3 Lod'o èèna, kètu agama Yahudi dènge dhèu heka ad'a sèra, dhu pakaboko ètu d'ara èmu Kayafas. Kayafas ne, nuka kètu kapai risi agama Yahudi. 4 Rèngu se tenge j'ara ho neo kèpe Yesus pahuni-pahuni, sèna ka pamadhe Ne. 5 Te ngaa rèngu rare lii èci, peka na, “Mata ku! Mage èdhi kèpe Ne ètu d'ara lai-lai ne, lula lod'o-lod'o be'a dètu le. Mage dhoka dhèu ae dhu d'èi Nèngu, tao maruru.”

6 Ètu rae Betania, abhu ca dhèu ngara na Simon. Uru èèna, dhèu madenge dènge ne, lula nèngu dhu lèke èi papèd'a kusta. Te ngaa limuri ne, èle le nèti papèd'a na. Lod'o dhu d'ai mèka lod'o babe'a dhèu Yahudi, Yesus si ra'a ètu d'ara èmu Simon. 7 Ropa rèngu ra'a era, bhèni ca dhèu mai paraga dènge Yesus. Nèngu nèd'u boto cue dhu tao nèti hadhu dhu kab'ua.^b Boto ne dhu isi na, èi hèu mèngi dhu kab'ua titu kèna. Ka bhèni ne hake pamae katanga boto ne. Hèia na pahae mau-mau èi hèu mèngi ne mi kètu Yesus, sèna ka j'aj'i tadha, nèngu pakab'ua Yesus.

8 Te ngaa ropa ana madhutu Na ladhe rèdhi tatao bhèni ne, hèia ra nasa. Ka ra paka'uu, aku rèngu na, “Heh! Bhèni ne bhori eele iia d'ara, èi hèu mèngi dhu kab'ua aae ne. Baku na tao sèmi èèna! 9 Be'a risi nèngu pahie! Sèna ka kab'ua na bagi mi dhèu-dhèu dhu unu boe ngaa-ngaa.”

10 Te ngaa Yesus ne'a ngangee rèngu, hèia Na lii peka na, “Miu se baku pasusa bhèni ne! Hud'i laa! Ja'a karej'e, lula na pahae le èi hèu mèngi ne mi ngi'u Ja'a. 11 Te dhèu dhu unu boe ngaa-ngaa pa'èci taruu dènge miu. Te ngaa Ja'a ne mamuri nèbhu heka dènge miu.^c 12 Aa bhèni dhu pahae èi hèu mèngi mi ngi'u Ja'a ne, sèmi ngaa te, nèngu pahèu mèngi mema le ngi'u aae Ja'a. Te mamuri Ja'a nèbhu heka. 13 Ngee paie-iie! Sad'i ètu mia èèna ka, ladhe dhèu palolo Lii Lolo Be'a Ama Lamatua palème rai-haha ne, tatu rèngu papeka kahèi babe'a bhèni ne, sèna ka dhèu aa'i-aa'i sanèd'e ne.”

14 Ca dhèu nèti canguru dua ana madhutu Yesus se, dhu ngara na Yudas Iskariot. Lod'o èèna kahèi, kalua la'e tenge kètu agama Yahudi sèra, sèna ka neo pahie Yesus mi rèngu. 15 Ropa Yudas d'ai dhèu se'e, hèia na karèi, peka na, “Ama-ama! Ladhe ja'a bhoke j'ara ho miu bisa kèpe Yesus, miu hia ja'a ngaa?”

Hèia dhèu se dhaa, peka na, “Ladhe èu neo pahie Ne dènge ji'i, na ji'i b'ae.” Ka ra ige rare 30 (tèlu nguru) doi iia, aa ra j'ole asa Yudas.^d 16 Èle, ka Yudas li'u ka la'e, hèia na tenge j'ara ho saraka Yesus asa d'ara adhe-aai rèngu.

17 D'ara tèu mai-tèu mai, abhu lod'o babe'a dhèu Yahudi dhu nanèbhu na pidhu lod'o. Ra pangare lod'o babe'a se, na, ‘Pesta Roti dhu Pake boe Ragi’.^e Ropa pesta èèna neo mulai, ana madhutu Yesus se mai karèi Ne, aku rèngu na, “Ama! Mèda ne'e, èdhi bhoke lod'o babe'a èdhi. De Ama neo sèna ka ji'i la'a roro kahib'i-kalèbho, aa lalau era pesta Paska ètu mia?”

18 Ka Yesus b'ala si, peka na, “Lami asa d'ara kota, pe mi paraga dènge ama ca dhèu. Miu peka dènge ne sèmi ne'e, ‘Ama! Ama Mese rasa lod'o mamadhe Na nèbhu heka. Hèia Na manèngi era èci ètu d'ara èmu ama, sèna ka Na tao kalela Paska dènge ana-ana madhutu Na.”’

19 Ropa ra tadèngi rare, hèia ana-ana madhutu Na, tao sèmi dhu Na peka. Ka ra lalau nganga'a kalela Paska ètu era èèna.

20 Ropa d'ai mèda, hèia Yesus dènge ana-ana madhutu Na, dhèu canguru dua sèra, madhèdi ra'a-rinu. 21 Ropa dhu ra'a era, hèia Na lii, peka na, “Mi nanene! Ca dhèu nèti miu se, èèna na pahie Ja'a asa adhe-aai dhèu leo kara.”

22 Ropa ra tadèngi sèmi èèna, d'ara rèngu roe-bhilu. Ka rèngu èci-èci karèi Yesus, peka na, “Dhèu dhu Ama peka deo na, ja'a aad'o, sina ma?”

23 Hèia Na peka, na, “Dhèu dhu cèb'u roti na palere-lere dènge Ja'a asa d'ara mago ne, nèngu ka dhu pahie Ja'a.^f 24 Sanèd'e, ee! Ja'a, Dhèu Rai-haha Tare'a-re'a ne, hud'i madhe ku, nuka sèmi dhu suri tèke ètu d'ara Sasuri Mola-Mèci Ama Lamatua. Te ngaa mate unu na! Dhèu dhu neo pahie Ja'a, bèli-camèd'a pasae nare pala na! Hua iia risi, ina na baku nara iisi ne!”

25 Èle èèna ka, Yudas karèi kahèi, peka na, “Tatu dhèu dhu Ama peka deo na, ja'a aad'o, sina ma?”

Hèia Yesus b'ala ne, “Mema tare'a èu unu mu ka dhu peka lii èèna. De cee hari?”

26 Rèngu dhu ra'a era, hèia Yesus ded'e nare roti cue, aa Na manèngi makasi mi Ama Lamatua. Ka Na pamae roti ne, hèia j'ole asa ana-ana madhutu Na, aa Na peka, “Roti ne'e ne, ngi'u Ja'a. Mere ho mi'e ka!”

27 Èle ka, Yesus nare galaa dhu pènu dènge èi anggor, ka Na manèngi makasi mi Ama Lamatua. Hèia Na j'ole asa ana-ana madhutu Na, aa Na lii, peka na, “Miu aa'i-aa'i mi, mere ho minu. 28 Te èi anggor ne'e ne, raa Ja'a kèna. Èèna na Ja'a madhe, te ngaa raa Ja'a suti, sèna ka sui kore dhèu ae nèti koasa sasala-sasigo ra. Raa ne'e j'aj'i mi tadha ho pasanèd'e dhèu, peka na, ngaa dhu Ama Lamatua pajaji èèna, mema limuri ne j'aj'i le. De mere ho minu ka!^g 29 Te ngaa nanene paie-iie! Mulai nèti mèda ne, Ja'a kinu heka èi anggor. Pe Ja'a dènge Ama Ku madhèdi ngèd'u paredha sama-sama ètu sorga, heka Ja'a kinu hari kèna dènge miu.”

30 Èle èèna, hèia rèngu sod'a lii sod'a èci, ho koa-kio Ama Lamatua. Ka mèda èèna kahèi, rèngu lasi dènge ka asa ledhe Saitun.

31 Ropa ètu d'ara kakako rèngu, Yesus peka dènge ana madhutu Na, aku Nèngu na, “Ciki hari ètu d'ara mèda ne'e kahèi, miu aa'i-aa'i mi rai tèke eele Ja'a mesa-mesa Ku. Te dhu suri tèke le ètu d'ara Sasuri Mola-Mèci Ama Lamatua, peka na,

32 Ja'a madhe tare'a, te ngaa ladhe Ja'a mamuri hari, laku mate miu ètu propensi Galilea.”ⁱ

33 Te ngaa Petrus d'èi boe nanene lii Na, ka na peka, “Ama! Masi ka dhèu leo rai tèke eele Ama, te ngaa ja'a rai boe!”

34 Hèia Yesus b'ala aku Nèngu na, “Petrus! Sèmi èèna, do? Lèka la lii Ja'a ne! Ètu d'ara mèda ne'e ne kahèi, manu dhae kokotoo mèka, te èu dhu pasili le tèlu hari, peka na, èu tadhe boe Ja'a!”

35 Te ngaa Petrus no'o boe sèmi. Ka na peka, “Aad'o, Ama! Ladhe Ama madhe, ja'a madhe kahèi. Te ja'a rai boe, tèke eele Ama!” Angalai Petrus se, peka sèmi èèna kahèi.

36 Ka Yesus si kako taruu asa ledhe Saitun, d'ai d'ara oka cue, ngara na Getsemani.^j Ètu era ne'e Yesus peka dènge ana madhutu Na, “Miu madhèdi uuru ku mi ne'e, te Ja'a neo laku manèngi-mangaj'i asa nèi.” 37 Te ngaa Na paroa nare Petrus, Yakobis dènge Yohanis, ho lasi palere-lere dènge Ne. Mulai nèti èèna ka, d'ara Na ma'ète laho mae-mae, aa roe-bhilu. 38 Rèngu kako kaj'èu mèka, te Na peka dènge rèngu, aku Nèngu na, “D'ara Ja'a susa titu kèna! Ja'a nuka sèmi oe madhe sa. Miu madhèdi, mate Ja'a mi ne'e.”

39 Ka la'e ako kaj'èu ciki, hèia Na patitu kètu urutuu ho sabaj'a, aku Nèngu na, “Ama pasue! Ladhe Ama d'èi na, Ja'a baku pasae j'aj'èra ne'e. Te ngaa baku madhutu dad'èi Ja'a, hud'i laa madhutu dad'èi Ama di.”

40 Sabaj'a nare, hèia lèpa la'e asa era ana madhutu Na dhèu tèlu sèra. Te ngaa rèngu dhu bhèj'i luu. Ka Yesus parèi si, hèia Na lii dènge Petrus, peka na, “Hee, Petrus! Nga tao ka miu se bhèj'i? Ja'a ètu nèi nèbhu boe, te ngaa miu lake mere boe beke ciki sa mate Ja'a! 41 Ruri pamako musi madha miu. Kèd'i ho beke dènge Ja'a. Te d'ara miu mema d'èi tao dhu be'a, te ngaa ngi'u miu èra boe. De hua iia miu sabaj'a, sèna ka ladhe lèke dadugu-rariu miu bisa taha.”

42 Ka Yesus la'e hari sabaj'a, peka na, “Ama! Ladhe Ja'a hud'i pasae ku j'aj'èra ne'e, hud'i laa madhutu dad'èi Ama di.” 43 Sabaj'a nare, hèia na mai hari asa era ana madhutu Na dhèu tèlu se. Te ngaa dhu ra bhèj'i hari, lula musi madha ra sakaa titu kèna.

44 Ka Na tèke eele si, la'e hari manèngi-mangaj'i catèka. Na manèngi-mangaj'i hari mi Ama, sèna ka baku soro tèke Nèngu pasae j'aj'èra èèna, te ngaa hud'i laa madhutu dhoka dad'èi Ama di. 45 Sabaj'a nare ka, Na lèpa hari, la'e parèi ana madhutu Na, peka na, “Miu se bhèj'i taruu, do? Kèd'i ka! Te dhèu dhu neo pahie Ja'a, Dhèu Rai-haha Tare'a-re'a ne, dètu le. Dhèu se mai ho kèpe Ja'a kèna, ho saraka asa adhe-aai dhèu bhelu-katub'a. 46 Wee, kèd'i ka! Bhoke musi madha miu, ladhe ku asa nèi. Te dhèu dhu pahie Ja'a, nuka mai nèi.”

47 Ropa Yesus padhai lii era, Yudas dhu nare le era èèna dènge dhèu ae-ae. Dhèu se mai rèti hela dènge aj'u cèki ho neo kèpe Ne. Rèngu tao sèmi ne'e, lula madhutu paredha nèti kètu agama Yahudi, dènge dhèu heka ad'a sèra. 48 Yudas dhu peka mema le mi dhèu se'e, na, “Miu ladhe paie-iie! Dhèu dhu ja'a uu, Nèngu ka dhu miu kèpe! Te Nèngu ka dhu miu tenge!”

49 Ropa rèngu d'ai madha Yesus, hèia Yudas lii dènge ka, “Saloom, Ama Mese!” Hèia Yudas uu Yesus.

50 Èle ka, Yesus peka dènge ne, “Hee, Yudas! Tao ka laa, madhutu dad'èi èu.” Ka dhèu ae sèra ara lasi neo kèpe Ne.

51 Te ngaa dhu re'a boe, na, dhèu unu Yesus ca dhèu dhu bete hela na, ka seru pama'ète rèu dhilu dhèu èci. (Dhèu dhu nu'a ne, nuka ca dhèu ènu nèti kètu kapai risi agama Yahudi.) 52 Ropa ladhe nèdhi sèmi èèna, hèia Yesus lii dènge ne, aku Nèngu na, “Pasaluu hela èu èèna asa d'ara sope na. Te dhèu dhu pake rèka ho neo uri pamere lii langu, èèna na nèngu madhe dènge rèka kahèi. 53 Èu me'a boe, do? Ja'a bisa manèngi Ama Ku, ho Na hia ana pajuu Na d'ai nguru riho^k mai nèti sorga, sèna ka soru-bara Ja'a. 54 Te ngaa hud'i laa, ra kèpe Ja'a. Te aa'i-aa'i dhu suri tèke le ètu d'ara Sasuri Mola-Mèci Ama Lamatua lula-nèti Ja'a ne, hud'i j'aj'i ku.”

55 Èle èèna ka, Yesus peka dènge dhèu-dhèu dhu mai kèpe Ne, aku Nèngu na, “Madhutu miu, Ja'a ne dhèu bhelu, do? Nga tao ka miu mai kèpe Ja'a ne, mèti dènge hela dènge aj'u cèki? Bèli-bèli Ja'a aj'a miu ètu d'ara Èmu Kapua Manèngi-Mangaj'i Ama Lamatua, te ngaa dhèu èci sa tao boe ngaa-ngaa mi Ja'a.^l 56 Te ngaa hud'i laa! Mai ka, kèpe Ja'a! Te j'ara ne'e ne, dhu suri tèke le karèi nèti uru ka, ètu d'ara Sasuri Mola-Mèci Ama Lamatua.”

Ropa ana madhutu Yesus rèdhi sèmi èèna, ra madha'u titu kèna. Hèia ra rai tèke eele Ne mesa-mesa.

57 Èle èèna, hèia dhèu dhu kèpe Yesus, rèti Ne asa èmu kètu kapai risi agama Yahudi dhu ngara na, Kayafas, lula dhèu kapai sèra dhu pakaboko le ètu era èèna. Dhèu se nuka, kètu agama Yahudi, mese agama, aa dhèu heka ad'a sèra. 58 Ropa ra rèti Yesus, Petrus madhutu nèti limuri, toke d'ai èmu kètu kapai risi agama Yahudi èèna. Petrus la'e kahèi asa madha èmu, ho madhèdi dènge dhèu-dhèu dhu ètu sèra. Te neo ne'a, ngaa ka dhu j'aj'i. 59 Ètu d'ara èmu ne, kètu agama Yahudi sèra dhu padhue-padhai dènge dhèu-dhèu dhu madhèdi uri lii langu agama. Rèngu aa'i-aa'i ra tenge j'ara, sèna ka pamanahu Yesus, lula ra neo huku pamadhe Ne. 60 Masi ka rèngu hia sakasii monya ae kahèi, te ngaa rèngu abhu boe sasala èci sa dhu rèngu bisa pake. Nèbhu boe ka, rèngu abhu sakasii dhèu dua. 61 Dhèu dua se, peka na, “Ji'i tadèngi le kahèi, Dhèu ne peka na, ‘Bèli-camèd'a Ja'a paguri eele Èmu Kapua Manèngi-Mangaj'i. Te ngaa ètu d'ara tèlu lod'o, Ja'a patitu kore hari.”’^m

62 Ka kètu kapai risi agama Yahudi, kèd'i titu ètu madha dhèu aa'i-aa'i dhu madhèdi ètu era èèna. Hèia na karèi Yesus, peka na, “Èu tadèngi le lii galaa dhèu se'e dhu ra galaa Èu. Nga tao ka Èu b'ala boe ca hèb'a sa?” 63 Te ngaa Yesus dhaa boe ngaa-ngaa. Hèia kètu kapai ne karèi hari, na, “Ja'a neo karèi! Te ngaa Èu hud'i dhaa tare'a-re'a ku, nuka sèmi Èu dhaa mi Ama Lamatua dhu mamuri ètu sorga. Abhu dhèu dhu peka na, Èu ne, Kristus, Ana Ama Lamatua dhu Na moa tèke karèi nèti uru ka. Tare'a sèmi èèna, do?”

64 Hèia Yesus b'ala, peka na, “Tare'a, nuka sèmi lii ama èèna. Te ngaa sanèd'e! Te bèli-camèd'a miu mèdhi Ja'a, Dhèu Rai-haha Tare'a-re'a ne. Pe Ja'a madhèdi ètu baboa g'ana Ama Lamatua ètu sorga, sèna ka kèd'u paredha sama-sama dènge Ne, dhu koasa Na kapai risi eele èèna. Èle na, Ja'a puru mai hari ètu dedha ra'i-liru.”ⁿ

65 Ropa na tadèngi nare Yesus peka sèmi èèna, hèia kètu kapai ne nasa bia, toke na ciu pamae kodho madhera na. Hèia na pa'oo mi dhèu aa'i-aa'i dhu madhèdi ètu sèra, aku nèngu na, “Èdhi parluu sakasii tao ngaa hari era! Miu unu mi tadèngi le dènge ro'a dhilu miu, lii padhai Na. Nèngu tao iisi Na j'aj'i Ana Ama Lamatua. Ne'e ne pahaha Ama Lamatua! Miu aa'i-aa'i mi me'a le, na, madhutu atora agama èdhi, ladhe abhu dhèu dhu tao iisi na nuka sèmi Ama Lamatua, na, dhèu ne hud'i madhe ku! 66 De miu neo pama'ète sèmi mia hari?”

Hèia aa'i-aa'i ra parodha, peka na, “Dhèu ne'e ne mema sala tare'a! De hud'i huku pamadhe Ne!”^o

67 Ka dhèu pèri-pèri lasi sabhuu ilu mi Yesus. Hèia ra hake-paru, aa tèb'e pa'oke Ne.^p 68 Èle ka, ra lalangu Ne, peka na, “Wee! Èu ne'e ka Kristus, si? Èu peka sèku! Dhèu cee ka dhu j'ubhu Èu?”

69 Lod'o èèna, Petrus madhèdi era ètu madha èmu. Ka ènu bhèni ca dhèu mai lii dènge ne, peka na, “Deo na, èu kahèi palere-lere dènge Yesus, dhèu Nasaret èèna, si?”

70 Te ngaa na pasili ètu madha dhèu ae sèra, peka na, “Aad'o! Nga tao ka èu karèi sèmi èèna! Ja'a tadhe boe Ne.” 71 Ka Petrus kalua la'e titu ètu hèb'a oka.

Hèia bhèni leo hari èci ladhe nèdhi ne ètu èèna. Ka bhèni ne peka dènge dhèu ètu sèra, aku nèngu na, “Deo na ja'a kèdhi dhèu ne'e ne palere-lere dènge Yesus, dhèu Nasaret èèna.”

72 Hèia Petrus jèke ne, peka na, “Èu ne tao-tao huj'u! Ja'a bani subha! Ja'a tadhe boe Dhèu nèi!”

73 Nèbhu boe ka dhèu leo ètu sèra sa peka dènge ne, “Hee! Èu ne baku kapod'e-kabèli d'ara lii, dhu peka na, èu kako palere boe dènge Dhèu ne! Te nèti lii padhai èu, èci èèna ka dènge laloe lii dhèu Galilea!”

74 Te ngaa na padhèd'a, ka b'ala, aku nèngu na, “Wee! Ja'a subha dènge kolongara Ama Lamatua! Ja'a tadhe boe Dhèu ne'e ne!” Ropa na peka nare sèmi èèna, hèia manu kokotoo dènge.

75 Ropa na tadèngi lii kokotoo manu, hèia Petrus ngee nèdhi lii Yesus, dhu peka na, “Manu dhae kokotoo mèka, te èu dhu pasili le tèlu hari, peka na, èu tadhe boe Ja'a.” Sanèd'e nare lii ne'e, hèia la'e asa li'u ka tangi d'ara pèd'a.