Mamadhe Lasarus
11
1-2 Abhu dhèu èci, ngara na Lasarus. Nèngu pea ètu rae Betania, sama-sama dènge a'a na bhèni dhèu dua, Maria dènge Marta. (Maria ne'e, ka dhu pakose haga Lamatua Yesus dènge èi hèu mèngi, ka pamèu pake rèu kètu na.) Ca lod'o, ka Lasarus pèd'a aae.a 3 Ka ana hèni na dhèu dua se pa'adhu lii moa hia Yesus, aku rèngu na, “Lasarus, angalai Ama èèna, pèd'a aae.”4 Ropa Yesus tadèngi lii moa ne, hèia Na lii, aku Nèngu na, “Èi papèd'a ne nèti boe mamadhe. Ama Lamatua neo pake j'ara ne'e ho pad'elo dadedha Na. Sèna ka dhèu aa'i-aa'i ded'e padedha-dedha Ja'a, nuka Ana Ama Lamatua ne.”
5 Yesus sue Marta, Maria, dènge ari ra Lasarus. 6 Lod'o Na tadèngi, na, Lasarus dhu pèd'a, Yesus pea dua lod'o era ètu cabèka loko Yarden. 7 Ka Na peka dènge ana madhutu Na sèra, aku Nèngu na, “Mai lati hari asa era pea Lasarus ètu propensi Yudea.”
8 Te ngaa ana madhutu Na pab'ala, peka na, “Ama Mese. Lai-lai ne, ama-ama dhèu Yahudi sèra neo pèci pamadhe Ama ètu nèi. Te ngaa Ama neo lamu hari asa nèi?”
9 Ka Yesus dhaa, na, “Baku madha'u! Bèli-bèli, nèti lod'o rea toke lod'o cèna, canguru dua jam, si? Ladhe kako ètu d'ara saraa, dhèu kadhunu boe. Te saraa pasaraa rai-haha ho dhèu bisa ladhe rèdhi dènge be'a. 10 Te ngaa ladhe dhèu kako ètu d'ara maroga, na kadhunu pahari-pahari, te dènge boe saraa.”b
11 Yesus padhai lii èle, ka Na peka, “Angalai èdhi Lasarus bhèj'i le. Te ngaa pe Ja'a laku parèi ne.”
12 Hèia ana madhutu Na peka, na, “Ama, ladhe nèngu bhèj'i di, sasoa na, èèna na nèngu èle nèti papèd'a, si?”
13 Ra peka sèmi èèna, lula rèngu ngee, na, Yesus padhai lii lula-nèti bhèj'i dhu biasa di. Aa te ngaa, Yesus lole lula-nèti mamadhe Lasarus. 14 Hèia Yesus peka mola-mola dènge ra, aku Nèngu na, “Sèmi ne'e. Lasarus madhe le. 15 Aa te ngaa Ja'a karej'e lula Ja'a aad'o ètu nèi lod'o dhu na madhe mèka, sèna ka miu baku susa. Te, ngaa dhu j'aj'i ne'e, èèna ka dhu tao miu bisa parcaya Ja'a. Mai lati ka!”
16 Hèia Tomas, dhu dhèu paroa, na, “ana kembar,” peka dènge ana madhutu dhu leo sèra, aku nèngu na, “Mai ka! Be'a risi aa'i-aa'i ti lati, sèna ka madhe palere-lere dènge Ne.”
Lamatua Yesus la'e asa Betania, ka pa'èra d'ara Marta
17-19 Ka Yesus si lasi asa rae Betania.
Rae ne, kaj'èu nèti Yerusalem tèlu kilometer di. Ka dhèu Yahudi nèti nèi, ae ka dhu mai beke, sèna ka pa'èra d'ara Marta dènge Maria.
Ropa Yesus si d'ai nèi, heka re'a, na, dhèu padhane le Lasarus èpa lod'o kèna.
20 Ka lod'o Marta tadèngi, na, Yesus mai le, hèia la'e paraga dènge Yesus. Te ngaa Maria mate ètu èmu. 21 Hèia Marta lii dènge Yesus, peka na, “Ama, ee! Ladhe Ama ètu ne'e, tatu ari ja'a madhe boe. 22 Te ngaa ja'a parcaya kahèi, sad'i Ama manèngi ngaa èèna ka nèti Ama Lamatua, tatu abhu.”
23 Ka Yesus lii dènge ne, peka na, “Marta! Èèna na, Ari mu mamuri hari.”
24 Marta padhai lii, peka na, “Ja'a ke'a, pe d'ai lod'o èle rai-haha ne, ladhe Ama Lamatua pamamuri hari dhèu madhe aa'i-aa'i, Nèngu pamamuri hari kahèi ari ja'a.”
25 Hèia Yesus peka na, “Ja'a ka dhu hia dhèu madhe mamuri hari. Ja'a ka dhu hia dhèu, mamuri dhu lèke kahèi. De dhèu dhu parcaya Ja'a, abhu mamuri èèna, masi ka nèngu madhe. 26 Ka dhèu dhu unu mamuri dhu lèke èèna, aa parcaya Ja'a, bèli-camèd'a madhe boe, te ngaa mamuri taruu. Marta, èu parcaya lii padhai Ja'a ne, do?”
27 Hèia Marta dhaa, na, “Oo, Ama! Ja'a parcaya, na, Èu ne, nuka Kristus, Dhèu dhu Ama Lamatua paj'uj'u mema karèi nèti uru ka. Aa Èu ne, Ana Ama Lamatua dhu Na padhadha tèke hia mai asa rai-haha ne.”
Lamatua Yesus tangi
28 Ropa Marta padhai lii nare, hèia na lèpa asa èmu na. Ka na paroa ari na Maria, sèna ka dua ra mesa-mesa ra. Ka na peka, na, “Ama Mese mai le. Nèngu neo paraga dènge èu.” 29-31 Ropa tadèngi sèmi èèna, hèia Maria la'e dènge ka tenge Yesus. Ropa dhèu Yahudi dhu beke dènge Maria ètu d'ara èmu, rèdhi nèngu kèd'i sahèka, ka rai li'u la'e, hèia lasi madhutu ne re limuri. Te rèngu pangee, na, Maria la'e tangi asa ro'a Lasarus.
Lod'o èèna, Yesus si d'ai mèka d'ara rae. Nèngu ètu era dhu Marta paraga dènge Ne. 32 Ropa Maria la'e d'ai era èèna, ka ladhe nèdhi Yesus. Hèia na patitu kètu urutuu ètu madha Yesus. Ka na lii, aku nèngu na, “Ama! Sèmi Ama ètu ne'e, tatu ari ja'a madhe boe.”
33 Ropa Yesus nèdhi Maria tangi, aa dhèu Yahudi dhu madhutu ne tangi kahèi, ka Yesus nasa aa d'ara Na susa. 34 Hèia Na karèi, aku Nèngu na, “Miu padhane ne ètu mia?”
Ra dhaa, peka na, “Mai, Ama! Sèna ka mèdhi unu mu.”
35 Hèia Yesus tangi. 36 Ka dhèu Yahudi se papeka, aku rèngu na, “Ladhe ku laa. Na sue Lasarus titu kèna!”
37 Te ngaa abhu cahag'e dhu papeka na, “Dhèu ne'e ne ka dhu hia dhèu bèdhu bisa nèdhi. Nga tao ka Nèngu bisa boe tenge j'ara, sèna ka Lasarus baku madhe?”
Lasarus mamuri hari
38 Ka d'ara Yesus susa. Hèia la'e padètu-dètu asa ro'a dhu ra padhane Lasarus. Ro'a ne dhu ra katange le dènge hadhu aae cue. 39 Hèia Yesus pua dhèu ètu sèra, peka na, “Loli eele ku hadhu nèti hèb'a ro'a ne!”
Te ngaa Marta, ana hèni dhèu madhe ne, peka, aku nèngu na, “Irii, Ama! Na madhe èpa lod'o kèna! Tatu hèu le.”
40 Ka Yesus pasanèd'e ne, aku Nèngu na, “Sanèd'e lii Ja'a deo na, si? Ja'a dhu peka mema le, na, ladhe èu tare'a-re'a parcaya Ja'a, pe mèdhi dadedha Ama Lamatua.”
41 Hèia pèri-pèri dhèu loli eele hadhu nèti hèb'a ro'a ne. Ka Yesus ladhe asa dedha-liru, hèia Na peka, “Ama! Ja'a manèngi makasi, lula Ama nanene Ja'a. 42 Ja'a ke'a karèi nèti uru ka, na, Ama nanene taruu Ja'a. Te ngaa doe ne Ja'a peka sèmi ne'e, sèna ka dhèu-dhèu dhu titu ètu ne'e, bisa re'a, na, Ama ka dhu pua Ja'a.” 43 Ropa peka nare, hèia Na paroa dènge lii mèdhu, peka na, “Lasarus! Kalua ka!”
44 Ka dhèu madhe ne kalua nèti d'ara ro'a. Kacui-aai dènge haga na pa'èki era dènge bèla hutu dhèu madhe. Aa abhu bèla dhu pahutu rèhu na kahèi. Yesus pua dhèu ètu sèra, peka na, “Bhoke eele bèla hutu se, sèna ka na kako!”
Ra tenge j'ara ho neo pamadhe Lamatua Yesus
45 Ropa laladhe rèdhi tatao Yesus ne, dhèu Yahudi dhu beke dènge Maria, ae ka dhu parcaya Yesus. 46 Te ngaa abhu cahag'e kahèi dhu lasi paraga dènge dhèu nèti partei Parisi, sèna ka peka tatao Yesus ne dènge rèngu.
47 Èle èèna, hèia kètu agama Yahudi sèra, dènge dhèu Parisi pakaboko ho padhue. Ra pakarèi, peka na, “Dhèu ne'e ne, tao tadha malaa rupa-rupa! De èdhi tao Ne tasamia hari? 48 Te ladhe èdhi soro tèke Ne, bèli-camèd'a dhèu aa'i-aa'i sanao-maena Nèngu j'aj'i dhèu aae rèngu. Dènge j'ara ne'e, èèna na sordad'u Roma sèra mai paguri eele Èmu Kapua Manèngi-Mangaj'i èdhi dènge palaho isi kabarai èdhi.”
49 Tèu èèna, Kayafas dhu j'aj'i kètu kapai risi agama Yahudi. Na peka, na, “Goa, ee! Miu me'a boe ngaa-ngaa! 50 Te ladhe dhèu èci madhe pala dhèu aa'i-aa'i, èèna be'a risi hia miu. Te ladhe aad'o, na, sordad'u Roma mai, pamadhe aa'i mèu-mèu isi kabarai èdhi dhèu Yahudi ne!” 51 Lii Kayafas ne mai boe nèti d'ara nèngu unu na. Te Ama Lamatua pake hèb'a na, lula nèngu ka kètu kapai risi agama d'ara tèu èèna. Nèti èèna ka, Kayafas peka tèke, na, bèli-camèd'a Yesus madhe pala dhèu Yahudi aa'i-aa'i ra. 52 Aa te ngaa, dhu lèke ka, Yesus madhe boe hia dhèu Yahudi mesa ra di, te ngaa pala dhèu unu Ama Lamatua aa'i-aa'i dhu pale-lème ètu rai-haha ne. Nèngu èèna na oru nare si j'aj'i mi suku ca nau-ca nadha.
53 Lula lii padhai Kayafas ne'e ka, karèi nèti lod'o èèna, ama-ama dhèu Yahudi tenge j'ara ho neo pamadhe Yesus.
54 Nèti èèna ka, Yesus la'e heka asa madha dhèu ae ètu talora ama-ama dhèu Yahudi. Nèngu dènge ana-ana madhutu Na lasi asa d'ara kota èci, ngara na Efraim, padètu dènge d'ara mamoo. Ka ra pea taha ètu èèna.c
55 Lod'o èèna, dètu le dènge lod'o kalela Paska agama Yahudi. Dhu tema le, d'ai lod'o sèmi èèna, dhèu ae nèti rae-rae mai pakaboko ètu kota Yerusalem ho madhutu kalela Paska ètu èèna. Dhèu se d'ai uru, ho pamèu iisi madhutu atora agama. 56 Ae ka nèti rèngu patangi-tenge Yesus ètu èèna. Ropa ra titu ètu madha Èmu Kapua Manèngi-Mangaj'i, ka ra pakarèi, peka na, “Madhutu a'abhu miu, tasamia? Yesus mai madhutu pesta kalela Paska ne, do aad'o?” 57 Te ngaa kètu agama Yahudi sèra, dènge dhèu Parisi paredha, peka na, “Ladhe abhu dhèu dhu re'a Yesus ètu mia, na, peka dènge ji'i!” Aa te ngaa rèngu neo kèpe Ne.