2 Lod'o èèna, dhèu aae nidhu dadugu-rariu le Yudas, ana Simon Iskariot, sèna ka pahie eele Yesus. Ka Yudas dhu pama'ète le, sèna ka ad'u-ue madha j'ara èèna, ropa Yesus si madhèdi ra'a-rinu ètu d'ara kalela Paska.

3 Yesus ne'a mema le, na, Ama Lamatua pua-paleha Nèngu mai asa rai-haha ne, de nèbhu heka Nèngu lèpa hari la'e asa Ama Lamatua. Aa Nèngu ne'a kahèi, na, Ama Na ètu sorga pangèd'u aa'i le ngaa-ngaa mi Nèngu. 4 Hèia Yesus kèd'i nèti mei, ka Na tao eele kodho li'u Na. Nare bèla èci, ho èki mi lalole na. 5 Ka Na bhori èi asa d'ara bokor iiki cue. Hèia Na rase haga ana madhutu Na sèra. Ropa Na rase pamèu nare haga dhèu èci, Na seka pamango pake bèla dhu pa'èki ètu lalole Na. 6 Na rase haga si èci-èci. Ropa d'ai Simon Petrus, ka Simon Petrus karèi, aku nèngu na, “Ama neo rase haga ja'a kahèi, do?”

7 Yesus dhaa, peka na, “Deo ne'e ne, èu dhae me'a mèka ngaa dhu Ja'a tao ne. Te ngaa nèbhu-nèbhu, èu heka me'a kèna.”

8 Te ngaa Petrus pasisu, aku nèngu na, “Ama baku tao sèmi èèna! Ja'a ko'o boe Ama rase haga ja'a.”

Hèia Yesus peka na, “Ladhe Ja'a rase pamèu boe haga èu, na, èu bisa boe pa'èki dènge Ja'a.”

9 Ka Simon Petrus dhaa, aku nèngu na, “Ladhe sèmi èèna, mesa boe haga di. Te ngaa Ama rase kacui-aai dènge kètu ja'a kahèi!”

10 Hèia Yesus lii dènge ne, aku Nèngu na, “Dhèu dhu diu le èi, parluu dhoka rase haga di. Te ngi'u na mèu le. Mema tare'a d'ara miu mèu le, te ngaa miu aa'i mi boe.” 11 (Yesus peka sèmi ne'e, lula ne'a le cee ka dhu neo pahie Ne. Nèti èèna ka, Na peka na, “Miu aa'i mi boe dhu mèu.”)

12 Ropa Yesus pamèu nare haga si, hèia Na silu hari kodho Na, ka madhèdi hari asa mei. Ka Na karèi ana madhutu Na, aku Nèngu na, “Tasamia? Ropa Ja'a rase haga miu, miu me'a sasoa nèti dhu Ja'a tao ne, do aad'o? 13 Miu tema paroa Ja'a ne, ‘Ama Mese’ aa ‘Lamatua’. Èèna lèke kèna, lula mema hud'i sèmi èèna ku. 14 Te ngaa ladhe Mese dènge Lamatua miu ne, rase le haga miu nuka sèmi ana pua-paleha sa, na, tasamia hari dènge miu? Miu hud'i lalau-lalo'o isi-aanga mi èci dènge èci; conto nuka: miu hud'i èci dènge èci rase haga mi. 15 Te Ja'a tao le j'ara ne, sèna ka miu madhutu. Ladhe Ja'a tao tasamia, na, miu hud'i tao sèmi èèna kahèi.^a 16 Ja'a peka tare'a-re'a dènge miu. Ca dhèu ènu bisa boe risi nèti lamatua na. Aa ca dhèu pajuu-paleha bisa boe risi nèti dhèu dhu pua nèngu.^b 17 Lula miu dhu me'a le j'ara se'e, miu oto ladhe miu tao madhutu.

18 Ja'a padhai lii boe lula-nèti miu aa'i-aa'i mi. Ja'a tadhe mèu dhèu dhu Ja'a hag'e kore. Masi ka sèmi èèna, te ngaa j'ara ne hud'i j'aj'i ku, sama sèmi dhu suri tèke ètu d'ara Sasuri Mola-Mèci Ama Lamatua, na, ‘Dhèu dhu madhèdi na'a-ninu pa'èci dènge Ja'a, soro kabodho mi Ja'a le.’^c 19 Ja'a peka mema dènge miu, ho ladhe abhu dhèu dhu la'e tèke eele Ja'a, na, miu bisa parcaya kèna, na, Ja'a ne, Kristus. 20 Ja'a peka dènge miu tare'a-re'a kèna, dhèu cee dhu bhoke d'ara na ho sèmi nare dhèu dhu Ja'a pua, na, nèngu kahèi sèmi nare Ja'a. Aa cee ka dhu sèmi nare Ja'a dènge be'a, na, nèngu sèmi nare kahèi Dhèu dhu pua-paleha Ja'a.”^d

21 Yesus padhai lii nare sèmi èèna, hèia d'ara Na mulai susa. Ka Na lii, aku Nèngu na, “Dhu Ja'a peka ne, lèke tare'a. Ca dhèu nèti miu, èèna na pahie eele Ja'a.”

22 Ropa tadèngi sèmi èèna, hèia ana-ana madhutu Na palaladha èci dènge èci, te rèngu malaa. Re'a boe na, cee ka dhu Nèngu peka. 23 Ètu era ne'e abhu ca dhèu dhu Yesus sue (nuka ja'a, Yohanis dhu suri sasuri ne).^e Ja'a dhu madhèdi ètu baboa Yesus. 24 Hèia Simon Petrus pangètu kètu, ho ja'a karèi Yesus, cee ka dhu Na peka èèna.

25 Ka ja'a eso padètu dènge Yesus, ho karèi Ne, “Dhèu dhu Ama peka ne, cee?”

26 Hèia Yesus dhaa, peka na, “Sèmi ne'e. Ja'a neo kore roti ca'èta, ho cèb'u asa d'ara mago ne. Èèna na Ja'a hia mi dhèu dhu Ja'a peka deo na.” Ka Yesus cèb'u nare roti ne asa d'ara mago, hèia Na j'ole asa Yudas, ana Simon Iskariot. 27 Ropa sèmi nare roti ne, hèia dhèu aae nidhu maso asa d'ara Yudas. Ka Yesus peka dènge ne, “Èu neo tao ngaa, na, tao ka lai-lai. Pamata ia ka.” 28 Te ngaa dhèu leo dhu madhèdi ètu sèra re'a rare boe, nga tao ka Yesus padhai lii sèmi èèna. 29 Lula Yudas dhu tèke doi-dhari, ka abhu dhu pangee, na, Yesus pua Yudas, peka na, “Lamu hèli ngaa dhu èdhi parluu, sèna ka tao pesta Paska.” Aa abhu kahèi dhu pangee, na, Yesus pua Yudas, “Lamu hia doi d'ai ciki sa, mi dhèu unu boe ngaa-ngaa sèra.”

30 Ropa Yudas sèmi nare roti ne, hèia la'e dènge ka. Lod'o nèngu kalua èèna, dhu mèda le.

31 Ropa Yudas la'e, hèia Yesus padhai lii, aku Nèngu na, “Ja'a ne, Dhèu Rai-haha Tare'a-re'a. D'ai lod'o kèna, ho Ama Lamatua ded'e Ja'a padedha-dedha. Aa nèti j'ara ne'e, dhèu rèdhi dadedha Ama Lamatua kahèi. 32 Lula Ja'a pa'èki dènge Ama Lamatua, aa pad'elo dadedha Na, nèti èèna ka Na ded'e padedha-dedha Ja'a. Na pamata heka.

33 Ana aa'i-aa'i! Masi ka Ja'a sue miu titu kèna, te ngaa nèbhu heka Ja'a pa'ana-lalu eele miu. Èèna na miu patangi-tenge Ja'a, te ngaa mèdhi boe. Lii dhu Ja'a peka dènge miu ne, èci èèna ka dènge dhu Ja'a lole dènge ama dhèu Yahudi sèra, na, ‘Ja'a laku asa era èci dhu miu bisa mèka madhutu.’^f 34 Ja'a hia miu lii paredha hiu èci, nuka: miu hud'i pasue ku èci dènge èci, sama sèmi Ja'a sue miu. De miu hud'i pasue ku èci dènge èci kahèi.^g 35 Ladhe miu pasue sèmi èèna, dhèu aa'i-aa'i bisa re'a, na, miu se, ana madhutu Ja'a.”

36 Ka Simon Petrus karèi, peka na, “Te Ama neo lamu mia?”

Hèia Yesus b'ala, aku Nèngu na, “Ja'a laku asa era èci dhu èu bisa mèka lamu. Te ngaa lod'o limuri ku, heka èu lamu kèna.”

37 Petrus karèi hari, peka na, “Ama! Nga tao ka ja'a bisa mèka laku hèi? Te ja'a dhu pa'èra iisi le ho madhe pala Ama!”

38 Yesus dhaa, peka na, “Tare'a, do? Èu neo soro mamuri èu sèna ka madhe pala Ja'a? Dhu lèke ka sèmi ne'e: manu dhae kokotoo mèka, te ngaa èu pasili le tèlu hari, peka na, èu tadhe boe Ja'a.”