Lamatua Yesus hia lii pakasame nèti dhèu sèle hini ètu rupa-rupa rai
13
Lod'o èèna kahèi, Yesus kalua nèti èmu èèna, la'e madhèdi asa sebhe dano Galilea. 2 Hèia dhèu ae-ae mai lingu rare Ne. Ka la'e madhèdi asa dedha koha cue, dhu panahu ètu era èèna, ho aj'a dhèu sèra. Dhèu aa'i-aa'i ètu dae sèra nanene Ne. 3 Hèia Na aj'a madha j'ara ae-ae mi rèngu pake lii pakasame. Na lole, peka na, “Abhu ca dhèu sab'a oka-tedhe, dhu ceb'e hini ètu d'ara oka na. 4 Ropa na ceb'e hini se, abhu dhu lèke ètu j'ara. Hèia manu-bhui mai, ka tutu ra'e aa'i hini se.5 Te ngaa hini cahag'e lèke ètu rai dhu dènge hadhu. Hini se muri malai, lula abhu rai ciki di. 6 Te ngaa ropa lod'o rea, hèia ana aaj'u se kamale, ka mango eele si. Te amo ra marèma boe ètu d'ara rai.
7 Abhu hini cahag'e dhu lèke ètu era j'u'u padhudhu. Hèia j'u'u padhudhu se hèlu pamadhe aa'i si.
8 Te ngaa abhu hini cahag'e lèke ètu rai isi. Hini se muri, ka ra kapai toke hua-hela. Abhu dhu tèlu nguru hari, abhu dhu èna nguru hari, aa abhu dhu d'ai cangasu hari.a
9 Cee dhu dènge ro'a dhilu, na nanene paie-iie!”
Nga tao ka Lamatua Yesus d'èi aj'a pake lii pakasame
10 Èle èèna ka, ana madhutu Yesus mai karèi Ne, aku rèngu na, “Nga tao ka Ama aj'a dhèu ae pake lii pakasame?”
11 Hèia Yesus dhaa, aku Nèngu na, “Lula miu se neo me'a tare'a-re'a paredha Ama Lamatua, nèti èèna ka Ja'a peka mema sasoa nèti lii pakasame ne. Te ngaa mi dhèu leo, Ja'a aj'a pake lii pakasame. 12 Te dhèu dhu tare'a-re'a neo re'a dad'èi Ama Lamatua, pe Lamatua hia ne asa ne'a ae. Te ngaa dhèu dhu pusi-pahae boe dad'èi Lamatua, pe Lamatua tao ne asa tabha goa.b 13 Ja'a aj'a-nori si pake dhoka lii pakasame di, lula:
‘Rèngu rèdhi le,
te ngaa ro'o boe re'a.
Rèngu tadèngi le,
te ngaa ra pusi-pahae boe.’
14 Rèngu se cakaraa dènge dhèu dhu Yesaya suri mema le. Yesaya èèna, nuka dhèu nèti lii padhai Ama Lamatua, dhu suri, na,
‘Miu èèna na tadèngi,
te ngaa miu pakatele dhilu.
Miu èèna na ladhe mèdhi,
te ngaa mo'o boe pame'a ngaa dhu j'aj'i le.
15 Lula d'ara dhèu se'e adhu sèmi hadhu,
ra pakatele dhilu ra,
aa ra pabèdhu musi madha ra.
De hud'i rèngu sène, sèna ka ro'a dhilu ra katele-katipa,
aa soro tèke si, sèna ka musi madha ra bèdhu sèmi èèna.
Hud'i laa, ho Ja'a puri-pa'èle ia ka si,
lula rèngu pusi-pahae boe Ja'a.’c
16 Te ngaa miu se, oto! Lula miu ladhe mèdhi dènge musi madha, aa tadèngi dènge ro'a dhilu miu unu mi. 17 Parcaya la Ja'a! Uru èèna, dhèu rèti lii padhai Ama Lamatua, dènge dhèu dhu d'ara mola, d'ara ra neo rèdhi ngaa dhu limuri ne miu ladhe mèdhi, te ngaa bisa boe. D'ara ra neo kahèi tadèngi ngaa dhu limuri ne miu tadèngi le, te ngaa bisa boe.”d
Lamatua Yesus peka sasoa lii pakasame nèti hini
18 Ropa padhai lii nare, hèia Yesus peka dènge ra, “De mi nanene ka sasoa nèti lii pakasame deo na. 19 Hini dhu lèke ètu j'ara, nuka dhèu dhu nanene Lii Holo-Nori nèti Ama Lamatua nèd'u paredha, te ngaa nèngu ne'a iia boe. Hèia dhèu aae nidhu mai parame nare Lii Holo-Nori nèti d'ara dhèu ne.
20 Hini dhu ceb'e lèke ètu rai dhu pènu dènge hadhu, nuka dhèu dhu nanene Lii Holo-Nori Ama Lamatua, hèia na sèmi nare dènge d'ara karej'e. 21 Te ngaa Lii Holo-Nori ne, amo na marèma boe. Nèti èèna ka, nare boe nèbhu ètu d'ara dhèu ne. Ropa dhèu leo paj'èra ne lula na sèmi nare Lii Holo-Nori ne, ka dhèu ne kèpe pa'èra heka a'aj'a sèra.
22 Aa hini dhu lèke ètu talora aae j'u'u padhudhu, nuka dhèu dhu nanene Lii Holo-Nori. Te ngaa nèngu bhute dènge rupa-rupa j'ara, ho pakarej'e mamuri na. Hèia bhabhute se'e ka seti eele Lii Holo-Nori ne nèti d'ara nèngu, toke dènge heka kab'ua.
23 Te ngaa hini dhu lèke ètu rai isi, nuka dhèu dhu pasa paie dhilu na, sèna ka sèmi nare Lii Holo-Nori, aa tao madhutu dad'èi Lamatua. Hèia na tao j'ara-j'ara dhu be'a, sama sèmi hini dhu muri toke kapai, ka na hua ae-ae. Abhu dhu tèlu nguru hari, abhu kahèi èna nguru hari, aa abhu dhu d'ai cangasu hari.”
Lamatua Yesus hia lii pakasame nèti j'u'u ètu talora aae oka
24 Yesus lolo hari lii pakasame èci, aku Nèngu na, “Paredha Ama Lamatua ne, nuka sèmi abhu ca dhèu la'e ceb'e hini dhu be'a ètu d'ara oka na. 25 D'ara mèda èèna, ropa dhèu aa'i-aa'i bhèj'i luu, hèia dhèu bhelu mai, ka na ceb'e lamusi j'u'u ètu d'ara oka ne. 26 Ropa hini ètu d'ara oka ne d'ai hua-hela, hèia dhèu sab'a se, ladhe rèdhi j'u'u dhu muri palere-lere dènge hini se. 27 Ka lasi peka dènge lamatua oka ne, aku rèngu na, ‘Ama! Ca hari ni ji'i sèle hini dhu be'a ètu d'ara oka ama, si? Nga tao ka muri mai pab'ali dènge j'u'u ae-ae?’
28 Lamatua oka ne dhaa, peka na, ‘Èèna tatao nèti dhèu bhelu.’
Hèia dhèu sab'a se peka, aku rèngu na, ‘Ama, ji'i la'a ko'o eele j'u'u sèi, do?’
29 Te ngaa na b'ala, peka na, ‘Hud'i laa, te ladhe miu ko'o eele j'u'u se, ana nganga'a èdhi se lèke bete kahèi. 30 Hud'i rèngu sène ra muri palere-lere toke hèru puu-g'ètu. Pe d'ai lod'o na, ja'a peka dènge dhèu sab'a se, na, “Miu pakaboko uru ku j'u'u sèra. Hèia èki si ca èki-ca èki ho tunu eele si. Èle ku, heka ta pakaboko isi oka kèna, sèna ka pamaso asa d'ara babesi.””’
Lamatua Yesus pake lii pakasame nèti lamusi dhu ana iiki
31 Èle, ka Yesus peka hari, na, “Ja'a pake hari lii pakasame èci, sèna ka miu me'a tasamia Ama Lamatua j'aj'i Dhèu Aae mi dhèu ae-ae. Dhèu unu Na sèra, mulai nuka sèmi lamusi dhu ana iiki titu kèna, dhu dhèu sèle ètu d'ara oka na. 32 Masi ka lamusi ne ana iiki d'ai seli, te ngaa ladhe na muri mai, j'aj'i aj'u dhu kapai aae ètu d'ara oka ne. Toke manu-bhui tao rèd'a ètu dadana-dadana na.”
Lamatua Yesus pake lii pakasame nèti ragi
33 Yesus peka hari lii pakasame èci, aku Nèngu na, “Dhèu-dhèu unu Ama Lamatua, èci èèna ka dènge ragi dhu bhèni èci nare, pab'ali dènge tarigu ca sak.e Hèia roti ne ca'e toke kapai, lula ragi dhu ciki oo'e deo na.”
Lamatua Yesus pake lii pakasame, ho aj'a dhèu nèti j'ara-j'ara hiu dhu dhèu re'a mèka
34 Yesus aj'a dhèu ae dènge lii lolo rupa-rupa. Lii padhai Na, aa'i-aa'i se, dhodhoka pake lii pakasame di. 35 Na aj'a sèmi èèna, sèna ka madhutu sèmi lii nèti dhèu rèti lii padhai Ama Lamatua dhu suri tèke, peka na,
“Pe Ja'a aj'a-nori pake lii pakasame.
Pe Ja'a lole j'ara-j'ara dhu dhèu tadèngi rèdhi mèka,
karèi nèti Lamatua paj'aj'i rai-haha toke d'ai sange ne'e.”f
Lamatua Yesus peka sasoa nèti j'u'u dhu muri ètu talora aae oka
36 Èle ka, Yesus lèpa èmu tèke eele dhèu ae sèra. Hèia ana madhutu Na sèra mai manèngi, na, “Ama! Peka ku dènge ji'i sasoa nèti lii pakasame j'u'u deo sa!”
37 Ka Yesus dhaa, na, “Dhèu dhu ceb'e hini dhu be'a èèna, nuka Ja'a, Dhèu Rai-haha Tare'a-re'a ne. 38 Aa oka èèna, nuka rai-haha ne. Hini dhu be'a èèna, nuka dhèu-dhèu dhu j'aj'i le ana-èpu Ama Lamatua. Aa j'u'u sèra, nuka ana pajuu nèti dhèu aae nidhu. 39 Aa dhèu bhelu dhu mai ceb'e lamusi j'u'u, nuka dhèu aae nidhu. Aa lod'o puu-g'ètu èèna, nuka d'ai èle rai-haha ne. Dhèu sab'a dhu pakaboko isi oka se, nuka ana pajuu Ama Lamatua nèti sorga. 40 Ropa d'ai èle rai-haha ne, ra oru rare j'u'u se ho tunu pakèpu si. 41 Te Ja'a, Dhèu Rai-haha Tare'a-re'a ne, bèli-camèd'a pua ana pajuu nèti sorga mai. Rèngu èèna na pakaboko dhèu-dhèu dhu pusi-pahae boe madhutu paredha Ama Lamatua. Aa rèngu oru rare kahèi dhèu-dhèu dhu dadugu-rariu dhèu leo, sèna ka baku madhutu paredha Lamatua. 42 Èèna na ra core dhèu bhelu-katub'a aa'i-aa'i se asa d'ara ai naraka, nuka sèmi j'u'u dhu ai na'e pakèpu si. Ètu nèi, dhèu se rasa j'èra titu kèna, aa tangi d'ara ma'ète mae-mae loe boe ciki sa. 43 Te ngaa dhèu dhu mamuri mola madhutu dad'èi Ama Lamatua, rèngu pea taruu dènge Ama Dhèu Aae ra ètu sorga. Ètu nèi, dhèu se ha'a-ha'a, hèti-hèti, nuka sèmi madha lod'o. De dhèu dhu neo tadhe mèu Ja'a, pasa dhilu paie-iie!”
Lamatua Yesus pake lii pakasame nèti mèdha dhu kab'ua aae
44 Yesus tabha hari lii pakasame èci, aku Nèngu na, “Dhèu dhu neo tadhe mèu Ama Lamatua nèd'u paredha, rèngu nuka sèmi dhèu dhu neo abhu mèdha kab'ua aae, dhu dhèu huni tèke ètu d'ara rai cakasib'i. Ka dhèu ne la'e kèi, hèia na abhu mèdha ne, nèti èèna ka na karej'e-karae. Èle èèna ka, na dhènu hari mèdha deo na. Hèia na lèpa hari lai-lai, la'e pahia aa'i mèdha-panyau na. Ka la'e hèli nare rai ne, sèna ka na unu mèdha dhu kab'ua aae deo na.”
Lamatua Yesus hia lii pakasame nèti mutiara dhu kab'ua aae
45 Yesus tuhu hari lii pakasame, peka na, “Dhèu dhu neo tadhe mèu Ama Lamatua nèd'u paredha, èci èèna kahèi dènge dhèu d'aga ca dhèu dhu d'ara na neo abhu mutiara dhu kab'ua aae titu kèna. Èle ka, na patangi-tenge mutiara ho neo hèli. 46 Ropa na rage mutiara cue dhu be'a titu kèna, hèia na lèpa lai-lai, sèna ka pahia aa'i mèdha-panyau na. Hèia la'e tihe mutiara ne, sèna ka j'aj'i mi unu na.”
Lamatua Yesus pake lii upama nèti dhèu puu i'a nèti pèku
47 Yesus peka hari, na, “Paredha Ama Lamatua, nuka sèmi pèku èci dhu dhèu sab'a dhasi lasi lolo ètu d'ara dano. Ka pèku ne lèke rupa-rupa i'a. 48 Ropa pèku ne pènu dènge i'a, dhèu pèku se ded'e rèti asa dedha nebhe. Hèia ra madhèdi kabhili i'a nèti pèku ne. I'a dhu be'a, ra tao asa d'ara kalera. Te ngaa i'a dhu karehe, ra core eele.
49 Èci èèna ka, ladhe d'ai lod'o èle rai-haha ne. Èèna na ana pajuu Lamatua mai nèti sorga, sèna ka hag'e eele dhèu dhu d'ara mola nèti dhèu bhelu-katub'a. 50 Dhèu dhu bhelu-katub'a aa'i-aa'i ra, core si asa d'ara ai naraka. Ètu nèi, rèngu heka re'a j'aj'èra, aa loe boe tangi roma iisi.”
Lamatua Yesus aj'a lula-nèti a'aj'a dhu dhui, dènge a'aj'a dhu hiu
51 Ropa padhai lii nare, hèia Yesus karèi ra, aku Nèngu na, “Miu me'a aa'i ngaa dhu Ja'a peka-padhai se, do?”
Ra dhaa peka na, “Nge'a, Ama!”
52 Hèia Yesus b'ala, peka na, “Be'a! Te mese agama aa'i-aa'i dhu re'a tare'a-re'a Lii Holo-Nori Lamatua dhu suri tèke karèi nèti uru èèna, ka ra kèpe pa'èra a'aj'a Ja'a, na, rèngu ca ropa dènge lamatua èmu dhu d'èi bhoke gud'a na, ho pad'elo mèdha-panyau na dhu dhui, dènge mèdha-panyau na dhu hiu.”
Dhèu Nasaret ro'o boe sèmi rare Lamatua Yesus
53 Ropa Yesus aj'a nare dhèu ae sèra, pake lii pakasame, hèia la'e, tèke eele era èèna, 54 ho lèpa asa rae Na. D'ai nèi, maso la'e asa d'ara èmu sabaj'a, ho aj'a-nori dhèu. Dhèu aa'i-aa'i dhu tadèngi lii padhai Na malaa-maloha. Ka ra papeka, aku rèngu na, “Ira ii! Dhèu ne d'èlu-mèu titu kèna, nga! Na sakola ètu mia ne? Tasamia ka Na bisa tao tadha malaa se'e? 55 Nèngu ne dhoka Ana nèti ca dhèu tuka aj'u di. Èdhi patadha be'a dènge ina Na Maria; aa dènge ari Na aa'i-aa'i, nuka Yakobis, Yusuf, Yudas dènge Simon. 56 Èdhi tadhe ana hèni Na kahèi, te èdhi pea ètu d'ara rae cue! De Na abhu mamèu Na nèti mia? Aa Na abhu koasa kapai ne nèti cee hari?” 57 Nèti èèna ka, dhèu se kacèki, toke ra ro'o heka nanene lii padhai Na.
Te ngaa Yesus peka dènge ra, aku Nèngu na, “Mema tare'a! Dhèu d'èi risi pakab'ua dhèu nèti lii padhai Ama Lamatua dhu mai nèti era leo, te ngaa ra pakab'ua boe dhèu nèti lii padhai Ama Lamatua dhu mai nèti rae rèngu unu ra.”g 58 Lula d'ara ra adhu, toke ra parcaya boe Yesus, nèti èèna ka Na tao tadha malaa ae boe ètu d'ara rae Na.