Rèngu padhai lii sèmi èèna, lula dii dua lod'o ka, d'ai lod'o kalela dhèu Yahudi, dhu biasa ra peka na, ‘Paska’ dènge ‘Pesta Roti dhu pake boe Ragi’. Kalela se pasanèd'e rèngu lod'o bèi-baki ra kalua nèti rai Masir.^a

3 Ètu rae Betania, abhu ca dhèu ngara na Simon. Uru èèna, dhèu madenge dènge ne, lula nèngu pèd'a kusta. Te ngaa limuri ne, èle le nèti papèd'a na.

Hèia lod'o kalela dhae d'ai mèka, na, Yesus dènge ana madhutu Na sèra lasi ra'a-rinu ètu èmu Simon. Ètu talora ra'a-rinu era, dhèu bhèni èci mai paraga Yesus. Nèd'u dènge boto èci dhu ra tao nèti hadhu. Isi boto ne, èi hèu mèngi asli dhu kab'ua titu kèna, dhu ra tao nèti amo aaj'u hèu mèngi.^b Hèia bhèni ne pamae hèb'a boto èèna, ka na pasuti èi hèu mèngi mi kètu Yesus, ho j'aj'i mi tadha, peka na, nèngu pakab'ua Yesus.

4 Te ngaa ètu èèna, abhu dhèu leo dhu ra'a-rinu pa'èci kahèi. Ropa dhèu se rèdhi dhèu bhèni ne tao sèmi èèna, hèia ra nasa. Ka ra padhai lii padedha iisi, peka na, “Ngaa ka unu bhèni nèi? Na bhori eele èi hèu mèngi kab'ua aae èèna! 5 Be'a risi nèngu pahie èi hèu mèngi èèna, ho la'e papala doi ae sèra, mi dhèu dhu dènge boe unu. Te kab'ua èi hèu mèngi ne, èci èèna ka dènge gaji tuka d'ara ca tèu.” Hèia ra jèke bhèni ne.

6 Te ngaa Yesus b'ala lii rèngu, aku Nèngu na, “Miu baku pasusa bhèni ne! Hud'i laa! Ja'a karej'e lula nèngu pasuti le ngi'u Ja'a dènge èi hèu mèngi ne'e! 7 Dhèu kasia sèra, bèli-bèli ètu talora miu. De lod'o mia èèna ka dhu miu lake mere, na, miu bisa soru-bara si. Te ngaa nèbhu heka, Ja'a pa'èci heka dènge miu.^c 8 Mamuri Ja'a nèbhu heka ètu rai-haha ne. Dènge tatao bhèni ne, nèngu lalau ngi'u Ja'a, sama sèmi nèngu pahèu mèngi mema ngi'u aae Ja'a, ho padhane. 9 Miu patadhe, ee! Èèna na, ladhe dhèu lole Lii Lolo Be'a Ama Lamatua ètu mia-mia, na, ra palolo kahèi tatao be'a bhèni ne'e. Sèna ka dhèu aa'i-aa'i sanèd'e nèngu.”

10 Èle èèna ka, abhu ca dhèu nèti ana madhutu Yesus dhèu canguru dua sèra, ngara na Yudas Iskariot. Nèngu kalua la'e tenge kètu agama Yahudi sèra ho neo pahie Yesus mi rèngu. Ropa na paraga dènge rèngu, ka na peka naneo na. 11 Lod'o kètu agama sèra tadèngi naneo Yudas, ka ra karej'e titu kèna. Hèia ra jaji, peka na, “Ladhe èu neo pahie Yesus dènge ji'i, tatu ji'i b'ae.” Hèia Yudas kalua, ka na mulai tenge j'ara ho pahie Yesus.

12 Lod'o èèna, lèke dènge lod'o partama nèti lod'o kalela dhèu Yahudi. De d'ara lod'o èèna, rèngu tema tunu roti dhu dènge boe ragi, aa roro kahib'i-kalèbho kahèi. Hèia ana madhutu Yesus sèra mai karèi Ne, aku rèngu na, “Ama! Doe ne'e ne, lod'o kalela Paska èdhi kèna. De Ama neo ji'i lalau era kalela Paska ètu mia?”

13 Hèia Yesus pua ana madhutu Na dhèu dua, aku Nèngu na, “Miu lami uuru ku asa d'ara kota. Ètu nèi, miu paraga dènge dhèu mone èci, dhu pasae èi d'ara g'ala iiki cue. Lami madhutu ne nèti limuri. 14 Ladhe na maso asa èmu mia èèna ka, na, miu madhutu ne asa d'ara. Hèia miu peka mi lamatua èmu èèna, sèmi ne'e, ‘Ama Mese ji'i manèngi kama èci, ho Na neo tao kalela Paska dènge ana madhutu Nèngu.’ 15 Pe dhèu èèna paj'uj'u kama aae èci ètu èmu dedha na, dhu na sadia nare le. De miu dua mi dhoka lami lalau nganga'a di.”

16 Hèia dua ra lasi ka asa d'ara kota. D'ai nèi, rèngu rèdhi tare'a, sama sèmi ngaa dhu Yesus moa deo na. Ka ra sadia aa'i-aa'i, ho Yesus si ra'a kalela Paska ètu era èèna. Èle èèna ka, dua ra lasi paroa Yesus si.

17 Ropa lod'o oe cèna, hèia Yesus dènge ana madhutu dhèu canguru dua sèra d'ai era èèna.

18 Ka ra madhèdi ra'a sama-sama. Ètu talora ra'a era, Yesus padhai lii dènge si, aku Nèngu na, “Miu nanene ku! Èèna na dhèu èci nèti miu se pahie eele Ja'a mi dhèu leo.”^d

19 Ropa tadèngi lii èèna, ana madhutu Yesus sèra cag'ag'a dènge manyasa. Ka rèngu èci-èci mulai karèi Yesus, peka na, “Dhèu dhu Ama peka èèna, ja'a aad'o, sina ma?”

20 Hèia Yesus dhaa, aku Nèngu na, “Dhèu dhu cèb'u roti palere-lere dènge Ja'a asa d'ara mago ne, nèngu ka dhu pahia Ja'a. 21 Mi sanèd'e! Ja'a ne, Dhèu Rai-haha Tare'a-re'a. Ja'a hud'i madhe ku, sama sèmi dhu suri tèke le, ètu d'ara Sasuri Mola-Mèci Ama Lamatua. Te ngaa kasia, dhèu dhu neo pahia Ja'a èèna, bèli-camèd'a nèngu dui nare pala na! Hua iia risi, ina na baku nara iisi ne!”

22 Ropa rèngu ètu talora ra'a era, Yesus nare roti cue, hèia Na manèngi makasi mi Ama Lamatua. Ka Na pamae roti ne, hèia Na j'ole asa ana madhutu Na sèra. Ka Na peka na, “Roti ne'e ne, ngi'u Ja'a kèna. Mere ho mi'a.”

23 Èle èèna ka, Na nare galaa dhu isi dènge èi hua anggor. Na manèngi makasi mi Ama Lamatua kahèi. Ka Na j'ole galaa èèna asa ana madhutu Na, sèna ka rinu. 24 Hèia Na peka, “Èi anggor ne'e ne, raa Ja'a kèna, dhu suti sèna ka hia mamuri mi dhèu ae. Raa ne, j'aj'i mi tadha ho pasanèd'e, peka na, ngaa dhu Ama Lamatua moa le èèna, limuri ne j'aj'i le tare'a. Mere ho minu ka!^e

25 Mi sanèd'e paie! Nèti mèda ne'e ne, Ja'a kinu heka èi anggor. Toke d'ai Ja'a dènge Ama Ku ngèd'u paredha sama-sama ètu sorga, heka kinu hari kèna.”

26 Èle èèna ka, ra sod'a lii sod'a èci, ho ra koa-kio kolongara Ama Lamatua. Ka mèda èèna kahèi, lasi dènge asa ledhe Saitun.

27 Ètu d'ara kakako rèngu èèna, Yesus padhai lii, peka na, “D'ara mèda ne'e ne, miu aa'i-aa'i mi rai tèke eele Ja'a mesa Ku. Sama sèmi dhu ra suri le ètu d'ara Sasuri Mola-Mèci Ama Lamatua, peka na,

28 Èèna na Ja'a madhe tare'a. Te ngaa lod'o Ja'a mamuri hari, Ja'a laku uru nèti miu asa propensi Galilea!”^g

29 Ka Petrus b'ala, peka na, “Ama! Masi ka dhèu leo rai eele Ama, te ngaa ja'a rai boe!”

30 Hèia Yesus dhaa, “Petrus! Mu patadhe! Mèda ne'e kahèi, manu kokotoo d'ai mèka dua hari, te ngaa èu pasili le Ja'a tèlu hari, peka na, èu tadhe boe Ja'a!”

31 Ka Petrus pajèka dènge Ne, peka na, “Aad'o sèmi èèna, Ama! Ladhe Ama madhe, ja'a madhe dènge Ama kahèi. Te ngaa Ja'a pasili boe Ama, aa rai eele boe!”

Angalai Petrus sèra lii èci èèna kahèi.

32 Hèia Yesus si lasi d'ai d'ara oka cue ètu ledhe Saitun, ngara na ‘Getsemani’. D'ai èèna, hèia Yesus peka dènge ra, “Miu madhèdi mate Ja'a mi ne'e. Ja'a neo laku manèngi-mangaj'i asa nèi.”

33 Ka Yesus gale nèti Petrus, Yakobis, dènge Yohanis lasi dènge Ne. Mulai nèti èèna ka, Na rasa d'ara Nèngu ma'ète laho mae-mae. 34 Hèia Na peka dènge ana madhutu Na sèra, aku Nèngu na, “D'ara Ja'a pèd'a titu kèna! Ja'a rasa sèmi oe madhe sa. Miu madhèdi mate mi ne'e.”

35-36 Hèia la'e ako kaj'èu ciki nèti era èèna, ka Na patitu kètu urutuu Na ètu rai, ka Na sabaj'a, peka na, “Ama pasue! Ladhe sèmi Ama d'èi, na, Ja'a baku pasae j'aj'èra ne'e d'ai madhe. Ja'a ke'a le, ètu madha Ama, abhu boe ngaa èci sa dhu Ama bisa boe tao. De ladhe bisa, na, Ama pakaj'èu eele babia ne'e nèti kabela-kao Ja'a. Masi ka sèmi èèna, baku madhutu dad'èi Ja'a; te ngaa hud'i madhutu dad'èi Ama Ku ka laa.”

37 Èle èèna ka, Na lèpa asa ana madhutu Na, dhèu tèlu sèra, te ngaa ra bhèj'i luu. Hèia Na parèi si, ka Na padhai lii dènge Petrus, peka na, “Petrus!^h Èu bhèj'i, do? Ja'a nèbhu boe ètu nèi, te ngaa miu bisa boe beke mate Ja'a ciki sa! 38 Kèd'i ho pamako musi madha èu. Kèd'i ka, ho beke dènge Ja'a! D'ara miu neo tao be'a kahèi, te ngaa ngi'u miu roe. De be'a risi miu sabaj'a, sèna ka ladhe miu lèke dadugu-rariu, miu baku manahu.”ⁱ

39 Èle èèna ka, Yesus la'e manèngi-mangaj'i ca tèka hari. Nèngu manèngi hari mi Ama Lamatua, aku Nèngu na, “Ama! Ladhe bisa, na, Ama pakaj'èu eele babia ne nèti Ja'a. Te ngaa hud'i madhutu dad'èi Ama Ku ka laa.” 40 Ka Na lèpa hari asa era ana madhutu Na dhèu tèlu sèra. Te ngaa rèngu bhèj'i hari le, lula musi madha ra sakaa titu kèna. Hèia Na parèi hari si, te ngaa rèngu re'a boe dhaa sèmi ngaa mi Nèngu.

41 Hèia Yesus tèke eele si, ka la'e manèngi-mangaj'i d'ai tèlu hari kèna. Èle èèna ka, Na lèpa la'e parèi ana madhutu Na sèra. Na peka, “Miu bhèj'i taruu era? Sange èèna ka laa! Kèd'i ka! Te dhèu dhu neo pahie Ja'a, Dhèu Rai-haha Tare'a-re'a ne, nuka mai dènge angalai nèngu sèra. Rèngu mai kèpe Ja'a, ho saraka mi dhèu bhelu-katub'a si. 42 Kèd'i ka! Pamako musi madha miu, ho ladhe ku asa nèi! Dhèu dhu neo pahie Ja'a ne, nuka mai nèi. Mai ho lati paraga dènge si!”

43 Ropa Yesus padhai lii era, hèia Yudas d'ai madha Yesus dènge dhèu ae titu kèna. Rèngu mai rèti dènge hela dènge cèki, ho kèpe Yesus. Dhèu se tao sèmi èèna, lula ra madhutu lii paredha nèti kètu agama Yahudi, mese agama, dènge dhèu heka-dhèu heka ad'a sèra. 44 Yudas hia mema tadha mi dhèu ae se, peka na, “Ladhe d'ai nèi, ja'a uu cee, na, Nèngu kèna. De mi kèpe Ne.”

45 Ropa Yudas si d'ai era èèna, na la'e asa madha Yesus. Ka na lii, aku nèngu na, “Ama mese!” Hèia na liku nare Yesus, ka na uu Ne. 46 Hèia dhèu ae sèra ara asa madha Yesus, ka ra kèpe Ne.

47 Te ngaa ana madhutu Yesus èci bete hela na, ka na pare pama'ète rèu dhilu dhèu èci. Dhèu dhu nu'a ne, ènu nèti kètu kapai risi agama Yahudi. 48 Hèia Yesus peka dènge dhèu ae dhu mai kèpe Nèngu sèra, aku nèngu na, “Tasamia? Miu ngee, na, Ja'a ne dhèu bhelu, do? Ka miu mai kèpe Ja'a mèti hela dènge cèki? 49 Bèli-bèli Ja'a aj'a miu ètu Èmu Kapua Manèngi-Mangaj'i, te ngaa miu èci sa kèpe boe Ja'a. Mai ka, kèpe Ja'a! Te j'ara ne j'aj'i sèmi dhu suri tèke le ètu d'ara Sasuri Mola-Mèci Ama Lamatua.”^j

50 Ana madhutu Yesus sèra madha'u titu kèna. Hèia ra rai tèke eele Yesus mesa Na ètu èèna.

51-52 Ètu era èèna, abhu ana mone ngèru èci kahèi dhu madhutu Yesus re limuri. Ana ne pahutu isi na dènge sig'i ca bèla. Dhèu sèra neo kèpe ne kahèi, ka na rai tèke eele sig'i na ètu kacui-aai dhèu sèra, lula na madha'u. Hèia na rai dènge boe mèdha-papake ètu ua na.

53 Èle èèna ka, ra rèti Yesus asa èmu kètu kapai risi agama Yahudi. Ètu èèna, dhèu kapai sèra pakaboko le. Rèngu sèra, nuka: kètu agama Yahudi, mese agama, dènge dhèu heka-dhèu heka ad'a sèra.

54 Ropa ra kèpe rèti Yesus, Petrus madhutu mau-mau nèti limuri. Hèia na maso kahèi d'ai madha èmu kètu kapai risi agama Yahudi, ka na madhèdi manyiru ai sama-sama dènge dhèu j'aga ètu sèra.

55 Ètu d'ara èmu èèna, kètu agama Yahudi sèra padhue dènge dhèu-dhèu dhu madhèdi j'ue lii langu agama. Ra patangi-tenge bukti ho pamanahu Yesus, lula ra neo pamadhe Ne. Te ngaa rèngu abhu boe bukti èci sa. 56 Ka ra paroa dhèu ae asa madha ho j'aj'i sakasii, sèna ka neo pabèbhe Yesus. Te ngaa lii sakasii rèngu sèra, èci dènge èci pamèci boe.

57 Abhu pèri-pèri dhèu sakasii leo dhu kèd'i titu, ka ra pakapod'e lii, peka na, 58 “Ji'i tadèngi dhèu ne'e peka na, ‘Èèna na Ja'a paguri eele Èmu Kapua Manèngi-Mangaj'i dhu dhèu rai-haha tao dènge kacui-aai ra. Te ngaa èle tèlu lod'o ka, Ja'a patitu kore hari le Èmu èèna, dènge boe pake kacui-aai dhèu.”’^k 59 Te ngaa lii lolo rèngu sèra èci dènge èci baka-leo hua.

60 Hèia kètu kapai risi agama Yahudi èèna, kèd'i titu ètu talora dhèu ae dhu madhèdi ètu sèra. Ka na karèi Yesus, aku nèngu na, “Dhèu ae mai le galaa Èu. Nga tao ka Èu mau-mau, mo'o boe dhaa lii galaa sèra?”

61 Te ngaa Yesus mau-mau, lii boe ca hèb'a sa. Èle èèna ka, kètu kapai risi agama Yahudi ne, karèi hari Ne ca tèka, “Èu peka ku laa! Tare'a-re'a Èu ne Kristus, Ana Ama Lamatua dhu Na moa nèti uuru èèna, do?”

62 Ka Yesus dhaa, aku Nèngu na, “Mema tare'a sèmi èèna! Nèngu èèna ka, Ja'a ne! Bèli-camèd'a miu ladhe mèdhi Ja'a, Dhèu Rai-haha Tare'a-re'a ne, madhèdi re bab'oa g'ana Ama Lamatua ètu sorga. Koasa Nèngu kapai risi eele! Ladhe èèna na, Ja'a dènge Nèngu, ngèd'u paredha sama-sama. Èle èèna na, Ja'a puru mai nèti sorga dènge ra'i-liru.”^l

63 Ropa tadèngi nare lii padhai Yesus, kètu kapai risi agama Yahudi ne nasa titu kèna, hèia na ciu pamae kodho madhera ètu ua na. Ka na pajèka peka dènge dhèu-dhèu dhu madhèdi ètu sèra, aku nèngu na, “Èdhi parluu heka sakasii! 64 Miu tadèngi le dènge ro'a dhilu miu, si? Nèngu unu Na ka dhu peka sèmi èèna! Nèngu padedha iisi Na, j'aj'i Ana Ama Lamatua. Lii ne'e ne, lii dhu pa'ele iie kolongara Ama Lamatua! Madhutu atora agama èdhi, dhèu dhu tao iisi na sama sèmi Ama Lamatua, dhèu èèna hud'i lèke huku madhe ku! De mi pama'ète tasamia?”

Hèia rèngu aa'i-aa'i pama'ète, peka na, “Dhèu ne'e ne, tare'a-re'a sala! De Nèngu ne hud'i lèke huku pamadhe!”^m

65 Hèia pèri-pèri dhèu kèd'i lasi sabhuu ilu mi rèhu Yesus. Ra hutu musi madha Na, ka ra game Ne. Hèia ra karèi Ne, aku rèngu na, “Ladhe Èu j'aj'i dhèu mèti lii padhai Ama Lamatua, na, Èu peka sèku! Cee ka dhu j'ubhu Èu?” Èle èèna ka, ra pua dhèu dhu madhenge Èmu Kapua Manèngi-Mangaj'i, ho mai pakako rèti Yesus. Ropa ra kako, ra tèb'e pa'oke Ne nèti haa, nèti dhimu.

66-67 Mèda èèna, Petrus madhèdi era ètu madha èmu èèna. Hèia ènu dhèu bhèni èci nèti kètu kapai risi agama Yahudi, mai ka nèdhi Petrus madhèdi manyiru ai. Na ladhe kaloo ka rèhu Petrus, ka karèi, aku nèngu na, “Deo na èu sama-sama dènge Yesus, dhèu Nasaret èèna, si?”

68 Te ngaa Petrus dhaa, peka na, “Aad'o! Nga tao ka èu karèi sèmi èèna! Ja'a tadhe boe Dhèu èèna.” Hèia Petrus kalua, ka la'e titu ètu hèb'a tedhe. [Kabèdhi laa, manu kokotoo.]ⁿ

69 Hèia dhèu bhèni èèna ladhe nèdhi hari Petrus. Ka na peka dènge dhèu ètu sèra, aku nèngu na, “Nèngu ne ca dhèu nèti rèngu kahèi!”

70 Te ngaa Petrus pasili hari, ka na peka, “Tao-tao èu huj'u! Ja'a tadhe boe Dhèu ne'e!”

Nèbhu boe ka, dhèu èci ètu èèna kahèi, peka hari mi Petrus, aku nèngu na, “Èu ne baku pasili, peka na, èu dènge boe dhèu se'e se! We! Miu se aa'i-aa'i mi, dhèu Galilea, si?”

71 Ka Petrus pab'ala hari, aku nèngu na, “Ja'a bani subha! Ja'a tadhe boe Dhèu nèi!”

72 Petrus dhu padhai lii nare mèka, kabèdhi laa, manu kokotoo ka dua hari kèna. Hèia Petrus sanèd'e lii dhu Yesus peka dènge nèngu, “Ladhe manu kokotoo d'ai mèka dua hari, te èu pasili le Ja'a tèlu hari peka na èu tadhe boe Ja'a!”

Ropa ngee nèdhi, hèia Petrus tangi d'ara pèd'a.