2 Nèti èèna ka, dhèu mai nèti mia-mia. Lula dhèu ae seli, ka ètu d'ara èmu pènu risi, toke d'ai hèb'a èmu. Èle èèna ka, Yesus lole dènge ra dad'èi Ama Lamatua.

3 Ètu talora Na padhai lii era, dhèu èpa jèru dhèu karuku èci neo asa madha Yesus. 4 Te ngaa, lula dhèu ae d'ai seli, ka rèngu abhu boe sasanga ho rèti dhèu èèna asa madha Yesus. Hèia ca'e lasi asa kolo èmu, bhoke eele rèu èmu re dedha kètu Yesus. Ropa ra bhoke rare rèu èmu, hèia ra papuru dhèu karuku èena dènge dhèpi na.^a 5 Ropa Yesus ladhe nèdhi si, Nèngu ne'a le dhèu se'e parcaya tare'a-re'a Nèngu. Ka na padhai lii dènge dhèu karuku ne, aku Nèngu na, “Ana, ee! Ja'a saku eele le sasala èu!”

6 Ètu èèna kahèi, abhu pèri-pèri mese agama Yahudi. Ropa ra tadèngi rare lii padhai lii Yesus, ka d'ara ngangee rèngu be'a boe. 7 Hèia ra papeka, “Boo! Dhèu ne'e bani titu kèna, padhai lii sèmi nèi! Dhodhoka Ama Lamatua di, dhu dènge hak ho saku eele sasala dhèu. Te ngaa dhèu ne'e tao ngi'u na èci èèna ka dènge Ama Lamatua. Nèngu pakarehe kolongara Ama Lamatua!”

8 Te ngaa Yesus ne'a le ngangee rèngu. Hèia Na peka, “Heh! Miu baku pangee sèmi èèna. 9-10 Mia dhu be'a risi? Ladhe Ja'a peka mi dhèu karuku ne, ‘Sasala èu saku eele le,’ miu me'a boe, na, j'aj'i do aad'o. Te ngaa ladhe Ja'a peka, ‘Kèd'i ka! Nedhe dhèpi èu, ho lèpa ka.’ Ladhe na kèd'i ho miu ladhe mèdhi kahèi, heka miu me'a kèna, Ja'a ne Dhèu Rai-haha Tare'a-re'a. Aa Ja'a dènge koasa kahèi, ho saku eele sasala-sasigo dhèu!”

Èle èèna ka, Yesus padhai lii dènge dhèu karuku èèna, peka na, 11 “Èu nanene, ee! Èu èle le ne! Kèd'i ka, nedhe dhèpi èu ho lamu ka.”

12 Ropa tadèngi nare, cag'ag'a laa dhèu ne kèd'i titu. Na nedhe dhèpi na, hèia la'e ka asa li'u. Dhèu-dhèu ètu sèra rèdhi dènge musi madha ra. Rèngu aa'i-aa'i ra malaa-maloha, ka ra peka, “Ira ii! Èdhi heka tèdhi ka! Ama Lamatua tare'a-re'a kapai d'ai seli!”

13 Èle èèna ka, Yesus la'e hari asa sebhe dano Galilea. Ka dhèu ae titu kèna mai paraga dènge Ne, hèia Na lole dad'èi Ama Lamatua mi rèngu.

14 Ètu èèna, abhu dhèu èci ngara na Lewi, ana nèti Alpius. Sasab'a na roro doi bea. Lod'o Yesus kako re èèna ka ladhe nèdhi Lewi. Ka Na peka dènge ne, “Wee! Mai madhutu Ja'a!”

Ropa tadèngi lii Yesus ne, Lewi kèd'i dènge ka la'e madhutu Ne.

15 Èle èèna ka, Yesus si ra'a ètu d'ara èmu Lewi, pa'èci dènge angalai Lewi dhèu roro doi bea sèra. Abhu kahèi dhèu-dhèu leo madhèdi ra'a dènge rèngu. Madhutu ngangee dhèu Yahudi, dhèu se'e dhèu karehe. Nèti dhèu-dhèu dhu madhèdi ra'a se abhu dhèu ae kahèi dhu d'èi nanene lii padhai lii Yesus.

16 Lod'o èèna, abhu pèri-pèri mese agama nèti partei Parisi dhu rèdhi Yesus madhèdi na'a-ninu dènge tuka roro doi bea, dènge dhèu karehe sèra. Ka ra karèi ana madhutu Yesus, peka na, “Nga tao ka mese miu madhèdi na'a-ninu dènge dhèu roro doi bea dènge dhèu dhu laku-laku boe sèra?”

17 Yesus tadèngi lii karèi rèngu èèna, ka Na dhaa, peka na, “Dhèu pèd'a mema parluu dote, te ngaa dhèu dhu pèd'a boe, parluu boe dote. Mamai Ja'a ne sèna ka lalau dhèu dhu laku-laku boe. Te Ja'a mai boe ho uri dhèu dhu rasa ngi'u na mola.”

18 Ca tèka, dhèu nèti partei agama Parisi puasa. Rèngu rèdhi ana madhutu Yohanis tuka sarani, puasa kahèi. Te ngaa rèdhi boe ana madhutu Yesus puasa sèmi rèngu. Hèia dhèu rèngu mai paraga dènge Yesus, ka ra karèi, aku rèngu na, “Ama. Ji'i puasa sama sèmi ana madhutu Yohanis kahèi. Te, nga tao ka, ana madhutu Ama puasa boe?”

19 Hèia Yesus dhaa, peka na, “Mema miu me'a le, ladhe abhu pesta kab'i, dhèu dhu abhu nèru sèra puasa boe, ka ra'a toke bècu. Ladhe mone dhu kab'i èèna era, dhèu sèra aa'i-aa'i ra'a-rinu. 20 Te ladhe d'ai lod'o ho ra kèpe rèti dhèu mone dhu kab'i èèna, ka mone aanga-angalai na sèra d'ara susa, heka ra puasa kèna.

21 Sèmi èèna kahèi, bèla hiu baku kalape mi kodho dhui. Te ladhe base, na, bèla hiu èèna karuku, hèia kodho èèna asa ka mae aae. 22 Sèmi èèna kahèi, miu baku edhe dhua pèd'u ètu d'ara sabha dhui. Te aad'o na, sabha èèna mae, aa dhua pèd'u na bhori eele asa rai.”^b [Nèti èèna ka Yesus peka dènge si, baku pakihu-kee lii holo-nori Nèngu dhu hiu, dènge lii holo-nori dhèu Parisi dhu dhui.]

23 Ca tèka, lèke lod'o manèngi-mangaj'i dhèu Yahudi, Yesus si kako re j'ara ètu d'ara oka. Ka ana madhutu Na g'ètu rèti are gandum.^c 24 Ropa dhèu Parisi ladhe rèdhi, ka ra karèi Yesus, “Tasamia ka, ana madhutu Èu madhutu boe j'ara-j'ara agama èdhi? Rèngu se g'ètu are gandum lèke lod'o a'oro sasab'a. Miu baku tao sèmi èèna!”

25-26 Hèia Yesus dhaa, “Samia, ee? Miu sanèd'e heka lii lolo Daud. Tèu èèna, Abyatar j'aj'i kètu kapai risi agama Yahudi. Lod'o èèna, Daud dènge dhèu madhutu na aa'i-aa'i ra manganga bia. Ka ra maso asa d'ara Paleo Ama Lamatua, hèia ra'a roti dhu ama agama hia le mi Lamatua. Madhutu atora agama èdhi, dhèu dhu bisa ra'a roti èèna, dhoka ama-ama agama di; dhèu leo bisa boe. Daud dènge ana madhutu na sèra, ra'e rare roti èèna, te ngaa dhèu èci sa peka boe, na, Daud si sala.”^d

27 Èle èèna ka, Yesus lole hari dènge rèngu, “Miu baku bhèlu! Lamatua hia lod'o a'oro sasab'a hia èdhi dhèu rai-haha. Lamatua paj'aj'i boe èdhi dhèu rai-haha, ho madhutu dhoka atora lod'o a'oro sasab'a di. 28 Ja'a ne, Dhèu Rai-haha Tare'a-re'a. Ja'a ne ka dhu peka ho dhèu sab'a, do aad'o, lèke dènge lod'o a'oro sasab'a.”