10 Ledo-eik ala fali, boe ma Yesus no ana mana tunggan nala sa'e leni ofak esa dale leu, de ala leni mamanak esa leu, nade Dalmanuta.

11 Ledo-eik Yesus asa losa Dalmanuta, boe ma hataholi hida leme paltei Farisi mai fo latonggo lo Ndia. Ala latane-lataak lo Ndia, fo sangga dalak latuda Ndia. Ala loke Ndia lae, “Ama! Matudu tanda heran esa fo dadik neu buti nae, memak Ama hambu koasa neme Manetualain mai.”^a

12 Yesus hela naluk ani hahaen, boe ma nae, “Mete ma Au amanene ei kokolam ndia, na Au fale Au daleng! Huu hatina de ei moke tanda heran? Boso tao leo ndiak! Memak hambu tanda heran, tehuu Au ta tao fee ei.”^b

13 Basa boe ma Yesus la'o ela sala, de sa'e fali neni ofak dale neu no Ndia ana mana tunggan nala. Boe ma leni dano selik leu.

14 Ledo-eik Yesus asa losa nai dano laladan, bei fo ana mana tunggan nala lasaneda ta leni lepa-nggee. Ala leni kada loti esa. 15 Yesus namanene ala kokolak loti, boe ma nae, “Ei musi mata neuk baa! Ei boso tungga Mane Herodes no hataholi Farisi la lele'a-nonole manggalaun. Sila lele'a-nonolen sama leo lalu teik fo hataholi seseok kana fo tao natafuu loti.”^c

16 Ndia ana mana tunggan nala lamanene Ana kokolak leo ndiak, boe ma ala lakandaa. De ala lakokola lae, “Tou lasik kokolak hata ndia? Fama Ana kokolak leo ndiak, huu ita ta teni loti, do?”

17 Tehuu Yesus bubuluk sila dudu'an. De Ana kokolak nae, “Hatina de ei kokolak kada loti! Ei ta malelak Au maksut, do? Memak ei langga-uten mba'an seli! 18 Ei mita mia ei mata hehelim mala so, tehuu ei ta bubuluk ndia ndandaan! Sama leo ei ta mita! Ei mamanene mia ei ndi'i doo hehelim mala so, tehuu ei ta bubuluk hata-hata. Sama leo ei bei ta mamanene! Ei mafalende henin^d 19 loti kalimak kala sila fo Au bibi'i sala so, de feen neu hataholi lifun kalimak kala sila, do? Fain ei makaduduluk mala loti elak kala lembeneu hida?”

Ala lataa lae, “Lembeneu sanahulu dua, Ama.”

20 Yesus natane sala bali nae, “Ei bei masaneda fai maneuk Au bibi'i loti kahituk kala, fo fee hataholi 4.000 la'a, do? Ei makaduduluk mala nana'a elak kala lembeneu hida?”

Ala lataa lae, “Hitu, Ama!”

21 Boe ma Yesus nae, “Memak tetebes! Ei mita mata nggei so, tehuu hatina de ei bei ta malelak Au koasang neme bee mai?”

22 Basa boe ma Yesus asa losa nai nggolo Betsaida. Nai ndia, hataholi la loo hataholi mbokek esa neni Yesus neu. Ala loke Yesus nafaloen, fo tao nahai hataholi mbokek ndia.

23 Basa boe ma Yesus to'u nala hataholi ndia liman, de dua sala kalua leni nggolok deak leu. Boe ma Ana mbula amben neu hataholi ndia matan, de nafaloe hataholi ndia matan. Ana natane nae, “Leo bee? O bisa mita so, do?”

24 Hataholi ndia botik matan, fo suli kii-konak, boe ma nataa nae, “Hei! Au ita hataholi la bela'o, tehuu leo bali au ita ai la bela'o!”

25 Basa boe ma Yesus tao seluk liman neu hataholi ndia matan. Boe ma hataholi ndia suli soba seluk, naa te matan neulau ndoos so. Hatematak ia, ndia nita no manggaledok so. 26 Boe ma Yesus nadenu hataholi ndia fali, boe ma Ana fee nasanenedak neun nae, “O fali leo, tehuu tungga dala fe'ek! Boso fali muni Betsaida muu bali.”

27 Basa boe ma Yesus asa la'ok ndule nggolok kala malai Kaisaria Filipi. Nai dala laladak, Yesus natane ana mana tunggan nala nae, “Mete ma tungga hataholi la tutuin, na, lae Au ia, see?”

28 Ala lataa lae, “Hambu lae ‘Yohanis Mana Salanik’. Hambu luma lae ‘ba'i Elia’, fo Manetualain mana kokola makahulun. Luma bali, na lae Ama ia esa neme Manetualain mana kokola lele ulun fe'ek.”^e

29 Boe ma Yesus natane bali nae, “Tehuu tungga ei, na Au ia, see?”

Petrus nataa nae, “Ama ia Karistus! Fo Manetualain tudu memak kana neme makahulun ele mai so.”^f

30 Boe ma Yesus ka'i sala nae, “Ei boso mafada esa boe baa!”

31 Basa boe ma Yesus mulai nafada ana mana tunggan nala nae, “Au ia, Hataholi Isi-isik. Dei fo Au hambu doidosok no'uk, huu basa lasi hadak kala, malangga anggama Yahudi la malanggan nala, ma mese anggama la timba heni Au. Dei fo ala tao lisa Au, tehuu nandaa no binesan,^g Au asoda fali.”

32 Yesus nafada manggaledok leo ndiak, boe ma Petrus hela nalan neu dalak bifin de ana ka'in nae, “Ama boso kokolak leo ndiak! Au ta nau sila liman nala la'e Ama.”

33 Tehuu Petrus kokolak leo ndiak, na, ta tungga Manetualain hihiin. Boe ma Yesus nasale, de suli Ndia ana mana tungga fe'en nala. Boe ma Ana mboka Petrus nae, “Wei! Ndia nitu la malanggan kokolan ndia. Boke malai heok ia! O dudu'a tungga kada hataholi hihiin, tehuu ta Manetualain hihiin!”

34 Boe ma Yesus nanggou nala hataholi fe'ek kala fo ala mai lakabubua lo Ndia ana mana tunggan nala. Boe ma Ana nanoli sala nae, “See nau tungga Au, na ana musi nakatataka tungga-tungga faik nakandoo! Ana musi nafalende heni ndia hihii hehelin, fo tungga kada Manetualain hihiin. Mae hataholi sangga tao lisan boe oo, ana musi kada tungga nakandoo, sama leo hataholi lemba ndia ai ngganggen fo neu mate.^h 35 Hataholi fo kada nau nasoda soa-neu ndia ao hehelin, na dei fo ana ta bisa nasoda nakandoo no Manetualain. Tehuu hataholi fo sadia mate, huu ana tungga Au ma tui-bengga Manetualain dala sodan, dei fo ana bisa nasoda nakandoo no Manetualain.ⁱ 36 Mamanene baa! Mete ma o hambu basa dae-bafok isin nala, tehuu Manetualain timba heni o, na, o hambu hata? 37 Mae o lemba muni basa dae-bafok isin nala boe oo, o ta bisa tukan neu o samanem.

38 Masanenedak baa! Hataholi malai dae-bafok hatematak ia manggalaun mata-matak kala. Tala nau tungga Manetualain. De see mae tungga Au do, mae to'u Au nanonoling, na, Au boe oo mae manakun nai Manetualain matan. Huu Au, Hataholi Isi-isik ia, neu ko Au fali maing uma nusa sodak mai. Ma Manetualain ata nusa sodan nala boe oo, tungga no'u lo Au. Ai konda mima nusa sodak mai, mia Amak koasa mandela-masa'an, bei fo hataholi la bubuluk Au ia see.