3-4 Te ngaa Yesus b'ala, aku Nèngu na, “Tasamia, ee? Miu teko bhèlu lii lolo Daud, si? Daud dènge ana-ana madhutu na dhu manganga titu kèna. Hèia na maso asa d'ara Paleo Manèngi-Mangaj'i Ama Lamatua, ka nare roti dhu ama agama hia le mi Lamatua, ka rèngu ra'a. Te ngaa dhu bisa ra'e roti se dhodhoka ama agama sèra. Dhèu leo bisa boe. Èle ka Daud si ra'a, te ngaa ca dhèu sa pasala boe si. Miu nuka sèmi dhèu dhu baca mèdhi boe sasuri Lii Holo-Nori Ama Lamatua!^b 5 Te ètu d'ara sasuri èèna, suri kahèi nèti sasab'a ama agama Yahudi sèra, ètu d'ara èmu sabaj'a, lèke dènge lod'o ae sasab'a. Te ngaa rèngu sala boe ngaa-ngaa.^c 6 Nanene! Uru èèna, èmu sabaj'a ka dhu kab'ua, te ngaa limuri ne abhu dhu kab'ua risi, nuka Ja'a ne, Dhèu Rai-haha Tare'a-re'a. 7 Ètu d'ara Sasuri Mola-Mèci Ama Lamatua, Na peka na, ‘Dad'èi Ja'a sèmi ne'e: dhèu Ja'a sèra hud'i pad'elo ku rasa kasia èci dènge èci. Ladhe ra tao boe madhutu j'ara ne, na, badha korban dhu rèngu rèti hia Ja'a, dènge boe kab'ua.’ De ladhe miu me'a mèu sasoa nèti lii padhai Lamatua ne, tatu miu pasala boe ana madhutu Ja'a se. Te ra tao boe sala ngaa-ngaa!^d 8 Te Ja'a ne, Dhèu Rai-haha Tare'a-re'a. Ja'a ka dhu dènge hak ho pama'ète, peka na, dhèu bisa sab'a ngaa, lèke dènge lod'o ae sasab'a.”

9 Èle ka Yesus tèke eele era èèna, la'e asa d'ara èmu sabaj'a ra. 10 Ètu ne'e, abhu mone ca dhèu dhu kacui-aai madhe cabèka. Dhèu Parisi sèra dhu tenge-tenge j'ara ho pasala Yesus, ladhe sèmi Na puri-pa'èle dhèu dhu kacui-aai madhe cabèka ne, lèke dènge lod'o ae sasab'a. Hèia ra karèi Ne, peka na, “Madhutu atora agama èdhi, dhèu bisa puri-pa'èle dhèu, lèke dènge lod'o ae sasab'a-la'a, do aad'o?”

11 Hèia Yesus dhaa, aku Nèngu na, “Ladhe kahib'i-kalèbho ci'u manahu asa d'ara ro'a, lèke dènge lod'o ae sasab'a, dhèu unu na mai name nare, sina ma?^e 12 De Ama Lamatua sue dhèu rai-haha, risi nèti dhèu unu kahib'i-kalèbho deo na. Nèti èèna ka, dhèu bisa tao j'ara dhu be'a lèke dènge lod'o ae sasab'a.”

13 Ka Na lii dènge dhèu dhu ai madhe cabèka na, “J'ole kacui-aai èu mai!” Hèia, na j'ole kacui-aai dhu madhe èèna, kaca'a la èle dènge ka, sama dènge kacui-aai dhu iia èèna.

14 Ropa dhèu Parisi se rèdhi sèmi èèna, hèia ra nasa titu kèna. Èle ka ra kalua tèke eele èmu sabaj'a ne, hèia lasi pare'a, aku rèngu na, “Èdhi hud'i tenge ku j'ara, sèna ka pamadhe Ne!”

15 Te ngaa Yesus dhu ne'a ngangee rèngu dhu karehe ne, nèti èèna ka la'e asa era leo. Dhèu ae madhutu Ne, hèia Na puri-pa'èle dhèu dhu pèd'a aa'i-aa'i. 16 Te ngaa Na kai si, peka na, “Mage lami palolo kahèi dènge dhèu leo lula-nèti Ja'a.” 17 Nèngu tao sèmi èèna, madhutu sèmi lii padhai Ama Lamatua dhu peka le mi dhèu nèti lii padhai Na, ngara na Yesaya, dhu suri tèke, na,

22 Ca tèka, rèti asa Yesus ca dhèu dhu nidhu tao toke bèdhu aa ele lii. Hèia Yesus pa'èle ne dènge babège eele nidhu nèti dhèu ne'e. Ka dhèu ne bisa nèdhi, aa bisa padhai lii. 23 Dhèu ae se, ropa rèdhi sèmi èèna, hèia ra malaa-maloha. Ra papeka na, “Nèngu ne'e, ele boe ana-èpu Daud, dhu dhèu rèti lii padhai Ama Lamatua suri tèke karèi nèti uru ka! Nèngu ne'e, tatu Dhèu dhu èdhi mate tae-tae èèna!”

24 Te ngaa ropa dhèu Parisi tadèngi rare, hèia ra ro'o boe parcaya. Ka ra papeka, na, “Wee! Dhèu ne bisa babège nidhu, lula dhèu aae nidhu Baalsebul ka dhu pangèd'u Na koasa.”^g

25 Te ngaa Yesus ne'a lii padhai dhèu Parisi se. Hèia Na peka dènge dhèu se'e, aku Nèngu na, “Lii padhai miu ne, lèke boe! Ladhe ètu d'ara rai cue, ana kabarai na patao-palaha, tasa mera mia ho rai ne bisa taha! Sèmi èèna kahèi, ladhe dhèu ètu d'ara kota èci, do d'ara èmu cue, èci patao dènge èci, tatu ra mae-manyèla, toke laho mae-mae, si! 26 De ladhe nidhu pamusu dènge nidhu, aa palab'a èci dènge èci, tatu dhèu aae ra nèd'u paredha nèbhu boe! 27 Sanèd'e paie! Dhèu miu re'a kahèi babège eele nidhu. Ra pake koasa nèti nidhu, do? Aad'o! De miu baku padhai lii ore dhu peka na, Ja'a pake koasa nidhu, ho babège eele nidhu. Pe dhèu miu unu mi ka dhu pama'ète, peka na, ngaa dhu miu galaa ne, lèke boe j'ara. 28 Te ngaa ladhe Ja'a tare'a-re'a babège eele nidhu pake koasa nèti Roh Ama Lamatua, èèna pad'elo na, Lamatua èèna tare'a-re'a Dhèu Aae dhu ètu le katanga madha miu.

29 Ladhe dhèu neo lasi mana'u èmu dhèu èci dhu èra, nèngu hud'i èki-karadhe uuru ku dhèu lamatua èmu ne. Heka na mana'u nèti mèdha-panyau na sèra.^h

30 Sanèd'e, ee! Te dhèu dhu pa'èci boe dènge Ja'a, nèngu pamusu dènge Ja'a. Aa dhèu dhu soru-bara boe Ja'a ètu d'ara sab'a-la'a, nèngu ne'a dhoka pa'iu dhèu di.ⁱ 31 De nanene paie-iie lii padhai Ja'a ne! Ama Lamatua dhu sadia saku eele sasala-sasigo dhèu. Ladhe dhèu padhai lii pakarehe kolongara dhèu leo, Ama Lamatua sadia abho ne era. Te ngaa ladhe abhu dhèu dhu bani padhai pakarehe Roh Ama Lamatua dhu Mola-Mèci, Ama Lamatua saku eele boe sasala na èèna. 32 Ladhe dhèu pakarehe Ja'a, Dhèu Rai-haha Tare'a-re'a ne, Ama Lamatua sadia saku eele sasala na. Te ngaa cee ka dhu bani padhai lii pahahe Roh Ama Lamatua, te ngaa Ama Lamatua saku eele boe sasala na, masi ka toke dai mia-mia la'e!”^j

33 Hèia Yesus padhai lii taruu dènge dhèu Parisi se, peka na, “Ngee paie-iie! Aj'u dhu be'a, hia hua dhu be'a. Te ngaa aj'u dhu karehe, hia hua dhu karehe. Nèti hua na, dhèu bisa tadhe aj'u ne, be'a do karehe.^k 34 Te ngaa miu se ca ropa dènge mege, dhu ne'a dhoka kapod'e-kabèli di! Miu me'a boe padhai lii dhu be'a. Lula ngaa dhu tèke ètu d'ara, èèna ka dhu kalua mai nèti d'ara hèb'a na.^l 35 Dhèu be'a, tatu lii padhai na be'a, lula ètu d'ara na abhu j'ara dhu be'a. Te ngaa dhèu bhelu, tatu lii padhai na karehe, lula ètu d'ara na dhu pènu dènge bhabhelu-katub'a.

36 Lèka la lii Ja'a ne! Te bèli-camèd'a lod'o èle rai-haha, Ama Lamatua parisa lii langu dhèu aa'i-aa'i. Lod'o èèna, dhèu èci-èci ka hud'i dhaa lii-lii nèngu dhu dènge boe kolo-kapua. 37 De mage-mage! Te bèli-camèd'a èèna, Ama Lamatua dadoo lii-lii miu sèra, aa pama'ète peka na, miu lèke huku do, aad'o.”

38 Ropa tadèngi lii padhai Yesus sèmi èèna, hèia pèri-pèri mese agama dènge dhèu Parisi, peka dènge Yesus, aku rèngu na, “Ama Mese! Ji'i neo ngèdhi tadha malaa èci, sèna ka j'aj'i mi tadha, peka na, koasa Ama, tare'a nèti Ama Lamatua.”^m

39 Te ngaa Yesus jèke si, peka na, “Weh! Miu dhèu taa limuri ne, mo'o boe madhutu Ama Lamatua! Miu se me'a dhodhoka ad'u-ue bhelu-katub'a di! Masi ka miu manèngi tadha malaa, te ngaa Ja'a tao boe. Lula uru èèna, Lamatua hia le tadha malaa re Yunus, dhèu nèti lii padhai Na. Èèna d'ai le!ⁿ 40 Yunus pea tèlu mèu-tèlu mèda ètu d'ara kabake i'a aae ci'u. Sèmi èèna kahèi dènge Ja'a, Dhèu Rai-haha Tare'a-re'a ne. Bèli-camèd'a Ja'a kahèi ètu d'ara ro'a dhèu madhe, tèlu mèu-tèlu mèda.^o 41 Ladhe d'ai lod'o èle rai-haha ne, Lamatua j'aj'i hakim. Aa dhèu Niniwe se titu j'aj'i sakasii ho galaa miu, peka na, ‘Miu aa'i-aa'i se, goa!’ Uru èèna, ropa dhèu Niniwe sèra tadèngi lii padhai Yunus, dhèu nèti lii padhai Ama Lamatua, hèia ra tèke eele sasala ra. Te ngaa miu sèmi boe èèna. Masi ka limuri ne, abhu le Dhèu ètu talora aae miu, dhu kapai risi nèti Yunus, nuka Ja'a ne. Te ngaa miu se pusi-pahae boe Ja'a ciki sa hèi.^p 42 Pe, ètu d'ara lod'o èle rai-haha ne, ladhe Lamatua j'aj'i hakim, bhèni aae Syeba nèti balèu, j'aj'i sakasii kahèi. Na paj'uj'u ai na mi miu, ho na galaa miu aa'i-aa'i dhu ana loo-limuri ne, peka na, ‘Miu aa'i-aa'i mi, goa!’ Uru èèna, bhèni aae ne mai nèti rai kaj'èu ho neo nèdhi unu na mamèu dhèu aae Soleman. Te ngaa limuri ne, abhu ca Dhèu ètu talora aae miu dhu kapai risi nèti dhèu aae Soleman, nuka Ja'a ne. Te ngaa miu pusi-pahae boe Ja'a ciki sa hèi.”^q

43 “Ladhe babège eele nidhu nèti ca dhèu, nidhu ne la'e pea asa era dhu kaliu, ho j'aj'i mi era ae iisi na. Te ngaa abhu boe era dhu mèci ho na pea kalili. 44 Hèia na pangee, peka na, ‘Abhu boe era dhu be'a sèmi nèi, hua iia ja'a lèpa hari asa dhèu dhu uru èèna ja'a pea.’ Ka la'e hari asa era nèngu uru èèna. Na ladhe na, era ne mèu bia, aa dhu lalau rare pabe'a-be'a. 45 Hèia nidhu ne la'e paroa nare angalai na dhèu pidhu dhu bhabhelu ra risi nèti nèngu. Ka lasi pea ètu d'ara dhèu ne, hèia aa'i-aa'i ra kakeho ne. De limuri ne, mamuri dhèu ne asa ele iie-iie. Sèmi èèna kahèi lèke mi dhèu bhelu-katub'a taa limuri ne.”

46 Lod'o èèna, Yesus padhai lii era dènge dhèu ae. Hèia ina dènge ari Na sèra, mai neo paraga dènge Ne. Rèngu titu ètu li'u, ka ra pua dhèu lasi paroa Ne. 47 Hèia dhèu mai peka dènge Ne, aku rèngu na, “Ama! Ina dènge ari Ama ètu li'u nèi. Rèngu neo paraga dènge Ama.”^r

48 Ka Yesus peka dènge ra, “Cee ka ina Ku, aa cee ka a'ari Ja'a dhu tare'a-re'a?” 49 Hèia Na paj'uj'u asa dhèu-dhèu dhu madhutu Ne, ka Na lii, aku Nèngu na, “Rèngu se'e se ka, ina dènge a'ari Ja'a. 50 Te dhèu dhu tao madhutu dad'èi Ama Ku ètu sorga, rèngu ka ina Ku aa a'ari Ja'a dhu tare'a-re'a.”