Lii pakasame lula-nèti dhèu sab'a oka anggor
12
Èle ka, Yesus padhai lii hari dènge kètu agama Yahudi, mese agama, dènge dhèu heka-dhèu heka ad'a Yahudi sèra. Ka Na lole pake lii upama èci, peka na, “Dhèu èci la'e tao oka ho neo sèla anggor ètu dedha rai na. Ka na tao tedhe reo nare oka èèna, aa tao bak cue ho kanate èi anggor asa d'ara la'e kahèi. Hèia na patitu èmu madhenga oka cue dhu dedha. Èle èèna ka, na hia dhèu leo seb'a oka èèna, ho ra pabagi èi anggor. Hèia na pakèd'i asa rai leo la'e.a 
Markus 12:1-17
2 Lod'o d'ai hèru puu-g'ètu hua anggor, ka lamatua oka pua ana paleha na èci la'e asa dhèu sab'a oka sèra, ho na manèngi pala na. 3 Ropa d'ai nèi, ka dhèu seb'a sèra kèpe rare, ka game ne. Hèia ra pua ne lèpa dènge ai hua da'u-da'u.
4 Ka lamatua oka pua hari ana paleha leo èci. Te ngaa dhèu seb'a sèra dhedhe panu'a kètu na. Ka ra pamakae ne, dènge magèle eele ne. 5 Hèia lamatua oka èèna pua hari ana paleha leo èci la'e. Te ngaa dhèu seb'a sèra hake pamadhe ne. Ra tao samia èèna ka, lamatua oka pua taruu ana paleha na la'e. Te ngaa dhèu seb'a sèra game cahag'e, aa pamadhe cahag'e. 6 Ate eele dhodhoka ana mone mesa dhu pasue nèti lamatua oka. Lula na abhu heka j'ara dhu leo, ka lamatua oka na pua ana d'èlu na la'e. Na pajiko, peka na, ‘Sèmi ja'a pua ana d'èlu ja'a la'e, na, rèngu sèmi rare dènge be'a, aa ra nanene ne.’
7 Hèia na pua ana na la'e. Ropa dhèu seb'a sèra rèdhi ana na mai, ka ra papeka isi-aanga ra, peka na, ‘We! Mi ladhe ku laa! Mone heka nèi pua ana d'èlu na mai! Ladhe ama na madhe, nèngu ne'e ka dhu sèmi nare aa'i-aa'i mèdha pusaka ama na. De mai ti pamadhe ne, sèna ka èdhi tare pusaka na!’ 8 Ka aa'i-aa'i ra kèpe, ka ra pamadhe ne, hèia ra core eele ngi'u aae na asa li'u tedhe la'e. Lii pakasame ne, d'ai sange ne'e ka.”
9 Èle èèna ka, Yesus karèi dhèu kapai sèra, peka na, “Madhutu ngangee miu, na, lamatua oka èèna tao dhèu seb'a sèra tasa mera mia? Madhutu ngangee Ja'a, tatu nèngu mai ho pamadhe aa'i dhèu seb'a sèra, sèna ka na hia dhèu leo hari seb'a oka anggor na.
10 Èdhi aa'i-aa'i ti baca le ètu d'ara Sasuri Mola-Mèci Ama Lamatua, peka na,
‘Abhu hadhu cue dhu tuka hadhu sèra core eele le,
Te ngaa limuri ne, j'aj'i le hadhu padhèdi.
11 Ama Lamatua mesa Na dhu pili nare, ka Na pamadhèdi hadhu ne.
Nèti èèna ka, èdhi ladhe, na, be'a titu kèna!”’b
12 Dhèu kapai sèra re'a dènge, na, Yesus padhai lii paraga, pake lii pakasame èèna. Rèngu sèra sama sèmi dhèu seb'a oka anggor èèna. Hèia ra tenge j'ara ho neo kèpe Yesus. Te ngaa ra madha'u dènge dhèu ae dhu d'èi lii holo-nori Yesus. Ka ra kako eele Ne.
Dhèu neo sahèdhe Yesus dènge j'ara b'ae bea
13 Èle èèna ka, dhèu kapai Yahudi se pua pèri-pèri dhèu Parisi dènge dhèu nèti partei Herodes, lasi pakarèi dènge Yesus, ho ra neo sahèdhe Ne. 14 Ka ra karèi Ne, peka na, “Ama Mese! Ji'i nge'a, na, d'ara Ama ku mola, aa d'èi boe kapod'e-kabèli. Ama me'a d'ara dhèu. Ama peka dad'èi Lamatua dènge mola-mola, lula Ama pili boe rèhu dhèu. De, ji'i neo karèi Ama ku ca j'ara. Madhutu atora agama Yahudi, èdhi bisa b'ae bea asa dhèu aae kapai dhu paredha Roma,c do aad'o?”
15 Te ngaa Yesus ne'a le, na, rèngu neo sahèdhe Ne, sèna ka Na padhai lii lab'a paredha Roma. Ka Yesus b'ala si, peka na, “Nga tao ka miu neo sahèdhe Ja'a dènge lii karèi sèmi èèna! Cob'a pad'elo ku mi Ja'a doi pudhi cue!”
16 Ka ra j'ole doi pudhi cue hia Ne. Hèia Yesus nare, ka laladhe. Ka Na karèi si, peka na, “Rèhu dènge ngara cee ètu doi pudhi ne?”
Ka ra dhaa, peka na, “Èèna dhèu aae kapai paredha Roma!”
17 Ka Yesus peka, “Naa, ladhe sèmi èèna, ngaa dhu unu dhèu paredha, hia asa dhèu paredha la'e. Te ngaa dhu unu Ama Lamatua, hia asa Ama Lamatua la'e.”
Ropa tadèngi rare, lii b'ala Na, ka ra malaa, lula Yesus peka dhu lèke. Nèti èèna ka, dhèu sèra bisa heka sahèdhe Ne.
Dhèu madhe mamuri hari, aa dhèu paleo èmu ètu sorga, do aad'o?
18 Abhu partei agama dhu leo èci, ngara na partei Saduki. Rèngu aj'a, peka na, dhèu madhe bisa heka mamuri. Ca tèka, abhu dhèu Saduki pèri-pèri mai neo sahèdhe Yesus.d
Markus 12:18-44
19 Ka ra padhai lii dènge Yesus, peka na, “Ama Mese! Musa suri tèke le hia èdhi atora, peka na: ladhe dhèu mone èci madhe tèke eele dhèu èmu na, te ngaa rèngu dènge boe kolo, na, ari dhèu mone na bisa leo nare hari bhèni balu èèna, sèna ka abhu kolo ho baku pa'ele kolongara a'a na dhu madhe èèna.e 20 Mema Musa aj'a sèmi èèna. Te ngaa ji'i neo karèi Ama sèmi ne'e: abhu dhèu pidhu dhu pa'a'ari. Mone uru leo uuru èmu, te ngaa madhe, abhu mèka kolo. 21 Ka ari na leo nare bhèni balu èèna. Nèbhu boe ka ari na madhe, te ngaa abhu boe kolo kahèi. Ari na ka tèlu, sèmi èèna kahèi; na leo nare bhèni balu èèna, te ngaa abhu mèka kolo, nèngu madhe. 22 Taruu-taruu sèmi èèna ka, d'ai ana limuri tèka madhe kahèi. Nèbhu boe, hèia bhèni balu èèna madhe.
23 Naa! Ji'i neo karèi Ama sèmi ne'e: dhèu bhèni èèna, leo le dènge mone dhèu pidhu! D'ai lod'o èle rai-haha ne, ho Lamatua pamamuri hari dhèu madhe, bhèni ne j'aj'i dhèu èmu cee, nèti dhèu pidhu sèra?”
24 Yesus dhaa, peka na, “Lii karèi miu sèra, tadha, na, miu me'a iia mèka isi Sasuri Mola-Mèci Ama Lamatua! Miu me'a boe koasa Lamatua kahèi. De miu sala titu kèna!
25 Mi nanene! Sèmi ne'e: ètu sorga dhèu paleo boe èmu. Dhèu madhe aa'i-aa'i dhu Lamatua pamamuri hari, ra paleo heka èmu. Sèmi èèna kahèi, ana pajuu Ama Lamatua ètu sorga. 26 Aa Ja'a peka mi miu lula-nèti dhèu madhe mamuri hari, do aad'o. Musa suri tèke lula-nèti ana aaj'u dhu ai na'e, te ngaa kèpu boe. Miu sanèd'e lii lolo èèna, do aad'o? Ropa ai na'e ana aaj'u èèna, Ama Lamatua peka dènge Musa, na, ‘Ja'a ne, Ama Lamatua nèti bèi-baki èu, nuka Abraham, Isak, dènge Yakob. Toke d'ai sange ne'e, rèngu aa'i-aa'i manèngi-mangaj'i mi Ja'a era.’f 27 Èdhi te'a, na, bèi-baki èdhi sèra madhe nèbhu le. Te ngaa, lula Ama Lamatua peka nare le, na, Nèngu j'aj'i Lamatua rèngu era. Nèti èèna ka, èdhi te'a, na, rèngu mamuri hari le. De masi ka dhèu madhe le, te ngaa ra mamuri hari. De dhèu mamuri dhu manèngi-mangaj'i mi Ama Lamatua, te ngaa dhèu madhe aad'o, sina ma? Nèti èèna ka, ladhe miu kèpe taruu a'aj'a dhu peka na, dhèu madhe mamuri heka, èèna miu sala ae!”
Lii paredha ho sue Lamatua, aa sue dhèu leo kahèi
28 Ètu lod'o èèna, abhu mese agama èci dhu nanene Yesus padhai lii dènge dhèu nèti partei Saduki sèra. Madhutu a'abhu mese agama èèna, na, Yesus dhaa lèke le lii karèi rèngu. Hèia na karèi Yesus, peka na, “Ama! Ja'a neo karèi sèmi ne'e: atora ad'a dènge lii paredha agama èdhi ae titu kèna. Madhutu a'abhu Ama, nèti lii paredha dhu mai nèti Musa, mia ka dhu hua iia risi?”
29 Ka Yesus dhaa, peka na, “Lii paredha dhu hua iia risi, peka sèmi ne'e ka:
‘Miu dhèu Isra'el aa'i-aa'i mi! Mi nanene paie!
Ama Lamatua èèna, mema Lamatua èdhi,
aa Kètu èdhi kahèi.
Nèngu dhoka mesa Na di, lamatua leo aad'o.
30 De miu hud'i sue risi eele Ne nèti aa'i-aa'i.
Nèti èèna ka, miu hud'i d'èi pa'èci dènge Ne dènge d'ara kateme,
aa tadhe mèu Ne,
dènge sab'a èra ho madhutu dad'èi Na.’g
31 Aa lii paredha ka dua peka na:
‘Èu hud'i sue ku dhèu leo, sama sèmi èu sue ngi'u èu unu mu.’
Dua paredha se'e ka dhu hua iia risi. Abhu heka lii paredha leo dhu risi eele nèti dua paredha se'e.”h
32 Ka mese agama èèna b'ala hari, peka na, “Tare'a! Ama ku peka lèke kèna. Te Ama Lamatua j'aj'i Kètu èdhi. Lamatua leo aad'o.i 33 Èdhi hud'i sue risi Ne, toke d'ara d'èi ho pa'èci dènge Ne, tadhe mèu Ne, dènge sab'a èra ho madhutu dad'èi Na. Èdhi hud'i sue dhèu leo kahèi sama sèmi èdhi sue ngi'u èdhi unu ti. Lamatua d'èi risi eele tatao sèmi èèna, nèti èdhi madhutu dhodhoka atora agama di. Tatao sèmi èèna be'a risi, nèti èdhi tèti badha ho lati tunu hia Lamatua, do tèti mèdha leo hia Ne.”j
34 Ropa Yesus nanene nare dhèu ne dhaa sèmi èèna, ka Na pangee, na, mese agama ne ne'a dènge be'a le. Hèia Yesus peka na, “Èu oe j'aj'i unu Ama Lamatua kèna.”
Èle èèna ka, dhèu leo sèra bani heka pakarèi dènge Yesus, lula dhèu èci sa segi boe Ne.k
Kristus èèna, ana-èpu dhèu aae Daud, te ngaa Nèngu lamatua Daud kahèi
35 Èle èèna ka, Yesus aj'a dhèu ae sèra ètu Èmu Kapua Manèngi-Mangaj'i era. Ka Na karèi si, peka na, “Madhutu ngangee miu, na, tasamia? Mese agama sèra aj'a, peka na, Kristus èèna dhu Lamatua paj'uj'u nèti uru ka mai. Madhutu ngangee rèngu, na, Kristus èèna dhoka ana-èpu Daud. Te ngaa a'aj'a sèmi èèna d'ai lèke mèu mèka. 36 Lula, nèti uru ka mai, Roh Ama Lamatua dhu Mola-Mèci pake Daud ho suri, peka na,
‘Ama Lamatua peka le mi lamatua ja'a, na,
“Mai ho madhèdi mi era dhu hua iia, re bab'oa g'ana Ja'a.
Pe èèna na Ja'a tao musu èu pahaha iisi, toke ra bisa boe ded'e kètu mi èu.”’l
37a De èdhi te'a, na, dhèu aae Daud paroa Kristus èèna, peka na, ‘Lamatua’ na. Nèti èèna ka, ladhe dhèu sèra peka, na, Kristus èèna dhoka ana-èpu Daud di, èèna d'ai mèka. Lula Nèngu èèna j'aj'i lamatua nèti Daud kahèi.”
Yesus peka na, pajiko paie mese agama dhu kapod'e-kabèli sèra
37b Ropa Yesus peka nare sèmi èèna, dhèu ae sèra d'èi titu kèna nanene Ne. 38 Ka Yesus peka hari si, “Miu hud'i pajiko paie ku mese agama. Rèngu d'èi pasia pake kodho madhera d'ai rai, lasi paraga dènge dhèu ae, sèna ka dhèu dhu rèdhi rèngu sèra, koa si, peka na, ‘Ladhe ku laa! Dhèu sèra, dhèu kapai!’ 39 Ladhe sèmi rèngu maso asa èmu manèngi-mangaj'i, do lasi ra'a-sisi, ra tenge era madhèdi dhu be'a risi, sèna ka dhèu ae rèdhi si. 40 De hua iia mi pajiko paie! Rèngu kapod'e-kabèli bhèni balu ho parame rare èmu bhèni balu sèra. Te ngaa ètu madha dhèu ae, rèngu pahuni bhabhelu ra sèra dènge j'ara titu ho sabaj'a pamadhera aae, sèna ka dhèu peka na, rèngu se dhèu mola. Te ngaa limuri mai, na, Ama Lamatua hia huku dhu bia risi asa rèngu.”
Bhèni balu hia doi kolete dhu ae risi
41 Èle èèna ka, Yesus la'e madhèdi patangara dènge boaraka derma ètu Èmu Kapua Manèngi-Mangaj'i. Na ladhe dhèu mai pamaso doi kolete asa d'ara boaraka èèna. Ka Na ladhe dhèu kaja sèra parèu doi ae. 42 Te ngaa abhu bhèni balu èci dhu dènge boe ngaa-ngaa èci sa mai manèngi-mangaj'i, ka na pamaso dua doi asa d'ara boaraka èèna. Dua doi dhu na pamaso èèna, kab'ua ciki ood'e di.