6 Ladhe rèngu maso asa d'ara èmu gareja, do, d'ara pesta rèngu d'èi tenge era dhu be'a risi, sèna ka dhèu ae ladhe rèdhi si. 7 Ladhe lasi asa d'ara pasa, rèngu d'èi dhèu pakab'ua si. Ra tenge j'ara, sèna ka dhèu pahaha iisi mi rèngu, aa d'èi dhèu paroa ra, ‘Ama mese, dhu hua iia.’ 8 Te ngaa miu baku madhutu j'ara rèngu se'e! Dhèu baku paroa miu ‘ama mese’, lula Mese miu dhoka ca dhèu di. Aa miu aa'i-aa'i mi se'e, pa'a'ari. 9 Mage j'oka padedha dhèu ètu rai-haha ne, peka na, ‘ama’, lula Ama miu ètu sorga dhoka èci di. 10 Dhèu baku paroa miu kahèi, ‘lamatua’, lula Ama Lamatua miu dhodhoka èci di, nuka Ja'a ne, dhu Ama Lamatua pajaji mema karèi nèti uru ka. 11 Nèti èèna ka, Ja'a pasanèd'e mema miu, mage padedha iisi mi, nuka sèmi dhèu dhu d'èi dhoka dhèu pakab'ua ra. Nèti miu se, cee ka dhu neo j'aj'i dhèu kapai, nèngu hud'i j'aj'i ku nuka sèmi ènu, sèna ka lalau-lalo'o dhèu leo.^b 12 Te dhèu dhu pamone-pabhèni, èèna na Lamatua pamanahu ne. Te ngaa dhèu dhu pahaha iisi nuka sèmi ana iiki, bèli-camèd'a Lamatua ded'e padedha ne.”^c

13 Ka Yesus tuhu hari lii padhai Na, aku Nèngu na, “Hee, miu mese agama dènge dhèu Parisi se! Miu mema dhèu dhu padhai lii leo, tao leo! Bèli-camèd'a miu dui mere pala miu, lula miu mo'o boe parcaya Ja'a, nuka Dhèu dhu Ama Lamatua pamoa tèke pua mai. Aa dhu bhelu risi hari, miu bhabhae dhèu neo mai asa d'ara rai paredha Ama Lamatua, sèna ka ra baku parcaya Ja'a.

14 [Hee, miu mese-mese agama dènge dhèu-dhèu Parisi! Mema miu dhèu dhu padhai lii leo, tao leo! Bèli-camèd'a miu pasae mere mamadhe-mamopo, lula miu d'èi kapod'e-kabèli bhèni balu, sèna ka parame mere èmu ra. Te ngaa ètu madha dhèu ae, miu pa'abhe bhabhelu miu, dènge j'ara sabaj'a panèbhu-nèbhu, ho dhèu peka na, miu dhèu d'ara mola. Te ngaa èèna na, Ama Lamatua hia huku dhu bia risi mi miu.]^d

15 Hee, miu mese agama dènge dhèu Parisi sèra! Mema miu dhèu dhu padhai leo, tao leo! Bèli-camèd'a miu pasae mere mamadhe-mamopo, lula miu lami asa mia èèna ka, palème lèu, do, ca'e-puru ledhe, neo tenge dhoka ca dhèu di, sèna ka maso partei agama miu. Te ngaa ropa na maso, miu ad'u-ue mamuri na asa bhelu risi, toke na abhu hahuku dhu babia na, dua hari risi nèti miu ètu d'ara naraka.

16 Wee! D'ara miu dhu bèdhu le. Nga tao ka limuri ne miu neo pad'elo j'ara hia dhèu leo? Pe miu abhu mamadhe-mamopo, lula miu aj'a leli, peka na, ‘Ladhe dhèu pajaji pake soo-subha dhu ale Èmu Kapua Manèngi-Mangaj'i, na, dhèu ne pa'èki boe dènge lii pajaji na èèna. Te ngaa ladhe na pajaji pake subha dènge ale mèdha hualaa ètu d'ara Èmu Kapua Manèngi-Mangaj'i, na, nèngu heka pa'èki dènge lii pajaji na.’ 17 Miu goa kabao! Miu pangee na, Ama Lamatua pakab'ua risi mèdha hualaa sèra nèti Èmu Kapua Manèngi-Mangaj'i Na, do? Aad'o! Te Èmu ne'e ka dhu tao mèdha sèra j'aj'i mola-mèci!

18 Miu se aj'a ore-leli kahèi, peka na, ‘Ladhe dhèu pajaji pake subha ale mei korban dhu ètu d'ara Èmu Kapua Manèngi-Mangaj'i, dhèu ne pa'èki boe dènge lii pajaji na. Te ngaa ladhe na pajaji pake subha aa ale mèdha ètu dedha mei korban, na, dhèu ne heka pa'èki dènge lii pajaji na kèna.’ 19 Miu mema bèdhu tare'a-re'a. Tatu mei korban ne, kab'ua risi nèti mèdha ètu dedha mei èèna. Te mei èèna ka dhu tao mèdha korban rèngu j'aj'i mola-mèci mi Ama Lamatua. 20 Nèti èèna ka, ladhe dhèu subha ale mei korban ne, na, be'a risi ale mei dènge aa'i-aa'i dhu ètu dedha mei èèna. 21 Aa ladhe dhèu subha ale Èmu Kapua Manèngi-Mangaj'i, na, be'a risi ale kahèi Èmu Kapua Manèngi-Mangaj'i dènge kolongara Ama Lamatua. Te Nèngu ka dhu pea ètu talora aae na. 22 Aa ladhe dhèu subha ale sorga, na, èèna èci èèna ka dènge nèngu ale kadera paredha Ama Lamatua, palere-lere dènge kolongara Na, te Nèngu ka dhu madhèdi nèd'u paredha ètu èèna.^e

23 Hee, miu mese agama dènge dhèu Parisi sèra! Mema miu dhèu dhu padhai leo, tao leo! Pe miu abhu mamadhe-mamopo, lula miu d'èlu-mèu titu kèna pa'iga capala nèti canguru pala dhu miu hia Lamatua. Miu pa'iga aa'i mèu-mèu, toke bubhu nèti d'ara oka, èci sa tèke eele boe. Miu ige toke lutu-sela nuka sèmi, rèu d'are, ka'unyi, dènge lasona. Te ngaa miu pabhèlu eele atora dhu kab'ua risi nèti Ama Lamatua! Te mamuri miu mola boe. Miu sue boe dhèu dhu unu aad'o. Aa mamuri miu madhutu boe dad'èi Lamatua. Be'a risi miu tao madhutu aa'i dhu pakarej'e d'ara Lamatua, heka mi pa'ige kèna bubhu-bubhu dhu lutu sèra, dhu miu neo hia mi Lamatua.^f 24 D'ara miu bèdhu, te ngaa tasamia ka neo era paj'uj'u j'ara hia dhèu leo? Miu tao atora toke lutu, ho pua dhèu madhutu, te ngaa atora dhu kab'ua risi nèti Ama Lamatua, miu mesa mi pusi-pahae boe. Nuka sèmi miu sule eele kikidui dhu ana iiki-iiki nèti èi dhu miu minu, te ngaa badha aae sèmi kabao, miu dhèle kateme!

25 Hee, miu mese agama dènge dhèu Parisi sèra! Mema miu dhèu dhu padhai leo, tao leo! Pe miu abhu mamadhe-mamopo, lula miu rase pega-mago toke mèu kale'e, te ngaa dhoka re li'u di. Masi ka re d'ara na dhu kaj'alu titu kèna nèti mana'u miu dènge dèu ngara miu. Mamuri miu sèmi èèna kahèi.

26 Wee, dhèu Parisi dhu bèdhu, ee! Rase uuru ku re d'ara pega-mago miu sèra! Dènge sèmi èèna, re li'u na j'aj'i mèu kahèi!

27 Wee, miu mese agama dènge dhèu Parisi sèra! Mema miu dhèu dhu padhai leo, tao leo! Pe miu abhu mamadhe-mamopo, lula miu ca ropa dènge ro'a dhèu madhe dhu lame dènge èi dama pudhi. Dhèu ladhe re li'u na, be'a titu kèna. Te ngaa ètu d'ara, pènu dènge rui dhèu madhe, aa dhu hèu oone-oone.^g 28 Miu èci èèna ka! Miu d'èi tao iisi mi sèmi dhèu dhu mola-mèci. Nèti li'u dhèu rèdhi, na, miu nuka sèmi dhèu d'ara mola. Te ngaa ètu d'ara, miu cakaraa dhèu bhelu-katub'a. Te miu padhai lii leo, tao leo, aa pabhèlu eele paredha Ama Lamatua sèra.

29 Hee, miu mese agama dènge dhèu Parisi sèra! Mema miu dhèu dhu padhai leo, tao leo! Pe miu abhu mamadhe-mamopo! Miu pakapai ro'a nèti dhèu rèti lii padhai Ama Lamatua, aa dule pabe'a-be'a ro'a dhèu d'ara be'a. 30 Te ngaa miu peka na, ‘Sèmi ji'i se mamuri tèu èci èèna ka dènge bèi-baki ji'i, tatu ji'i madhutu boe pamadhe dhèu dhu rèti lii padhai Ama Lamatua sèra.’ 31 Dènge j'ara ne'e, miu unu mi bhoke rahasia miu, na, miu bhelu èci èèna ka dènge bèi-baki miu. 32 De la'a, sina ma. Miu tao taruu la bhabhelu toke d'ai èle, madhutu tatao bèi-baki mi!

33 Miu tare'a-re'a bhelu-katub'a, èci èèna ka dènge mege dhu dènge raco. Miu pangee, na, Ama Lamatua huku boe miu? Aad'o! Tatu Na pèci miu asa d'ara ai naraka! 34 Sanèd'e paie! Pe Ja'a pua ana madhutu Ja'a mai, ho ra aj'a-nori dènge pad'elo miu j'ara mamuri Lamatua dhu lèke. Te ngaa èèna na miu pamadhe cahag'e, aa cahag'e hari miu paku pamadhe si ètu aj'u palolo-palèbha. Abhu kahèi dhu miu hake-paru si ètu d'ara èmu-èmu sabaj'a, aa abhu cahag'e kahèi miu paj'èra si toke ra rai nèti kota èci asa kota leo. 35 Lod'o uru sèra, bèi-baki miu pamadhe Habel. Masi ka nèngu ne, d'ara dhu mola. Bèi-baki miu dhu loe boe pamadhe dhèu dhu d'ara mola nèti lai ana-lai èpu. Toke d'ai Sakaria, ana nèti Barakia. Ra pamadhe ne ètu madha Èmu Kapua Manèngi-Mangaj'i padètu dènge mei korban. Lula miu madhutu bhabhelu bèi-baki mi, nèti èèna ka miu hud'i tago mere raa nèti dhèu dhu d'ara mola se'e. 36 Mema lèke tare'a! Te miu ana lod'o limuri ne, bèli-camèd'a abhu huku lula j'ara-j'ara bhabhelu dhu bèi-baki miu ad'u-ue karèi nèti uru ka mai.”

37 “Hee, miu dhèu Yerusalem! Miu dhu loe boe pamadhe dhèu-dhèu rèti lii padhai Ama Lamatua, aa pèci pamadhe dhèu pajuu-paleha Na dhu mai soru-bara miu. Ja'a ke'a boe roca pamako miu, sèna ka lèpa mai asa Ja'a ne, nuka sèmi manu rena dhu bhiri-sarobho ana na ètu d'ara èla na. Te ngaa miu pusi-pahae boe Ja'a. 38 Nèti èèna ka, Lamatua pusi-pahae heka dènge èmu miu. Ka bèli-camèd'a, èmu èèna dhèu pea heka ètu d'ara. 39 Nanene paie-iie! Te bèli-camèd'a miu mèdhi heka Ja'a toke d'ai lod'o na, miu mangaku, peka na, ‘Èdhi manèngi sèna ka Ama Lamatua pala-bagi mamèngi-nale mi Dhèu ne'e, lula Lamatua ka dhu pua Na mai.’ Miu mangaku sèmi èèna, heka mèdhi hari Ja'a kèna.”