2-3 Lod'o èèna, kètu agama Yahudi sèra dènge dhèu-dhèu nèti partei agama Parisi saraka mi Yudas, sordad'u dènge dhèu j'aga pèri-pèri. Te nèngu neo pahie eele Yesus. Yudas ne'a oka ne kahèi, lula Yesus pakaboko dènge ana madhutu Na ètu era ne'e pèri-pèri hari le. Ka Yudas si lasi asa oka ne rèti dènge ob'o, labhu lantera dènge rèka.

4 Aa te ngaa Yesus dhu ne'a uru le aa'i-aa'i dhu èèna na j'aj'i. Hèia ara la'e asa madha rèngu, ka Na lii, peka na, “Miu tenge cee?”

5 Ka ra b'ala, na, “Ji'i tenge dhèu èci, ngara na Yesus, nèti rae Nasaret.”

Ka Yesus dhaa, aku Nèngu na, “Ja'a ka ne'e.” Lod'o èèna, Yudas dhu titu dènge dhèu se'e. Nèngu ne'e ka dhu pahie Yesus. 6 Ropa Yesus peka na, “Ja'a ka ne'e,” hèia dhèu se hari kabodho, ka ra bèbha.

7 Ka Yesus karèi hari, na, “Miu tenge cee?”

Hèia dhèu se dhaa, aku rèngu na, “Yesus, dhèu Nasaret.”

8 Hèia Na peka dènge ra, “Deo na Ja'a peka kore le, na, Nèngu ka Ja'a ne. De ladhe miu tenge Ja'a, na, baku kèpe dhèu leo. Hud'i si lasi.” 9 (Nèngu padhai lii sèmi èèna, sèna ka pamèci dènge ngaa dhu Nèngu peka nèdhi le, na, “Ama. Aa'i-aa'i dhu Ama pangèd'u le mi Ja'a, abhu boe èci sa dhu ele.”)

10 Lod'o èèna, Simon Petrus nèti dènge samala iiki èci. Ka na bete ho neo pare dhèu. Kabèdhi laa, na pare pama'ète rèu dhilu g'ana nèti dhèu èci. (Dhèu ne ngara na Malkus. Nèngu ne, ana pua-paleha nèti kètu kapai risi agama Yahudi.) 11 Ka Yesus pua Petrus, aku Nèngu na, “We, Petrus! Pasaluu hari samala èu èèna asa d'ara sope la'e. Te Ama Ku dhu peka le, na, Ja'a hud'i paraga ku dènge j'aj'èra sèmi ne'e ne. De hud'i laa! Èèna nuka sèmi Nèngu hia Ja'a galaa èci dhu isi na pèd'u-èd'u. Hud'i laa Ja'a kinu toke èle.”^a

12 Hèia komedhaa, sordad'u dènge dhèu j'aga aa'i-aa'i ra kèpe Yesus, ka ra èki Ne. 13 Ka lere rèti uuru Ne asa Anas. Anas ne, ama dhèu èmu Kayafas. Tèu èèna, Kayafas dhu j'aj'i kètu kapai risi agama Yahudi. 14 Kayafas ne'e ka dhu peka nèdhi le dènge ama-ama dhèu Yahudi, aku nèngu na, “Be'a risi hia miu, ladhe dhèu èci madhe pala dhèu aa'i-aa'i.”^b

15 Simon Petrus dhu madhutu Yesus re limuri palere-lere dènge ana madhutu Yesus èci, nuka ja'a, Yohanis ne. Lula kètu kapai risi agama Yahudi tadhe ja'a, nèti èèna ka ja'a bisa maso kahèi palere-lere dènge Yesus asa madha èmu na. 16 Te ngaa Petrus titu ètu li'u, padètu dènge hèb'a tedhe. Hèia ja'a laku asa li'u, ho peka dènge dhèu bhèni èci dhu j'aga hèb'a tedhe ne, sèna ka kèti Petrus asa d'ara. 17 Hèia bhèni ne karèi Petrus, aku nèngu na, “Wee! Èu ne, ca dhèu ana madhutu Dhèu nèi, si?”

Te ngaa Petrus dhaa, aku nèngu na, “Aad'o!”

18 Lod'o èèna lèke dènge hèru pacuhi. Nèti èèna ka, dhèu madhenga dènge ana pua-paleha sèra dhu titu manyiru ai. Ka Petrus la'e manyiru ai sama-sama dènge rèngu kahèi.

19 Lod'o èèna, kètu kapai risi dhui nèti agama Yahudi parisa Yesus lula-nèti a'aj'a Na, aa lula-nèti ana madhutu Na.

20 Ka Yesus peka dènge nèngu, aku Nèngu na, “Ja'a peka paled'a, sèna ka dhèu aa'i-aa'i bisa tadèngi. Ja'a tema aj'a ètu era dhu biasa dhèu Yahudi èdhi pakaboko, nuka ètu d'ara èmu sabaj'a èdhi, dènge ètu Èmu Kapua Manèngi-Mangaj'i. Ja'a padhai lii pahuni kèdhi boe. 21 Nga tao ka èu karèi Ja'a? Karèi la dhèu-dhèu dhu nanene lii padhai Ja'a. Te, tatu re'a ngaa dhu Ja'a peka-padhai.”

22 Ropa Na padhai lii sèmi èèna, dhèu j'aga èci dhu titu ètu èèna, tèb'e Yesus, ka na peka na, “Èu baku padhai lii sèmi èèna dènge kètu kapai risi.”

23 Ka Yesus b'ala, aku Nèngu na, “Ladhe Ja'a padhai lii sale, na, pad'elo mia dhu sale nèti lii padhai deo na. Te ngaa ladhe Ja'a peka lèke, nga tao ka èu tèb'e Ja'a?”

24 Èle ka, Anas pua dhèu lere Ne asa Kayafas dhu j'aj'i kètu kapai risi agama Yahudi. Lod'o lere rèti Ne, Yesus dhu ra èki era.

25 Lod'o èèna, Simon Petrus titu manyiru ai era. Ka dhèu leo dhu ètu èèna, karèi ne, aku nèngu na, “Èu ne, ca dhèu nèti ana madhutu Dhèu nèi, si?”

Te ngaa Petrus pasili, peka na, “Aad'o!”

26 Ètu era ne'e, abhu kahèi dhèu sab'a èci nèti kètu kapai risi agama Yahudi. Nèngu ne, pa'a'ari kahèi dènge dhèu dhu Petrus pare pama'ète rèu dhilu na. Hèia dhèu ne karèi Petrus, peka na, “Waa! Deo na, èu ne ètu d'ara oka nèi, si? Te ja'a kèdhi èu ètu nèi!”

27 Te ngaa Petrus pasili hari, hèia manu kokotoo dènge.

28 D'ara mad'ae aae era, lere rèti Yesus nèti Kayafas asa èmu jabatan gubernur ètu benteng sordad'u Roma.^c Dhèu Yahudi se maso boe asa èmu dhèu Roma, te èèna pakaj'alu rèngu. Te ladhe ra maso, na, rèngu bisa boe ra'a pesta Paska. 29 Hèia gubernur Pilatus la'e asa li'u paraga dènge dhèu Yahudi se. Ka na karèi, aku nèngu na, “Miu pèci sasala ngaa mi dedha Dhèu ne'e?”

30 Hèia ra b'ala, peka na, “Sèmi ne'e, ama. Ladhe Nèngu ne dhèu bhelu-katub'a boe, na, tatu ji'i mai boe asa madha ama. Ngaa hari ji'i mai saraka Ne asa kacui-aai ama.”

31 Ka gubernur peka dènge dhèu se, na, “Sèmi ne'e. Hud'i laa miu ka dhu uri lii langu Na, madhutu atora miu dhèu Yahudi.”

Hèia ama-ama dhèu Yahudi se, peka na, “Bisa boe ama. Ji'i dhèu Yahudi dènge heka hak ho pama'ète hahuku madhe. Dhoka miu dhèu paredha Roma di dhu dènge hak èèna.” 32 (Lii padhai lii rèngu èèna, palèke dènge lii padhai dhu uru èèna Yesus peka nèdhi le. Te Nèngu dhu peka le dènge dhèu unu Na sèra, na, Nèngu madhe madhutu j'ara paredha Roma, nuka ra paku Ne ètu aj'u palolo-palèbha.)^d

33 Hèia gubernur maso hari asa d'ara benteng sordad'u. Ka na paroa Yesus, hèia na karèi, peka na, “Èu ne, dhèu aae dhèu Yahudi, do?”

34 Te ngaa Yesus karèi ne, aku Nèngu na, “Ama ka peka sèmi èèna, do abhu dhèu leo ka dhu peka dènge ama lula-nèti Ja'a?”

35 Hèia gubernur dhaa, na, “Eee! Ja'a ne dhèu Yahudi boe. Ana kabarai Èu mesa Mu ka dhu saraka Èu. Ngaa hari kètu agama Yahudi sèra. Èu ne, tao sala ngaa? Èu peka sèku!”

36 Ka Yesus peka na, “Ja'a ne, dhèu aae boe nèti rai-haha ne. Te ladhe Ja'a j'aj'i dhèu aae sama sèmi èèna, tatu dhèu-dhèu Ja'a palab'a le, ka dhèu Yahudi kèpe boe Ja'a. Tare'a, Ja'a ne Dhèu Aae. Te ngaa ca dhèu sa ètu rai-haha ne ded'e boe Ja'a.”

37 Hèia gubernur karèi hari, peka na, “De Èu ne, Dhèu Aae, do?”

Ka Yesus dhaa, aku Nèngu na, “Ama unu mu ka dhu peka, na, Ja'a ne Dhèu Aae. Dhu lèke ka, rara iisi Ja'a ne, sèna ka j'aj'i Dhèu Aae. Ja'a mai asa rai-haha ne ho j'aj'i Dhèu Aae, sèna ka Ja'a peka-padhai j'ara-j'ara dhu lèke. Dhèu aa'i-aa'i dhu kèpe pa'èra j'ara-j'ara dhu lèke, rèngu sèra ka dhu nanene Ja'a.”

38a Ka gubernur karèi, peka na, “Dhu lèke èèna, sèmi ngaa sa?”

38b Ropa gubernur Pilatus padhai lii nare, hèia kalua hari la'e asa dhèu Yahudi sèra. Ka na peka, “Ja'a parisa le Nèngu, te ngaa abhu boe sasala Na èci sa.

39 Te ngaa miu dhu tema le, tèu mai-tèu mai lod'o d'ai pesta Paska sèmi ne'e, ja'a patabuli ana bèdho ca dhèu hia miu. De tèu ne'e mo'o sèna ka ja'a patabuli dhèu aae Yahudi miu, do tasamia?”

40 Ka aa'i-aa'i ra pa'oo-parodha, peka na, “Baku patabuli Dhèu èèna! Patabuli Barabas di!” Barabas ne, ca dhèu dhu bhelu titu kèna.^e