5 D'ai èmu, broit dhèu mone dhae mai mèka. Nèbhu-nèbhu ka, dhèu bhèni se musi madha ra sakaa, hèia ra bhèj'i luu titu kèna.

6 Re'a rare boe te, d'ai talora mèda sa, hèia tadèngi lii pa'oo, peka na, ‘Wee! Broit mai le! Mai lati soru ne!’ 7 Ropa ra tadèngi, hèia dhèu bhèni se kèd'i ka. Ka ra kèpe ka labhu ra èci-èci. 8 Te ngaa dhèu bhèni dhu goa se, peka dènge bhèni aanga ra, aku rèngu na, ‘Angalai, ee! Bagi hia ji'i èi mènyi miu ciki la, te labhu ji'i di ruru-ruru kèna!’ 9 Te ngaa dhèu bhèni dhu d'èlu-mèu se dhaa, aku rèngu na, ‘Irii! Baku nasa, te bisa boe. Te èi mènyi ji'i d'ai boe èdhi aa'i-aa'i ti! De be'a risi lami hèli ètu era dhu pahia èi mènyi.’ 10 Hèia lasi ka hèli èi mènyi. Te ngaa ropa rèngu lasi, broit dhu d'ai le. Ka dhèu bhèni dhu d'èlu-mèu se, lasi ka asa d'ara pesta, palere-lere dènge broit dènge tamu aa'i-aa'i ra. Ropa rèngu aa'i-aa'i d'ai d'ara, ka ra bèdho èmu.

11 Hèia dhèu bhèni dhèu lèmi dhu goa se, lèpa mai. Ka ra paroa peka na, ‘Ama! Ama! Conge ku èmu hia ji'i la!’ 12 Te ngaa ama ne dhaa, aku nèngu na, ‘Wee, bisa boe, te miu se cee, ja'a tadhe boe!’^b

13 Nèti èèna ka, miu hud'i pa'èra taruu, te miu me'a boe kahèi, lod'o do hake pèri Ja'a lèpa hari mai.”

14 Ka Yesus peka hari lii pakasame èci, aku Nèngu na, “Ropa Ja'a tèke eele miu, na, miu hud'i sab'a paie-iie hia Ja'a, nuka sèmi lii pakasame ne: abhu lamatua ca dhèu neo pakèd'i la'e asa rai kaj'èu. Ropa na pa'èra neo la'e, hèia na paroa nare dhèu-dhèu sab'a na, ka na paredha si, aku nèngu na, ‘Miu pake doi ne, tao mi poko. Ladhe ja'a lèpa mai, miu pad'elo dènge ja'a, miu abhu leto ca ngaa.’ 15 Ka na pabagi doi hualaa mi dhèu sab'a ka èci, lèmi saku,^c sèna ka pab'unge ne. Dhèu sab'a ka dua abhu doi dua saku, aa ka tèlu abhu doi ca saku, madhutu a'èra rèngu èci-èci ra. Ka lamatua ne pakèd'i la'e ka.

16 Ropa sèmi rare doi ne, hèia dhèu sab'a ka èci la'e dènge d'aga. Nèbhu boe, na abhu leto doi lèmi saku hari. 17 Sèmi èèna kahèi dènge dhèu sab'a ka dua. Na abhu leto, doi dua saku hari. 18 Te ngaa dhèu sab'a ka tèlu dhu abhu doi ca saku deo na, la'e kèi ro'a ka na padhènu doi lamatua na asa d'ara.

19 Nèbhu ae ku, heka lamatua rèngu lèpa. Hèia na paroa dhèu sab'a na sèra, ho parisa doi na, dhu na hia si uri. 20 Dhèu sab'a ka èci, la'e ka saraka doi canguru saku, ka na peka, ‘Ama! Doi ama ka ne'e. Ca hari ni, ama hia ja'a doi lèmi saku. Te ngaa limuri ne, ja'a abhu leto lèmi saku kahèi.’

21 Ropa lamatua na tadèngi, hèia na karej'e. Ka na peka, na, ‘Be'a! Èu ne dhèu sab'a dhu be'a. Èu ne maj'èni, aa d'èi madhutu taruu lii paredha ja'a, masi ka ja'a aad'o. Lula èu ne bisa uri dhu ciki sèmi ne'e, de èèna na ja'a ded'e èu sèna ka uri j'ara dhu kapai aae hari. Pe ja'a tao pesta, sèna ka ta'a-tinu sama-sama.’

22 Èle ka, dhèu sab'a ka dua, la'e saraka mi lamatua na, doi èpa saku, ka na peka na, ‘Ama! Ca hari ni, ama hia ja'a doi dua saku. Te ngaa ladhe ku la, ja'a abhu leto dua saku kahèi.’

23 Ka lamatua ne karej'e kahèi, ka na peka na, ‘Be'a! Èu ne dhèu sab'a dhu be'a kahèi. Èu ca dhèu dhu maj'èni, aa madhutu taruu lii paredha ja'a, masi ka ja'a aad'o. Lula èu bisa uri dhu ciki sèmi ne'e ne, de èèna na ja'a ded'e èu ho uri dhu kapai hari. Pe ja'a tao pesta, sèna ka ta'a-tinu sama-sama.’

24 Èle èèna ka, dhèu sab'a ka tèlu, la'e peka dènge lamatua na, aku nèngu na, ‘Ama! Ja'a ke'a na, ama ca dhèu dhu d'ara adhu. Te ama more ngaa dhu dhèu leo tao, aa puu more ngaa dhu dhèu leo sèle. 25 Ka ja'a madha'u, mage doi se ele, hèia ama huku ja'a. Nèti èèna ka, ja'a huni paie-iie ne. Ka se'e, ama! De more hari ka, te doi ama se, kura boe ca ana ma sa!’

26 Ropa lamatua ne tadèngi nare, hèia na jèke dhèu sab'a ne, aku nèngu na, ‘Wee, èu ne dhèu sab'a dhu bhelu aa bai-eed'a! Èu dhu me'a, na, ja'a kore ngaa dhu dhèu leo tao, aa puu kore ngaa dhu dhèu leo sèle, 27 nga tao ka èu lamu boe tèke doi ne mi bank? Sèna ka ropa ja'a lèpa, ja'a kore bunga na, masi ka ciki oo'e, ngaa-ngaa tao boe!’

28 Ka lamatua ne pua dhèu sab'a dhu leo sèra, aku nèngu na, ‘Mere doi nèti nèngu ne, ho hia mi dhèu sab'a dhu abhu leto lèmi saku èèna. 29 Te dhèu dhu uri paie-iie ngaa dhu ètu adhe-aai na, èèna na, na abhu ae hari. Te ngaa dhèu dhu ro'o boe uri ngaa dhu ètu d'ara adhe-aai na, èèna na rare aa'i nèti nèngu.^d

30 Kèpe mere dhèu sab'a dhu guna boe ne. Nuni pa'oro ne, pèci asa li'u nèi. Soro tèke ne, sèna ka na tangi, aa dui nare j'aj'èra ètu era maroga aatu-aatu nèi!”’^e

31 Ka Yesus tuhu hari lii padhai Na, aku Nèngu na, “Ja'a, Dhèu Rai-haha Tare'a-re'a ne, bèli-camèd'a puru mai dènge dadedha nèti Ama Ku, palere-lere dènge ana pajuu Na nèti sorga. Èle na Ja'a madhèdi ètu kadera paredha dhu dedha risi, sèna ka parisa mamuri dhèu aa'i-aa'i.^f 32 Bèli-camèd'a dhèu aa'i-aa'i dhu mamuri rèdhi ètu rai-haha, mai asa madha Ja'a. Pe Ja'a hag'e si, nuka sèmi dhèu madhenga badha pacèri kahib'i-kalèbho nèti kahib'i-ka'ia, sèna ka j'aj'i mi dua kaboko. 33 Dhèu-dhèu dhu mamuri madhutu dad'èi Ama Lamatua, Ja'a hia si re g'ana Ja'a. Te ngaa dhu leo sèra, Ja'a hia si re kariu Ja'a. 34 Lod'o èèna, Ja'a kèd'u paredha nuka sèmi Dhèu Aae. Èèna na dhèu-dhèu ètu g'ana Ja'a, Ja'a peka dènge rèngu, na, ‘Miu se'e se, ka dhu abhu mèngi-nale nèti Ama Ku. Mai lati asa d'ara èmu Na, dhu Na tao tèke hia miu, karèi nèti uru ka. 35 Ja'a nèru miu, lula uru èèna lod'o Ja'a manganga, miu ka dhu panga'a Ja'a. Aa lod'o Ja'a koko kamango, miu ka hia Ja'a kinu. Ja'a mai nuka sèmi dhèu leo kara, te ngaa miu hia Ja'a manubha ètu d'ara èmu miu. 36 Ja'a dènge boe mèdha-papake, te ngaa miu ka dhu papake Ja'a. Ja'a ètu d'ara papèd'a-tarègu, te ngaa miu ka dhu lalau-lalo'o Ja'a. Ja'a ètu d'ara bèdho, aa miu ka dhu mai pa'asu-pareo dènge Ja'a.’

37 Ropa dhèu-dhèu ètu sebhe g'ana Ja'a se tadèngi lii Ja'a ne, ra dhaa peka na, ‘Lamatua, ne'e ne tasamia kèna? Lamatua peka na, Lamatua manganga, ka ji'i panga'a. Lamatua koko kamango, ka ji'i hia minu. 38 Lamatua sèmi dhèu leo kara, ka ji'i hia manubha ètu d'ara èmu ji'i. Lamatua dènge boe mèdha-papake, ka ji'i papake Lamatua. 39 Lamatua pèd'a, ka ji'i lalau-lalo'o Lamatua, Lamatua ètu d'ara bèdho, ka ji'i dhiu pa'asu-pareo. Te ngaa j'ara se'e se, lod'o mia ka dhu ji'i tao mi Lamatua?’

40 Pe Ja'a dhaa si, peka na, ‘Parcaya la Ja'a! Te lod'o miu tao j'ara se'e se mi dhèu unu Ja'a, masi ka tao mi dhèu dhu haha d'ai seli èèna ka, sèra sa miu tao le mi dedha Ja'a kahèi!’

41 Èle èèna, dhèu-dhèu dhu ètu sebhe kariu Ja'a, Ja'a peka dènge rèngu, na, ‘Hee, dhèu bhelu-katub'a! Ama Lamatua dhu dhoo le miu. Pakaj'èu nèti ne'e ne! Pe Ja'a paredha dhèu mai kèpe miu, sèna ka pèci asa d'ara ai naraka dhu heo robhe-robhe. Te Ama Lamatua dhu sadia nare le era j'aj'èra ne, hia mi nidhu dènge dhèu aae ra. 42 Ja'a babège eele miu, lula lod'o Ja'a manganga, miu hia boe Ja'a ku'a. Aa lod'o Ja'a koko kamango, miu hia boe Ja'a kinu. 43 Ja'a mai nuka sèmi dhèu leo kara, te ngaa miu soru boe Ja'a asa d'ara èmu mi. Ja'a dènge boe mèdha-papake, te ngaa miu papake boe Ja'a. Lod'o Ja'a pèd'a-tarègu, miu lalau-lalo'o boe Ja'a. Ja'a ètu d'ara bèdho, te ngaa miu pa'asu-pareo boe Ja'a sa kahèi.’

44 Ropa dhèu bhelu-katub'a se tadèngi lii Ja'a sèmi èèna, hèia ra b'ala, peka na, ‘Lamatua ne tasamia kèna? Lamatua peka na, Lamatua manganga, te ngaa ji'i hia boe mu'a. Lamatua koko kamango, te ngaa ji'i hia boe minu. Lamatua nuka sèmi dhèu leo kara, te ngaa ji'i ngo'o boe hia manubha ètu d'ara èmu ji'i. Lamatua dènge boe mèdha-papake, te ngaa ji'i papake boe. Lamatua ètu d'ara papèd'a-tarègu, te ngaa ji'i lalau-lalo'o boe. Lamatua ètu d'ara bèdho, te ngaa ji'i pa'asu-pareo boe. Te ngaa j'ara se'e se, ji'i tao mi Lamatua lod'o mia?’

45 Pe Ja'a dhaa mi rèngu, peka na, ‘Parcaya la Ja'a! Te lod'o miu soru-bara boe dhèu-dhèu dhu haha ae d'ai seli, èci èèna ka dènge miu soru-bara boe Ja'a.’ 46 Ka dhèu bhelu-katub'a abhu j'aj'èra, toke d'ai mia-mia. Te ngaa dhèu-dhèu dhu d'ara mola, abhu mamuri taa-taa, toke d'ai mia-mia dènge Ama Lamatua.”^g