Lamatua' Yesus se risi' Yerusalem noo atahori hetar koa-kio E 'ona' atahori monaen
11
Lele' ara deka roo kota Yerusalem ena, ara losa sia kambo' rua, naran Betfage noo Betania, sia lete' Saitun suu na.a Mia naa, Yesus se hahae ao na ra. De Ana haitua mana tunggan rua reu ra'ahulu'.
Markus 11:1-14
2 Ana helu nae, “Ru'a nggi mi'ihulu' misi' kambo' naa. Mete ma hei losa, na, mita keled'ei ana' esa, mana pa'a' sia naa. Atahori nda fe'e sae rita e sa. Mii sefi hendi talin fo lea mendi e nema. 3 Te mete ma hambu atahori ratane nggi rae, ‘Saa de hei sefi mendi keled'ei naa?’ na, musi mitaa mae, ‘Hai Lamatuam nae pake. Mete ma pake basa, na, Ana haitua bali' e nema.’”
4 Basa ma, atahori karua' ra reu, de rita keled'ei ana' nenepa'a' sia ume esa mata' sia dala' a bife na. Ara sefi rendi e. 5 Te atahori mana rii-rii sia naa ra, ratane rae, “Woe! Saa de hei sefi mendi atahori keled'ei na?”
6 Basa ma rataa rae, “Hai Lamatuam nae pake e. Mete ma Ana pake basa ena, na, hai mendi bali' e.” Boe ma atahori naa ra hela se nore rendi keled'ei a. 7 Ara nore rendi nisi' Yesus. Basa de, ara laka lafe na ra neu keled'ei ata, de Yesus sae.
8 Lele' ara rae maso' kota rala reu, ma atahori hetar ha'i rala lafe na ra, de bela neu dala'. Hambu ruma reu tati hau palam roo'b mia dala' bifen, de bela neu dala' talad'a na. Noo ta'o naa, ara tao tatanda' rae sira simbo Lamatua' Yesus noo had'a-hormat. 'Ona' sira biasa simbo atahori monae na ra boe. 9 Boe ma atahori ruma lao ra'ahulu' sia Yesus matan, ma ruma ra'ab'uit. De ara mulai eki-randu rae,
“Hosana! Hita koa-kio Lamatualain!c
Lamatualain na'onda' papala-bab'anggi' fee atahori mana nema nendi Lamatualain naran,
huu Lamatualain mana denu E!d
10 Hosana! Hita koa-kio Lamatualain!
Huu Lamatualain nae nafefela bali' Mane Daud parenda na!
Hosana! Hita koa-kio Lamatualain!
Huu Lamatualain 'endo' parenda sia lalai a ata-ata' ena!”
11 Yesus se losa kota rala ma, ara reu risi' Lamatualain Ume Hule-o'e Huun nembeleo na. Ma Yesus mete na'ab'eb'esa ndule basa mamana' naa. Huu fai nese ena, de ara lao bali' risi' kambo Betania.
Lamatua' Yesus parenda hau huu' esa fo nda bisa nab'oa sa ena
12 Mbila fefetu anan, ara lao hela Betania de bali' risi' kota Yerusalem reu. Te mia dala' talad'an, Yesus named'a ndoe. 13 Ana nita hau huu' esa sia dala' bife na. Atahori biasa raa boa na.e De Yesus neu deka-d'eka hau naa huun, nae mete sob'a maboa', do hoko'. Losa hau huu' naa, te Ana nda nita boa' esa sa boe. Huu mema' nda fai nab'oan sa. Ana fe'e nae naroo ena. 14 Boe ma Yesus 'ola' mbali hau huu' naa nae, “Huu nda muboa fee Au sa, de mia fai' ia, ho nda bisa muboa fee atahori laen sa!”
Mana tungga na ra rena Ana 'ola' nahere' ta'o naa.
Lamatua' Yesus maso' nisi' Ume Hule-o'e Huu' a, ma ofe hendi pasar mia naa
15 Basa ma ara lao rakandoo, losa Yerusalem, ma Yesus neu selu' nisi' Lamatualain Ume Hule-o'e Huu na. Sia Ume Hule-o'e' naa nembeleon, atahori tao dad'i pasar, fo raseo' mbui lunda fo atahori tao neu tutunu-hohotu'. Yesus nita ara tao ta'o naa, ma neu 'oi hendi se. Ana timba lenggu-b'ab'ara hendi mei fo ara pake tukar neu doi', ma timba hendi banggu fo ara pake raseo' neu mbui' ra.
Markus 11:15-33
16 Ana o na'anggee basa atahori fo nda bole ha'i rendi sud'i 'a saa na ra fo lao nggero tungga nembeleo' naa sa. 17 Boe ma Ana nanori se nae, “Hei mihine saa fo Lamatualain mana 'ola-'ola na ra sura' hela rae, ‘Au 'ufefela Ume ngga ia, fo atahori mia basa nusa' ra rema hule-o'e sia ia.’ Te hei tao mala Ume ia dad'i neu na'o ra mamana ne'eb'ub'ue na!”f
18 Lele' malangga agama Yahud'i ra malangga na ra roo meser agama ra rena Yesus tao ta'o naa ena, ma ara ramanasa E. De ara mulai sangga dala' fo rae tao risa E. Te ara o hia E boe, huu atahori hetar hii rena nenori na.
19 Lele' relo a nae mopo ma, Yesus se lao hela kota Yerusalem, de bali' reu sunggu' sia kambo Betania.
Mete ma hita tamahere teb'e-teb'e neu Lamatualain, na, Ana fee saa fo hita to'e' a
20-21 Mbila fefetu anan ma, Yesus se bali' risi' Yerusalem. Sia dala' talad'an, ara tungga bali' hau afis a Yesus 'ola' 'oi sud'i' boe nab'oa. Mana tungga na ra kakaler, huu hau naa mate meto losa 'oka na. Boe ma Petrus nasaned'a Yesus 'o'olan afis a. Nafad'e nae, “Papa! Mete dei! Hau fo afis a Papa ndoondoon a, mate ena!”
22 Yesus nataa nae, “Mema' teb'e! Sad'i mimihere Lamatualain ta'o naa boe. 23 Mete ma mimihere teb'e-teb'e', na, ama bisa denu lete' esa lali tasi' rala neu. Boe ma Lamatualain fee lete' naa lali, sad'i 'afi' mimihere noo rala mana banggi-b'anggi'! Hei musi mimihere teb'e-teb'e' neu Lamatualain.g 24 'Afi' lilii'! Sad'i mimihere teb'e-teb'e' mae Lamatualain bisa fee saa fo mo'e' a, na, Ana fee nggi! 25 Mete ma ama hule-o'e, te rala ma ra nda malole noo atahori laen sa, na, ama musi mii malolole moo atahori naa dei. Ama musi tao ta'o naa dei, fo Papam sia sorga nau 'ose hendi sala-singgo ma ra. 26 [Mete ma hei esa mimbed'a rala', ma nda nau fee ambon neu atahori sa, na, tantu hei Papam sia sorga boe o nda nau lilii' hendi sala-singgo ma ra sa boe.”]h i
Ara ratane Lamatua' Yesus hak na
27 Basa ma, ara lao rakandoo. Losa Yerusalem, ara maso' bali' risi' Lamatualain Ume Hule-o'e Huu na. Lele' ara maso' losa nembeleon, ma malangga agama Yahud'i ra malangga na ra roo meser agama ra rema, 28 de ratane Yesus rae, “See denu nggo 'uma mumue sia ia afis a? See fee nggo hak!?”
29 Te Yesus nahine ara sangga dala' fo rae ra'atutud'a E. De Ana nataa nae, “Au o 'ae 'utane nggi boe. Ama mitaa Au dei, fo Au fe'e 'utaa nggi ena. 30 Au 'ae 'utane ta'o ia: basa nggi mihine Yohanis mana sarani' naa, do? Seka denu e sarani atahori? Lamatualain, do atahori?”
31 Basa ma ara dud'u'a neu-nema, ma sangga dala' rae, “Awii! Dai nggita ena! Mete ma ata tataa tae, ‘Lamatualain mana denu’, na, Ana nataa nae, ‘Mete ma ta'o naa, saa de nda mimihere Yohanis sa!’ 32 Te ata o nda bisa tae, ‘atahori mana denu’ sa. Te hoko', na, basa atahori ra ramue. Huu ramahere rae Yohanis naa, Lamatualain mana 'ola-'ola na.”
33 Basa ma rataa rae, “Hai nda mihine sa!”
Boe ma Yesus nataa bali' nae, “Mete ma ta'o naa, na, Au o nda nau 'ufad'e see mana denu Au sa boe.”