3 Ropa Yudas tadèngi na, Yesus abhu hahuku madhe, hèia na manyasa, lula nèngu ka dhu pahie Yesus. Ka la'e hari asa kètu agama Yahudi dènge dhèu heka ad'a sèra, ho neo hia hari la'a doi iia 30 (tèlu nguru) bua sèra. 4 Na peka na, “Ja'a tao le sasala-sasigo, lula ja'a pahie le Dhèu dhu dènge boe sasala.”

Te ngaa dhèu se b'ala, aku rèngu na, “Wee! Ji'i se pusi-pahae heka èu ne! Èu mesa mu ka dhu d'ui more sasala èèna.” 5 Ka Yudas ceb'e eele doi sèra asa d'ara Èmu Kapua Manèngi-Mangaj'i. Hèia la'e kadhoe iisi na, toke na madhe aapa.

6 Hèia kètu agama Yahudi sèra kaboko rare doi dhu na ceb'e eele sèra. Ra padhue, aku rèngu na, “Doi se'e mage èdhi tao asa d'ara boaraka doi, lula doi se doi kaj'alu. 7 De be'a risi èdhi hèli tare rai ca kasib'i nèti dhèu tao èru rai sèi. Ladhe dhèu mai nèti rai leo, do, dhèu dhu èdhi tadhe boe madhe, èdhi padhane si ètu era ne'e ne.” 8 Ka ra hèli rai ne, kab'ua na nèti doi deo sa. Nèti èèna ka, rai ne, toke d'ai sange ne'e, dhèu pangare na, ‘Rai Raa’.^b

9 Dènge j'ara ne'e, rèngu madhutu lii nèti ca dhèu nèti lii padhai Ama Lamatua, ngara na Yermia, dhu suri tèke na,

11 Ropa dhèu se rèti Yesus d'ai gubernur, hèia na karèi Yesus, “Tasamia? Èu ne, tare'a-re'a Dhèu Aae dhèu Yahudi, do?”

Na dhaa, peka na, “Tare'a. Ama peka lèke kèna.”

12 Te ngaa ropa kètu agama Yahudi dènge dhèu heka ad'a sèra galaa Ne dènge lii langu ae-ae, Na dhaa boe ca hèb'a sa hèi.

13 Ka gubernur karèi hari Ne, peka na, “Èu tadèngi boe lii padhai lii rèngu, do? Dhèu se hia sasala ae-ae mi dedha Èu. Te ngaa tasamia ka Èu b'ala boe si hèi?!”

14 Te ngaa Na dhaa boe ca hèb'a sa hèi, toke gubernur malaa.

15 Tèu mai-tèu mai, dhu tema le, ladhe d'ai ka lod'o kalela Paska, dhèu Yahudi hag'e rare ana bèdho ca dhèu, sèna ka gubernur patabuli ne. 16 Tèu èèna, dhèu bèdho ca dhèu, ngara na Barabas.^d Dhèu aa'i-aa'i tadhe le nèngu ne, lula nèngu ca dhèu bhelu-katub'a titu kèna. 17 Lod'o èèna kahèi, dhèu ae lasi asa gubernur Pilatus ho manèngi, sèna ka patabuli dhèu bèdho èci, sèmi biasa. Hèia Pilatus karèi si, aku nèngu na, “Be'a. De ja'a patabuli cee? Ètu ne'e Barabas, aa abhu kahèi Yesus, dhu dhèu paroa Ne, Kristus. Mia ka dhu ja'a patabuli? Miu ka dhu pama'ète.” 18 (Gubernur peka sèmi èèna, te ne'a na kètu agama Yahudi rèti Yesus asa nèngu, lula rèngu se tèka d'ara dènge Yesus.)

19 Gubernur ètu d'ara uri lii langu ne era, dhèu èmu na moa lii, peka na, “Ama! Mage-mage, oo! Te Yesus ne dhu dènge boe sasala. Lula Nèngu ne'e ka, mèda deo na, ja'a nii aapa. Toke d'ai sange ne'e, d'ara ja'a dhae tèka mèka.” 20 Te ngaa kètu agama Yahudi dènge dhèu heka ad'a sèra, dadugu dhèu ae ètu èèna, ho ra manèngi gubernur patabuli Barabas, aa huku pamadhe Yesus. 21 Ka na karèi hari si, aku nèngu na, “Nèti dhèu dua se, mia ka dhu ja'a patabuli?”

Hèia aa'i-aa'i ra dhaa, peka na, “Barabas! Patabuli Barabas di!”

22 Èle ka na karèi si, aku nèngu na, “Ladhe sèmi èèna, ja'a tao tasa mera mia mi Yesus, dhu ra peka na Kristus ne?”

Hèia aa'i-aa'i ra pa'oo-parodha peka na, “Paku pamadhe Ne asa aj'u palolo-palèbha!”

23 Èle èèna ka, gubernur karèi hari, peka na, “Te sala Na, ngaa? Ja'a parisa le, te ngaa abhu boe sasala Na èci sa!”

Te ngaa ra asa pa'oo-parodha, aku rèngu na, “Pamadhe Ne! Paku Ne asa aj'u palolo-palèbha!”

24 Nèbhu boe, na ne'a heka tao tasamia hari, lula dhèu se'e asa ka ra hino neo patao. Nèti èèna ka, nare èi ho j'amo ai ètu madha dhèu ae-ae sèra, aa na peka dènge ra, aku nèngu na, “Ja'a tago boe mamadhe Dhèu ne'e ne! Miu aa'i-aa'i mi ka dhu hud'i pasae mere mamadhe Na!”^e

25 Hèia dhèu se'e dhaa dènge lii pa'oo-parodha peka na, “Oo, hud'i laa! Hud'i laa ji'i dènge ana-èpu ji'i tago ngare raa Na!”

26 Ropa tadèngi nare, hèia na peka, “La'a, sina ma.” Hèia na patabuli Barabas madhutu dad'èi ra. Èle èèna ka, na pua dhèu j'aga, lasi kalabhe Yesus pake gui. Game rare, ka sordad'u rèti Yesus, sèna ka neo paku pamadhe Ne ètu aj'u palolo-palèbha.

27 Èle èèna ka, sordad'u ère rèti Yesus asa tana lapa ètu d'ara benteng rèngu. D'ai nèi, rèngu paroa rare angalai ra ca batalion.^f 28 Hèia ra papake Ne kodho madhera èci dhu mea aae.^g 29 Ka rare loro aj'u padhudhu ra ènyu tao sèmi solo. Hèia ra ènyi solo ne mi kètu Yesus, ho ra sasei Ne, tao nuka sèmi rèngu ded'e dhèu aae hiu, dhu pake solo dhèu aae. Èle èèna ka, ra j'ole hia Ne aj'u ca'èta asa ai g'ana Na, nuka sèmi tatea paredha. Hèia ra patitu kètu urutuu ra, patangara dènge Yesus, aa ra pamakae Ne, peka na, “Pakab'ua dhèu aae dhèu Yahudi.” 30 Hèia ra sabhuu Ne ilu, aa rare aj'u ca'èta dhu Na kèpe deo na, ka ra d'eu kètu Na. 31 Ropa ra sasei rare Ne, hèia ra bhoke eele kodho madhera. Èle èèna ka, ra papake hari mèdha-papake Na. Ka rèti Ne asa li'u kota Yerusalem, ho neo paku Ne mi aj'u palolo-palèbha.

32 Ropa ra ère rèti Yesus, d'ai talora j'ara paraga dènge dhèu kota Kirene èci dhu neo la'e asa d'ara kota. Ngara na, Simon. Dhèu se laka-seti ne, sèna ka pasae aj'u palolo-palèbha gati Yesus. 33 Ka ra d'ai era èci, ngara na Golgota. (Ètu d'ara lii Aram, sasoa na, “Era rui kètu.”) 34 Ètu era ne'e, dhèu se'e hia Yesus ninu èi anggor dhu pab'ali rare le dènge èi na'i dhu pèd'u, sèna ka bisa taha rarii. Ka Yesus camuci, hèia juku eele.^h

35 Èle èèna ka, dhèu se'e paku Yesus asa aj'u palolo-palèbha. Hèia sordad'u se ère lot, sèna ka nèti rèngu, cee ka dhu abhu mèdha-papake Na.ⁱ 36 Ka ra madhèdi madhenge Yesus ètu era ne'e. 37 Ra suri kahèi ètu papa èci, peka na,

Ka ra paku papa ne re dedha kètu Yesus, sèna ka dhèu re'a nga tao ka rèngu huku Ne.

38 Ètu era ne'e, ra paku pamadhe parapo dhèu dua kahèi. Ca dhèu re bèka g'ana Yesus, aa èci hari re bèka kariu Na.

39 Dhèu aa'i-aa'i dhu kako re sèra, laladhe Ne. Hèia ra pakapengo hèb'a ra, ho lalangu Ne.^{j k} 40 Dhèu se'e rodhe Ne, peka na, “Eeh! Èu peka na, Èu bisa paguri eele Èmu Kapua Manèngi-Mangaj'i Ama Lamatua, ho èèna na patitu hari ètu d'ara tèlu lod'o, si? Ladhe Èu tare'a-re'a Ana Ama Lamatua, na, papuru ngi'u Mu nèti aj'u palolo-palèbha èèna.”^l

41 Sèmi èèna kahèi dènge kètu agama Yahudi, mese agama, dènge dhèu heka ad'a sèra. Ra pahahe Yesus, aku rèngu na, 42 “Nèngu ne pamamuri le dhèu leo, te ngaa Na bisa boe patabuli eele ngi'u Nèngu unu Na. Nèngu mesa Na peka na, Nèngu dhèu aae Isra'el! Ladhe sèmi èèna, be'a risi Na puru ka nèti aj'u palolo-palèbha èèna. Ladhe ji'i ngèdhi ka j'aj'i sèmi èèna, ji'i heka parcaya Nèngu kèna. 43 Ladhe Nèngu ne tare'a-re'a Ana Ama Lamatua, hud'i laa,

44 Dhèu parapo dhèu dua se, pahahe Ne sèmi èèna kahèi.

45 Èle èèna ka, maroga kiu-kiu saguru nare era ne'e, karèi nèti lod'o titu mera toke d'ai hake tèlu nihia. 46 D'ai hake tèlu, hèia Yesus pa'oo pake lii Aram, na, “Eli! Eli! Lema sabaktani?” (Sasoa na, “Ama Lamatua Ja'a! Lamatua Ja'a! Nga tao ka Ama soro kabodho ho tèke eele Ja'a mesa-mesa Ku sèmi ne'e ne?”)ⁿ

47 Abhu pèri-pèri dhèu dhu dètu ètu sèra, tadèngi lii Na sèmi èèna, hèia ra papeka, “Mi nanene ku laa. Na paroa Elia, ca dhèu nèti lii padhai Ama Lamatua dhu uru sèra!” 48 Ka ca dhèu rai la'e nare ula, cèb'u asa d'ara èi anggor manyilu. Hèia na èki mi suu tatea èci, ka j'ole asa hèb'a Yesus sèna ka Na camuci.^o

49 Te ngaa cahag'e hari peka na, “Èdhi ladhe sèku, teko-teko Elia mai pamamuri Ne, do aad'o?”

50 Ka Yesus pa'oo hari dènge lii mèdhu, hèia Na madhe.

51 Ètu d'ara Èmu Kapua Manèngi-Mangaj'i, abhu bèla dhu bhèla aae kadhoe pa'abhe Kama Luri Mola-Mèci Ama Lamatua. Lèke dènge Yesus ma'ète a'ae èèna, bèla dhu bhèla aae ne mae, cèri mi dua, nèti dedha toke haha. Hèia rai opo, toke hadhu aae-hadhu aae mae sèg'i bagi mi dua.^p 52 Ro'a-ro'a dhèu madhe bhoke kahèi. Aa dhèu unu Ama Lamatua dhu madhe le, abhu dhu Na pamamuri hari. 53 Ropa Yesus mamuri hari le nèti mamadhe Na, hèia dhèu madhe sèra bhodho mai nèti d'ara ro'a, ka lasi asa Yerusalem. Ètu era ne'e dhèu ae rèdhi si.

54 Ètu Golgota, abhu komedhaa dènge sordad'u na dhu j'aga ètu aj'u palolo-palèbha Yesus èèna. Ropa ladhe rèdhi rai opo, dènge aa'i-aa'i dhu j'aj'i se'e, rèngu madha'u titu kèna. Ka ra papeka, na, “Ira ii! Dhèu ne'e ne, tare'a-re'a Ana Lamatua!”

55 Ètu era ne'e, abhu bhèni pèri-pèri dhèu dhu laladhe mamadhe Yesus nèti kaj'èu. Rèngu se'e ka dhu madhutu Ne nèti Galilea, te rèngu ka dhu lalau-lalo'o Ne karèi nèti uru. 56 Dhèu bhèni se'e, nuka Maria nèti rae Magdala, Maria èci hari (nuka ina Yakobis dènge Yusuf), aa dènge dhèu èmu Sabadeus (nuka ina nèti Yakobis dènge Yohanis).^q

57 Ètu èèna, abhu dhèu kaja èci nèti rae Arimatea, ngara na Yusuf. Nèngu ne dhu nèbhu le madhutu a'aj'a Yesus. Lod'o mamadhe Yesus lèke hari Jumat. Asa bèli èèna, lèke dènge lod'o sabaj'a dhèu Yahudi. Nèti èèna ka, ropa lod'o oe cèna, hèia Yusuf tenge j'ara ho neo papuru ngi'u aae Yesus nèti aj'u palolo-palèbha. 58 Hèia la'e asa gubernur Pilatus, sèna ka manèngi papuru ngi'u aae Yesus. Ka gubernur paredha, sèna ka ngi'u aae Yesus saraka mi Yusuf. 59 Ka Yusuf la'e asa Golgota, hèia na papuru ngi'u aae Yesus nèti aj'u palolo-palèbha. Hèia na hutu pabe'a-be'a ngi'u aae ne dènge bèla hiu dhu kab'ua. 60 Tèu èèna, dhèu heka pae rare ro'a èci ètu ledhe hadhu, sèna ka tao tèke ro'a hia Yusuf dènge a'ari na, ladhe d'ai lod'o rèngu madhe. De Yusuf si nedhe rèti ngi'u aae Yesus ne, lasi paj'unu asa ro'a deo na. Ka ètu hèb'a ro'a ne, ra saguru dènge hadhu kabela aae cue, ho ra bèdho pabe'a-be'a hèb'a ro'a ne. Èle èèna ka Yusuf si lèpa.

61 Lod'o èèna, Maria nèti Magdala, dènge Maria dhu leo èci madhutu d'ai era èèna kahèi. Ra madhèdi patangara dènge ro'a ne.

62 Asa bèli èèna, lèke dènge lod'o ae sasab'a dhèu Yahudi. Hèia kètu agama Yahudi dènge dhèu Parisi lasi paraga dènge gubernur. 63 Ra peka, “Ama. Ji'i sanèd'e era, lod'o dhèu kapod'e-kabèli èèna mamuri era, Na peka, na, ‘Ja'a madhe tare'a, te ngaa èle tèlu lod'o, Ja'a mamuri hari.’^r 64 Nèti èèna ka, ama paredha ku sordad'u sèra, ho ra j'aga paie-iie ro'a èèna d'ai tèlu lod'o. Dènge j'ara ne'e, ana madhutu Na bani boe mana'u rèti ngi'u aae Na, sèna ka ra monya peka na, Nèngu mamuri hari. Te ladhe rèngu kapod'e-kabèli sèmi èèna, risi eele nèti mamonya rèngu uru sèra, lod'o dhu ra peka na, Nèngu ne nuka Kristus.”

65 Ropa tadèngi nare, hèia gubernur dhaa, aku nèngu na, “Be'a kahèi! Te ngaa miu dènge dhèu madhenga kahèi. Be'a risi miu pua si, ho lasi j'aga paie-iie ro'a nèi.”

66 Èle ka lasi asa era èèna, rèti dènge dhèu madhenga ra. D'ai era ne'e, ra segel madhe babèdho ro'a ne.^s Hèia ra pua dhèu sèra madhenga, sèna ka dhèu leo baku mai rare ngi'u aae Yesus.