3 Nèti dhèu pajuu-paleha Yesus, dhèu canguru dua sèra, èci ngara na Yudas Iskariot. Lod'o kètu agama Yahudi sèra tenge j'ara ho pamadhe Yesus, dhèu aae nidhu maso asa d'ara Yudas Iskariot. 4 Hèia la'e tenge kètu agama Yahudi se dènge kètu nèti dhèu madhenga Èmu Kapua Manèngi-Mangaj'i. La'e neo pane'a dènge ra, sèna ka pahie Yesus dènge rèngu. 5 Ropa tadèngi lii padhai Yudas, hèia ra karej'e titu kèna. Ra pamoa, peka na, “La'a, ma! Ladhe èu neo pahie Yesus dènge ji'i, na ji'i b'ae.” 6 Ka Yudas d'èi, hèia na mulai tenge lod'o dhu lake nare, sèna ka dhèu ae baku re'a nèngu pahie eele Yesus.

7 Hèia d'ai ka lod'o hua iia dhèu Yahudi, dhu rèngu biasa roro ana kahib'i-kalèbho sèna ka tao kalela Paska. 8 Ka Yesus pua Petrus dènge Yohanis, aku Nèngu na, “Dua mi lami uuru, sèna ka sadia tèke nganga'a kalela Paska ho ta'a sama-sama.”

9 Ka dua ra karèi, “Ama! Ji'i la'a sadia nganga'a asa mia?”

10 Hèia Na b'ala, “Ladhe miu maso asa d'ara kota Yerusalem, pe miu paraga dènge dhèu mone ca dhèu dhu pasae g'ala èi cue. Madhutu ne toke d'ai èmu na. 11 Peka dènge lamatua èmu ne, ‘Ama Mese ji'i manèngi ca kama, ho neo pake tao kalela Paska dènge ana-ana madhutu Na. Abhu, do?’ 12 Èèna na lamatua èmu ne pad'elo dènge miu kama èci dhu taleo ètu èmu dedha. Nèngu lalau pamèci nare aa'i le kama èèna. Ate dhoka miu dua mi lami sadia nganga'a ètu èèna.”

13 Ka dua ra lasi. Hèia ra paraga ka nuka sèmi ngaa dhu Yesus peka le. Ka dua ra sadia nganga'a-nganginu Kalela Paska ètu nèi.

14 Ropa lalau rare aa'i, Yesus si mai. Yesus madhèdi ètu mei, aa ana-ana pajuu-paleha Na madhèdi kahèi ra'a pesta. 15 Hèia Yesus peka dènge si, “Ja'a d'èi titu kèna madhèdi ku'a kalela Paska dènge miu aa'i-aa'i mi, uru nèti Ja'a abhu j'aj'èra. 16 Patadhe pabe'a-be'a. Te èle ne'e ne, Ja'a madhèdi heka ku'a kalela Paska dènge miu. Ladhe dhèu aa'i-aa'i re'a mèu ku, peka na, Ama Ku nèd'u paredha, Ja'a heka ku'a hari kèna.”

17 Hèia Na kèpe nare galaa cue dhu isi èi anggor. Ka Na manèngi makasi mi Ama Lamatua, èle ka Na soro galaa ne asa rèngu. Hèia Na padhai lii, aku Nèngu na, “Sèmi mere galaa ne, ho èci-èci minu. 18 Sanèd'e paie-iie! Karèi nèti mèda ne'e ne, Ja'a kinu heka èi anggor. Ladhe dhèu aa'i-aa'i re'a mèu ka, peka na, Ama Ku nèd'u paredha, Ja'a heka kinu hari kèna.”

19 Hèia Na kèpe nare roti cue, ka manèngi makasi mi Ama Lamatua. Ka Na pamae roti ne, hèia Na soro sa rèngu aa'i-aa'i ra. Ka Na peka, “Roti ne'e ne, ngi'u aae Ja'a dhu Ja'a hia sa miu aa'i-aa'i mi. Lod'o-lod'o dhu miu mi'e ne, pasanèd'e taruu miu, lula tatao Ja'a.” 20 Ropa ra'a rare, ka Na ded'e nare galaa dhu isi èi anggor. Hèia Na lii, peka na, “Èi anggor ne'e ne, raa Ja'a ka ne, dhu bhori mai sèna ka hia sod'a-mole mi miu. Nèti raa ne'e ka, Ama Lamatua pa'èki lii pajaji dhu hiu dènge miu.^b

21 Mage pamud'e, te abhu dhèu dhu madhèdi sama-sama dènge èdhi ètu mei ne, èèna na, nèngu pahie eele Ja'a.^c 22 Mema Ja'a, Dhèu Rai-haha Tare'a-re'a ne, hud'i madhe ku madhutu dad'èi Ama Lamatua. Te ngaa dhèu dhu pahie eele Ja'a, sanèd'e, ee! Te bèli-camèd'a, nèngu pasae nare mamadhe-mamopo!”

23 Ropa ra tadèngi lii ne, ana-ana pajuu-paleha se pakarèi, peka na, “Cee ka dhu ad'u-ue madha j'ara bhelu ne mi dedha Na?”

24 Ka ana madhutu Yesus se pasisu, peka na, nèti rèngu aa'i-aa'i ra, cee ka dhu dhèu re madha.^d 25 Te ngaa Yesus kai si, peka na, “Ètu rai-rai dhu kabarai ra tadhe boe Lamatua, dhèu aae ra hia paredha dhu bia risi mi kabarai rèngu. Te ngaa rèngu neo sèna ka kabarai paroa rèngu, peka na, ‘Ama dhu taru kira kabarai’. 26 Te ngaa miu baku madhutu j'ara sèra. Cee dhu neo j'aj'i dhèu kapai, mamuri na hud'i tare'a-re'a sama sèmi dhèu haha ho lalau-lalo'o dhèu aa'i-aa'i ra. Dhu neo j'aj'i kètu, hud'i ladhe-leru ku sama sèmi ana pua-paleha.^e 27 Miu pangee sèku, dhèu kapai sèra nuka mia? Dhèu dhu madhèdi ètu mei, do, dhu lalau mei? Tatu dhèu dhu madhèdi ne, dhèu kapai, si? Te ngaa Ja'a ne, tao boe ngi'u sèmi sèra. Ja'a mai lalau-lalo'o miu.^f

28 Miu se'e ka dhu bera-bera dènge Ja'a, lod'o Ja'a paraga dènge j'aj'èra. 29 Ama Ku ded'e le Ja'a, sèna ka kèd'u paredha ètu era paredha Na. Ka limuri ne, Ja'a ded'e miu kahèi, 30 ho miu bèli-camèd'a madhèdi mi'a dènge Ja'a ca mei ètu sorga. Ja'a hia koasa kahèi, sèna ka miu paredha canguru dua suku dhèu Isra'el.”^g

31 Ka Yesus lii dènge Petrus, peka na, “Petrus. Dhèu aae nidhu neo hia miu pacèri nèti Ja'a, nuka sèmi dhèu tatai ho hag'e eele èto nèti laludhu.^h 32 Te ngaa Ja'a sabaj'a hia èu, Petrus, ho èu lèka Ja'a taruu. Ladhe èu lèpa hari mai asa Ja'a, na, èu hud'i pa'èra ku d'ara a'ari èu, nuka dhèu unu Lamatua sèra.”

33 Hèia Petrus b'ala, aku nèngu na, “Aad'o, Ama! Masi ka tasamia èèna ka, ja'a bisa boe tèke eele Ama. Te ja'a pa'èra maso bui sama-sama dènge Ama. Masi ka ja'a madhe palere-lere dènge Ama, ngaa-ngaa tao boe.”

34 Te ngaa Yesus peka na, “Petrus! Nanene paie. Mèda ne'e kahèi, manu dhae kokotoo mèka, èu pasili le tèlu hari, na, èu tadhe boe Ja'a.”

35 Èle èèna ka, Yesus padhai lii dènge ra, aku Nèngu na, “Ca hari na, Ja'a pua miu lami lole Lii Lolo Be'a Ja'a asa mia-mia, Ja'a peka dènge miu, ho baku mèti doi, tas, dènge salapa. Lod'o èèna, miu kura ngaa?”

Ka aa'i-aa'i ra dhaa, aku rèngu na, “Ca hari na, ji'i kura boe ngaa-ngaa èci sa!”ⁱ

36 Hèia Yesus peka tabha hari, na, “Te ngaa limuri ne, leo. Ladhe miu dènge doi, na todhe mèti. Ladhe dènge tas, na mèti kahèi. Ladhe dènge boe samala, pahia kodho miu, sèna ka hèli. 37 Te dhèu Yahudi pangee na, Ja'a ne dhèu bhelu. Hèia nèbhu heka, rèngu mai kèpe Ja'a. J'ara ne, nuka sèmi dhu baki Yesaya suri tèke le:

38 Ka ra peka na, “Ama! Ji'i ngèti hela dua.”

Hèia Yesus peka, “D'ai le. Ale ia ka sèra!”

39 Ra'a rare Paska, ka Yesus dènge ana madhutu Na lasi asa ledhe Saitun, sèmi biasa. 40 D'ai nèi, Yesus peka dènge si, “Miu hud'i sabaj'a ku, ho baku lèke dadugu-rariu.”

41 Hèia Na tèke eele si, la'e kaj'èu boe. Ka Na patitu kètu urutuu Na, ho sabaj'a, peka na, 42 “Ama! Ladhe Ama d'èi na, pakaj'èu ku j'aj'èra ne nèti Ja'a. Te ngaa mage madhutu dad'èi Ja'a; hud'i laa madhutu dhoka dad'èi Ama di.” 43 [Ka ana pajuu Ama Lamatua èci mai nèti sorga pa'èra d'ara Na. 44 Lula d'ara Na j'èra titu kèna, toke èi kabhèsu Na suti sèmi raa sa.]^k

45 Ropa sabaj'a nare, Na kèd'i la'e paraga dènge ana madhutu Na. Te ngaa rèngu dhu bhèj'i, lula ngi'u roe aa d'ara susa. 46 Hèia Yesus lii dènge ra, “Tasamia ka miu se bhèj'i? Be'a risi miu sabaj'a, ho ladhe paraga dènge dadugu-rariu, miu baku manahu.”

47 Ropa Yesus padhai lii era, Yudas (ca dhèu nèti canguru dua ana madhutu Na), mai dènge dhèu ae-ae. Na mai padètu-dètu dènge Yesus, neo kèpe ho uu Ne. 48 Te ngaa Yesus lii dènge ne, peka na, “Yudas! Èu neo pahie eele Dhèu Rai-haha Tare'a-re'a dènge a'uu, do?”

49 Ropa ana madhutu leo sèra re'a tatao bhelu nèti Yudas ne, ka ra karèi Yesus, peka na, “Ama! Ji'i lab'a si, do? Te ji'i dhu ngèti hela.” 50 Ka ca dhèu nèti rèngu se, bete hela na, ka na pare pama'ète rèu dhilu g'ana nèti dhèu èci. Dhèu ne, ènu nèti kètu kapai risi agama Yahudi.

51 Te ngaa Yesus dhaa si, peka na, “Sange èèna ka! Baku lab'a si.” Hèia Na g'ag'e dhilu dhèu ne, ka pa'èle.

52 Dhèu-dhèu dhu mai kèpe Yesus, nuka: kètu agama Yahudi sèra, dhèu heka d'ara rae, kètu nèti dhèu madhenga Èmu Kapua Manèngi-Mangaj'i, dènge dhèu leo hari kahèi. Yesus karèi si, “Tasamia? Miu se ngee, na, Ja'a ne dhèu bhelu, ka mai kèpe Ja'a mèti samala dènge aj'u cèki, do? 53 Bèli-bèli èèna, Ja'a aj'a miu ètu Èmu Kapua Manèngi-Mangaj'i, te ngaa abhu boe ca dhèu sa dhu mai kèpe Ja'a. De hud'i laa! Ne'e d'ai lod'o miu. Ne'e ne mai nèti koasa dhèu aae nidhu!”^l

54 Hèia ra kèpe rare Lamatua Yesus, ka nuni rèti Ne asa èmu kètu kapai risi agama Yahudi. Petrus kako mau-mau re kabodho. 55 Ètu madha èmu ne, dhèu tao ai raci. Hèia Petrus la'e manyiru ai kahèi. 56 Ka bhèni sab'a ca dhèu ladhe nèdhi Petrus dhu manyiru ai. Na ladhe patae rèhu Petrus, ka peka dènge dhèu leo ètu sèra, aku nèngu na, “Dhèu ne'e ne dhu madhutu Yesus kahèi!”

57 Te ngaa Petrus pasili, ka na peka, “Aad'o! Ja'a tadhe boe Dhèu ne. Èu me'a ngaa?”

58 Nèbhu boe ka, ca dhèu ladhe sa Petrus, èle ka na lii, aku nèngu na, “Tare'a. Èu ne, mema ca dhèu nèti dhèu Yesus sèra, si?”

Te ngaa Petrus pasili, ka na peka, “Aad'o! Èu peka leli na!”

59 Pe d'ai ca jam sa, ca dhèu leo hari, peka na, “Ja'a ke'a dhèu ne'e ne, ca dhèu nèti ana madhutu Yesus. Te nèngu ne, dhèu Galilea kahèi.”

60 Te ngaa Petrus pasili hari kahèi, aku nèngu na, “Èu monya èèna!” Ropa Petrus padhai lii sèmi èèna, kaca'a laa manu kokotoo.

61 Hèia Yesus kabib'a sa nèngu. Ka Petrus sanèd'e lii Yesus deo na, dhu peka na, “Mèda ne'e ne kahèi, manu dhae kokotoo mèka, te èu pasili le Ja'a tèlu hari kèna.” 62 Ngee nèdhi sèmi èèna, hèia Petrus kalua nèti madha èmu ne, dènge tangi dhu d'ara laho mae-mae.

63 Èle èèna ka, dhèu dhu j'aga Yesus, padhai lii pahaha Ne, dènge game pa'oke Ne. 64 Ra pahutu rèhu Na pake bèla, ka ra karèi Ne, aku rèngu na, “Wee! Ladhe èu ne dhèu mèti lii padhai Lamatua, na, èu peka sèku! Cee ka dhu j'ubhu èu?” 65 Èle ka, ra padhèd'a aape Ne.

66 Mad'ae aae era, kètu agama Yahudi, mese agama, dènge dhèu heka-dhèu heka ad'a Yahudi sèra, pakaboko le uri lii langu Yesus. Ka ra pua dhèu lasi nuni rèti Yesus asa era pama'ète lii langu agama. 67 Ropa Yesus maso, ka ra karèi Ne, “Èu peka ku laa! Èu ne, tare'a Kristus, do?”

Hèia Na b'ala, peka na, “Masi ka Ja'a dhaa na tare'a, miu se lèka boe. 68 Aa ladhe Ja'a bari miu ca madha j'ara, tatu miu dhaa boe. 69 Nèbhu heka Ama Lamatua pake koasa Na dhu kapai èèna, ded'e padedha-dedha Ja'a, Dhèu Rai-haha Tare'a-re'a ne. Ho èèna na, Ja'a madhèdi ètu baboa g'ana Na, sèna ka paredha sama-sama dènge Ne.”^m

70 Ropa ra tadèngi sèmi èèna, ka aa'i-aa'i ra karèi, peka na, “Ladhe sèmi èèna, Èu ngee, na, Èu ne Ana Ama Lamatua, do?”

Ka Yesus dhaa, aku Nèngu na, “Mema tare'a, sèmi dhu miu peka na.”

71 Hèia dhèu dhu uri lii langu se, aa'i-aa'i peka, na, “Èdhi aa'i-aa'i ti tadèngi le, si? Na ded'e iisi Na, j'aj'i Ana Ama Lamatua. Ne'e ne lii pahahe kolongara Ama Lamatua! Madhutu atora agama èdhi, ladhe dhèu tao iisi ra nuka sèmi Lamatua, dhèu ne hud'i madhe ku. De tasamia? Èdhi parluu heka sakasii. Huku pamadhe Ne!”