2 Ja'a koa-kad'iri miu, lula tasamia èèna ka miu sanèd'e taruu ja'a. Aa j'ara aa'i-aa'i dhu ja'a aj'a-nori le miu, miu tao madhutu era. Be'a titu kèna! 3 Te ngaa ca j'ara dhu ja'a neo pasanèd'e miu nuka: baku bhèlu j'aj'aj'i miu nèti mia. Dhèu mone dhu parcaya sèra, kèni na nèti Kristus, dhu j'aj'i Kètu ra. Dhèu bhèni j'aj'i nèti dhèu mone. Aa Kristus mai nèti Ama Lamatua.^b

4 Dhèu mone baku pahutu kètu na lod'o nèngu manèngi-mangaj'i, do, ropa na peka-padhai lii moa Lamatua. Te èèna sama sèmi nèngu pamakae Kristus, lula ne'a boe pakab'ua madhutu ad'a èdhi. 5 Te ngaa bhèni hud'i pahutu kètu na lod'o sabaj'a, do ropa nèngu lole lii moa Lamatua. Te ladhe aad'o na, èèna sama sèmi nèngu pamakae dhèu èmu na, lula ne'a boe pakab'ua madhutu ad'a èdhi. Aa nèngu pamakae ngi'u nèngu unu na, nuka sèmi dhèu bhèni dhu lusu pakahoni kètu na. 6 Te ladhe abhu dhèu bhèni dhu d'èi boe pahutu kètu na, sèna ka j'aj'i tadha nèngu pakab'ua dhèu èmu na, be'a risi nèngu g'ute pabab'a rèu kètu na. Te ngaa ladhe nèngu rasa kètu na kahoni pamakae nèngu, hua iia nèngu pahutu kètu na.

7 Ngee sèku sèmi ne'e: dhèu mone parluu boe hutu kètu na, te Ama Lamatua paj'aj'i dhèu mone madhutu raropa Na. Nèti èèna ka, dhèu mone j'aj'i mi hua-hela dhu pad'elo dadedha Ama Lamatua. Aa dhèu bhèni kahèi j'aj'i mi hua-hela dhu pad'elo dadedha dhèu mone.^c 8 Te lod'o Ama Lamatua paj'aj'i rai-haha ne, Na tao boe dhèu mone nèti dhèu bhèni. Te ngaa paj'aj'i dhèu bhèni nèti dhèu mone. 9 Aa Lamatua tao boe dhèu mone hia mi dhèu bhèni. Te ngaa Na pangèd'u dhèu bhèni mi dhèu mone.^d 10 De hua iia risi dhèu bhèni pahutu kètu ho dhèu re'a, na, nèngu pake hak na ho sabaj'a aa lole lii moa Lamatua, madhutu j'ara dhu lèke. Ana pajuu nèti sorga re'a sèmi èèna kahèi. 11 Te ngaa ladhe rèngu pa'èki dènge Lamatua, bhèni dènge mone bisa boe èci-èci ka tao unu na. 12 Ama Lamatua paj'aj'i uuru ku dhèu mone. Hèia Na paj'aj'i dhèu bhèni nèti dhèu mone. Te ngaa èle èèna ka, dhèu bhèni ka dhu nara iisi dhèu mone. Aa Ama Lamatua ka dhu tao aa'i-aa'i, j'aj'i.

13 Miu pangee sèku! Ladhe dhèu bhèni pahutu boe kètu ho sabaj'a mi Ama Lamatua, madhutu a'abhu miu, na, be'a, do aad'o? 14 Madhutu ad'a miu ètu kota Korintus, ladhe dhèu mone rèu kètu madhera, èèna pamakae nèngu, do? 15 Te ngaa bhèni dhu rèu kètu na madhera, be'a titu kèna, si? Lamatua hia ne rèu kètu madhera ho pa'abhe kab'a kètu na. Èèna ka dhu lèke mola-mola.

16 Te ngaa ladhe abhu dhu loe boe pakarèi nèti j'ara ne'e, sanèd'e, te nèti ji'i dhu j'aj'i kètu juma'at, aa nèti juma'at-juma'at, ne'e ne dhu tema le j'aj'i ètu talora èdhi.

17 Limuri ne, ja'a neo padhai lii ca j'ara. Te ngaa lii ne koa-kad'iri boe miu. Te ropa miu pakaboko, miu tao boe j'ara dhu lèke, te ngaa miu asa tao maruru.

18 Partama, dhu ja'a tadèngi, na, lod'o miu pakaboko tao kasasi, miu dhu mae-manyèla. Nèti lii dhu ja'a tadèngi sèra, tatu abhu cahag'e dhu lèke tare'a. 19 (Mema, lula mamae-manyèla miu èèna ka, bisa te'a cee ka dhu tare'a-re'a nanene Lamatua èdhi, aa mia dhu nanene boe.)

20 Te lod'o miu dhèu sarani pakaboko ho mi'a ètu mei Lamatua, miu hud'i sanèd'e ku mi Lamatua Yesus. Èèna ka dhu lèke. Te ngaa miu tao boe sèmi èèna. 21 Tadha na, nuka ropa miu madhèdi mi'a, abhu dhu mate boe dhèu leo, abhu dhu ra'a dènge gagoo, aa abhu leo dhu rinu mahu. Toke abhu dhèu cahag'e dhu abhu boe pala, ka ra manganga. 22 Tasamia ka ne!? Miu dènge boe èmu ho mi'a-minu, do? Do, miu neo pa'ele iie kolongara juma'at Lamatua? Do, miu neo pamakae dhèu dhu unu aad'o sèra? Miu neo ja'a padhai lii tasamia hari? Neo sèna ka ja'a koa-kad'iri miu ètu d'ara tatao miu ne, do? Baku maena!

23 Lamatua Yesus ka dhu peka Unu na dènge ja'a j'ara ne, de ja'a peka hari dènge miu. Peka na, ropa dhèu pa'èra neo pamadhe Ne, mèda èèna Nèngu nare roti cue. 24 Hèia Na sabaj'a manèngi makasi mi Ama Lamatua. Ka Yesus peka dènge ana madhutu Na sèra, aku Nèngu na, “Mi'a roti ne, te ne'e ne ngi'u Ja'a, dhu mae hia miu. De miu hud'i mi'a roti ne, sèna ka sanèd'e Ja'a.” 25 Ropa ra'a rare, Na tao sèmi èèna kahèi dènge galaa dhu isi èi anggor, aku Nèngu na, “Èi anggor ne, sasoa na, Ama Lamatua neo pa'èki lii padhadha hiu dènge miu. Ka Ja'a hud'i pasuti raa Ja'a toke madhe, heka lii padhadha èèna j'aj'i. Lod'o-lod'o miu minu èi anggor sèmi ne'e, miu hud'i ngee mèdhi ku mamadhe Ja'a.”^e 26 Lod'o-lod'o miu tao j'ara sèmi ne'e, ho mi'a roti dènge minu nèti galaa sèmi ne'e, toke Kristus lèpa hari mai, èèna nuka sèmi miu palolo hari mamadhe Na.

27 Nèti èèna ka, lod'o dhèu ra'a roti dènge rinu nèti galaa èèna, sèna ka sanèd'e Kètu èdhi, Yesus Kristus, te ngaa ladhe abhu dhèu dhu d'ara na mola boe dènge dhèu leo, èèna na Ama Lamatua huku ne. Lula, èèna ngi'u dènge raa nèti Lamatua Yesus. De ladhe d'ara dhu mola mèka, na, nèngu nia boe na'a dènge ninu, lula j'ara èèna pahahe Lamatua Yesus. 28 Be'a risi ca dhèu-dhèu ka parisa uuru ku d'ara na. Ladhe d'ara na dhu mola le, heka bisa na'a roti aa ninu èi anggor kèna. 29 Te ngaa abhu dhu ra'a dènge rinu dhu d'ara ra koe-kapengo. Te ra pangee, na, “Mamadhe Yesus èèna, dènge boe kab'ua. Ngi'u Yesus dènge boe sasoa bagi mi ja'a.” Dhèu sèmi se'e se, bèli-camèd'a dui rare pala ra, lula hahuku dhu sadia tèke le. 30 Nèti èèna ka, ètu talora aae miu sèra, abhu dhu èra boe, abhu dhu lèke papèd'a-tarègu, aa abhu dhu madhe le.

31 Te ngaa ladhe èdhi parisa paie-iie d'ara èdhi, èdhi abhu boe huku sèmi sèra. 32 Ladhe Lamatua èdhi huku èdhi, Na tao sèmi èèna sèna ka aj'a-nori èdhi ho èdhi madhutu j'ara dhu lèke. Te Nèngu d'èi boe ladhe èdhi lèke huku sama sèmi dènge dhèu aa'i-aa'i ètu rai-haha ne.

33 De a'ari pasue aa'i-aa'i! Ladhe miu pakaboko ho mi'a-minu ètu mei Lamatua, èci hud'i mate ku èci. 34 Ladhe abhu dhu taha boe manganga, be'a risi mi'a uuru ku ètu èmu, sèna ka ropa miu pakaboko pa'èci, baku abhu dhu lèke huku.

J'ara leo dhu miu karèi sèra, pe ja'a dhiu ku, heka ator si kèna.