2 Ka Yesus peka, na, “Be'a! Sabaj'a pake conto sèmi ne'e:

5-6 Èle èèna ka, Yesus nori hari si, j'ara-j'ara sabaj'a. Na pake upama, peka na, “Sèmi d'ai talora mèda, angalai èu mai nèti kaj'èu, ho manubha ètu èmu èu. Te ngaa èu dhu dènge boe ngaa-ngaa, sèna ka hia ne na'a. Ka èu lamu asa èmu angalai dhu leo, ho pamako nèti li'u, peka na, ‘Lai aae na, ee! Hia taha ku ja'a roti d'ai tèlu bua sa! Te ji'i abhu tamu ètu èmu, te ngaa ji'i dhu mola-mèu èi! De lai aae na, ee! Dhoka tèlu bua di. Pe ja'a g'ati hari!’

7 Ladhe sèmi angalai èu dhaa, peka na, ‘Te a'a, ee! Dhèu bhèj'i luu, na, èu mai parèi! Babèdho dhu patèke le! Ana iiki se dhu bhèj'i aa'i le. De mage mu nasa kahèi! Pe lod'o leo hari ku laa!’

8 Te ngaa masi ka sèmi èèna, ngee paie-iie. Masi ka dhèu ne kèd'i boe lula èu angalai nèngu, te ngaa ladhe èu loe boe pamako, tatu na kèd'i, ho hia èu roti sèra.

9 Sèmi èèna kahèi, dènge manèngi-mangaj'i.

10 Te dhèu aa'i-aa'i dhu manèngi taruu mi Ama Lamatua, èèna na rèngu sèmi. Dhu loe boe tenge, èèna na abhu. Dhu ma'ète boe paroa, pe Na bhoke babèdho. 11 Miu pangee ku laa. Abhu ètu mia ladhe ama, dhu ana na manèngi i'a, na hia mege? 12 Do, ladhe ana manèngi kanadhu manu, na hia karaka rai? Tatu aad'o, si? 13 Dhèu rai-haha ne, mema bhelu. Te ngaa Ama miu ètu sorga, Nèngu ne mema be'a. De ladhe miu dhèu dhu bhelu, d'èi hia mèdha dhu be'a mi ana-ana miu, ngaa hari Ama! Nèngu ne hia, mesa boe ngaa dhu miu parluu, te ngaa risi nèti èèna. Na pala-bagi Roh Na dhu Mola-Mèci mi dhèu dhu manèngi mi Nèngu.”

14 Ca lod'o, Yesus magèle eele nidhu nèti ca dhèu dhu lii aad'o. Ka dhèu ne bisa padhai lii hari. Dhèu-dhèu ètu sèra malaa. 15 Te ngaa abhu kahèi dhu peka na, “Mema, Nèngu bisa magèle eele nidhu, lula Nèngu abhu koasa nèti dhèu aae nidhu, nuka Baalsebul.”^a

16 Abhu dhèu leo neo sèku Yesus. Ka ra manèngi ho Yesus tao tadha malaa èci hari, sèna ka dhèu re'a, na, koasa Na nèti Ama Lamatua.^b

17 Te ngaa Yesus ne'a nare le kahadhu kaj'alu rèngu sèra. Ka Na lii, peka na, “Ladhe ètu rai cue, kabarai na pamusu, tatu rai ne laho mae-mae. Sèmi èèna kahèi, ladhe ètu d'ara èmu cue, isi èmu loe boe patao-palaha, tatu èmu ne j'aj'i boe mi ngaa sa èci! 18 De ladhe nidhu se pamusu aa pabata èci dènge èci, tatu dhèu aae ra bisa boe rèd'u paredha dènge nèbhu. De maso boe asa d'ara kahadhu, ladhe miu peka, na, Ja'a pake koasa nidhu ho bata eele hari nidhu. 19 Sanèd'e paie! Dhèu miu kahèi dhu re'a magèle eele nidhu. Rèngu pake koasa nèti nidhu, do? Aad'o, si! De miu baku sad'i padhai lii di, dhu peka na, Ja'a ne pake koasa nidhu sèna ka bata eele si. Pe dhèu miu ka dhu pama'ète, peka na, ngaa dhu miu galaa ne, lèke boe. 20 Te ngaa ladhe Ja'a tare'a-re'a bata nidhu pake koasa Ama Lamatua, èèna dhu peka na, paredha Lamatua ètu katanga madha miu le. Paredha ne abhu le, te ngaa miu oe sèmi pame'a boe sa.

21 Ladhe dhèu èra èci dènge rèka, dhu bori tèke ètu keja g'ana-kariu madhenge èmu na, tatu mèdha-panyau na, dhèu bani boe lasi mana'u. 22 Te ngaa ladhe abhu dhèu dhu èra risi nèti nèngu mai segi ne, aa parame nèti rèka na. Hèia na parame nèti mèdha-panyau na kahèi, ho papala mi dhèu-dhèu na. Nèbhu nare sange ne'e lamatua èmu èèna maena dhoka mi rèka na. Te ngaa limuri ne, na maena heka rèka na sèra.^c

23 Sanèd'e paie-iie! Dhèu dhu pa'èci boe dènge Ja'a, nèngu musu Ja'a. Aa dhèu dhu soru-bara boe ètu d'ara sasab'a Ja'a, nèngu ne'a dhoka ad'u-ue j'ara maruru di.”^d

24 Yesus tuhu hari lii Na, aku Nèngu na, “Ladhe èdhi bata eele nidhu nèti ca dhèu, nidhu ne rai la'e asa era kaliu, ho tenge era ae iisi. Lula na abhu boe era dhu pamèci dènge dad'èi na, hèia na pangee na, ‘Aah! Abhu boe era ae iisi, be'a risi ja'a lèpa hari asa dhèu dhu uru èèna ja'a pea.’ 25 Ropa na lèpa, rage hari era uru èèna, dhu mèu le, aa dhu lalau pabe'a-be'a. 26 Hèia nidhu ne la'e paroa angalai na pidhu dhu bhelu risi nèti nèngu. Ka aa'i-aa'i ra lasi pea ètu dhèu èèna, ka ra madahu ne. De lèpa limuri, mamuri dhèu ne asa aae ka ele iie.”

27 Lod'o Yesus padhai lii era dènge dhèu ae sèra, dhèu bhèni èci ètu èèna pa'oo, peka na, “Ina Mu oto kapai, lula nara iisi Èu, aa pasusu Èu!”

28 Ka Yesus b'ala ne, peka na, “Tare'a ina! Te ngaa dhu oto risi, nuka dhèu dhu pasa dhilu ho nanene Lii Holo-Nori Ama Lamatua aa tao madhutu!”

29 Lod'o Yesus padhai lii era, dhèu oke rare Ne, hèia Na peka, “Dhèu limuri ne re'a dhoka ad'u-ue bhabhelu di. Rèngu loe boe manèngi ho Ja'a tao tadha malaa hia rèngu, sèna ka re'a, na, Ja'a ne tare'a-re'a dhèu unu Lamatua. Te ngaa Lamatua dhu tao le tadha malaa uru èèna, re dhèu nèti lii padhai Na, nuka Yunus. Èèna na d'ai le! 30 Ngaa dhu lèke mi dedha Yunus èèna, j'aj'i tadha hia dhèu ètu kota Niniwe, peka na, Ama Lamatua ka dhu paleha ne mai. Èci èèna ka dènge Dhèu Rai-haha Tare'a-re'a ne. Ngaa dhu lèke mi Ja'a, èèna na j'aj'i mi tadha hia dhèu limuri ne, dhu peka na, mema Ama Lamatua ka dhu pua Ja'a mai.^e

31 Ladhe lod'o d'ai èle rai-haha ne, ho Lamatua j'aj'i ka Hakim, pe bhèni aae nèti balèu mamuri hari ho na j'aj'i sakasii. Na paj'uj'u ho galaa miu aa'i-aa'i mi dhu mamuri taa limuri ne, peka na, ‘Miu aa'i-aa'i mi se, goa!’ Te uru èèna, bhèni aae mai nèti j'ara kaj'èu, ho nèdhi dènge madha na, mamèu dhèu aae Soleman. Te ngaa limuri ne abhu Dhèu ètu talora aae miu, dhu kapai risi nèti dhèu aae Soleman. Te ngaa miu pusi boe Ne!^f 32 Mesa boe nèngu di! Èèna na dhèu-dhèu nèti Niniwe kèd'i titu ho paj'uj'u ai asa miu dhu mamuri limuri ne, peka na, ‘Miu aa'i-aa'i mi se, goa!’ Ra peka sèmi èèna, lula uru èèna, ropa Yunus la'e peka dad'èi Lamatua dènge rèngu, hèia ra ele-ho'a dènge. Masi ka Dhèu dhu kapai risi nèti Yunus ètu talora aae miu, te ngaa mo'o boe ele-ho'a sa hèi.”^g

33 Yesus tuhu hari lii padhai Na, aku Nèngu na, “Dhèu suru labhu, na padhèdi ètu era dhu dedha, sèna ka pasaraa d'ara kama hia dhèu aa'i-aa'i dhu maso asa era èèna. Abhu ètu mia dhèu suru labhu, ho saguru ne dènge soe, sèna ka pahuni ne!^h Èèna guna boe ngaa-ngaa!ⁱ 34 Musi madha miu èci èèna ka dènge labhu. Nèngu ka dhu pasaraa d'ara miu. Ladhe musi madha maroga, dhèu ladhe ngaa aa'i-aa'i dènge d'ara dhu maroga. Te ngaa ladhe musi madha mèu, dhèu rèdhi dènge d'ara dhu be'a. 35 Tenge j'ara sèna ka saraa ètu d'ara miu, j'aj'i mèu aae sèmi saraa madha lod'o. Saraa ètu d'ara miu, mage sèmi heo hèru, dhu pad'elo dhoka mamaho di. 36 Ladhe d'ara miu saraa, abhu boe sasanga èci sa dhu maroga, tatu mamuri miu j'aj'i mèu, nuka sèmi labhu aae dhu d'elo mamuri miu.”

37 Yesus padhai lii nare, ka dhèu èci nèti partei agama Parisi nèru Ne, lasi ra'a asa èmu na. D'ai d'ara èmu èèna, ka Yesus madhèdi ètu mei ra'a. 38 Te ngaa lamatua èmu ne malaa ladhe Yesus madhèdi na'a, dhu j'amo uru boe ai, madhutu atora dhèu Parisi.

39 Ka Yesus lii dènge ne, peka na, “Eeh! Miu dhèu Parisi se seli-kolane! Miu kèpe pa'èra atora agama miu! Miu bhèlu boe rase pega dènge galaa re li'u toke kale'e, te ngaa sanèd'e boe ho pamèu d'ara miu dhu kaj'alu, dhu bhelu-katub'a dènge manga'a dèu ngara! 40 Goa, ee! Baku bhèlu. Ama Lamatua ka dhu paj'aj'i re li'u, aa tao re d'ara kahèi. 41 Te ngaa dhu be'a risi eele, miu pala-bagi dhèu dènge boe unu sèra, nèti ngaa dhu miu unu, sèna ka miu mola ètu katanga madha Lamatua.

42 Miu dhèu Parisi! Bèli-camèd'a miu dui mere mamadhe-mamopo! Ca pala nèti canguru pala dhu miu hia mi Lamatua, miu pa'iga taruu nèti dhu ana iiki toke kapai. Toke bubhu-lara dhu ana iiki-iiki d'ara oka, miu pa'iga hèi! Te ngaa miu pusi boe dènge j'ara dhu kapai risi. J'ara-j'ara sasue mi Ama Lamatua, aa dènge boe bia cabèka, miu pabhèlu eele! Mema tare'a, èdhi hud'i hia ku pala Lamatua, te ngaa baku bhèlu kahèi dènge j'ara-j'ara dhu kapai risi sèra.^j

43 Bèli-camèd'a miu dui mere mamadhe-mamopo! Te miu d'èi dhoka tenge era re madha ètu d'ara èmu sabaj'a, aa d'èi dhèu pakab'ua miu ètu madha dhèu ae.

44 Bèli-camèd'a miu dui mere mamadhe-mamopo! Te miu nuka sèmi ro'a dhèu madhe dhu pamera le dènge rai. Dhèu kako re dedha, te ngaa re'a boe, na, ètu èèna na abhu ro'a dhèu madhe, lula ro'a èèna ètu dedha na tèdhi na mèu, te ngaa d'ara na laho kao-kao. Masi ka madhutu ad'a èdhi, ladhe dhèu j'èli lèke ro'a dhèu madhe, pakaj'alu ngi'u na, de nèngu nia boe maso asa d'ara èmu sabaj'a. Miu dhèu Parisi se, ca ropa dènge ro'a dhèu madhe èèna! Re li'u, miu mèu titu kèna. Te ngaa ètu d'ara miu pènu dènge kaj'alu. Dhèu dhu padètu dènge miu, j'aj'i mi kaj'alu kahèi.”

45 Ètu èèna, abhu ca dhèu d'èlu-mèu atora agama Yahudi. Ropa na tadèngi lii Yesus, ka b'ala dènge, aku nèngu na, “Lii padhai Ama deo na, lèke mi dedha ji'i!”

46 Hèia Yesus b'ala lii na, peka na, “Tare'a! Miu dhèu d'èlu-mèu agama Yahudi, hud'i dui mamadhe-mamopo kahèi! Miu soru boe dhèu ho pasamaa si, te ngaa miu asa pasusa si dènge j'ara pabia atora agama miu. Ka miu pua dhèu sèra pasae rupa-rupa babia nèti atora miu sèra. Te ngaa miu mesa mi, mo'o boe pasae babia ne dènge kacui-aai miu ca laa sa hèi!

47 Bèli-camèd'a miu dui mere mamadhe-mamopo! Te miu bhute dhoka pudhi hadhu tao tugu hia dhèu rèti lii padhai Ama Lamatua dhu uru sèra, sèna ka pakab'ua si. Te ngaa bèi-baki miu se'e ka dhu pamadhe si! 48 Miu èci èèna kahèi dènge bèi-baki miu sèra. Rèngu tule eele dhèu rèti lii padhai Lamatua, ka ra pamadhe si. Hèia miu dame hadhu ro'a ho j'aj'i tadha, peka na, miu se mo'o kahèi dènge tatao bèi-baki miu. 49 Nèti èèna ka, Ama Lamatua dhu ne'a aa'i, peka nèdhi le, na, ‘Pe Ja'a pua dhèu rèti lii padhai Ja'a, dènge dhèu pajuu-paleha dhu leo, sèna ka lasi asa dhèu sèra. Hèia dhèu sèra kalabhe paj'èra cahag'e, aa cahag'e hari ra pamadhe si.’

50-51 Dhèu taa limuri ne, hud'i tago rare tatao nèti dhèu-dhèu dhu pamadhe dhèu rèti lii padhai Lamatua. Sèra sa, mulai ige nèti Lamatua paj'aj'i rai-haha ne, karèi nèti mamadhe Habel, toke d'ai dhèu dhu limuri tèka, nuka Sakaria. Nèngu ne'e ka dhu ra pamadhe ne ètu talora aae mei korban dènge Kama Mola-Mèci ètu d'ara Èmu Kapua Manèngi-Mangaj'i. Miu se kahèi pasae mere hahuku ra!^k

52 Miu dhèu d'èlu-mèu atora agama Yahudi! Bèli-camèd'a miu dui mere mamadhe-mamopo! Te miu dhu mèd'u gagoe ho bisa bhoke babèdho, sèna ka dhèu re'a mèu dad'èi Ama Lamatua. Te ngaa miu mesa mi maso boe asa d'ara. Dhu karehe risi hari, miu pahèb'e dhèu, ho baku ra lasi asa èèna!”

53-54 Ropa Yesus padhai lii nare, ka mese agama dènge dhèu Parisi sèra jèke Ne. Karèi nèti lod'o èèna ka, rèngu karèi rupa-rupa j'ara, sèna ka neo pamanahu Ne. Ra loe boe tenge j'ara ho pabèbhe Ne.